5 Mose 1 - ŊMALƐ KRƆŊKRƆŊ LƐ

Saji ni ba yɛ Horeb lɛ

¹ Mose kɛ Israel fɛɛ wie Wolo nɛɛ mli wiemɔi nɛɛ yɛ Yordan Faa lɛ bokãgbɛ, yɛ ŋa kplenee ni kã Suf maŋ lɛ ŋlɛnɔ lɛ nɔ. Ŋa nɛɛ kã Paran maŋ lɛ kɛ Tofel kɛ Laban kɛ Hazerot kɛ Dizahab maji lɛ ateŋ.

² Kɛjɛ Sinai Gɔŋ lɛ he kɛtsɔ̃ Edom Gɔŋ lɛ he gbɛ lɛ nɔ kɛtee Kadesh Barnea lɛ, gbii nyɔŋma kɛ ekome gbɛnyiɛmɔ ni.

³ Afi ni ji nyɔŋmai ejwɛ lɛ mli nyɔŋ ni ji nyɔŋma kɛ ekome lɛ klɛŋklɛŋ gbi lɛ nɔ lɛ, Mose kɛ Israelbii lɛ wie wiemɔi fɛɛ ni Yehowa efã lɛ akɛ ekɛ amɛ awie lɛ.

⁴ No mli lɛ Mose egbe Amorbii amaŋtsɛ Sihon, mɔ ni ye lumɔ yɛ Heshbon lɛ, kɛ Bashan maŋtsɛ Og, mɔ ni ye lumɔ yɛ Ashtarot kɛ Edrei lɛ momo.

⁵ Mose bɔi mlai lɛ anaatsɔ̃ɔmɔ yɛ Yordan bokãgbɛ yɛ Moab Shikpɔŋ lɛ nɔ. Ekɛɛ maŋ lɛ akɛ,

⁶ “Yehowa, wɔNyɔŋmɔ lɛ, kɛɛ wɔ yɛ Horeb Gɔŋ lɛ he akɛ, ‘Bɔ ni nyɛhi nɛkɛ gɔŋ nɛɛ he lɛ efa.

⁷ Nyɛdɔa nyɛyi koni nyɛfãa kɛyaa Amorbii agɔji ashikpɔŋ lɛ kɛ hei fɛɛ ni bɛŋkɛ jɛi lɛ nɔ. Hei nɛɛ ji Yordan Jɔɔ shikpɔŋ lɛ, ni yɔɔ wuoyigbɛ lɛ kɛyamɔ Mediterenia Ŋshɔ lɛ naa, kɛ Kanaanbii ashikpɔŋ lɛ kɛ Lebanon aahu kɛyamɔ faa wulu ni ji Eufrate lɛ naa.

⁸ Shikpɔŋ lɛ mikɛfɔ̃ nyɛhiɛ nɛɛ. Nyɛyaa ni nyɛyaŋɔa! Yehowa wo nyɛtsɛmɛi Abraham kɛ Isak kɛ Yakob shi yɛ he akɛ ekɛbaahã amɛ kɛ amɛshwiei.’ ”

Mose to kojolɔi

⁹ Mose kɛɛ maŋ lɛ akɛ, “Be ni wɔyɔɔ Sinai Gɔŋ lɛ he lolo lɛ, mikɛɛ nyɛ akɛ, ‘Mi kome minyɛŋ nyɛsaji lɛ makura dɔŋŋ.

¹⁰ Yehowa, nyɛNyɔŋmɔ lɛ, ehã nyɛyi efa, ni ŋmɛnɛ nyɛyikulɛ tamɔ ŋwɛi ŋulamii.

¹¹ Yehowa, nyɛtsɛmɛi aNyɔŋmɔ lɛ, ahã nyɛyi afa bɔ ni nyɛyɔɔ amrɔ nɛɛ toi akpei abɔ; ni ejɔɔ nyɛ tamɔ bɔ ni ewo nyɛ shi lɛ.

