5 Mose 3 - ŊMALƐ KRƆŊKRƆŊ LƐ

Israel ye Maŋtsɛ Og nɔ kunim

¹ “Agbɛnɛ wɔdɔ wɔyi, ni wɔyi Bashan shikpɔŋ lɛ nɔ gbɛ. Bashan Maŋtsɛ Og kɛ etabilɔi fɛɛ fã kɛba koni amɛ kɛ wɔ abawu yɛ Edrei maŋ lɛ masɛi.

² Shi Yehowa kɛɛ mi akɛ, ‘Nyɛkashea Og gbeyei, ejaakɛ mijɔɔ lɛ kɛ etabilɔi lɛ kɛ eshikpɔŋ lɛ fɛɛ nɔ mihã nyɛ koni nyɛfee amɛ tamɔ nyɛfee Sihon, Amorbii amaŋtsɛ lɛ ni hi Heshbon lɛ.’

³ “No hewɔ lɛ, Yehowa, wɔNyɔŋmɔ lɛ, hã wɔye Bashan Maŋtsɛ Og hu kɛ etabilɔi lɛ fɛɛ anɔ kunim, ni wɔgbe amɛ kɛyashi eshwɛɛɛ gbɔmɔ hiɛkãalɔ kome nɛkɛ.

⁴ Wɔshɔ̃ Bashan shikpɔŋ lɛ nɔ maji fɛɛ ni yɔɔ Og shishi, maŋ ko maŋ ko bɛ ni wɔshɔ̃ɔɔ. Wɔshɔ̃ maji nyɔŋmai ekpaa lɛ ni feɔ Argob kpokpai tso muu fɛɛ ni yɔɔ Bashan Maŋtsɛ Og shishi lɛ.

⁵ Nɛkɛ maji nɛɛ fɛɛ lɛ, atswatswaa gbogboi ni kwɔlɔ awowoo amɛhe akɛwaje amɛ, ni agboi kɛ amɛsɛɛ adabaŋi tara amɛnaa. Wɔshɔ̃ maji babaoo diɛŋtsɛ ni gbogboi bɛ amɛhe hu.

⁶ Bɔ ni wɔkɛ Heshbon Maŋtsɛ Sihon ye lɛ, nakai pɛpɛɛpɛ wɔkpãtã maŋ fɛɛ maŋ kɛ emli hii kɛ yei kɛ gbekɛbii fɛɛ ahiɛ yɛ Bashan shikpɔŋ lɛ nɔ.

⁷ Wɔmɔmɔ kooloi fɛɛ, ni wɔha maŋbii lɛ anibii wɔhã wɔhe.

⁸ “Belɛ wɔshɔ̃ nakai be lɛ mli shikpɔji ni yɔɔ Amorbii amaŋtsɛmɛi enyɔ nɛɛ ashishi, yɛ Yordan Faa lɛ bokãgbɛ lɛ, yɛ amɛdɛŋ. Wɔshɔ̃ kɛjɛ Arnon Faa lɛ naa aahu kɛyashi Hermon Gɔŋ lɛ he.

⁹ (Hermon Gɔŋ nɛɛ lɛ, Sidonbii lɛ tsɛɔ lɛ Sirion, ni Amorbii lɛ tsɛɔ lɛ Senir.)

¹⁰ Wɔshɔ̃ Bashan Maŋtsɛ Og nɔyelihei lɛ fɛɛ: maji fɛɛ ni jwere gɔji ayiteŋ shikpɔŋ kplanaa lɛ nɔ lɛ, kɛ nii ni yɔɔ Gilead shikpɔŋ lɛ fɛɛ nɔ, kɛ Bashan shikpɔŋ lɛ kɛtee bokãgbɛ aahu kɛyanina maji ni ji Salka kɛ Edrei lɛ.”

¹¹ (Bashan Maŋtsɛ Og nɛɛ, lɛ ji Refaimbii ashwiei lɛ ateŋ naagbeemɔ ni eshwɛ. Esaatso lɛ dade saatso ni, ni ekɛlɛ ji ninetalɔi nɛɛhu kɛ elɛɛmɔ hu ninetalɔi ejwɛ. Dade saatso nɛɛ yɛ Amonbii amaŋ ni ji Raba kɛbashi ŋmɛnɛ.)

Akutsei ni to shi yɛ Yordan bokãgbɛ lɛ

¹² “Be ni wɔŋɔ nɛkɛ shikpɔŋ nɛɛ sɛɛ lɛ, mikɛ shikpɔŋ ni kã Aroer maŋ lɛ ni yɔɔ Arnon Faa lɛ naa lɛ kooyigbɛ lɛ, kɛ Gilead gɔji ayiteŋ shikpɔŋ lɛ fã hu, kɛ maji fɛɛ ni yɔɔ amɛnɔ lɛ, hã Rubenbii akutso lɛ kɛ Gadbii lɛ akutso lɛ.

¹³ Ni mikɛ Gilead shikpɔŋ lɛ fã ni shwɛ lɛ kɛ Bashan fɛɛ, he ni Og ye elumɔ yɛ lɛ, ni ji Argob shikpɔŋ tso muu lɛ fɛɛ, hã Manasebii akutso lɛ fã kome.” (Atsɛɔ Bashan akɛ Refaim shikpɔŋ.

¹⁴ Manasenyo ko ni gbɛi ji Yair lɛ ŋɔ Argob, shikpɔŋ ni ji Bashan, fɛɛ kɛyashi Geshurbii kɛ Maakatbii ahusui lɛ anaa, ni ekɛ lɛ diɛŋtsɛ egbɛi wo Bashan akrowai lɛ, ni gbɛi Yair akrowai lɛ ka kɛbashi ŋmɛnɛ.)

