4 Mose 6 - ŊMALƐ KRƆŊKRƆŊ LƐ

Nazirnyofeemɔ he mlai

¹ Yehowa kɛɛ Mose akɛ,

² “Kɛɛmɔ Israelbii lɛ akɛ, ‘nuu fɛɛ nuu loo yoo fɛɛ yoo ni eje gbɛ ewo shi akɛ eeefee ehe Nazirnyo, ni no hewɔ lɛ, ejɔɔ ehe nɔ kwraa ehã Yehowa lɛ,

³ ekanu wain loo dãa ni wa; ekanu vinega ni akɛ wainyibii loo dãa ni wa fee. Nɔ fɛɛ nɔ ni akɛ wainyibii fee lɛ ekanu; ni wainyibii ŋmɔŋ jio, nɔ ni aka lɛ egbiŋ jio, ekaye.

⁴ Bei abɔ fɛɛ ni etsɛɔ ehe Nazirnyo lɛ ekaye nɔ ko nɔ ko ni akɛ wain tso he nɔ ko fee. Eyibii lɛ mli wui tete loo ehetoto po ekaye eko.’

⁵ “Kɛyaashi eeeye ebe ni ewo shi akɛ ejɔɔ ehe nɔ ehã Yehowa etã lɛ, ekaku eyi, ni yishɛɛ kakla naa akasa eyiteŋ. Shiwoo lɛ fĩɔ lɛ bei abɔ fɛɛ ni ejɔɔ ehe nɔ kwraa ehã Yehowa lɛ. Mɔ krɔŋkrɔŋ ji lɛ; ni eŋmɛ eyi kusuu.

⁶ Gbii abɔ fɛɛ ni ejɔɔ ehe nɔ ehã Yehowa lɛ, ekaya gbonyo ko masɛi

⁷ Kɛ etsɛ loo enyɛ loo enyɛmi nuu loo enyɛmi yoo tete gbo lɛ, ekaya gbonyo lɛ masɛi ni ekɛbule ehe, yɛ ehe nɔ ni ejɔɔ ehã Yehowa lɛ hewɔ, ejaakɛ

⁸ bei abɔ fɛɛ ni Nazirnyo ji lɛ lɛ, mɔ krɔŋkrɔŋ ji lɛ hã Yehowa.

⁹ “Kɛji mɔ ko tswa shi egbo trukaa yɛ emasɛi, ni no hewɔ lɛ, ebule eyiteŋ tsɔi lɛ ni ejɔɔ nɔ lɛ, eshɛ eyi lɛ yɛ gbi ni ji kpawo lɛ nɔ ni ekɛtsuu ehe.

¹⁰ Gbi ni ji kpaanyɔ lɛ nɔ lɛ ehiɛ kosɛɛ okpoi enyɔ loo okpoi bibii enyɔ ekɛbahã osɔfo lɛ yɛ Kpee Buu lɛ shinaa lɛ shi.

¹¹ Osɔfo lɛ aŋɔ okpoi lɛ ekome koni ekɛshã esha he afɔle, ni ekɛ ekome lɛ hu ashã shãa afɔle koni ekɛkpãtã ehã lɛ; ejaakɛ gbonyo lɛ ewo ehe muji. Nakai gbi lɛ, mɔ lɛ aku sɛɛ ejɔɔ eyiteŋ tsɔi lɛ nɔ ekoŋŋ ehã Yehowa.

¹² Esaa ejɔɔ ehe nɔ ehã Yehowa ekoŋŋ ejaakɛ be ni ewo shi tsuutsu lɛ eho. Ekɛ too gwantɛŋ binuu ni eye afi aba ekɛbashã fɔyeli he afɔle, ejaakɛ ebule ehe nɔ ni ejɔɔ lɛ, ni ekɛhã be ni eye momo lɛ efee yaka.

¹³ “Kɛji Nazirnyo eye be ni ewo shi akɛ ejɔɔ ehe nɔ ehã Yehowa egbe naa lɛ, nɔ ni afee nɛ: akɛ lɛ aba Kpee Buu lɛ shinaa lɛ shi.

