5 Mose 28 - ŊMALƐ KRƆŊKRƆŊ LƐ

Toiboo he Jɔɔmɔi

¹ “Kɛji ooobo Yehowa, oNyɔŋmɔ lɛ, toi, ni ooojwɛŋ nɔ, ni oooye kitãi fɛɛ ni miwoɔ bo ŋmɛnɛ nɛɛ nɔ pɛpɛɛpɛ lɛ, no lɛ Yehowa, oNyɔŋmɔ lɛ, baawo onɔ gojoo fe shikpɔŋ lɛ nɔ maji fɛɛ.

² Obaana Yehowa, oNyɔŋmɔ lɛ, dɛŋ jɔɔmɔi nɛɛ fɛɛ, ni jɔɔmɔi nɛɛ aaanina bo yɛ he fɛɛ he kɛji ooobo Yehowa, oNyɔŋmɔ lɛ, gbee toi.

³ “Aaajɔɔ bo yɛ maŋ, ni aaajɔɔ bo yɛ ŋmɔshi hu.

⁴ “Aaajɔɔ omusuŋ bii kɛ oŋmɔshi nibaanii kɛ oshĩaŋ kooloi abii kɛ otoi kɛ otsinai abii fɛɛ.

⁵ “Aaajɔɔ okɛntɛŋ ni okɛyakpaa nii lɛ kɛ otsese hu.

⁶ “Aaajɔɔ oyaa kɛ obaa mli fɛɛ.

⁷ “Yehowa aaahã oplene ohenyɛlɔi ni aaabatua bo. Amɛaanyiɛ gbɛ kome nɔ kɛaabatua bo, shi amɛaatsɔ̃ gbɛi kpawo nɔ amɛaajo foi kɛaaje ohiɛ.

⁸ “Yehowa aaajɔɔ onitsumɔ, ni eeehã oboŋoi ayimɔ obɔ̃bɔ̃, ni nɔ fɛɛ nɔ ni okɛ onine taa he aaashwere; ni eeejɔɔ bo yɛ shikpɔŋ ni Yehowa, oNyɔŋmɔ lɛ kɛhãa bo lɛ nɔ.

⁹ “Yehowa aaaŋɔ bo, Israel, akɛ lɛ diɛŋtsɛ emaŋ krɔŋkrɔŋ tamɔ bɔ ni ekã bo kitã lɛ, kɛji oye Yehowa, oNyɔŋmɔ lɛ, kitãi lɛ anɔ, ni oba ojeŋ bɔ ni etaoɔ lɛ.

¹⁰ No lɛ shikpɔŋ lɛ nɔ maji lɛ fɛɛ aaana akɛ Yehowa kɛ egbɛi ewo bo akɛ lɛ diɛŋtsɛ emaŋ, ni amɛbaashe bo gbeyei.

¹¹ Yehowa baahã oshwere babaoo. Omusuŋ bii kɛ okooloi abii kɛ oŋmɔshi nibaanii fɛɛ aaashwere yɛ shikpɔŋ lɛ ni ewo otsɛmɛi lɛ he shi akɛ ekɛbaahã bo lɛ nɔ.

¹² Yehowa aaagbele eŋwɛi niikpakpai anaa ehã bo; eeehã nu anɛ oshikpɔŋ lɛ nɔ yɛ be ni sa mli; eeejɔɔ onine naa nitsumɔi fɛɛ nɔ; ooona nii, ni ooofala maji pii nii, shi bo lɛ ofaŋ nɔ ko nɔ ko yɛ maŋ ko dɛŋ.

^13-14 Kɛji oooye Yehowa, oNyɔŋmɔ lɛ, kitãi lɛ, ni ji kitãi ni miwoɔ bo ŋmɛnɛ gbi nɛɛ nɔ, ni oookwɛ ni oooye nɔ pɛpɛɛpɛ, asaŋ kɛji okplaŋ kɛjeŋ kitã ni miwoɔ bo ŋmɛnɛ gbi nɛɛ nɔ lɛ ateŋ eko he, ni ogbaŋ ninejurɔ loo abɛku, ni oyanyiɛŋ nyɔŋmɔi krokomɛi asɛɛ, ni oyajaŋ amɛ lɛ, Yehowa aaafee bo yitso, shi jeee lei; onɔ sɔŋŋ ebaawo, ni ebaŋ bo shi kɔkɔɔkɔ.

