4 Mose 4 - ŊMALƐ KRƆŊKRƆŊ LƐ

Kohatbii, Levibii lɛ, agbɛfaŋ nitsumɔi

¹ Yehowa kɛɛ Mose akɛ,

² “Kanemɔ Kohatbii ni yɔɔ Levibii lɛ ateŋ lɛ ayikulɛ yɛ amɛwekui kɛ amɛtsɛmɛi awei lɛ anaa,

³ kɛjɛ mɔ ni eye afii nyɔŋmai etɛ̃ nɔ aahu kɛyashi mɔ ni eye afii nyɔŋmai enumɔ nɔ. Aŋmã mɔ fɛɛ mɔ ni yɔɔ hegbɛ akɛ etsu nii yɛ Kpee Buu lɛ mli lɛ gbɛi koni amɛtsu Kpee Buu lɛ he nii.

⁴ Kohatbii lɛ anitsumɔ ni amɛbaatsu yɛ Kpee Buu lɛ he lɛ kɔɔ nibii krɔŋkrɔŋi fe fɛɛ lɛ ahe.

⁵ “Kɛji maŋ lɛ baafã nyiɛmɔ lɛ, Aaron kɛ ebihii lɛ aya Kpee Buu lɛ mli, ni amɛyajie muhɔɔ ni tsiɔ Kpãŋmɔ Adeka lɛ hiɛ lɛ koni amɛkɛ muhɔɔ nɛɛ aha Kpãŋmɔ Adeka lɛ he.

⁶ No sɛɛ lɛ, amɛkɛ abotia hewolo aha muhɔɔ ni akɛha Kpãŋmɔ Adeka lɛ he lɛ nɔ; ni yɛ no hu sɛɛ lɛ amɛkɛ mama bluu krɔŋŋ alɛɛ Adeka lɛ nɔ. Enɛɛmɛi fɛɛ asɛɛ lɛ amɛkɛ tsei bloblobii ni akɛwoɔ Kpãŋmɔ Adeka lɛ ahɔlɔ amɛfɔji lɛ amli.

⁷ “Amɛkɛ mama bluu aha okplɔ̃ ni akɛ Yehowa aboloo lɛ mãa nɔ lɛ nɔ, koni amɛkɛ plɛtei lɛ, kɛ tsɛnsii ni akɛ tsofakɛŋma woɔ mli lɛ, kɛ okpolui lɛ kɛ kpuji ni akɛ afɔleshãa dãa woɔ mli lɛ amãmɔ nɔ. Be fɛɛ be lɛ aboloo amã okplɔ̃ lɛ nɔ.

⁸ Kɛkɛ lɛ alɛɛ mama tsuru fɔɔ lɛ mli akɛha okplɔ̃ lɛ kɛ enɔ nibii lɛ fɛɛ anɔ; no sɛɛ lɛ akɛ abotia hewolo alɛɛ mama tsuru fɔɔ lɛ nɔ; ni no hu sɛɛ lɛ amɛkɛ tsei bloblobii ni akɛwoɔ okplɔ̃ lɛ ahɔlɔ amɛfɔji lɛ amli.

⁹ “Amɛkɔ mama bluu, ni amɛkɛha kanetso lɛ kɛ ehe kanei lɛ, kɛ lagbeenii lɛ, kɛ tsɛnsii tɛtɛrɛbii lɛ, kɛ nibii ni akɛ mu ni akɛsuɔ kanei lɛ woɔ mli lɛ fɛɛ ahe.

¹⁰ No sɛɛ lɛ, amɛfi nibii nɛɛ fɛɛ amɛwo abotia wolo mli koni amɛkɛwo tso adeka ni akɛtereɔ lɛ mli.

¹¹ “Shika afɔleshãa latɛ lɛ, amɛlɛɛ mama bluu lɛ mli amɛkɛha nɔ, koni amɛkɛ abotia wolo aha mama bluu lɛ hu nɔ; ni no sɛɛ lɛ akɛ tsei bloblobii ni akɛwoɔ latɛ lɛ ahɔlɔ amɛfɔji lɛ amli.

