5 Mose 10 - ŊMALƐ KRƆŊKRƆŊ LƐ

Aŋma Kitãi lɛ ahã Mose ekoŋŋ

¹ “Nakai be lɛ mli nɔŋŋ lɛ, Yehowa kɛɛ mi akɛ, ‘Ko tɛi tɛtɛrɛbii enyɔ ni tamɔ klɛŋklɛŋ tɛi lɛ; asaŋ okɛ tso akpɛ adeka. Kɔlɔmɔ tɛi lɛ kɛba miŋɔɔ yɛ gɔŋ lɛ nɔ.

² Mibasaa maŋma wiemɔi ni yɔɔ tsutsu tɛi lɛ ni ojwara lɛ anɔ lɛ mawo tɛi tɛtɛrɛbii nɛɛ anɔ ni okɛ tɛi lɛ ato adeka lɛ mli.’

³ “No hewɔ lɛ, mikpɛ tso adeka ko, ni miko tɛi tɛtɛrɛbii enyɔ tamɔ tsutsu tɛi tɛtɛrɛbii lɛ. Kɛkɛ ni mihole tɛi tɛtɛrɛbii lɛ mihiɛ kɛkwɔ gɔŋ lɛ.

⁴ Ni tamɔ bɔ ni Yehowa fee klɛŋklɛŋ lɛ, eŋma kitãi Nyɔŋma lɛ ewo tɛi tɛtɛrɛbii lɛ anɔ. Kitãi nɛɛ ji wiemɔ ni Yehowa jɛ la lɛ teŋ ekɛ nyɛ wie kɛjɛ gɔŋ lɛ nɔ lɛ, gbi nɔ ni maŋ lɛ kpe kpee wulu lɛ. Kɛkɛ ni Yehowa kɛ tɛi tɛtɛrɛbii lɛ hã mi,

⁵ ni mitsɔ̃ mihe, ni mikpeleke shi kɛjɛ gɔŋ lɛ nɔ kɛba. Ni tamɔ bɔ ni Yehowa fã akɛ mifee lɛ, mikɛ tɛi tɛtɛrɛbii lɛ bawo adeka lɛ ni mikpɛ lɛ mli, ni amɛyɛ mli kɛbashi ŋmɛnɛ.”

⁶ (Israelbii lɛ fã nyiɛmɔ kɛjɛ Yaakanbii lɛ anubui lɛ ahe kɛtee Mosera. Jɛi Aaron gbo yɛ, ni jɛi nɔŋŋ afu lɛ yɛ. Kɛkɛ ni ebinuu Eleazar baye esɛɛ akɛ osɔfo.

⁷ Kɛjɛ Mosera lɛ, Israelbii lɛ fã kɛtee Gudgoda; ni kɛjɛ Gudgoda lɛ amɛtee Yotbata, ni ji shikpɔŋ ko ni fai yɔɔ nɔ lɛ.

⁸ Be ni ayɔɔ gɔŋ lɛ he lɛ, Yehowa ŋɔ Levi akutso lɛ akɛ amɛ amɛtere Kpãŋmɔ Adeka lɛ. Asaŋ amɛ amɛdamɔ ehiɛ amɛsɔmɔ lɛ, ni amɛ pɛ amɛkɛ egbɛi ajɔɔ mɛi. Nitsumɔi nɛɛ amli amɛhiɛ kɛbashi ŋmɛnɛ gbi nɛɛ.

⁹ No hewɔ ni Levibii akutso lɛ naaa amɛ kɔkrɔɔ amɛshikpɔŋ tamɔ akutsei krokomɛi lɛ. Amɛ lɛ, amɛgbɛfaŋnɔ ji akɛ amɛ amɛsɔmɔ Yehowa tamɔ bɔ ni Yehowa, nyɛNyɔŋmɔ lɛ, ekɛɛ amɛ lɛ.)

¹⁰ “Mihi gɔŋ lɛ nɔ shwaneshwane kɛ nyɔɔŋnyɔɔŋ gbii nyɔŋmai ejwɛ tamɔ tsutsu lɛ nɔŋŋ. Yehowa bo mi toi nakai be lɛ mli hu, ni eŋɔ nɔ akɛ ekpãtãaa nyɛhiɛ dɔŋŋ.