¹² Te mafee tɛŋŋ ni mi koome manyɛ nyɛhaomɔi kɛ nyɛteŋ saji fɛɛ makura hu?

¹³ Nyɛfamɔa hii ni le nii, ni nuɔ nii ashishi, asaŋ ni amɛkpa jeŋ shi, yɛ nyɛkutsei lɛ anaa koni mato amɛ nyɛnukpai.’

¹⁴ Ni nyɛhere nɔ ni nyɛkɛɛ mi akɛ, ‘Nɔ ni okɛɛ wɔfee nɛɛ, ehi!’

¹⁵ Kɛkɛ ni miŋɔ nyɛkutsei lɛ amli hii ni le nii, ni yɔɔ gbɛi hu ni nyɛfamɔ lɛ, ni miwo amɛ onukpai mihã nyɛ, mɛi akpeakpe kui kɛ mɛi ohaoha kui kɛ mɛi nyɔŋmai enumɔenumɔ kui kɛ mɛi nyɔŋmanyɔŋma kui anɔkwɛlɔi kɛ nyɛkutsei lɛ anɔkwɛlɔi hu.

¹⁶ “Miwo nyɛkojolɔi lɛ kitã nakai be lɛ mli, ni mikɛɛ amɛ akɛ, ‘Nyɛkuraa saji ni aaaba nyɛnyɛmimɛi lɛ ateŋ lɛ ni nyɛkojoa mɔ kɛ enyɛmi teŋ loo maŋnyo kɛ gbɔ teŋ sane yɛ jalɛ naa.

¹⁷ Nyɛkakwɛa hiɛiaŋ nyɛkɛkojoa; nyɛboa mɔ bibioo kɛ mɔ wulu fɛɛ toi pɛpɛɛpɛ, ni nyɛkashea gbɔmɔ hiɛ sanekɛɛmɔ gbeyei, ejaakɛ Nyɔŋmɔ ji mɔ ni baakudɔ nyɛ kɛkojo. Shi sane ni mli wa tsɔ̃ hã nyɛ lɛ, nyɛkɛbahãa mi koni maye.’

¹⁸ Nakai be lɛ mli nɔŋŋ lɛ, mitsɔ̃ɔ nyɛ nibii fɛɛ ni sa akɛ nyɛfee.”

Atsu mɛi kɛjɛ Kadesh Barnea amɛyasara shikpɔŋ lɛ

¹⁹ “Wɔfã kɛjɛ Sinai Gɔŋ lɛ he, ni tamɔ bɔ ni Yehowa, wɔNyɔŋmɔ lɛ, efã wɔ lɛ, wɔtsɔ̃ shiaŋa ni nɔ yɔɔ gbeyei, tamɔ nyɛna lɛ, nɔ yɛ gbɛ ni yaa Amorbii agɔji ashikpɔŋ lɛ nɔ lɛ nɔ, ni wɔbashɛ Kadesh Barnea.

²⁰ Kɛkɛ ni mikɛɛ nyɛ akɛ, ‘Nyɛshɛ Amorbii agɔji shikpɔŋ lɛ ni Yehowa, wɔNyɔŋmɔ lɛ, kɛmiihã wɔ lɛ nɔ.

²¹ Naa shikpɔŋ lɛ, no Yehowa, nyɛNyɔŋmɔ lɛ kɛfɔ̃ nyɛhiɛ nɛɛ. Nyɛyaa ni nyɛyaŋɔa tamɔ bɔ ni Yehowa, nyɛtsɛmɛi aNyɔŋmɔ lɛ, kɛɛ nyɛ lɛ. Nyɛkashea gbeyei, ni nyɛtsuii akafãa hu.’

²² “Kɛkɛ ni nyɛ fɛɛ tswɛm nyɛtsi nyɛbɛŋkɛ mi, ni nyɛkɛɛ mi akɛ, ‘Hã wɔtsu hii komɛi kɛtsɔ̃ wɔhiɛ ni amɛyasara shikpɔŋ lɛ koni amɛbagba wɔ he ni wɔtsɔ̃ kɛya kɛ maji ni wɔyaanina lɛ hu ahe sane.’

