5 Mose 14 - ŊMALƐ KRƆŊKRƆŊ LƐ

Nɔ ni akafee yɛ yarafeemɔ mli

¹ “Yehowa, nyɛNyɔŋmɔ lɛ, bii ji nyɛ. No hewɔ lɛ, kɛji nyɛmiiye mɔ ko ni egbo he ŋkɔmɔ lɛ, nyɛkafolɔa nyɛhe gbɛ̃i, ni nyɛkashɛa nyɛhiɛnaa yɛ gbonyo lɛ hewɔ.

² Ejaakɛ Yehowa je gbɛ eŋɔ nyɛ yɛ shikpɔŋ lɛ nɔ maji fɛɛ ateŋ ehã ehe akɛ lɛ diɛŋtsɛ emaŋ.

Kooloi ni aye kɛ nii akaye

³ “Nyɛkayea nɔ ko nɔ ko ni Yehowa ekɛɛ akɛ ehe tseee.

⁴ Kooloi ni nyɛbaanyɛ nyɛye nɛ: tsina kɛ gwantɛŋ kɛ abotia,

⁵ kɛ ofrote kɛ baayelɔ kɛ odabɔ kɛ soŋai kɛ duŋ kɛ wuo kɛ otrɔ̃ŋ.

⁶ Kooloo fɛɛ kooloo ni agba enane kokloto mli enyɔ, ni asaŋ egɔiɔ eniyenii, ni esaa etaa ni emiɔ ekoŋŋ lɛ, nyɛbaanyɛ nyɛye.

⁷ Shi nyɛkayea kooloo ko kooloo ko ja eyɛ kokloto ni agba mli, ni asaŋ egɔiɔ eniyenii, ni esaa etaa ni emiɔ ekoŋŋ. Kooloi tamɔ yooma kɛ kpɛŋkplɛ kɛ afutuɔkɔ nɛkɛ lɛ, tsɛbelɛ amɛgɔiɔ amɛniyenii ni amɛsaa amɛtaa amɛmiɔ ekoŋŋ moŋ nɛ, shi agbalako amɛkoklotoi amli lɛ, amɛhe tseee hãaa nyɛ.

⁸ Nyɛkayea kplotoo hu ejaakɛ agba enane kokloto mli enyɔ moŋ nɛ, shi egɔiii eniyenii etaaa. Nyɛkayea kooloi nɛɛ ateŋ ekoeko loo; ni kɛji agbe eko lɛ ehe tete po nyɛkataa.

⁹ “Nyɛbaanyɛ nyɛye nu mli loo fɛɛ loo ni yɔɔ fiji ni eyɛ totoi hu yɛ ehe.

¹⁰ Shi nɔ ni bɛ fiji ni totoi hu bɛ ehe lɛ nyɛkayea; ehe tseee hã nyɛ.

¹¹ “Loofɔji fɛɛ ni he tse lɛ nyɛbaanyɛ nyɛye.

¹² Shi enɛɛmɛi lɛ, nyɛkayea: okropɔŋ kɛ akpaŋa kɛ ŋshɔŋ akroma,

¹³ kɛ oka kɛ laalɔɔ kɛ amɛhenɔi lɛ fɛɛ.

¹⁴ Loofɔji lɛ ekomɛi hu ji kwãakwãalabite henɔi fɛɛ,

¹⁵ kɛ duguma kɛ patu kɛ yaalai kɛ akroma kɛ amɛhenɔi fɛɛ.

¹⁶ Ekrokomɛi ji omiɔhɔɔ henɔi lɛ, kɛ

¹⁷ kpokukpoku kɛ guŋ kɛ oka,

¹⁸ kɛ gɔ̃dɔ̃ kɛ amɛhenɔi lɛ, kɛ obleku kɛ aputupata.

¹⁹ “Kooloi nyɛ́ŋɛ́nyɛ́ŋɛ́ ni filikiɔ fɛɛ lɛ, amɛhe tseee, nyɛkayea.

²⁰ Kooloi ni filikiɔ ni he tse fɛɛ lɛ, nyɛyea.

²¹ “Nyɛkayea kooloo ni lɛ diɛŋtsɛ egbo. Aaanyɛ akɛ kooloo lɛ ahã gbɔ ni nyɛkɛyɔɔ nyɛmaŋ lɛ mli koni eye, aloo ahɔ̃ɔ ahã gbɔ kroko ko, ejaakɛ nyɛ lɛ, Yehowa, nyɛNyɔŋmɔ lɛ, mɛi krɔŋkrɔŋi ji nyɛ. “Nyɛkahoa toobi kɛ lɛ diɛŋtsɛ nɔŋŋ enyɛ fufɔ mli nu.”

Mlijai nyɔŋma mli ekome lɛ he mla

²² “Nyɛjiea nyɛŋmɔshi nii mli mlijaa nyɔŋma mli ekome daa afi;

²³ ni nyɛkɛyaa he koome ni Yehowa diɛŋtsɛ eŋɔ akɛ jɛi aja lɛ yɛ lɛ. Nyɛyayea nyɛtoi kɛ nyɛtsinai akromɔbii kɛ nyɛbele kɛ nyɛmu ni nyɛnu nyɛwain mli mlijaa nyɔŋma mli ekomekomei lɛ yɛ Yehowa, nyɛNyɔŋmɔ lɛ, hiɛ, koni nyɛkɛkase Yehowa, nyɛNyɔŋmɔ lɛ, gbeyeishemɔ nyɛwala gbii abɔ fɛɛ.

²⁴ Kɛji mɔ oshihilɛhe kɛ he ni Yehowa eŋɔ akɛ jɛi aja lɛ yɛ lɛ teŋ jɛkɛ bɔ sɔŋŋ ni owoŋ oŋmɔshi nii lɛ mli mlijaa nyɔŋma mli ekome lɛ teremɔ kɛ jɛiyaa lɛ,

²⁵ no lɛ hɔɔmɔ ŋmɔshinii lɛ koni okɛ shika lɛ ahiɛ odɛ̃ kɛya he ni Yehowa eŋɔ akɛ jɛi aja lɛ yɛ lɛ.

²⁶ Okɛ shika nɛɛ ahe nɔ fɛɛ nɔ ni baa otsine, too loo jio, tsina loo jio, wain jio, dãa ni wa jio, koni bo kɛ owe lɛ fɛɛ aye yɛ Yehowa, nyɛNyɔŋmɔ lɛ, hiɛ yɛ jɛi ni nyɛmii ashɛ nyɛhe.

²⁷ “Nyɛkashĩa Levibii ni nyɛkɛyɔɔ nyɛmaji lɛ amli lɛ asɛɛ, ejaakɛ amɛ lɛ ahãaa amɛ amɛ kɔkrɔɔ amɛgbɛfaŋ shikpɔŋ loo gboshinii ko.

²⁸ Daa afii etɛ̃ naagbee lɛ, nyɛbuaa nyɛŋmɔshi nii lɛ amli mlijaa nyɔŋma mli ekomekomei lɛ fɛɛ anaa nyɛtoa yɛ nyɛmaji amli.

²⁹ Nyɛkɛ niyenii nɛɛ eko ahãa Levibii lɛ ni ahãaa amɛ amɛgbɛfaŋnɔ ko lɛ, kɛ gbɔi kɛ awusai kɛ okulafoi hu ni yɔɔ nyɛmaji lɛ amli lɛ koni amɛna nii amɛye ni amɛtɔrɔ; ni Yehowa, nyɛNyɔŋmɔ lɛ, aaajɔɔ nyɛninenaa nitsumɔi fɛɛ.”