Toigbele yibii

¹⁵ “Shi kɛji aaaba mli akɛ obooo Yehowa toi ni ojwɛŋŋ nɔ ni oye ekitãi kɛ ekpɔi fɛɛ ni miwoɔ bo ŋmɛnɛ gbi nɛɛ nɔ lɛ, no lɛ nɛkɛ loomɔi nɛɛ miimɛ bo:

¹⁶ “Aaalomɔ bo yɛ maŋ, ni aaalomɔ bo yɛ ŋmɔshi hu.

¹⁷ “Aaalomɔ okɛntɛŋ kɛ otsese hu.

¹⁸ “Aaalomɔ omusuŋ bii kɛ oŋmɔshi nibaanii kɛ otsinai abii kɛ otoi abii.

¹⁹ “Aaalomɔ bo yɛ oyaa mli, ni aaalomɔ bo yɛ obaa mli hu.

²⁰ “Yehowa aaalomɔ bo, ni eeehã ojijaa, ni onijiaŋ aaaje wui yɛ nɔ fɛɛ nɔ ni ooofee mli kɛyaashi beyinɔ ni aaafite bo, ni ohiɛ aaakpãtã oya mli yɛ nibii fɔ̃ji ni ofee lɛ hewɔ, ejaakɛ okwa Yehowa.

²¹ Yehowa aaahã oye gbele hela kɛyaashi beyinɔ ni eeekpãtã ohiɛ yɛ shikpɔŋ ni oyaa koni oyaŋɔ okɛfee onɔ lɛ nɔ.

²² Yehowa aaahã oye wɔlɔmɔ fɔŋ kɛ atridii kɛ fuumɔ hela; ebaahã jeŋ adɔ waa, ni nu enɛŋ, ni kɔɔyɔɔ ni mli edɔ tamɔ la aaatswa, ni nibii aaaŋala. Nibii nɛɛ aaanyiɛ osɛɛ kɛyaashi beyinɔ ni ohiɛ aaakpãtã.

²³ Ŋwɛi ni yɔɔ oyiteŋ nɛɛ aaatsɔ̃ tamɔ akɔɔble, ni shikpɔŋ aaatsɔ̃ tamɔ dade.

²⁴ Yehowa aaahã shia kɛ mlu atsɔ̃ onu ni aaanɛ ahã bo; amɛaajɛ ŋwɛi amɛbayi bo yɛ oshikpɔŋ lɛ nɔ kɛyaashi beyinɔ ni ohiɛ aaakpãtã.

²⁵ “Yehowa aaahã henyɛlɔi aye onɔ. Ooonyiɛ gbɛ kome nɔ kɛyatua amɛ; shi gbɛi kpawo nɔ oootsɔ̃ ojo foi kɛje amɛhiɛ. Osane lɛ baahã shikpɔŋ lɛ nɔ nɔyelihei fɛɛ atsui afã.

²⁶ Ogbonyo aaatsɔ̃ niyenii ahã ŋwɛi loofɔji kɛ ŋaŋ kooloi, ni onaŋ mɔ ko po ashwie amɛ kɛje ohe.

²⁷ Yehowa aaahã asanei ni ye Ijiptbii lɛ eko kɛ fala kɛ abuasha kɛ kpla ni ehiii tsamɔ aye bo.

²⁸ Yehowa aaahã oye sɛkɛ, ni oooshwila, ni oyiŋ baakã bo.

²⁹ Ooogbugbuu shi shwane fintiŋŋ tamɔ shwilafo ni yɔɔ duŋ mli be fɛɛ be. Obaatsɔ ogbutsɛ, ni onɔ ko nɔ ko kwraa shwereŋ, ni aaahi bo nyɔŋyeli kɛ ojotswaa sɔŋŋ kɛkɛ daa nɛɛ, ni onaŋ mɔ ko mɔ ko ni aaahere bo.

