5 Mose 26 - ŊMALƐ KRƆŊKRƆŊ LƐ

Ŋmãakpamɔ

¹ “Kɛji oyashɛ shikpɔŋ ni Yehowa kɛhãa bo akɛ onɔ lɛ nɔ, ni oŋɔ shikpɔŋ lɛ, ni ohi nɔ lɛ,

² okɛ klɛŋklɛŋnii ni obaakpa, yɛ oŋmɔ mli yɛ shikpɔŋ ni Yehowa eŋɔ ehã bo lɛ nɔ lɛ, eko awo kɛntɛŋ mli koni okɛya he koome ni Yehowa, oNyɔŋmɔ lɛ, eŋɔ akɛ jɛi aja lɛ yɛ lɛ.

³ Yaa osɔfo ni tsuɔ jɛi nii nakai be mli lɛ ŋɔɔ, ni oyakɛɛ lɛ akɛ, ‘Miikɛɛ ŋmɛnɛ gbi nɛɛ, yɛ Yehowa, miNyɔŋmɔ lɛ, hiɛ akɛ mibashɛ shikpɔŋ lɛ ni Nuŋtsɔ lɛ wo wɔtsɛmɛi lɛ ehe shi akɛ ekɛbaahã wɔ lɛ nɔ.’

⁴ “Kɛkɛ lɛ Osɔfo lɛ baahe kɛntɛŋ lɛ yɛ odɛ̃ŋ, koni ekɛma Yehowa, oNyɔŋmɔ lɛ, afɔleshãa latɛ lɛ hiɛ.

⁵ No sɛɛ lɛ, okɛɛ, yɛ Yehowa, oNyɔŋmɔ lɛ, hiɛ akɛ, ‘Aramnyo ni ebɔ ko ji mitsɛ; ekɛ mɛi fioo ko tee Ijipt, ni eyato gbɔ yɛ jɛi. Shi eshwiei ayi bafa, ni etsɔ̃ maŋ kpeteŋkple ni he wa yɛ jɛi.

⁶ Shi Ijiptbii lɛ hiɛ wɔ soisoi, ni amɛwa wɔ yi, ni amɛye wɔ nyɔŋ.

⁷ Kɛkɛ ni wɔbolɔ wɔtsɛ Yehowa, wɔtsɛmɛi lɛ aNyɔŋmɔ lɛ, ni ebo wɔ toi, ni ena bɔ ni ahaoɔ wɔ lɛ kɛ deŋme ni wɔgboɔ lɛ kɛ nyɔŋ ni ayeɔ wɔ lɛ.

⁸ Kɛkɛ ni Yehowa bakpɔ̃ wɔ yɛ Ijipt yɛ ehewalɛ kɛ enineshiwalɛ naa. Ehã naakpɛɛ kɛ gbeyei nibii ba, ni ekɛto okadi.

⁹ Ni ekɛ wɔ eba biɛ nɛɛ, ni ekɛ nɛkɛ shikpɔŋ nɛɛ hã wɔ, shikpɔŋ ni ewo fɔ ni baa nii babaoo lɛ.

¹⁰ No hewɔ lɛ, naa, mikɛ shikpɔŋ ni bo, Yehowa, okɛhã mi lɛ nɔ klɛŋklɛŋ ŋmɔshi nii ni mikpa lɛ eko eba.’ “Enɛ sɛɛ lɛ okɛ kɛntɛŋ lɛ ama Yehowa, oNyɔŋmɔ lɛ hiɛ, ni oja yɛ Yehowa, oNyɔŋmɔ, lɛ hiɛ.

¹¹ Onya nibii kpakpai fɛɛ ni Yehowa, oNyɔŋmɔ lɛ, eduro bo lɛ he, bo kɛ owe lɛ mli bii kɛ Levibii kɛ gbɔi ni kɛ bo yɔɔ lɛ.

¹² “Afi ni ji etɛ̃ lɛ nɔ, ni ji mlijai nyɔŋma mli ekomekome hãmɔ afi lɛ, kɛji okɛ oŋmɔshi nii mlijai nyɔŋma mli ekomekome lɛ ehã Levibii lɛ kɛ gbɔi lɛ kɛ awusãi lɛ kɛ okulafoi lɛ ogbe naa, koni amɛna nii amɛye yɛ nyɛmaji lɛ amli lɛ,

¹³ yaakɛɛ yɛ Yehowa, oNyɔŋmɔ lɛ, hiɛ akɛ, ‘Mijie nii krɔŋkrɔŋ lɛ yɛ minii mli yɛ miwe lɛ, ni mikɛhã Levibii kɛ gbɔi kɛ awusãi kɛ okulafoi bɔ ni owo mi shi akɛ mifee lɛ. Mitɔ̃ko okitãi lɛ eko nɔ, ni mihiɛ hu kpako kitã ko nɔ.

¹⁴ Miyeko nii nɛɛ ni mijie lɛ eko yɛ mikɔmɔyeli beiaŋ lɛ, mifiteko nii lɛ eko be ni mibule mihe lɛ, mikɛ eko hu eshãko afɔle mihãko gbonyo ko. Miye Yehowa, miNyɔŋmɔ lɛ, gbee nɔ, ni mifee nɔ fɛɛ nɔ ni owo mi shi akɛ mifee lɛ.

¹⁵ Jɛɛ oshihilɛhe krɔŋkrɔŋ ni yɔɔ ŋwɛi lɛ, ni okwɛ koni ojɔɔ omaŋ Israel kɛ shikpɔŋ kpakpa ni baa nii ni okɛhã wɔ lɛ, tamɔ bɔ ni okã wɔtsɛmɛi lɛ kitã lɛ.’

Yehowa diɛŋtsɛ webii

¹⁶ “Ŋmɛnɛ gbi nɛɛ lɛ Yehowa, oNyɔŋmɔ lɛ, miiwo bo kitã akɛ oye ekpɔi kɛ emlai lɛ anɔ. No hewɔ lɛ, kwɛmɔ jogbaŋŋ koni okɛ otsui kɛ onyɛmɔ fɛɛ aye nɔ.

¹⁷ Ogba mli kpoo ŋmɛnɛ okɛɛ Yehowa akɛ lɛ ji oNyɔŋmɔ, ni obaaba ojeŋ bɔ ni etaoɔ lɛ, ni obaaye ekpɔi lɛ kɛ ekitãi lɛ kɛ emlai lɛ anɔ, ni obaabo lɛ toi.

¹⁸ Yehowa hu egba mli kpoo ekɛɛ bo, ŋmɛnɛ gbi nɛɛ, akɛ lɛ diɛŋtsɛ emaŋ ji bo tamɔ bɔ ni ewo bo shi lɛ, ni eebi bo koni oye ekitãi lɛ fɛɛ nɔ,

¹⁹ koni yɛ yijiemɔ kɛ gbɛi kɛ anunyam gbɛfaŋ lɛ, Israel agbojee akwɔ fe maji fɛɛ agbojee yɛ je lɛ mli. Oootsɔ̃ Yehowa, oNyɔŋmɔ lɛ, maŋ krɔŋkrɔŋ bɔ ni ekɛɛ lɛ.”