5 Mose 15 - ŊMALƐ KRƆŊKRƆŊ LƐ

Heyeli Afi lɛ

¹ “Daa afii kpawo lɛ heyeli afi ni.

² Bɔ ni afee yɛ afi lɛ nɔ nɛ: Mɔ fɛɛ mɔ ni efa enyɛmi Israelnyo nɔ ko lɛ, ekɛ nɔ lɛ ake mɔ lɛ; ekabi nɔ lɛ shi yɛ enaanyo loo enyɛmi lɛ dɛŋ dɔŋŋ, ejaakɛ Yehowa efã akɛ ahã mɛi fɛɛ aye amɛhe.

³ Kɛji mɔkpɔŋ ji mɔ ni hiɛ nyɔmɔ lɛ, no lɛ ahe yɛ edɛŋ, shi kɛji onyɛmi Israelnyo ni lɛ, no lɛ onɔ fɛɛ nɔ ni yɔɔ edɛŋ lɛ okɛke lɛ.

⁴ “Ohiafo kome nɛkɛ ehiŋ nyɛteŋ, ejaakɛ Yehowa baajɔɔ nyɛ yɛ shikpɔŋ ni Yehowa, nyɛNyɔŋmɔ lɛ, kɛhãa nyɛ, koni nyɛŋɔ akɛ nyɛgbɛfaŋnɔ lɛ nɔ,

⁵ kɛji nyɛaabo Yehowa, nyɛNyɔŋmɔ lɛ, toi kɛkɛ, ni nyɛaajwɛŋ nɔ nyɛye kitã fɛɛ kitã ni miwoɔ nyɛ ŋmɛnɛ gbi nɛɛ nɔ.

⁶ Ejaakɛ Yehowa, nyɛNyɔŋmɔ lɛ, baajɔɔ nyɛ tamɔ bɔ ni ewo shi eto lɛ. Nyɛbaafala maji babaoo nii, shi nyɛ lɛ nyɛfaŋ nɔ ko yɛ maŋ ko dɛŋ; nyɛaaye maji babaoo anɔ, shi nyɛ lɛ maŋ ko yeŋ nyɛnɔ.

⁷ “Kɛji nyɛnyɛmi Israelnyo ko miiye ohia yɛ maŋ ko mli yɛ nyɛshikpɔŋ ni Yehowa, nyɛNyɔŋmɔ lɛ, kɛhãa nyɛ lɛ nɔ lɛ, akawa lɛ yi, musuŋ akajoo yɛ nyɛmi ohiafo lɛ nɔ.

⁸ Shi moŋ odɛ̃ŋ akpɔ ahã lɛ, ni ofa lɛ nɔ fɛɛ nɔ ni ehia lɛ bɔ ni efĩ lɛ ehã lɛ naa.

⁹ Kwɛmɔ koni jwɛŋmɔ gbonyo akaba oyiŋ ni okɛɛ akɛ, ‘Afi ni ji kpawo ni ji heyeli afi lɛ eshɛ etã’ hewɔ lɛ, otũ ohiɛ owo onyɛmi ohiafo lɛ, ni ohãaa lɛ nɔ ni ebaa ebafa lɛ. Kɛji nyɛmi ohiafo nɛɛ fo etsɛ Yehowa lɛ, eeebu bo fɔ.

¹⁰ Shi moŋ hã lɛ nii lɛ yɛ tsuijurɔ naa, ni Yehowa, oNyɔŋmɔ lɛ, aaajɔɔ onitsumɔi fɛɛ kɛ nɔ fɛɛ nɔ ni okɛ onine aaata he lɛ.

¹¹ Ejaakɛ bɔ fɛɛ bɔ ni fee lɛ, ohiafo kpãŋ yɛ shikpɔŋ lɛ nɔ. No hewɔ ni miwoɔ nyɛ kitã nɛɛ, akɛ nyɛdɛŋ akpɔ ahã nyɛmi Israelnyo ohiafo ni efĩ lɛ yɛ nyɛshikpɔŋ lɛ nɔ lɛ.