³⁰ “Oootsɛ yoo he baa, shi nuu kroko moŋ ni kɛ lɛ aaawɔ; oooma tsu, shi owɔŋ mli; ni ooofee waintrom, shi oyeŋ emli yibii.

³¹ Ookwɛ nɛkɛ nɔŋŋ ni aaamɔ otsina agbe, shi onaŋ eloo lɛ eko oye, ni ookwɛ nɛkɛ nɔŋŋ ni aaamɔ oteji akranaŋ naa kɛya, ni akpaleŋ lɛ abahaŋ bo dɔŋŋ. Abaahã ohenyɛlɔi abamɔmɔ otoi kɛya, ni onaŋ mɔ ko abahere bo.

³² Abaaŋɔ obihii kɛ obiyei akɛ nomii ahã mɛi kpɔ̃ji be mli ni oona kɛ ohiŋmɛi nɔŋŋ, ni obaakwɛ amɛsɛɛkuu gbɛ kɛ tɔlɛ daa gbi; shi onyɛŋ he nɔ ko ofee.

³³ Maŋsɛɛ maŋ ko ni oleee kwrakwra aaaba ebaloo oŋmɔshi nibaanii kɛ nii ni otsu oto fɛɛ kɛya eyaye. Yi sɔŋŋ kɛkɛ aaawa bo, ni shi sɔŋŋ kɛkɛ aaashwishwia bo daa nɛɛ,

³⁴ ni ohiɛnaanɔ nii ni ooona lɛ aaaye bo sɛkɛ.

³⁵ Yehowa aaahã asanei ni anaa jaraa ni ehiii tsamɔ atsɛ̃rɛ onakutsei anaa kɛ oshuɔji ahe; ebaatsɛ̃rɛ kɛjɛ oyiteŋ aahu kɛyashi onaneshi.

³⁶ “Yehowa aaakpala bo kɛ omaŋtsɛ ni oto ohã ohe lɛ fɛɛ kɛaatee maŋsɛɛ maŋ ko ni bo loo otsɛmɛi leee mli; jɛi oooyaja nyɔŋmɔi krokomɛi ni akɛ tso kɛ tɛ fee yɛ.

³⁷ Oootsɔ̃ gbeyei nɔ kɛ naakpɛɛ nɔ ni akɛbaabu abɛ yɛ maji amli he ni Yehowa kɛ bo aaatee lɛ.

³⁸ “Okɛ dumɔ wui babaoo baaya oyadu yɛ ŋmɔ mli, shi nii fioo pɛ obaana okpa kɛba, ejaakɛ baalabii aaaye tsiimɔ.

³⁹ Ooofee waintromi, ni obaakura amɛ, shi onaŋ amɛmli wain lɛ eko onu lɛ, onaŋ amɛmli yibii lɛ eko hu oye, ejaakɛ gɔgɔmii aaaye.

⁴⁰ Obaahi mutsei yɛ okpokpai lɛ fɛɛ anɔ nɛ, shi onaŋ mutso mu okpa, ejaakɛ omutsei lɛ ayibii lɛ aaakpala be mli ni amɛsrako.

⁴¹ Ooofɔ bihii kɛ biyei nɛ, shi ohiŋ bi, ejaakɛ aaaŋɔ amɛ fɛɛ nom.

⁴² Otsei lɛ kɛ oŋmɔshi nibaanii lɛ baalabii aaaye fɛɛ.

⁴³ “Gbɔ ni kɛ bo yɔɔ lɛ agbojee aaakwɔ fe ogbojee, shi bo lɛ ogbojee lɛ aaaba shi daa.

⁴⁴ Lɛ lɛ ebaana nii efa bo, shi bo lɛ onaŋ nɔ ko ofa lɛ; eeetsɔ̃ yitso, ni bo lɛ oootsɔ̃ lei.