¹² Amɛfi tsɛnsii fɛɛ ni akɛsɔ̃mɔɔ yɛ Kpee Buu lɛ mli lɛ amɛwo mama bluu mli; ni no sɛɛ lɛ amɛfi nii lɛ ekoŋŋ amɛwo abotia hewolo mli. Enɛ sɛɛ lɛ amɛkɛma nɔ ni akɛtereɔ lɛ nɔ.

¹³ Amɛloo lamlu fɛɛ yɛ afɔleshãa latɛ lɛ nɔ, ni amɛkɛ mama afaseo aha latɛ lɛ nɔ;

¹⁴ ni amɛkɛ nibii fɛɛ ni akɛsɔ̃mɔɔ yɛ afɔleshãa latɛ lɛ he lɛ ashwie latɛ lɛ nɔ. Nibii nɛɛ ji lajee tsɛnsii lɛ, kɛ fakai lɛ kɛ sofii lɛ kɛ tsɛnsii lɛ kɛ nibii krokomɛi fɛɛ. Akɛ abotia hewolo aha nibii nɛɛ fɛɛ anɔ; ni no sɛɛ lɛ akɛ tsei bloblobii ni akɛwoɔ afɔleshãa latɛ lɛ ahɔlɔ amɛfɔji lɛ amli.

¹⁵ Kɛji Aaron kɛ ebihii lɛ eha Kpee Buu lɛ kɛ Buu lɛ mli nibii lɛ hu fɛɛ ahe amɛgbe naa, ni maŋ lɛ baafã nyiɛmɔ lɛ, no mli dani Kohatbii lɛ abahole nibii lɛ, shi moŋ amɛkɛ amɛnine akata nibii lɛ eko he koni amɛkagboi. Enɛɛmɛi ji Kpee Buu lɛ he nibii ni Kohatbii lɛ baatere lɛ.

¹⁶ “Nibii ni atu awo Osɔfo Eleazar, Aaron bi lɛ, dɛŋ koni ekwɛ nɔ ji mu ni akɛsuɔ kane lɛ, kɛ mu ni akɛfɔɔ mɔ mu lɛ kɛ daa niyenii afɔle lɛ, kɛ Kpee Buu Krɔŋkrɔŋ lɛ diɛŋtsɛ kɛ emli nibii fɛɛ, kɛ He Krɔŋkrɔŋ lɛ hu kɛ ehe nibii lɛ fɛɛ lɛ.”

¹⁷ Yehowa kɛɛ Mose kɛ Aaron akɛ,

¹⁸ “Nyɛkahãa Kohatbii akutso lɛ mli wekui lɛ ashishi miibule yɛ Levibii lɛ ateŋ,

¹⁹ kɛtsɔ̃ gboimɔ ni amɛaagboi kɛji amɛmiibɛŋkɛ nibii krɔŋkrɔŋi fe fɛɛ lɛ nɔ. Shi moŋ nɔ ni nyɛfee nyɛhã amɛ koni amɛyi ana wala ji akɛ Aaron kɛ ebihii lɛ abote Kpee Buu lɛ mli koni amɛtsɔ̃ɔ Kohatbii lɛ ateŋ mɔ fɛɛ mɔ enitsumɔ kɛ ejatsu hu.

²⁰ Ejaakɛ kɛji Kohatbii lɛ bote Kpee Buu lɛ mli ni amɛhiŋmɛi gba nibii krɔŋkrɔŋi lɛ anɔ lɛ nɔ lɛ amɛbaagboi.”

Gershonbii, Levibii lɛ, agbɛfaŋ nitsumɔi

²¹ Yehowa kɛɛ Mose akɛ,

²² “Kanemɔ Gershonbii lɛ hu ayikulɛ yɛ amɛtsɛmɛi lɛ kɛ amɛwekui lɛ anaa,

²³ kɛjɛ mɔ ni eye afii nyɔŋmai etɛ̃ nɔ aahu kɛyashi mɔ ni eye afii nyɔŋmai enumɔ nɔ. Aŋmã mɔ fɛɛ mɔ ni yɔɔ hegbɛ akɛ etsu nii yɛ Kpee Buu lɛ mli lɛ gbɛi koni amɛtsu Kpee Buu lɛ he nii.