¹⁴ Ehiɛ edɛŋ toi etɛ̃ ni kpa ko bɛ amɛhe ni akɛshã afɔle akɛhã Yehowa nɛkɛ: ekɛ gwantɛŋ binuu ni eye afi ni kpa ko bɛ ehe ashã shãa afɔle, ni ekɛ gwantɛŋ yoo kome ni eye afi ni kpa ko bɛ ehe ashã esha he afɔle, ni ekɛ too ojwɛni kome ni kpa ko bɛ ehe ashã shidaa afɔle.

¹⁵ Ehiɛ nibii nɛɛ hu efata kooloi lɛ ahe: aboloo ni akɛŋmãa mã akpiti ni awo mli fɔ shã kɛntɛŋ kome, kɛ akpãanɔɔ ni akɛ mamu muɛmuɛ fɛɛfɛo ni awo mli fɔ shã kɛ mã akpiti aboloo kekeree ni akpa hiɛ fɔ. Ekɛ abele kɛ dãa afɔlei lɛ hu ashi nɔ.

¹⁶ “Osɔfo lɛ aŋɔ̃ nibii lɛ fɛɛ kɛba Yehowa afɔleshãa latɛ lɛ hiɛ koni ekɛshã esha he afɔle lɛ kɛ shãa afɔle lɛ ehã Nazirnyo lɛ.

¹⁷ Ekɛ too ojwɛni lɛ afata mã akpiti aboloo kɛ kɛntɛŋ lɛ he koni ekɛshã shidaa afɔle ekɛhã Yehowa. Osɔfo lɛ kɛ shidaa afɔle lɛ he niyenii kɛ dãa afɔlei lɛ hu afata he.

¹⁸ Nazirnyo lɛ ashɛ eyiteŋ tsɔi ni eto kɛjɛ be ni ejɔɔ ehe nɔ ehã Yehowa yɛ Kpee Buu lɛ shinaa lɛ shi lɛ, koni eloo eyitsɔi lɛ ewo la ni yɔɔ toiŋjɔlɛ afɔle lɛ shishi lɛ mli.

¹⁹ “Kɛji loo lɛ be lɛ, osɔfo lɛ akɔ ojwɛni lɛ nine kome, ni ekɛfata kɛntɛŋ lɛ mli mã akpiti aboloo lɛ akwaabɔ kome kɛ akpiti akpãanɔɔ hu kome he koni ekɛwo Nazirnyo lɛ dɛŋ be ni eshɛ eyiteŋ tsɔi lɛ sɛɛ.

²⁰ Enɛ sɛɛ lɛ osɔfo lɛ ahe afɔle lɛ ni efɔ̃ kɛya kɛba yɛ Yehowa hiɛ akɛ afɔle krɔŋkrɔŋ. Nii nɛɛ ji nɔ krɔŋkrɔŋ ni akɛhãa osɔfo lɛ kɛfataa too lɛ tsitsinaa lɛ kɛ eshuɔ lɛ he. Agbɛnɛ Nazirnyo lɛ baanyɛ enu wain kɛjɛ enɛ sɛɛ.

²¹ “Mla kɛ kusum ni yɔɔ afɔle ni esa akɛ Nazirnyo, mɔ ni ewo shi kɛjɔɔ ehe nɔ ehã Yehowa, nɛ. Shi kɛji mɔ lɛ ewo shi fe tɛ ni afo afɔ̃ shi ahã Nazirnyo lɛ, no lɛ eye eshiwoo lɛ nɔ, ehã bɔ ni ewo shi lɛ pɛpɛɛpɛ.”

Osɔfoi adɛŋ Jɔɔmɔ

²² Yehowa kɛɛ Mose akɛ,

²³ “Kɛɛmɔ Aaron kɛ ebihii lɛ akɛ kɛji amɛmiijɔɔ Israelbii lɛ, amɛkɛɛ akɛ,

²⁴ ‘Yehowa ajɔɔ bo, ni eto bo!

²⁵ Yehowa atse ehiɛ ehã bo, ni eduro bo.

²⁶ Yehowa ana bo mɔbɔ, ni ehã bo hejɔlɛ!’

²⁷ “Kɛji amɛtsɛ migbɛi nɛkɛ amɛkɛjɔɔ Israelbii lɛ, mibajɔɔ maŋbii lɛ.”