⁴⁵ “Naa, nɛkɛ loomɔi nɛɛ fɛɛ aaaba onɔ, ni amɛaanyiɛ osɛɛ, ni amɛaanina bo yɛ hei fɛɛ kɛyaashi beyinɔ ni ohiɛ aaakpãtã, ejaakɛ obooo Yehowa, oNyɔŋmɔ lɛ gbee toi, ni oyeee ekitãi ni ewo bo lɛ anɔ.

⁴⁶ Amɛaatsɔ̃ naakpɛɛ okadi amɛhã bo kɛ oshwiei kɛaatee naanɔ,

⁴⁷ “Ejaakɛ yɛ nii ni Yehowa jɔɔmɔ hã ona babaoo lɛ fɛɛ sɛɛ lɛ, okɛ miishɛɛ kɛ tsuijurɔ jaaa Yehowa, oNyɔŋmɔ lɛ.

⁴⁸ No hewɔ lɛ, okɛ hɔmɔ kɛ kumai kɛ yayai kɛ hiamɔ yɛ nibii fɛɛ mli aaasɔmɔ ohenyɛlɔi ni Yehowa baahã abatua bo lɛ. Henyɛlɔi nɛɛ kɛ dade apã aaawo okuɛ kɛyashi beyinɔ ni eeekpãtã ohiɛ.

⁴⁹ Yehowa kɛ maŋ ko aaajɛ shɔŋŋ diɛŋtsɛ, kɛaajɛ je lɛ naagbeehe, abatua bo trukaa, shwim tamɔ okropɔŋ filikiɔ, maŋ ko ni onuuu amɛwiemɔ,

⁵⁰ maŋ ni hiɛ yɔɔ kramakrama; amɛhiɛ eshwieee onukpa hiɛiaŋ lɛ, amɛnaaa gbekɛ mɔbɔ hu.

⁵¹ Amɛbaaye otsinai abii kɛ oŋmɔshi nibaanii kɛyaashi aaakpãtã ohiɛ; amɛshiŋ abele loo wain loo mu loo otsinabii loo otoobii lɛ eko amɛhaŋ bo kɛyaashi amɛaakpãtã ohiɛ.

⁵² Amɛaasa oyi amɛwo omaji lɛ fɛɛ amli kɛyashi omaji lɛ ahe gbogboi grɔŋŋi ni awaje, ni okɛ ohiɛ efɔ̃ nɔ lɛ, amɛaakumɔ ogbogboi lɛ amɛshwie shi yɛ shikpɔŋ lɛ fɛɛ ni Yehowa, oNyɔŋmɔ lɛ, kɛhãa bo lɛ nɔ.

⁵³ “Hiamɔ ni ohenyɛlɔi aaahã ahia bo, be mli ni asa oyi lɛ hewɔ lɛ oooye bo diɛŋtsɛ omusuŋbii, obihii kɛ obiyei, ni Yehowa, oNyɔŋmɔ lɛ, ehã bo lɛ aloo.

⁵⁴ Nakai be lɛ mli lɛ nyɛteŋ nuu ni he jɔ, asaŋ ni ekpaaa niiaŋ po musuŋ aaajoo yɛ enyɛmi kɛ eŋa ni eshwɛɛɛ ehe kwraa kɛ emusuŋbii ateŋ mɔ ni eshwɛ ehã lɛ tete nɔ,

⁵⁵ bɔ sɔŋŋ ni ehaŋ amɛteŋ mɔ ko mɔ ko abi lɛ loo ni eyeɔ lɛ eko, ejaakɛ oyi ni asa kɛ fimɔ ni ohenyɛlɔ ehã efi bo yɛ omaji fɛɛ amli hewɔ lɛ, obɛ nɔ ko nɔ ko dɔŋŋ.

⁵⁶ Nakai nɔŋŋ nyɛteŋ yoo ni he jɔ ni alɛ lɛ fɔfɔɔle, mɔ ni ekaŋ akɛ eeenyiɛ enane folo ejaakɛ eyɛ wɔrɔmii kɛ bɔdɔbii, musuŋ aaajoo yɛ ewu ni eshwɛɛɛ ehe kwraa kɛ emusuŋ binuu kɛ emusuŋ biyoo fɛɛ hu nɔ.

