5 Mose 20 - ŊMALƐ KRƆŊKRƆŊ LƐ

Tawuu he akpɔi

¹ “Kɛji nyɛmiiya nyɛkɛ nyɛhenyɛlɔi ayawu ta, ni nyɛna amɛkpɔŋɔi kɛ tawuu shwiilii kɛ tabilɔi babaoo ni ayi fa fe nyɛ lɛ, nyɛkashea gbeyei, ejaakɛ Yehowa, nyɛNyɔŋmɔ lɛ, ni yakpɔ̃ nyɛ yɛ Ijipt shikpɔŋ lɛ nɔ lɛ kɛ nyɛ yɛ.

² Kɛji be lɛ shɛ ni nyɛbaabɔ̃i ta lɛ wuumɔ lɛ, osɔfo lɛ aje kpo kɛba koni ekɛ tabilɔi lɛ abawie,

³ ni ekɛɛ amɛ akɛ, ‘Hiiabii Israelbii, nyɛboa toi! Ta ebanina nyɛ ŋmɛnɛ, ni nyɛkɛ nyɛhenyɛlɔi yaakpe. Nyɛtsui akafãa; nyɛkashea gbeyei, ni nyɛhe akakpokpoa; nyɛkahãa ŋmiŋmi mɔmɔa nyɛ yɛ amɛhiɛ,

⁴ ejaakɛ Yehowa, nyɛNyɔŋmɔ lɛ, kɛ nyɛ yaa ta lɛ koni ekɛ nyɛhenyɛlɔi lɛ ayawu ahã nyɛ koni nyɛye kunim.’

⁵ “Osɔfo lɛ wiemɔ lɛ sɛɛ lɛ, asafoiatsɛmɛi lɛ akɛɛ tabilɔi lɛ akɛ, ‘Nyɛteŋ mɔ ni ema tsu hee ni egbeleko naa lɛ, eku esɛɛ kɛya ewe, ejaakɛ kɛji eeeyanyɔ yɛ ta lɛ mli lɛ, mɔ kroko moŋ ni baagbele tsu lɛ naa.

⁶ Mɔ hu ni efee waintrom hee, shi ebɔiko emli yibii yeli lɛ, eku esɛɛ kɛya ewe, ejaakɛ kɛji eeeyanyɔ yɛ ta lɛ mli lɛ, mɔ kroko moŋ ni baaye trom lɛ mli nii lɛ.

⁷ Ni mɔ hu ni etsɛ yoo he baa, shi eyaŋɔko yoo lɛ, lɛ hu eku esɛɛ kɛya ewe, ejaakɛ kɛji eeeyanyɔ yɛ ta lɛ mli lɛ, mɔ kroko moŋ ni baaŋɔ yoo lɛ.’

⁸ “Asaŋ asafoiatsɛmɛi lɛ akɛɛ tabilɔi lɛ akɛ, ‘Nyɛteŋ mɔ ni miishe gbeyei, ni etsui efã lɛ, eku esɛɛ kɛya ewe koni ekahã enyɛmimɛi tabilɔi krokomɛi lɛ atsui miifã tamɔ lɛ nɔŋŋ.’

⁹ Kɛji asafoiatsɛmɛi lɛ kɛ tabilɔi lɛ wie gbe naa lɛ, afãmɔ tatsɛmɛi ni amɛnyiɛ asafoiasafoi lɛ ahiɛ.

¹⁰ “Kɛji nyɛyanina maŋ ko ni nyɛbaatua maŋ lɛ, nyɛtsɔ̃a hiɛ koni nyɛbia maŋbii lɛ kɛji amɛmiisumɔ hejɔlɛ loo ta.

¹¹ Kɛji ahã nyɛ naajɔlɛ hetoo, ni agbele maŋ lɛ agbo lɛ ahã nyɛ lɛ, no lɛ mɛi fɛɛ ni yɔɔ maŋ lɛŋ lɛ, nyɛnyɛa amɛnɔ koni amɛtsu nii amɛhã nyɛ, ni amɛsɔmɔ nyɛ.

¹² Shi kɛji maŋ lɛ kɔɔɔ hejɔlɛ, shi moŋ amɛkɔ ta lɛ, no lɛ nyɛsaa maŋ lɛ yi.

¹³ Kɛji Yehowa, nyɛNyɔŋmɔ lɛ, ehã nyɛye maŋ lɛ nɔ sɛɛ lɛ, nyɛgbea emli hii fɛɛ.

¹⁴ Shi maŋ lɛŋ yei lɛ kɛ gbekɛbii lɛ kɛ shĩa kooloi lɛ, no ji nɔ fɛɛ nɔ ni yɔɔ maŋ lɛŋ lɛ, nyɛŋɔa akɛ ta mli nii ni Yehowa, nyɛNyɔŋmɔ lɛ, kɛduro nyɛ.

¹⁵ Nɛkɛ ji bɔ ni nyɛkɛ maji fɛɛ ni yɔɔ shikpɔji krokomɛi ni kɛ nyɛteŋ jɛkɛ pii anɔ lɛ aye ahã.

¹⁶ “Shi nɛkɛ gbɔmɛi nɛɛ ni Yehowa, nyɛNyɔŋmɔ lɛ, kɛ amɛshikpɔŋ lɛ ehã nyɛ akɛ nyɛnɔ lɛ, nyɛgbea amɛmaji lɛ amli gbɔmɛi fɛɛ.

¹⁷ Nyɛbulea amɛshishi wɛɛ, ni ji Hitbii lɛ kɛ Amorbii lɛ kɛ Kanaanbii lɛ kɛ Perizbii lɛ kɛ Hivbii lɛ kɛ Yebusbii lɛ, tamɔ bɔ ni Yehowa, nyɛNyɔŋmɔ lɛ, efã nyɛ ni nyɛfee lɛ.

¹⁸ Nyɛgbea amɛ bɔ ni afee ni amɛkatsɔ̃ɔ nyɛ musubɔɔ nibii ni amɛfeɔ amɛkɛjaa amɛnyɔŋmɔi lɛ koni nyɛkafee esha nyɛshi Yehowa nyɛNyɔŋmɔ, lɛ.

¹⁹ “Kɛji nyɛkɛ maŋ ko miiwu ni nyɛsa maŋ lɛ yi, bɔ ni afee ni nyɛŋɔ lɛ, bɔ fɛɛ bɔ ni maŋ lɛ yisamɔ lɛ sɛɛ etsɛ ehã lɛ, nyɛkafolɔa maŋ lɛ yeli tsei nyɛshwiea, ejaakɛ tsei nɛɛ ayibii lɛ eko nɔŋŋ nyɛbaana nyɛye. Ani tsei lɛ ji gbɔmɛi ni nyɛkɛna ta lɛ lo?

²⁰ Shi moŋ nyɛbaanyɛ nyɛfolɔ tsei ni ayeee amɛyibii lɛ koni nyɛkɛfee tawuu nibii koni nyɛkɛsa maŋ lɛ yi kɛyaashi beyinɔ ni nyɛaaye maŋ lɛ nɔ.”