¹⁵ “Mikɛ Gilead shikpɔŋ lɛ hã Makir shwiei ni yɔɔ Manasebii lɛ ateŋ lɛ.

¹⁶ Rubenbii lɛ kɛ Gadbii lɛ akutsei lɛ mikɛ shikpɔŋ lɛ ni kã kɛjɛ Gilead kɛyashi Arnon Faa lɛ naa lɛ hã amɛ. Faa lɛ teŋ ji amɛhusu yɛ wuoyigbɛ, ni amɛkooyigbɛ husu yafee Yabok Faa lɛ, ni faa nɛɛ fã ko fee Amonbii ahusu.

¹⁷ Yɛ anaigbɛ lɛ amɛshikpɔŋ lɛ yamɔɔ Yordan Faa lɛ; ejɛɔ Galilea Kpaakpo lɛ he yɛ kooyigbɛ kɛhoɔ kɛyamɔɔ Ŋoo Ŋshɔ lɛ yɛ wuoyigbɛ, kɛtseɔ mli kɛyaa Pisga Gɔŋ lɛ shishi yɛ bokãgbɛ.

¹⁸ “Mikɛɛ nyɛ nakai be lɛ mli akɛ, ‘Yehowa, nyɛNyɔŋmɔ lɛ, kɛ nɛkɛ Yordan bokãgbɛ shikpɔŋ nɛɛ ehã nyɛ akɛ nyɛnɔ. Nyɛteŋ tabilɔi lɛ fɛɛ amia koni nyɛnyiɛ nyɛnyɛmimɛi Israelbii lɛ ahiɛ.

¹⁹ Nyɛŋamɛi lɛ kɛ nyɛbii lɛ kɛ nyɛkooloi lɛ baahi shi yɛ maji ni mikɛhã nyɛ lɛ amli (ejaakɛ mile akɛ nyɛyɛ kooloi babaoo).

²⁰ Nyɛ kɛ nyɛnyɛmimɛi lɛ baaya kɛyaashi beyinɔ ni Yehowa aaahã nyɛnyɛmimɛi lɛ aaajɔɔ amɛhe tamɔ nyɛ nɔŋŋ, ni amɛ hu amɛnine aaashɛ shikpɔŋ ni Yehowa, nyɛNyɔŋmɔ lɛ, kɛhãa amɛ yɛ Yordan Faa lɛ anaigbɛ lɛ nɔ. No sɛɛ dani nyɛteŋ mɔ fɛɛ mɔ baanyɛ eku esɛɛ kɛba egbɛfaŋnɔ ni mikɛhã lɛ lɛ nɔ.’

²¹ “Ni Yoshua hu, mikɛɛ lɛ nakai be lɛ mli akɛ, ‘Ona kɛ ohiŋmɛitsei enyɔ, nɔ ni Yehowa, nyɛNyɔŋmɔ lɛ, efee nɛkɛ maŋtsɛmɛi enyɔ nɛɛ lɛ. Nakai nɔŋŋ ebaafee maŋtsɛmɛi fɛɛ ni nyɛbaaya nyɛyanina amɛshikpɔji lɛ.

²² Nyɛkashea amɛ gbeyei, ejaakɛ Yehowa, nyɛNyɔŋmɔ lɛ, ji mɔ ni wuɔ ta lɛ hãa nyɛ.’

Ahãaa Mose ayashɛ Kanaan

²³ “Mikpa Yehowa fai nakai be lɛ mli akɛ,

²⁴ ‘Nuŋtsɔ Yehowa, ogbojee kɛ ohewalɛ lɛ eshishi kɛkɛ oje ojieɔ otsɔ̃ɔ otsulɔ nɛɛ; ejaakɛ mɛɛ Nyɔŋmɔ yɔɔ dɔŋŋ, yɛ ŋwɛi jio, shikpɔŋ lɛ nɔ jio, ni aaanyɛ hewalɛ naa nibii wuji ni otsu nɛɛ etsu?

²⁵ Ofainɛ, hã mi hu mafo mli kɛya mayana shikpɔŋ kpakpa ni baa nii ni yɔɔ Yordan anaigbɛ lɛ, nakai gɔji ashikpɔŋ kpakpa lɛ kɛ Lebanon hu.’

²⁶ “Nyɛhewɔ lɛ Yehowa mli fu mi, ni no hewɔ lɛ, ebooo mi toi. Shi moŋ ekɛɛ mi akɛ, ‘Efa; okɛ mi akawie nɛkɛ sane nɛɛ he dɔŋŋ.

²⁷ Kwɔɔ Pisga Gɔŋ lɛ kɛya eyiteŋ, koni owo ohiɛ nɔ okwɛ anaigbɛ kɛ kooyigbɛ kɛ wuoyigbɛ kɛ bokãgbɛ, ni obaana shikpɔŋ lɛ, ejaakɛ ofoŋ nɛkɛ Yordan Faa nɛɛ.

²⁸ Wo Yoshua kitã; ni owo lɛ ekãa kɛ hewalɛ fɛɛ ejaakɛ lɛ ebaanyiɛ maŋbii lɛ ahiɛ kɛya kɛyaŋɔ shikpɔŋ lɛ ni obaana lɛ.’

²⁹ “No hewɔ lɛ, wɔhi shi yɛ jɔɔ lɛ mli yɛ Betpeor maŋ lɛ ŋlɛnɔ.”