4 Mose 9 - ŊMALƐ KRƆŊKRƆŊ LƐ

Hehoo gbijurɔyeli ni ji enyɔ lɛ

¹ Yehowa kɛ Mose wie yɛ Sinai Shiaŋa lɛ nɔ yɛ Israelbii lɛ Ijipt shikpɔŋ lɛ nɔ shimɔ sɛɛ afi ni ji enyɔ lɛ klɛŋklɛŋ nyɔŋ lɛ nɔ, ni ekɛɛ lɛ akɛ,

² “Hã ni Israelbii lɛ aye Hehoo Gbijurɔ lɛ yɛ ebe ni ato lɛ mli.

³ Nɛkɛ nyɔŋ nɛɛ nɔ gbi nyɔŋma kɛ ejwɛ lɛ nɔ gbɛkɛnaashi lɛ, nyɛyea gbijurɔ lɛ yɛ ebe ni ato lɛ mli; nyɛyea lɛ yɛ ehe akpɔi kɛ gbɛjianɔtoi lɛ fɛɛ anaa pɛpɛɛpɛ.”

⁴ No hewɔ lɛ, Mose kɛɛ Israelbii lɛ koni amɛye Hehoo Gbijurɔ lɛ;

⁵ ni amɛye Hehoo lɛ yɛ klɛŋklɛŋ nyɔŋ lɛ nɔ gbi nyɔŋma kɛ ejwɛ lɛ gbɛkɛnaashi, yɛ Sinai Shiaŋa lɛ nɔ. Bɔ ni Yehowa fã Mose lɛ nakai pɛpɛɛpɛ Israelbii lɛ fee.

⁶ Shi hii komɛi yata gbonyo he, ni amɛbule amɛhe; ni no hewɔ lɛ, amɛnyɛɛɛ Hehoo Gbijurɔ lɛ amɛye yɛ nakai gbi lɛ nɔ. Enɛ hewɔ lɛ, hii nɛɛ ba Mose kɛ Aaron ŋɔɔ yɛ Hehoo gbi lɛ nɔ nɔŋŋ.

⁷ Amɛbakɛɛ Mose akɛ, “Wɔ lɛ wɔyabule wɔhe kɛ gbonyo ko he ni wɔyata lɛ. Mɛni hewɔ ni atsiɔ wɔ gbɛ akɛ wɔkɛ wɔnikeenii akabahã Yehowa yɛ ebe ni eto lɛ mli tamɔ Israelbii krokomɛi lɛ?”

⁸ Mose kɛɛ amɛ akɛ, “Nyɛmɛa kɛyashi Yehowa aaakɛɛ mi nɔ ni afee yɛ nyɛhewɔ.”

⁹ Ni Yehowa kɛɛ Mose akɛ,

¹⁰ “Kɛɛmɔ Israelbii lɛ akɛ, ‘Kɛji nyɛteŋ mɔ ko loo nyɛshwiei lɛ eko yata gbonyo he ni ekɛbule ehe, aloo edom etee maŋsɛɛ shɔŋŋ he ko tete lɛ, ebaanyɛ eye Hehoo lɛ ehã Yehowa kɛ̃.

¹¹ Nɛkɛ gbɔmɛi lɛ amɛye Hehoo lɛ yɛ nyɔŋ ni nyiɛ sɛɛ lɛ nɔ gbi ni ji nyɔŋma kɛ ejwɛ lɛ gbɛkɛnaashi. Amɛkɛ mã akpiti kɛ shwie ni joɔ aye;

¹² amɛkashwɛ eko ni je tsɛre nɔ, ni asaŋ amɛkajwa kooloo ni agbe akɛye lɛ wui lɛ eko. Amɛye Hehoo lɛ yɛ ehe akpɔi lɛ fɛɛ anaa.

¹³ Shi mɔ ni he tse, ni asaŋ edomko, shi kɛ̃lɛ ekwa Hehoo Gbijurɔ lɛ yeli lɛ, nakai mɔ lɛ ehiɛ aaakpãtã yɛ maŋbii lɛ ateŋ, ejaakɛ ekɛ Yehowa nikeenii lɛ baaa ebahãaa yɛ be ni ato lɛ mli. Nakai gbɔmɔ lɛ yi sɔ̃ atere lɛ diɛŋtsɛ.’

