5 Mose 12 - ŊMALƐ KRƆŊKRƆŊ LƐ

Jamɔhe Koome

¹ “Akpɔi kɛ mlai ni nyɛjwɛŋ nɔ nyɛye nɔ gbii abɔ ni nyɛyɔɔ shikpɔŋ ni Yehowa, nyɛtsɛmɛi aNyɔŋmɔ lɛ, kɛhãa nyɛ akɛ nyɛnɔ lɛ nɛ.

² Fitemɔ nyɛfitea hei fɛɛ ni maji ni nyɛyaashwie lɛ jaa amɛnyɔŋmɔi lɛ yɛ, yɛ gɔji grɔŋŋi lɛ anɔ jio gɔŋkpɔi lɛ anɔ jio, tsei kusukusuu lɛ fɛɛ ashishi jio.

³ Nyɛkumɔa amɛfɔleshãa latɛi lɛ kɛ shiui ni amɛkɛ tɛi emamɔ lɛ nyɛshwiea; ni amɛ, Ashera, wɔŋ koi lɛ nyɛshãa; amɛtso amãgãi lɛ nyɛfolɔa mli nyɛshwiea shi, koni akaja amɛ yɛ hei nɛɛ dɔŋŋ kɛjɛ kɛyaa nɛɛ.

⁴ “Shi bɔ ni amɛjaa amɛnyɔŋmɔi lɛ jeee nakai nyɛbaaja Yehowa, nyɛNyɔŋmɔ lɛ, yɛ he fɛɛ he kɛkɛ.

⁵ Shi moŋ he ni Yehowa, nyɛNyɔŋmɔ lɛ, baaŋɔ yɛ nyɛkutsei lɛ fɛɛ mli akɛ jɛi afee eshihilɛhe kɛ he ni aja lɛ yɛ lɛ, jɛi nyɛyaa.

⁶ Nyɛkɛ kooloi ni agbeɔ akɛ afɔle kɛ afɔlei ni ashãa lɛ kɛ ekrokomɛi lɛ, nyɛnibii amlijai nyɔŋma mli ekomekome lɛ kɛ nyɛniyenii afɔlei lɛ kɛ nyɛshiwoo afɔlei lɛ kɛ nyɛtsuijurɔ naa nikeenii lɛ kɛ nyɛtoi kɛ nyɛtsinai akromɔbii lɛ, ayaa jɛi.

⁷ Nyɛyea nii lɛ yɛ Yehowa, nyɛNyɔŋmɔ lɛ hiɛ yɛ jɛi, koni nyɛ kɛ nyɛshĩaŋbii fɛɛ amii ashɛ nyɛhe yɛ nyɛninenaa nitsumɔ nii ni Yehowa, nyɛNyɔŋmɔ lɛ, ejɔɔ nɔ lɛ hewɔ.

⁸ “Kɛji nakai be lɛ shɛ lɛ, nyɛkafea tamɔ wɔfeɔ yɛ biɛ ŋmɛnɛ nɛɛ lɛ; bɔ ni mɔ fɛɛ mɔ feɔ nɔ ni sa ehiɛ lɛ,

⁹ ejaakɛ nyɛnako nyɛshɛ shikpɔŋ lɛ ni Yehowa, nyɛNyɔŋmɔ lɛ, kɛhãa nyɛ lɛ nɔ, he ni nyɛbaana hejɔlɛ yɛ lɛ.

¹⁰ Kɛji nyɛfo Yordan Faa lɛ kɛyashɛ shikpɔŋ lɛ ni Yehowa, nyɛNyɔŋmɔ lɛ, kɛhãa nyɛ akɛ nyɛnɔ lɛ nɔ lɛ, Yehowa baahã nyɛfee shweshweeshwe bɔ ni nyɛhenyɛlɔi ni baabɔle nyɛ kɛkpe lɛ gbaŋ nyɛnaa, ni nyɛhe baajɔ nyɛ.