²³ “Wiemɔ lɛ sa mihiɛ, ni no hewɔ lɛ, miŋɔ nyɛteŋ mɛi nyɔŋma kɛ enyɔ, akutso fɛɛ akutso mli lɛ mɔ kome, ni mitsu amɛ.

²⁴ Amɛyi mli, ni amɛkwɔ kɛtee gɔji ashikpɔŋ lɛ nɔ, ni amɛtee aahu kɛyashɛ Eshkol Jɔɔ lɛ mli, ni amɛyasara jɛi.

²⁵ Amɛtserɛ shikpɔŋ lɛ nɔ aduawai lɛ eko amɛhiɛ amɛdɛ̃, ni amɛkɛkpeleke shi kɛba, ni amɛbagba wɔ akɛ, ‘Shikpɔŋ ni Yehowa, wɔNyɔŋmɔ lɛ, kɛhãa wɔ lɛ, ehi.’

²⁶ “Shi nyɛtse Yehowa, nyɛNyɔŋmɔ lɛ, hiɛ atua, ni nyɛyayeee ewiemɔ lɛ nɔ, ni nyɛkwa shikpɔŋ lɛ nɔ yaa.

²⁷ Nyɛwie huhuuhu yɛ nyɛbui lɛ amli, ni nyɛkɛɛkɛɛ akɛ, ‘Nyɛɛ ni Yehowa nyɛɔ wɔ lɛ hewɔ ni eyajie wɔ kɛje Ijipt shikpɔŋ lɛ nɔ kɛba koni ekɛ wɔ abahã Amorbii lɛ koni amɛkpãtã wɔhiɛ.

²⁸ Nɛgbɛ wɔɔtsɔ̃ kɛya?’ Wɔnyɛmimɛi lɛ ehã wɔtsui efã, ejaakɛ amɛkɛɛ, ‘Gbɔmɛi lɛ dara ni amɛkwɔlɔ fe wɔ; amɛmaji lɛ hu dara, ni atswa gbogboi ni kwɔlɔ kɛyashi ŋwɛi awowoo amɛhe; ni wɔna Anakbii tete yɛ jɛi.’

²⁹ “Kɛkɛ ni mikɛɛ nyɛ akɛ, ‘Nyɛkahãa ŋmiŋmi miimɔmɔa nyɛ, ni nyɛkashea amɛ gbeyei hu.

³⁰ Yehowa, nyɛNyɔŋmɔ lɛ, mɔ ni nyiɛ nyɛhiɛ lɛ, baawu ehã nyɛ lɛ diɛŋtsɛ, tamɔ bɔ ni efee ehã nyɛ yɛ nyɛ diɛŋtsɛ nyɛhiŋmɛiaŋ, yɛ Ijipt,

³¹ kɛ ŋa lɛ nɔ lɛ. Ni nyɛna bɔ ni Yehowa, nyɛNyɔŋmɔ lɛ, hiɛ nyɛmli kɛyashi nyɛbashɛ biɛ nɛɛ tamɔ bɔ ni nuu hiɛɔ ebi yɛ ekpɔkɔiaŋ lɛ.’

³² Shi nɛkɛ wiemɔ nɛɛ fɛɛ sɛɛ lɛ, nyɛyaheee Yehowa, nyɛNyɔŋmɔ lɛ, nyɛyeee,

³³ tsɛbelɛ nyɔɔŋ lɛ enyiɛ nyɛhiɛ akɛ la koni etsɔ̃ɔ nyɛ he gbɛ ni nyɛtsɔ̃, ni shwane lɛ enyiɛ nyɛhiɛ akɛ atatu.”

