5 Mose 22 - ŊMALƐ KRƆŊKRƆŊ LƐ

¹ “Kɛji ona onyɛmi tsina loo etoo ni edu gbɛ lɛ, kaatsɔ̃ ohiɛ oto afã; shi moŋ kplamɔ kooloo lɛ kɛku sɛɛ oyahã onyɛmi lɛ.

² Kɛji nɔtsɛ lɛ shĩa bɛŋkɛɛɛ bo, aloo oleee lɛ lɛ, no lɛ kplamɔ kooloo lɛ kɛya bo diɛŋtsɛ owe, koni kooloo lɛ ahi oŋɔɔ kɛyashi nɔtsɛ lɛ aaababi shi, ni okɛ enii aku sɛɛ ahã lɛ.

³ Nɛkɛ nɔŋŋ ofee onyɛmi teji loo etade loo enɔ fɛɛ nɔ ni elaaje ni ooona; okaho he ni otee.

⁴ “Kɛji ona onyɛmi teji loo etsina ni egbee shi lɛ, kaaho ehe ni otee; shi moŋ ye obua koni awo kooloo lɛ nɔ adamɔ shi.

⁵ “Yoo akawo hii atade, ni nuu akawo yei atade ejaakɛ Yehowa, nyɛNyɔŋmɔ lɛ, miihi mɔ ni feɔ nakai.

⁶ “Kɛji ona loofɔlɔ tsu, eyɛ tso nɔ jio, eyɛ shikpɔŋ jio, ni loofɔlɔ nyɛ lɛ bu ebii lɛ loo ewɔji lɛ anɔ yɛ mli lɛ, kaamɔ loofɔlɔ nyɛ lɛ kɛ bii lɛ fɛɛ kɛtee.

⁷ Obaanyɛ omɔmɔ loofɔlɔ bii lɛ ni oŋmɛɛ loofɔlɔ nyɛ lɛ he, ni ebaahi ehã bo, ni owala sɛɛ baatsɛ hu.

⁸ “Kɛji oma tsu hee lɛ, foo afabaŋ okɛbɔle tsu lɛ yiteŋ naabu fɔfɔoo lɛ, koni mɔ ko akaje tsu lɛ yiteŋ ebagbee shi ni obaye elá yi sɔ̃.

⁹ “Kaadu nɔ kroko ofutu wain yɛ owain trom mli; no lɛ ŋmɔ lɛ mli nii fɛɛ kwa, wain yibii lɛ ni jio, nii ni odu ofutu lɛ lɛ ni jio, baatsɔ nɔ krɔŋkrɔŋ, ni fɛɛ baaŋmɛɛ bo.

¹⁰ “Kaatsa tsina kɛ teji fɛɛ okɛhu.

¹¹ “Kaawo atade ni akɛ odonti kpãa kɛ kuntu kpãa lo lɛ asaasaa.

¹² “Feemɔ ahwanya owo otade koji ejwɛ lɛ fɛɛ naa kɛkpe.

Oblayoo foro hemujiwoo he mlai

¹³ “Kɛji nuu yaŋɔ yoo, ni be ni ekɛ lɛ ena bɔlɛ sɛɛ lɛ, eba mli akɛ esumɔɔɔ yoo lɛ dɔŋŋ,

¹⁴ ni no hewɔ lɛ, efolɔ hiɛgbeji asaji eshwie yoo lɛ nɔ akɛ be ni ekɛ lɛ bɔ lɛ enaaa lɛ akɛ oblayoo foro lɛ,

¹⁵ no lɛ oblayoo foro lɛ fɔlɔi lɛ akɔ okadi ni yeɔ he odase akɛ amɛbi lɛ oblayoo foro ni lɛ, kɛya onukpai lɛ ahiɛ yɛ maŋ koi lɛ shi.

¹⁶ Oblayoo lɛ tsɛ lɛ akɛɛ onukpai lɛ akɛ, ‘Mikɛ mibiyoo nɛɛ hã nuu nɛɛ gbãlã; shi amrɔ nɛɛ lɛ ekɛɛ etaooo lɛ.

¹⁷ No hewɔ lɛ, efolɔ heguɔgbee saji eshwie mibiyoo lɛ nɔ akɛ enaaa lɛ oblayoo foro. Shi naa okadi ni tsɔ̃ɔ akɛ mibiyoo lɛ oblayoo foro ni.’ No sɛɛ lɛ, fɔlɔi lɛ alɛɛ mama lɛ mli amɛkɛtsɔ̃ɔ maŋ onukpai lɛ.