¹¹ Nakai be lɛ, he ni Yehowa, nyɛNyɔŋmɔ lɛ eŋɔ akɛ aja lɛ yɛ lɛ, jɛi nyɛkɛ nibii fɛɛ ni miwoɔ nyɛ kitã yɛ he lɛ ayaa. Nibii nɛɛ ji kooloi ni agbeɔ akɛ nyɛfɔlei kɛ afɔlei ni ashãa lɛ kɛ nyɛŋmɔshi nii amlijaa nyɔŋma mli ekomekomei lɛ kɛ nyɛniyenii afɔlei lɛ kɛ nɔ fɛɛ nɔ ni nyɛ diɛŋtsɛ nyɛwo Yehowa shi yɛ he lɛ.

¹² Nyɛmii ashɛa nyɛhe yɛ Yehowa, nyɛNyɔŋmɔ lɛ hiɛ, nyɛ kɛ nyɛbihii kɛ nyɛbiyei kɛ nyɛwehii kɛ nyɛweyei kɛ Levibii hu ni yɔɔ nyɛmaji lɛ amli lɛ. Ejaakɛ amɛ lɛ agbaŋ shikpɔŋ lɛ eko ahaŋ amɛ yɛ nyɛteŋ.

¹³ Nyɛkwɛa nyɛhe ni ahia koni nyɛkayashãa afɔlei lɛ yɛ he fɛɛ he kɛkɛ ni nyɛaana,

¹⁴ akɛ ja he pɛ ni Yehowa baaŋɔ yɛ nyɛkutsei lɛ ateŋ ekome mli lɛ. Jɛi pɛ nyɛshãa afɔlei lɛ yɛ; ni jɛi nyɛfee nɔ fɛɛ nɔ ni miwoɔ nyɛ he kitã lɛ yɛ.

¹⁵ “Kɛ̃lɛ nyɛyɛ hegbɛ akɛ nyɛgbeɔ nyɛkooloi ni Yehowa nyɛNyɔŋmɔ, kɛduro nyɛ lɛ nyɛyeɔ, bɔ fɛɛ bɔ ni nyɛaanyɛ yɛ nyɛmaji lɛ amli. Mɔ ni he tse kɛ mɔ ni he tseee fɛɛ aaanyɛ aye tamɔ baayelɔ loo ofrote nɛkɛ.

¹⁶ Shi moŋ loo lɛ mli lá lɛ eko kɛkɛ ni nyɛkayea; nyɛtsia no nyɛshwiea tamɔ nu.

¹⁷ Nii ni nyɛkɛmiishã afɔle lɛ, nyɛkayea eko yɛ nyɛmaji lɛ eko kwraa mli. Nyɛbele jio, nyɛwain jio, nyɛmu mlijaa nyɔŋma mli ekomekome lɛ jio, nyɛtoi loo nyɛtsinai akromɔbii lɛ jio, nii ni nyɛkɛwo shi lɛ jio, nyɛtsuijurɔnaa nikeenii lɛ jio, niyenii afɔlei lɛ jio nyɛkayea yɛ nyɛmaji amli.

¹⁸ He pɛ ni nyɛ kɛ nyɛbihii kɛ nyɛbiyei kɛ nyɛwehii kɛ nyɛweyei kɛ Levibii ni yɔɔ nyɛmaji lɛ amli lɛ aye afɔlei lɛ yɛ kɛkɛ ji Yehowa hiɛ, yɛ he ni lɛ Yehowa, nyɛNyɔŋmɔ lɛ, diɛŋtsɛ eŋɔ akɛ aja lɛ yɛ lɛ. Nyɛmii ashɛa nyɛhe yɛ Yehowa nyɛNyɔŋmɔ lɛ hiɛ, yɛ nitsumɔ fɛɛ nitsumɔ ni nyɛaatsu lɛ hewɔ.

¹⁹ Gbii abɔ ni nyɛyɔɔ nyɛshikpɔji lɛ anɔ lɛ, nyɛkwɛa ni ahĩa koni nyɛhiɛ akakpaa Levibii lɛ anɔ.

²⁰ “Kɛji be ni Yehowa, nyɛNyɔŋmɔ lɛ, elɛɛ nyɛhusui lɛ amli tamɔ bɔ ni ewo nyɛ shi lɛ, ni eba nyɛtsine akɛ nyɛye loo lɛ, nyɛyɛ hegbɛ akɛ nyɛyeɔ loo bɔ fɛɛ bɔ ni nyɛaanyɛ.

