5 Mose 17 - ŊMALƐ KRƆŊKRƆŊ LƐ

¹ “Nyɛkaŋɔa tsina loo too ni kpa ko yɔɔ ehe nyɛkɛshãa afɔle nyɛhãa Yehowa, nyɛNyɔŋmɔ lɛ, ejaakɛ eehi nakai kooloo.

² “Kɛji ana nuu ko loo yoo ko yɛ nyɛmaji ni Yehowa, nyɛNyɔŋmɔ lɛ, hãa nyɛ lɛ eko mli ni eku Yehowa kpãŋmɔ lɛ mli,

³ ni nii ni migu nyɛ lɛ, etee eyafee, tamɔ akɛ etee eyaja, ni esɔmɔ nyɔŋmɔi krokomɛi, loo hulu, loo nyɔɔŋtsere loo ŋulamii lɛ eko,

⁴ ni abatswa nyɛ adafi lɛ, nyɛtaoa sane lɛ mli fitsofitso. Kɛji nyɛna akɛ eyɛ mli anɔkwale akɛ gbɔmɔ nɛɛ efee nɛkɛ musubɔɔnii nɛɛ yɛ Israel lɛ,

⁵ nyɛkɛ gbɔmɔ nɛɛ ajea kpo kɛjea maŋ lɛ mli kɛya maŋ agbo lɛ sɛɛ, nuu ni jio, yoo ni jio, koni nyɛtswia lɛ tɛi ni egbo.

⁶ Shi moŋ odasefoi enyɔ loo etɛ̃ odaseyeli nɔ adamɔ agbe lɛ; akadamɔ odasefonyo kome wiemɔ nɔ agbe lɛ.

⁷ Odasefoi lɛ tsuutsu atswa gbɔmɔ nɛɛ tɛ; ni no sɛɛ dani maŋ muu lɛ fɛɛ atswia lɛ tɛi ni egbo. Kɛtsɔ̃ nɛkɛ gbɛ nɔ lɛ nyɛbaajie nɔ fɔŋ lɛ yɛ nyɛteŋ.

⁸ “Kɛji sane ni kɔɔ gbɔmɔgbee loo niiaheplemɔ loo awuyeli he ba, ni naataamɔ te shi yɛ sane lɛ yeli mli lɛ, nakai maŋ lɛ mli kojolɔi lɛ kɛ sane lɛ aya he ni Yehowa, nyɛNyɔŋmɔ lɛ, eŋɔ akɛ jɛi aja lɛ yɛ lɛ,

⁹ koni amɛkɛ sane lɛ ayafɔ̃ Levibii osɔfoi lɛ kɛ kojolɔ hu ni yɔɔ jɛi nakai be lɛ mli lɛ fɛɛ ahiɛ koni amɛkojo.

¹⁰ Bɔ ni amɛaagbe sane lɛ naa amɛhã, yɛ he ni Yehowa eŋɔ akɛ jɛi aja lɛ yɛ lɛ, nakai pɛpɛɛpɛ nyɛŋɔa lɛ.

¹¹ Nyɛŋɔa bɔ ni amɛaabua sane lɛ he amɛhã lɛ nɔ; ni nyɛnyiɛa gbɛjianɔ ni amɛaato amɛhã nyɛ lɛ sɛɛ pɛpɛɛpɛ. Nyɛkatsakea amɛsanebuamɔ lɛ hiɛ; bɔ ni amɛaakɛɛ nyɛ lɛ nakai nyɛfea.

¹² Mɔ fɛɛ mɔ ni baaje gbɛ eshi etsitsi etse kojolɔ lɛ loo osɔfo ni yɔɔ jɛi esɔmɔɔ Yehowa, nyɛNyɔŋmɔ lɛ, hiɛ atua lɛ, esa akɛ agbe lɛ koni akɛgu su fɔŋ nɛɛ yɛ Israelbii ateŋ.

¹³ Kɛ afee nakai lɛ maŋ muu lɛ fɛɛ baanu he, ni amɛbaashe gbeyei, ni mɔ ko ekaŋ asa akɛ eeeye etsui naa sane nakai dɔŋŋ.

Maŋtsɛyeli he Akpɔi

¹⁴ “Kɛji nyɛyashɛ shikpɔŋ ni Yehowa, nyɛNyɔŋmɔ lɛ, kɛhãa nyɛ lɛ nɔ, ni nyɛŋɔ shikpɔŋ lɛ nyɛfee nyɛnɔ, ni nyɛhe shi yɛ nɔ lɛ, eeeba nyɛsusumɔ mli akɛ nyɛwo maŋtsɛ nyɛhã nyɛhe tamɔ bɔ ni majimaji ni bɔle nyɛ lɛ efee lɛ.

¹⁵ Nyɛaanyɛ nyɛwo maŋtsɛ lɛ; shi efee mɔ ni Yehowa, nyɛNyɔŋmɔ lɛ, diɛŋtsɛ ni jie lɛ ehã nyɛ. Mɔ lɛ afee nyɛnyɛmi Israelnyo. Nyɛkawoa gbɔ ni ejeee Israelnyo nyɛmaŋtsɛ.

¹⁶ Shi moŋ maŋtsɛ lɛ akahi okpɔŋɔi pii; asaŋ ekawo maŋbii lɛ gbɛ ni amɛku amɛsɛɛ kɛtee Ijipt shikpɔŋ lɛ nɔ amɛyahe okpɔŋɔi, ejaakɛ Yehowa ewo nyɛ shi akɛ nyɛkaku nyɛsɛɛ kɛtee Ijipt kɔkɔɔkɔ.

¹⁷ Agbɛnɛ hu maŋtsɛ lɛ akaŋɔ yei pii; ni ekadi shika kɛ jwiɛtɛi sɛɛ tuutu hu koni ekaje Yehowa sɛɛ.

¹⁸ “Kɛji maŋtsɛ nɛɛ bata maŋtsɛ sɛi lɛ nɔ lɛ, ekwɛ Nyɔŋmɔ mlai nɛɛ anɔ wolo lɛ ni yɔɔ Levibii osɔfoi lɛ adɛŋ lɛ nɔ, koni eŋma nakai wolo lɛ henɔ pɛpɛɛpɛ kome ehã ehe.

¹⁹ Wolo lɛ ahi eŋɔɔ, ni ekane ewala gbii abɔ fɛɛ, bɔ ni afee ni ekase Yehowa, eNyɔŋmɔ lɛ, gbeyeishemɔ; ni asaŋ eye mlai kɛ akpɔi nɛɛ anɔ pɛpɛɛpɛ.

²⁰ No ji nɔ ni baahã maŋtsɛ nɛɛ akawo ehe nɔ yɛ enyɛmimɛi Israelbii lɛ anɔ, ni no hã ekwa kitãi lɛ eko ni egba kɛtee ninejurɔ loo abɛku. Enɛ baahã lɛ kɛ eshwiei hu amaŋtsɛyeli sɛɛ atsɛ yɛ Israel.”