Yehowa gbala Israel toi

³⁴ “Yehowa nu wiemɔi ni nyɛwiewie lɛ, ni ewo lɛ mlifu, ni ekã kitã ekɛɛ akɛ,

³⁵ ‘Nɛkɛ yinɔ fɔŋ nɛɛ nɔ bii nɛɛ ateŋ mɔ ko mɔ ko enaŋ shikpɔŋ kpakpa ni mikã he kitã akɛ mikɛbaahã nyɛtsɛmɛi lɛ kɔkɔɔkɔ.

³⁶ Kaleb, Yefune bi lɛ, pɛ ni aaana jɛi, ni lɛ kɛ eshwiei nɔŋŋ mikɛ shikpɔŋ lɛ ni eyasara lɛ baahã, ejaakɛ eye mi anɔkwa kɛmɔ shi.’

³⁷ Mi hu, nyɛhewɔ lɛ Yehowa mli fu mi, ni ekɛɛ akɛ, ‘Bo Mose, bo hu oshɛŋ shikpɔŋ lɛ nɔ.

³⁸ Yoshua, Nun bi lɛ, mɔ ni waa bo lɛ ji mɔ ni baaya ayashɛ jɛi. Wo lɛ hewalɛ ejaakɛ lɛ ji mɔ ni baanyiɛ Israelbii lɛ ahiɛ kɛyaŋɔ shikpɔŋ lɛ akɛ amɛnɔ.

³⁹ Asaŋ nyɛbifabii ni ji nyɛbii ni nako ale ekpakpa kɛ efɔŋ lɛ, mɛi ni nyɛkɛɛ abaaŋɔ amɛ nom lɛ, amɛ amɛbaayashɛ shikpɔŋ nɛɛ nɔ, ni amɛ mikɛ shikpɔŋ lɛ baahã, ni amɛbaaŋɔ akɛ amɛnɔ.

⁴⁰ Shi nyɛ lɛ, nyɛdɔa nyɛyi koni nyɛtsɔ̃a Akaba Bele lɛ he gbɛ lɛ nɔ kɛyaa shiaŋa lɛ nɔ.’

⁴¹ “Kɛkɛ ni nyɛhere nɔ, ni nyɛkɛɛ mi akɛ, ‘Wɔgbo Yehowa nɔ toi; wɔɔtee koni wɔyawu tamɔ bɔ pɛ ni Yehowa fã akɛ wɔfee lɛ.’ Nyɛteŋ mɔ fɛɛ mɔ mia kɛ etawuu nii, ejaakɛ efee nyɛ akɛ gɔŋ nɔ shikpɔŋ lɛ tuamɔ lɛ shwɛmɔ nɔ ko ni.

⁴² “Shi Yehowa kɛɛ mi akɛ, ‘Bɔɔ amɛ kɔkɔ akɛ nyɛkayaa ni nyɛyawua, koni nyɛhenyɛlɔi lɛ akaye nyɛnɔ ejaakɛ mi kɛ nyɛ eyaŋ.’

⁴³ Ni mikɛɛ nyɛ hu, shi nyɛbooo mi toi, ni nyɛtse Yehowa hiɛ atua, ni nyɛfee ntɛŋ kɛkwɔ kɛtee gɔŋ shikpɔŋ lɛ nɔ.

⁴⁴ Kɛkɛ ni Amorbii lɛ ni yɔɔ nakai gɔji ashikpɔŋ lɛ nɔ lɛ je kpo, ni amɛ kɛ nyɛ bakpe, ni amɛshwie nyɛ, tamɔ wobii shwieɔ mɔ lɛ, ni amɛtswia nyɛ nii kɛjɛ Edom aahu kɛyashi Horma.

⁴⁵ Ni nyɛku nyɛsɛɛ nyɛba, ni nyɛbafo nyɛtsɔ̃ɔ Yehowa shi Yehowa kwɛɛɛ nyɛ lɛ, efooo nyɛdaaŋ hu.”

Afii ni aye yɛ shiaŋa lɛ nɔ

⁴⁶ “No hewɔ lɛ, nyɛye gbii babaoo yɛ Kadesh bɔ ni nyɛle momo lɛ.