5 Mose 13 - ŊMALƐ KRƆŊKRƆŊ LƐ

¹ “Kɛji gbalɔ ko loo mɔ ko ni laa lamɔi te shi yɛ nyɛteŋ, ni gbɔmɔ nɛɛ tsɔ̃ɔ akɛ okadi loo naakpɛɛ nɔ ko miiba,

² ni okadi lɛ loo naakpɛɛ nɔ lɛ na ba mli anɔkwaleŋ, ni no hewɔ lɛ, gbɔmɔ nɛɛ kɛɛ ‘Nyɛhãa wɔyaa ni wɔyajaa nyɔŋmɔi krokomɛi ni nyɛleee koni nyɛsɔmɔ amɛ lɛ,

³ nyɛkaboa nakai gbalɔ lɛ loo lamɔ shishitsɔ̃ɔlɔ lɛ toi; ejaakɛ kaa Yehowa, nyɛNyɔŋmɔ lɛ, kɛkaa nyɛ lɛ. Eetao ena akɛ nyɛkɛ nyɛtsui fɛɛ kɛ nyɛmumɔ fɛɛ miisumɔ lɛ Yehowa lɛ lo.

⁴ Nyɛjaa Yehowa, nyɛNyɔŋmɔ lɛ, ni nyɛshea lɛ gbeyei; nyɛyea ekitãi lɛ anɔ, ni nyɛboa lɛ toi; nyɛsɔmɔa lɛ, ni lɛ ehe nyɛkɛ nyɛhe akpɛtɛa.

⁵ Shi nakai gbalɔ lɛ loo mɔ ni laa lamɔi lɛ agbe lɛ. Ejaakɛ eetsɔ̃ɔ nyɛ akɛ nyɛtse Yehowa, nyɛNyɔŋmɔ lɛ, mɔ ni jie nyɛ yɛ Ijipt shikpɔŋ lɛ nɔ ni ekpɔ̃ nyɛ yɛ nyɔŋyeli mli lɛ, hiɛ̃ atua. Eetao akɛ nyɛkahi shi bɔ ni Yehowa, nyɛNyɔŋmɔ lɛ, ewo nyɛ kitã akɛ nyɛfee lɛ. No hewɔ lɛ, esa akɛ nyɛgbe lɛ koni nyɛjie nakai su fɔŋ lɛ yɛ nyɛteŋ.’

⁶ “Onyɛmi ni ji onyɛ musuŋbi, loo obinuu, loo obiyoo, loo oŋa ni kãa osɛɛ, loo oshieŋtsɛ ko ni okɛ lɛ shɛɔ hulu wɔɔ aaalaka bo akɛ ohã nyɛya ni nyɛyaja nyɔŋmɔi krokomɛi ni nyɛ loo nyɛtsɛmɛi lɛ tete leee lɛ,

⁷ maji ni bɔle nyɛ kpaakpa lɛ kɛ maji ni kɛ nyɛteŋ jɛkɛ, kɛjɛ shikpɔŋ lɛ biɛ kɛyashi biɛ lɛ anyɔŋmɔi lɛ,

⁸ kaakpɛlɛ̃, ni kaabo lɛ toi hu, kaana lɛ mɔbɔ, okabaa eyi, ni okatee enɔ hu,

⁹ shi moŋ ogbe lɛ. Bo tsutsu otswa lɛ tɛ, ni no sɛɛ lɛ maŋ muu lɛ fɛɛ atswia lɛ tɛi.

¹⁰ Atswia lɛ tɛi ni egbo, ejaakɛ eetao akɛ akpala nyɛ kɛje Yehowa, nyɛNyɔŋmɔ lɛ sɛɛ, mɔ ni jie nyɛ kɛje Ijipt shikpɔŋ lɛ nɔ, he ni aye nyɛ nyɔŋ yɛ lɛ.

¹¹ No baahã Israel muu fɛɛ anu nɔ ni eba lɛ, ni amɛbaashe gbeyei koni akaye nɛkɛ sane fɔŋ nɛɛ eko yɛ nyɛteŋ dɔŋŋ.

¹² “Kɛji nyɛaanu yɛ maji ni Yehowa, nyɛNyɔŋmɔ lɛ, kɛhãa nyɛ ni nyɛhi amɛmli lɛ eko he akɛ

¹³ nyɛteŋ hii yakagbɔmɛi komɛi ete shi yɛ maŋ lɛ mli, ni amɛlaka maŋ lɛ mli bii, ni amɛmiija nyɔŋmɔi krokomɛi ni nyɛleee lɛ,

¹⁴ nyɛtaoa sane nɛɛ mli fitsofitso. Kɛji sane lɛ yɛ mli anɔkwale akɛ abɔ nɛkɛ musu yɛ nyɛteŋ lɛ,

¹⁵ no lɛ nyɛfãa klante yɛ nakai maŋ lɛ mli bii lɛ anɔ; nyɛgbea gbɔmɛi kɛ kooloi fɛɛ.

¹⁶ Nyɛbuaa maŋ lɛ mli nibii fɛɛ ni ji haanii lɛ naa nyɛbuaa shi, yɛ maŋ blohu lɛ mli koni nyɛma maŋ lɛ kɛ haanii lɛ fɛɛ naa la nyɛshãa akɛ shãa afɔle nyɛkɛhãa Yehowa, nyɛNyɔŋmɔ lɛ. Akasaa maŋ lɛ ama dɔŋŋ koni etsɔ̃ amaŋfɔ̃ kɛya naanɔ.

¹⁷ Nyɛkaŋɔa musunii lɛ eko kwraa nyɛtoa nyɛhãa nyɛhe bɔ ni afee ni Yehowa afo emlifu ni naa wa lɛ sɛɛ. Eeena nyɛ mɔbɔ, ni emusuŋ aaatsɔ̃ lɛ yɛ nyɛhe, ni eeehã nyɛyi afa tamɔ bɔ ni ewo nyɛtsɛmɛi lɛ shi lɛ,

¹⁸ ejaakɛ nyɛbo Yehowa, nyɛNyɔŋmɔ lɛ, toi, ni nyɛye ekitãi ni miwoɔ nyɛ ŋmɛnɛ gbi nɛɛ lɛ nɔ, ni nyɛfee nɔ ni ja yɛ Yehowa, nyɛNyɔŋmɔ lɛ, hiɛ.”