¹¹ Kɛkɛ ni Yehowa kɛɛ mi akɛ, ‘Yaa ni oyanyiɛ maŋ lɛ hiɛ koni amɛya ni amɛyaŋɔ shikpɔŋ lɛ ni miwo amɛtsɛmɛi lɛ shi yɛ he akɛ mikɛbaahã amɛ lɛ.’ ”

Nɔ ni Nyɔŋmɔ taoɔ yɛ maŋ lɛ dɛŋ

¹² “No hewɔ lɛ, agbɛnɛ Israel, mɛni Yehowa, nyɛNyɔŋmɔ lɛ, taoɔ yɛ nyɛdɛŋ dɔŋŋ fe akɛ nyɛshe Yehowa, nyɛNyɔŋmɔ lɛ, gbeyei, ni nyɛba nyɛjeŋ bɔ ni etsɔ̃ɔ nyɛ lɛ, ni nyɛsumɔ lɛ ni nyɛ kɛ nyɛtsui fɛɛ kɛ nyɛnyɛmɔ fɛɛ hu asɔmɔ lɛ.

¹³ Nyɛyea Yehowa kitãi lɛ kɛ ekpɔi ni miwo nyɛ ŋmɛnɛ gbi nɛɛ lɛ nɔ koni ahi ahã nyɛ.

¹⁴ Naa, Yehowa, nyɛNyɔŋmɔ lɛ, ŋwɛi kɛ ŋwɛi amli ŋwɛi lɛ enɔ ni; ni shikpɔŋ lɛ kɛ emli nii lɛ fɛɛ hu enɔ ni.

¹⁵ Kɛ̃lɛ Yehowa na suɔmɔ krɛdɛɛ hã nyɛtsɛmɛi lɛ ni eŋɔ nyɛ, ni ji amɛshwiei lɛ, yɛ maji fɛɛ ateŋ; ni nakai ekɛ nyɛ yɔɔ kɛbashi ŋmɛnɛ.

¹⁶ No hewɔ lɛ, nyɛtsakea nyɛtsui ni nyɛkpliŋ lɛ, ni nyɛkafea nyɛhe kuɛŋtilɔi dɔŋŋ.

¹⁷ Ejaakɛ Yehowa, nyɛNyɔŋmɔ lɛ, lɛ ji nyɔŋmɔi fɛɛ aNyɔŋmɔ kɛ nuŋtsɔmɛi anuŋtsɔ; lɛ ji Nyɔŋmɔ Ofe ni je agbo, ni he yɔɔ gbeyei lɛ; mɔ ni kwɛɛɛ hiɛiaŋ, ni asaŋ eheee nyɔɔŋnii lɛ.

¹⁸ Eyeɔ awusã kɛ okulafo sane ehãa amɛ, ni edɔɔ gbɔ he, ni ehãa amɛ nɔ ni amɛaaye kɛ nɔ ni amɛkɛaahã amɛhe.

¹⁹ No hewɔ lɛ, nyɛdɔa gbɔ he ejaakɛ nyɛ hu nyɛyato gbɔ pɛŋ yɛ Ijipt shikpɔŋ lɛ nɔ.

²⁰ Nyɛshea Yehowa, nyɛNyɔŋmɔ lɛ, gbeyei; nyɛsɔmɔa lɛ; nyɛkpɛtɛa ehe, ni lɛ egbɛi lɛ pɛ nyɛkɛkã kitã.

²¹ Nyɛjiea eyi ejaakɛ lɛ ji nyɛNyɔŋmɔ lɛ; ni asaŋ nyɛna kɛ nyɛhiŋmɛi nibii wuji ni yɔɔ gbeyei ni etsu ehã nyɛ lɛ.

²² Nyɛtsɛmɛi lɛ ni tee Ijipt lɛ ayikulɛ ji gbɔmɛi nyɔŋmai kpawo; shi ŋmɛnɛ lɛ, Yehowa, nyɛNyɔŋmɔ lɛ, ehã nyɛyi efa tamɔ ŋwɛi ŋulamii.”