Bɔ ni akɛ nyɔji aye ahã

¹² “Kɛji ahɔ̃ɔ onyɛmi Hebrinyo ahã bo lɛ, nuu ni jio, yoo ni jio, esɔmɔ bo afii ekpaa; afi ni ji kpawo lɛ nɔ lɛ, oŋmɛɛ ehe koni eye ehe tswaa.

¹³ Shi kɛji oŋmɛɛ nyɔŋ lɛ he koni eye ehe tswaa lɛ, kaahã eeya kɛ edɛ̃ folo.

¹⁴ Shi moŋ okɛ otoi lɛ kɛ obele lɛ kɛ owain lɛ eko awo lɛ gbɛ. Okwɛ jɔɔmɔ ni Yehowa, oNyɔŋmɔ lɛ, kɛjɔɔ bo lɛ nɔ koni ohã lɛ nii lɛ bɔ ni sa ni okɛwo lɛ gbɛ.

¹⁵ Kaimɔ akɛ bo hu kulɛ nyɔŋ ji bo yɛ Ijipt shikpɔŋ lɛ nɔ, ni Yehowa kpɔ̃ bo. No hewɔ ni miwoɔ bo nɛkɛ kitã nɛɛ ŋmɛnɛ gbi nɛɛ lɛ.

¹⁶ Shi kɛji nyɔŋ lɛ aaakɛɛ bo akɛ esumɔɔɔ akɛ eshi bo, akɛni esumɔɔ bo kɛ owe lɛ ejaakɛ eyɛ jogbaŋŋ yɛ oŋɔɔ lɛ,

¹⁷ no lɛ ŋɔɔ nyɔŋ lɛ kɛba shinaa lɛ naa, ni akɔ fitii ni akɛgbu nyɔŋ lɛ toi. Enɛ tsɔ̃ɔ akɛ etsɔ̃ onyɔŋ kɛmiiya naanɔ. Nakai nɔŋŋ afee yoo nyɔŋ hu.

¹⁸ Omusuŋ akashã bo akɛ oooŋmɛɛ nyɔŋ he koni eye ehe tswaa, ejaakɛ ekome lɛ, etsu apaafoi enyɔ anitsumɔ ehã bo afii ekpaa nɛɛ fɛɛ. Yehowa, oNyɔŋmɔ lɛ, aaajɔ bo yɛ nɔ fɛɛ nɔ ni ofeɔ mli.

Toi kɛ Tsinai akromɔbii

¹⁹ “Nyɛjɔa nyɛtoi lɛ kɛ nyɛtsinai lɛ hu akromɔbii hii fɛɛ ni aaafɔ lɛ anɔ nyɛhãa Yehowa, nyɛNyɔŋmɔ lɛ. Nyɛkɛ tsinai akromɔbii lɛ akatsua nɔ ko nɔ ko; ni nyɛtoi akromɔbii lɛ hu nyɛkakua amɛhe tsɔi.

²⁰ Nyɛ kɛ nyɛwekui kɛ nyɛwebii baaya he ni Yehowa nyɛNyɔŋmɔ lɛ, eŋɔ akɛ jɛi aja lɛ yɛ lɛ daa afi koni nyɛyagbe kooloi nɛɛ yɛ jɛi, ni nyɛye yɛ Yehowa hiɛ.

²¹ Shi kɛji kpa ko yɛ kooloo ko he lɛ, akpake ni jio, shwilamɔ ni jio, kpa fɛɛ kpa ni eji lɛ, nyɛkɛ no akashãa afɔle nyɛkɛhãa Yehowa, nyɛNyɔŋmɔ lɛ.

²² Nyɛbaanyɛ nyɛye nakai kooloo lɛ yɛ nyɛmaji lɛ amli tamɔ nyɛyeɔ soŋai loo ofrote nɛkɛ lɛ. Mɔ ni he tseee kɛ mɔ ni he tse fɛɛ aaanyɛ aye eko.

²³ Kooloo lɛ mli lá lɛ moŋ kɛkɛ nyɛkaye; nyɛtsia lá lɛ nyɛshwiea tamɔ atsiɔ nu ashwieɔ shi.”