¹⁴ “Ni kɛji mɔkpɔŋ ko bato gbɔ yɛ nyɛteŋ ni eesumɔ akɛ eye Yehowa Hehoo Gbijurɔ lɛ, eye; shi eye yɛ Hehoo lɛ he akpɔ kɛ gbɛjianɔtoo lɛ anaa. Akpɔ kome akã shi ahã mɔ fɛɛ mɔ, gbɔ jio, mɔ ni afɔ lɛ yɛ shikpɔŋ lɛ nɔ jio.”

Atatu ni kpɛɔ kɛ la lɛ

¹⁵ Gbi nɔ ni ashi Kpee Buu Krɔŋkrɔŋ lɛ amã shi lɛ, atatu lɛ baha nɔ. Gbɛkɛ lɛ kɛ aakwɛ lɛ atatu lɛ tsoɔ tamɔ la yɛ Kpee Buu Krɔŋkrɔŋ lɛ nɔ kɛyashiɔ leebi.

¹⁶ Ni nakai eyɔɔ daa; atatu lɛ haa Buu lɛ nɔ ni gbɛkɛ lɛ etsoɔ tamɔ la.

¹⁷ Be fɛɛ be ni atatu lɛ aaawo ehe nɔ kɛjɛ Buu lɛ nɔ lɛ, Israelbii lɛ fãa nyiɛmɔ; ni he ni atatu lɛ aaayawa yɛ lɛ, jɛi Israelbii lɛ toɔ shi yɛ.

¹⁸ Israelbii lɛ fãa nyiɛmɔ yɛ Yehowa fãmɔ naa, ni amɛtoɔ shi hu yɛ Yehowa fãmɔ nɔŋŋ naa. Gbii abɔ fɛɛ ni atatu lɛ ma shi yɛ Kpee Buu Krɔŋkrɔŋ lɛ nɔ lɛ, Israelbii lɛ hiɔ shitoohe lɛ mli.

¹⁹ Kɛji atatu lɛ tsɛ akɛ amɛ yɛ Kpee Buu Krɔŋkrɔŋ lɛ nɔ lɛ, Israelbii lɛ boɔ Yehowa toi, ni amɛfãaa kɔkɔɔkɔ.

²⁰ Bei komɛi lɛ atatu lɛ yeɔ gbii fioo ko kɛkɛ yɛ Kpee Buu Krɔŋkrɔŋ lɛ nɔ. Shi bɔ fɛɛ bɔ ni eba lɛ ehã lɛ, Israelbii lɛ toɔ shi yɛ Yehowa fãmɔ naa, ni amɛfãa nyiɛmɔ hu yɛ Yehowa fãmɔ naa.

²¹ Kɛji atatu lɛ hi shi kɛjɛ gbɛkɛ kɛyashi jetsɛremɔ, ni ewo ehe nɔ leebi lɛ nɔŋŋ lɛ, Israelbii lɛ fãa nyiɛmɔ lɛ nɔŋŋ, ni eye gbi muu kɛmɔ enɔ jetsɛremɔ hu, be fɛɛ be ni atatu lɛ woɔ ehe nɔ lɛ Israelbii lɛ fãa.

²² Ni kɛ gbii enyɔ atatu lɛ ye yɛ Kpee Buu Krɔŋkrɔŋ lɛ nɔ jio, nyɔŋ kome jio, be kakadaŋŋ jio, gbii abɔ ni eyɔɔ Buu lɛ nɔ lɛ, Israelbii lɛ efãaa. Shi kɛji ewo ehe nɔ pɛ, kɛkɛ lɛ amɛfã.

²³ Amɛtoɔ shi yɛ Yehowa fãmɔ naa, ni amɛfãa yɛ Yehowa nɔŋŋ fãmɔ naa. Amɛye Yehowa gbee nɔ tamɔ bɔ ni etsɔ Mose nɔ efã amɛ akɛ amɛfee lɛ.