²¹ Kɛji nyɛmaji lɛ kɛ he koome ni Yehowa, nyɛNyɔŋmɔ lɛ, eŋɔ akɛ aja lɛ yɛ jɛi lɛ teŋ jɛkɛ lɛ, no lɛ nyɛgbea nyɛtoi kɛ nyɛtsinai lɛ ni Yehowa kɛduro nyɛ lɛ, yɛ nyɛmaji lɛ amli, koni nyɛye bɔ fɛɛ bɔ ni nyɛaanyɛ tamɔ bɔ ni miwo nyɛ ehe kitã lɛ.

²² Mɔ ni he tseee kɛ mɔ ni he tse fɛɛ aaanyɛ aye tamɔ baayelɔ loo ofrote nɛkɛ,

²³ shi moŋ nyɛmiaa nyɛhiɛ koni nyɛkaye loo lɛ lá lɛ eko; ejaakɛ lá lɛ wala ni. No hewɔ lɛ, nyɛkayea wala lɛ kɛ loo lɛ fɛɛ.

²⁴ Nyɛkayea lá lɛ; atsi ashwie tamɔ nu.

²⁵ Nyɛkayea la lɛ bɔ ni afee ni kɛji nyɛfee nɔ ni ja yɛ Yehowa hiɛ lɛ, ahi ahã nyɛ kɛ nyɛshwiei fɛɛ.

²⁶ Shi nyɛnikeenii krɔŋkrɔŋi lɛ kɛ nyɛshiwoonii lɛ, nyɛkɛyaa he ni Yehowa eŋɔ akɛ aja lɛ yɛ lɛ,

²⁷ koni kooloo afɔle ni ashãa lɛ loo lɛ kɛ lá lɛ fɛɛ lɛ, nyɛshã yɛ Yehowa, nyɛNyɔŋmɔ lɛ, afɔleshãa latɛ lɛ nɔ. Shi afɔlei krokomɛi lɛ agbɛfaŋ lɛ, nyɛtsia lá lɛ nyɛshwiea afɔleshãa latɛ lɛ nɔ; shi loo lɛ nyɛyea.

²⁸ Nyɛjwɛŋa nɔ, ni nyɛyea nibii fɛɛ ni mikɛɛ nyɛ lɛ nɔ, ni ebaahi ehã nyɛ kɛ nyɛshwiei fɛɛ kɛya naanɔ, kɛ nyɛfee nɔ ni hi kɛ nɔ ni ja yɛ Yehowa, nyɛNyɔŋmɔ lɛ, hiɛ lɛ.

Amãgãjamɔ he kɔkɔbɔɔ

²⁹ “Kɛji Yehowa, nyɛNyɔŋmɔ lɛ, kpãtã maji ni nyɛyaa nyɛyaŋɔ amɛshikpɔji lɛ yɛ amɛdɛŋ lɛ ahiɛ, ni nyɛŋɔ shikpɔŋ lɛ nyɛhi nɔ lɛ,

³⁰ nyɛkwɛa ni ahia koni be ni akpãtã amɛhiɛ yɛ nyɛhiɛ sɛɛ lɛ, ni nyɛkanyiɛ amɛsɛɛ, ni nyɛyadu tsɔne, ni nyɛkabia amɛnyɔŋmɔi lɛ ahe sane ni nyɛkɛɛ akɛ, ‘Te amɛjaa amɛnyɔŋmɔi lɛ amɛhãa tɛŋŋ,’ ni nyɛ hu nyɛfee nakai.

³¹ Nyɛkajaa Yehowa, nyɛNyɔŋmɔ lɛ, tamɔ amɛjaa amɛnyɔŋmɔi lɛ, ejaakɛ nibii fɛɛ ni Yehowa hiɔ lɛ, nomɛi moŋ amɛfeɔ amɛkɛjaa amɛnyɔŋmɔi lɛ. Amɛgbeɔ amɛbihii kɛ amɛbiyei tete amɛkɛshãa afɔle amɛhãa amɛnyɔŋmɔi lɛ.

³² “Nyɛyea nibii fɛɛ ni miwo nyɛ he kitã lɛ anɔ; nyɛkɛ nɔ ko akafataa he, ni nyɛkajiea nɔ ko hu yɛ mli.