⁵⁷ Ebaaye lɛ diɛŋtsɛ ebi ni efɔ eŋmɔŋ sɛɛnii kɛ emusuŋ bii nigii, ejaakɛ nɔ fɛɛ nɔ he esɛ̃ yɛ omaji lɛ ayi ni ohenyɛlɔ esa kɛ fimɔ ni efi bo lɛ hewɔ.

⁵⁸ “Kɛji okwɛɛɛ ni ahi koni oye nɛkɛ mlai ni aŋma yɛ nɛkɛ wolo nɛɛ mli lɛ anɔ, ni oooshe Yehowa, oNyɔŋmɔ lɛ, gbɛi ni yɔɔ nyam kɛ gbeyei fɛɛ lɛ gbeyei lɛ,

⁵⁹ no lɛ Yehowa aaahã helai ni anaa wa abaye bo kɛ oshwiei, helai ni anaa wa, asaŋ ni amɛsɛɛ efooo.

⁶⁰ Eeehã helai lɛ ni osheɔ amɛ gbeyei, nɔ ni ona Ijiptbii ye eko lɛ aye bo; ni helai nɛɛ baaka ohe.

⁶¹ Hela fɛɛ hela kɛ haomɔ fɛɛ haomɔ hu ni atsĩko tã yɛ nɛkɛ Mla Wolo nɛɛ mli lɛ, Yehowa aaahã eko aye bo kɛyaashi beyinɔ ni ohiɛ aaakpãtã.

⁶² Tsɛbelɛ sa lɛ nyɛyi fa tamɔ ŋwɛi ŋulamii, shi nyɛyi fioo kɛkɛ aaashwɛ, ejaakɛ nyɛbooo Yehowa, nyɛNyɔŋmɔ lɛ, toi.

⁶³ Bɔ ni Yehowa nya he akɛ efee nyɛ ejurɔ koni ehã nyɛyi afa lɛ, nakai nɔŋŋ eeenya he akɛ ekpãtã nyɛhiɛ koni efite nyɛ, ni aaashwie nyɛ kɛje shikpɔŋ ni nyɛyaa nyɛyaŋɔ lɛ nɔ.

⁶⁴ “Ni Yehowa aaagbɛ nyɛ ashwã shikpɔŋ lɛ nɔ bii lɛ fɛɛ ateŋ, kɛjɛ je lɛ naagbeehe kome kɛyashi naagbeehe kome hu, ni nyɛbaaya nyɛyaja tso kɛ tɛ nyɔŋmɔi ni nyɛ loo nyɛtsɛmɛi lɛ leee.

⁶⁵ Onaŋ hejɔlɛ, ni asaŋ onaŋ nanemaahe hu yɛ maji nɛɛ ateŋ; aaahã otsui afã, ni ooofee yeyeeye kɛ tsuiyeli yɛ jɛi;

⁶⁶ oyiŋ aaafee bo kɔshikɔshi yɛ owala he, ni nyɔɔŋnyɔɔŋ kɛ shwaneshwane fɛɛ lɛ, ŋmiŋmi aaamɔ bo, ni oleŋ kɛji oyi aaana wala lo.

⁶⁷ Leebi lɛ obaakɛɛ akɛ, ‘Mina ni je ena’, ni gbɛkɛ lɛ obaakɛɛ akɛ, ‘Mina ni je etsɛre’. Obaakɛɛ nɛkɛ yɛ ŋmiŋmi ni emɔ bo kɛ ohiɛnaanɔ nii ni onaa lɛ ahewɔ.

⁶⁸ Ni Yehowa kɛ nyɛ aaawo lɛji amli kɛaaya Ijipt ekoŋŋ, tsɛbelɛ eji gbɛ ko ni ewo nyɛ he shi akɛ nyɛfaŋ dɔŋŋ; ni nyɛaahɔ̃hɔ̃ɔ nyɛ diɛŋtsɛ nyɛhe nyɛhã nyɛhenyɛlɔi lɛ akɛ nyɔji hii kɛ nyɔji yei, shi mɔ ko mɔ ko heŋ nyɛ tete.”