¹⁸ Maŋ onukpai lɛ amɔ nuu lɛ koni agwao lɛ.

¹⁹ Gwaomɔ lɛ sɛɛ lɛ, agbe lɛ shika gbele jwiɛtɛi shekeli oha; ni akɛ shika nɛɛ ahã oblayoo lɛ tsɛ lɛ, ejaakɛ nuu lɛ ewo Israel fɔmɔbi oblayoo foro lɛ he muji yakatswaa. Yoo lɛ atsa nɔ ni ekɛ nuu lɛ ahi shi akɛ eŋa; ni nuu lɛ bɛ hegbɛ akɛ eshwieɔ yoo nɛɛ kɛyaashi lɛ nuu lɛ aaashi jeŋ.

²⁰ “Shi kɛji sane lɛ yɛ mli anɔkwale akɛ nuu lɛ enaaa oblayoo lɛ akɛ oblayoo foro lɛ,

²¹ maŋ onukpai lɛ akpala oblayoo lɛ kɛya etsɛ agbo naa, koni maŋ lɛ mli hii atswia oblayoo lɛ tɛi ni egbo, ejaakɛ efee hiɛgbejianii yɛ Israel akɛ ele nuu dani eshi etsɛ we lɛ etee gbãlã. Kɛtsɔ̃ nɛkɛ gbɛ nɔ lɛ nyɛbaajie su fɔŋ nɛɛ kɛje nyɛteŋ.

²² “Kɛji ana nuu ko ni ekɛ mɔ ko ŋa miina bɔlɛ lɛ, agbe nuu lɛ kɛ yoo lɛ fɛɛ koni akɛgu su fɔŋ nɛɛ yɛ Israel.

²³ “Kɛji atsɛ oblayoo foro ko he baa, ni nuu kroko kɛ lɛ kpe yɛ maŋ lɛ mli, ni ekɛ lɛ na bɔlɛ lɛ, no lɛ

²⁴ nyɛkpalaa nuu lɛ kɛ yoo lɛ fɛɛ kɛyaa nakai maŋ lɛ agbo lɛ naa koni atswia amɛ tɛi yɛ jɛi ni amɛgboi. Yoo lɛ sa gbele ejaakɛ maŋ teŋ eyɔɔ, ni ebaanyɛ ebo etsɛ; shi ebooo; nuu lɛ hu sa gbele ejaakɛ efite enaanyo ŋa. Kɛtsɔ̃ nɛkɛ gbɛ nɔ lɛ nyɛbaagu su fɔŋ nɛɛ yɛ nyɛteŋ.

²⁵ “Shi kɛji ŋa mli nuu lɛ na oblayoo ni atsɛ ehe baa lɛ yɛ, ni nuu lɛ mɔ lɛ, ni ekɛ lɛ na bɔlɛ lɛ, no lɛ agbe nuu lɛ kome pɛ.

²⁶ Oblayoo lɛ, akafee lɛ nɔ ko ejaakɛ efeko nɔ fɔŋ ko ni sa akɛ agbe lɛ yɛ no hewɔ. Bɔ ni mɔ ko teɔ shi etuaa enaanyo ni egbeɔ lɛ lɛ, nakai nɔŋŋ ji nɛkɛ sane nɛɛ.

²⁷ Ejaakɛ mɔ nuu lɛ mɔ oblayoo ni atsɛ ehe baa lɛ yɛ ŋa lɛ mli, ni ekɛ lɛ na bɔlɛ lɛ; ni oblayoo lɛ bolɔ, shi mɔ ko bɛ jɛi ni aaahere lɛ.

²⁸ “Kɛji nuu ko kɛ oblayoo foro ni mɔ ko etsɛko ehe baa kpe, ni emɔ lɛ, ni ekɛ lɛ na bɔlɛ lɛ,

²⁹ nuu lɛ awo oblayoo foro yinii, ni ji jwiɛtɛi shekeli nyɔŋmai enumɔ, ehã oblayoo foro lɛ tsɛ. Yoo lɛ atsɔ̃ nuu lɛ ŋa, ejaakɛ nuu lɛ ni nyɛ oblayoo lɛ nɔ, ni ekɛ lɛ na bɔlɛ lɛ; asaŋ nuu lɛ wala beiaŋ fɛɛ lɛ enyɛŋ yoo nɛɛ eshwie gbi ko gbi ko.

³⁰ “Nuu ko nuu ko bɛ hegbɛ ni ekɛ etsɛ ŋa loo etsɛ hemɔ naa bɔlɛ, koni ekɛshwie etsɛ hiɛ shi.”