5 Mose 16 - ŊMALƐ KRƆŊKRƆŊ LƐ

Hehoo Gbijurɔ lɛ

¹ “Nyɛhiɛ ahia Abib nyɔŋ lɛ nɔ koni nyɛye Hehoo Gbijurɔ lɛ yɛ nɔ nyɛhã Yehowa, nyɛNyɔŋmɔ lɛ. Ejaakɛ Abib nyɔŋ lɛ nɔ nyɔɔŋteŋ Yehowa, nyɛNyɔŋmɔ lɛ, kpɔ̃ nyɛ kɛje Ijipt shikpɔŋ lɛ nɔ.

² No hewɔ lɛ, nyɛyaa he ni Yehowa eŋɔ akɛ jɛi aja lɛ yɛ lɛ, ni nyɛgbea too kɛ tsina akɛ Hehoo Gbijurɔ lɛ afɔle nyɛkɛhãa Yehowa.

³ Nyɛkɛ masha nii akayea Hehoo niyenii lɛ. Nyɛyea ma akpiti aboloo gbii kpawo akɛ amanehulu aboloo, ejaakɛ nyɛshi Ijipt shikpɔŋ lɛ nɔ kɛ hejojomɔ. Nyɛyea ma akpiti aboloo nɛɛ koni nyɛwala gbii abɔ fɛɛ lɛ, nyɛkɛkai gbi ni nyɛje Ijipt shikpɔŋ lɛ nɔ lɛ.

⁴ Akana mashanii ko yɛ nyɛshikpɔŋ lɛ nɔ he ko he ko gbii kpawo lɛ fɛɛ. Asaŋ kooloo ni agbe akɛshã afɔle lɛ yɛ klɛŋklɛŋ gbi lɛ nɔ gbɛkɛ lɛ, loo lɛ, akahã je miitsɛre eko nɔ.

⁵ “Nyɛkayea Hehoo Gbijurɔ lɛ yɛ nyɛmaji ni Yehowa, nyɛNyɔŋmɔ lɛ, kɛhãa nyɛ lɛ eko eko mli,

⁶ akɛ ja yɛ he ni Yehowa, nyɛNyɔŋmɔ lɛ, diɛŋtsɛ eŋɔ akɛ jɛi aja lɛ yɛ lɛ. Jɛi nyɛgbe Hehoo afɔle kooloo lɛ yɛ, gbɛkɛnaashi mli be ni hulu yaanyɔ shi lɛ, ejaakɛ nakai ŋmɛlɛtswaa mli nyɛshi Ijipt.

⁷ Nyɛhoa kooloo lɛ, ni nyɛyea yɛ he ni Yehowa, nyɛNyɔŋmɔ lɛ, eŋɔ akɛ jɛi aja lɛ yɛ lɛ; ni enɔ jetsɛremɔ lɛ nyɛkua nyɛsɛɛ kɛyaa nyɛshĩaiaŋ.

⁸ Nyɛyea ma akpiti aboloo lɛ gbii ekpaa, ni gbi ni ji kpawo lɛ nɔ lɛ, akpe kpee wulu akɛja Yehowa, nyɛNyɔŋmɔ lɛ. Akatsu nitsumɔ ko nitsumɔ ko yɛ nakai gbi lɛ nɔ.”

Nikpamɔ Gbijurɔyeli

⁹ “Nyɛkanea otsii kpawo kɛjɛ be mli ni abɔiɔ abelekuu lɛ,

¹⁰ koni nyɛkɛ nyɛtsuijurɔ naa nikeenii ayea otsii agbijurɔ lɛ nyɛkɛwoa Yehowa, nyɛNyɔŋmɔ lɛ, hiɛ nyam, mɔ fɛɛ mɔ lɛ bɔ ni Yehowa, nyɛNyɔŋmɔ lɛ, eduro bo ehã lɛ naa.

¹¹ Nyɛmii ashɛa nyɛhe yɛ Yehowa, nyɛNyɔŋmɔ lɛ hiɛ, nyɛ kɛ nyɛbihii kɛ nyɛbiyei kɛ nyɛwehii kɛ nyɛweyei kɛ Levibii ni yɔɔ nyɛmaji lɛ amli kɛ maŋsɛɛ gbɔi kɛ awusãi kɛ okulafoi hu ni yɔɔ nyɛteŋ lɛ. Nyɛyea gbijurɔ nɛɛ yɛ he ni Yehowa, nyɛNyɔŋmɔ lɛ, eŋɔ akɛ jɛi aja lɛ yɛ lɛ.

