5 Mose 21 - ŊMALƐ KRƆŊKRƆŊ LƐ

Mɔ ko ni aleee mɔ ni gbe lɛ

¹ “Kɛji ana mɔ ko ni agbe lɛ afɔ̃ ŋa nɔ yɛ shikpɔŋ ni Yehowa, nyɛNyɔŋmɔ lɛ, kɛhãa nyɛ lɛ nɔ, ni aleee mɔ ni gbe lɛ lɛ,

² nyɛmaŋ onukpai lɛ kɛ kojolɔi lɛ aya, ni amɛyasusu he ni agbe gbɔmɔ lɛ afɔ̃ lɛ kɛ maji ni yɔɔ jɛiniiaŋ lɛ ateŋ eko fɛɛ eko jekɛmɔ.

³ Maŋ ni kɛ gbonyo lɛ bɛŋkɛ fe fɛɛ lɛ mli onukpai lɛ amɔ tsina oblayoo ni akɛtsuko nii dã.

⁴ Amɛkpala tsina lɛ kɛya jɔɔ ni nu hoɔ yɛ mli, he ni ahuko ni aduko nii yɛ dã. Amɛkũ tsina lɛ kuɛ mli yɛ jɛi.

⁵ Osɔfoi lɛ, ni ji Levibii lɛ, atsi aba ejaakɛ amɛ ji mɛi ni Yehowa ehala akɛ amɛsɔmɔ lɛ, ni amɛkojo bei loo mɔnɔtswaa sane fɛɛ sane yɛ egbɛi mli.

⁶ Kɛkɛ lɛ maŋ ni bɛŋkɛ gbonyo lɛ fe fɛɛ lɛ mli onukpai lɛ afɔ amɛdɛ̃ amɛshwie tsina oblayoo lɛ nɔ, ni no sɛɛ lɛ aku tsina lɛ kuɛ mli yɛ jɔɔ lɛ mli.

⁷ Nakai be mli lɛ amɛkɛɛ akɛ, ‘Jeee wɔ ni wɔshwie lá nɛɛ shi, ni asaŋ wɔleee mɔ hu ni gbe lɛ.

⁸ Yehowa, ofainɛ, ona omaŋ Israel ni oyakpɔ̃ lɛ mɔbɔ koni okɛ gbɔmɔ nɛɛ lá shi ni ashwie yaka nɛɛ sɔ̃ akatere Israel.’

⁹ Nyɛtsɔ̃a nɛkɛ gbɛ nɔ koni nyɛfea nɔ ni Yehowa etsɔ̃ɔ akɛ afee lɛ koni nyɛkɛjie mɔ ni efeko efɔŋ lɛ lá yi sɔ̃ kɛje Israel nɔ.”

Ta mli yei nomii

¹⁰ “Kɛji otee ta, ni Yehowa, oNyɔŋmɔ lɛ, hã oye ohenyɛlɔi lɛ anɔ kunim, ni omɔ nomi,

¹¹ ni yoo fɛɛfɛo ko yɛ nomii lɛ ateŋ, ni oosumɔ lɛ, ni otao akɛ oŋɔ lɛ ofee oŋa lɛ,

¹² no lɛ kɛ yoo lɛ aya owe, ni ohã eshɛ eyi, ni ejie ewaobii anaa;

¹³ ni etsake ehe nom atade lɛ. Yoo lɛ ahi owe lɛ, ni efo etsɛ kɛ enyɛ kɛyashi nyɔŋ kome. No sɛɛ dani oŋɔ yoo lɛ koni otsɔ̃ ewu, ni lɛ hu etsɔ̃ oŋa.

¹⁴ Kɛji eshɛ be ko ni osumɔɔɔ yoo lɛ dɔŋŋ lɛ, no lɛ oŋmɛɛ yoo lɛ he koni eye ehe tswaa, koni eya he ni lɛ esumɔɔ. Obɛ hegbɛ akɛ ohɔ̃ɔ yoo lɛ oheɔ shika, ni okaye lɛ nyɔŋ hu ejaakɛ ona ota ehe.”

Binuu kromɔ gbɛnaa nɔ

¹⁵ “Kɛji nuu ko yɛ ŋamɛi enyɔ, ni esumɔɔ mɔ kome lɛ, shi esumɔɔɔ mɔ kome; ni ekɛ yei enyɔ lɛ fɛɛ fɔ bihii, shi eŋa ni esumɔɔɔ esane lɛ binuu lɛ ji kromɔbi lɛ,

¹⁶ kɛji shɛ be, ni ebaaja egboshinii ehã ebii lɛ, ebɛ hegbɛ akɛ eŋɔɔ yoo ni esumɔɔ esane lɛ binuu akɛ ekromɔ binuu yɛ yoo ni esumɔɔɔ esane lɛ binuu lɛ najiaŋ.

¹⁷ Yoo ni esumɔɔɔ esane lɛ binuu lɛ ji ekromɔbi, ni lɛ eŋɔ egboshinii lɛ fɛɛ mlijai lɛ toi enyɔ lɛ ehã akɛ kromɔbi gbɛnaa nɔ.”

Bi toigbolɔ he akpɔ

¹⁸ “Kɛji mɔ ko yɛ binuu toigbolɔ kɛ atuatselɔ, bi ni booo efɔlɔi atoi, tsɛbelɛ amɛmiikã lɛ nɔŋŋ, shi ebooo toi lɛ,

¹⁹ no lɛ fɔlɔi lɛ aŋɔ lɛ kɛya amɛmaŋ lɛ mli onukpai lɛ ahiɛ yɛ koishi.

²⁰ Amɛkɛɛ maŋ lɛ onukpai lɛ akɛ, ‘Wɔbi nɛɛ toigbolɔ kɛ atuatselɔ ni, ebooo wɔ toi lɛ, nyɛnyɛŋtswi ebɔɔ, ni etɔɔ dãa hu.’

²¹ Maŋ lɛ mli hii fɛɛ atswia lɛ tɛi koni egbo bɔ ni afee ni akɛjie su fɔŋ lɛ yɛ nyɛteŋ. Israel fɛɛ baanu nɔ ni ba lɛ, ni amɛbaashe gbeyei.”

Mlai srɔtoi

²² “Kɛji abu efɔŋfeelɔ ko gbele fɔ, ni asɛŋ lɛ yɛ tso nɔ lɛ,

²³ akahã egbonyo lɛ miihi tso lɛ nɔ ni je tsɛre nɔ. Afu mɔ lɛ gbi nɔ ni asɛŋ lɛ lɛ nɔŋŋ, ejaakɛ nɛkɛ gbɔmɔ lɛ Nyɔŋmɔ loomɔ kã enɔ koni nyɛkabule shikpɔŋ ni Yehowa, nyɛNyɔŋmɔ lɛ, kɛhã nyɛ lɛ.”