¹² Nyɛkaia akɛ nyɛyatsɔ̃mɔ nyɔji yɛ Ijipt, ni no hewɔ lɛ, nyɛjwɛŋa nɔ ni nyɛyea akpɔi nɛɛ anɔ.”

Asesei Agbijurɔyeli

¹³ “Kɛji nyɛkɛ nyɛbele ni nyɛkpa lɛ kɛ nyɛwain ni nyɛŋa lɛ eto sɛɛ lɛ, nyɛyea Asesei Agbijurɔ lɛ gbii kpawo.

¹⁴ Nyɛyea gbijurɔ nɛɛ kɛ miishɛɛ, nyɛ kɛ nyɛbihii kɛ nyɛbiyei kɛ nyɛwehii kɛ nyɛweyei kɛ Levibii kɛ maŋsɛɛ gbɔi kɛ awusãi kɛ okulafoi hu ni yɔɔ nyɛmaji lɛ amli lɛ.

¹⁵ Nyɛyea gbijurɔ nɛɛ gbii kpawo nyɛkɛwoa Yehowa, nyɛNyɔŋmɔ lɛ, hiɛ nyam yɛ he ni Yehowa eŋɔ akɛ jɛi aja lɛ yɛ lɛ. Nyɛmii ashɛa nyɛhe jogbaŋŋ diɛŋtsɛ ejaakɛ Yehowa, nyɛNyɔŋmɔ lɛ, baajɔɔ nyɛŋmɔshi nibaanii kɛ nyɛnine naa nitsumɔi fɛɛ nɔ.

¹⁶ “Afi fɛɛ afi mli lɛ nyɛteŋ hii fɛɛ abapuea yɛ Yehowa, nyɛNyɔŋmɔ lɛ, hiɛ shii etɛ̃, yɛ he ni Yehowa eŋɔ akɛ jɛi aja lɛ yɛ lɛ. Bei nɛɛ ji Ma Akpiti Gbijurɔ be lɛ kɛ Nikpamɔ Gbijurɔ be lɛ kɛ Asesei Agbijurɔ be lɛ. Mɔ ko mɔ ko akabapue yɛ Yehowa, nyɛNyɔŋmɔ lɛ, hiɛ kɛ edɛ̃ folo;

¹⁷ mɔ fɛɛ mɔ ahã bɔ ni eeenyɛ. Ekwɛ bɔ ni Yehowa, nyɛNyɔŋmɔ lɛ, ejɔɔ lɛ ehã koni ehã nikee bɔ ni eeenyɛ.

¹⁸ “Nyɛwoa kojolɔi kɛ maŋnɔkwɛlɔi yɛ nyɛmaji fɛɛ ni Yehowa, nyɛNyɔŋmɔ lɛ, hãa nyɛ lɛ amli, yɛ nyɛkutsei lɛ anaa, koni amɛkojo maŋbii ateŋ yɛ jalɛ naa.

¹⁹ Amɛkaye toikɔdɔmɔ sane; amɛkakwɛ mɛi ahiɛiaŋ lɛ, amɛkahe nyɔɔŋnii hu, ejaakɛ nyɔɔŋniihemɔ shwilaa nilelɔi tete po ahiŋmɛi, ni ehãa atsɔ̃ɔ jalɔ sane hiɛ abuɔ shi.

²⁰ Naa, nyɛyea jalɛ sane pɛ kɛkɛ, bɔ ni afee ni nyɛyi ana wala, ni nyɛhi shikpɔŋ lɛ ni Yehowa, nyɛNyɔŋmɔ lɛ, kɛhãa nyɛ lɛ nɔ.

²¹ “Kaatɛo tsei ni okɛfee wɔŋ koo ofata Yehowa, nyɛNyɔŋmɔ lɛ, afɔleshãa latɛ ni nyɛbaama lɛ he.

²² Asaŋ nyɛkamaa shiu ko shiu ko ni ji nii ni Yehowa, nyɛNyɔŋmɔ lɛ, hiɔ lɛ nyɛhãa nyɛhe.”