²⁴ Jatsui ni Gershonbii lɛ atere ji:

²⁵ Kpee Buu Krɔŋkrɔŋ lɛ mamai lɛ, kɛ mama ni haa Buu lɛ nɔ lɛ, kɛ abotia hewolo ni haa Buu lɛ yiteŋ lɛ, kɛ Kpee Buu Krɔŋkrɔŋ lɛ shinaa lɛ naa mama lɛ.

²⁶ Amɛ nɔŋŋ amɛtere kpo lɛ ni bɔle Kpee Buu Krɔŋkrɔŋ lɛ kɛ afɔleshãa latɛ lɛ fɛɛ kpula lɛ mamai lɛ, kɛ kpo lɛ agbo lɛ naa mamai lɛ, kɛ mamai nɛɛ ahe taŋkpei lɛ, kɛ kpo lɛ he nibii krokomɛi lɛ fɛɛ. Nɔ fɛɛ nɔ ni kɔɔ nibii nɛɛ ahe lɛ amɛnitsumɔ ni.

²⁷ Jatsu ni Gershonbii lɛ baatere kɛ nitsumɔi fɛɛ ni amɛbaatsu lɛ, amɛbaafee yɛ Aaron kɛ ebihii lɛ afãmɔ naa; ni nyɛ nyɛkɛ jatsui fɛɛ ni amɛbaatere lɛ baawo amɛdɛŋ.

²⁸ Enɛɛmɛi ji nitsumɔi ni Gershonbii lɛ awekui lɛ baatsu yɛ Kpee Buu lɛ he; ni mɔ ni baakwɛ amɛnɔ ji Osɔfo Aaron bi Itamar.”

Meraribii, Levibii lɛ, agbɛfaŋ nitsumɔi

²⁹ Yehowa kɛɛ Mose akɛ, “Kanemɔ Meraribii lɛ hu ayikulɛ yɛ amɛwekui kɛ amɛtsɛmɛi awei lɛ anaa,

³⁰ kɛjɛ mɔ ni eye afii nyɔŋmai etɛ̃ nɔ aahu kɛyashi mɔ ni eye afii nyɔŋmai enumɔ nɔ. Aŋmã mɔ fɛɛ mɔ ni yɔɔ hegbɛ akɛ etsuɔ nii yɛ Kpee Buu lɛ mli lɛ gbɛi koni amɛtsu Kpee Buu lɛ he nii.

³¹ Ni jatsui ni amɛbaatere kɛ amɛnitsumɔ fɛɛ ni amɛbaatsu yɛ Kpee Buu Krɔŋkrɔŋ lɛ gbɛfaŋ ji Kpee Buu Krɔŋkrɔŋ lɛ mplaŋi lɛ, kɛ mlibɛlɛmɔnii lɛ, kɛ ekulashiŋi lɛ, kɛ nibii ni akulashiŋi lɛ mamɔ̃ɔ nɔ lɛ,

³² kɛ kpo lɛ he akulashiŋi lɛ kɛ amɛhe nibii ni amɛmamɔ̃ɔ nɔ lɛ, kɛ shiŋmlitsei lɛ kɛ taŋkpei lɛ kɛ amɛhe nibii krokomɛi lɛ fɛɛ hu. Ni nyɛtsɔ̃a mɔ fɛɛ mɔ ejatsu ni ebaatere lɛ gbɛi.

³³ Enɛɛmɛi ji nitsumɔi ni Meraribii lɛ awekui lɛ baatsu yɛ Kpee Buu Krɔŋkrɔŋ lɛ he; ni mɔ ni baakwɛ amɛnɔ ji Osɔfo Aaron bi Itamar.”

Levibii lɛ ayikulɛ kanemɔ

³⁴ Mose kɛ Aaron kɛ maŋ onukpai lɛ kane Kohatbii hii lɛ yɛ amɛwekui lɛ kɛ amɛtsɛmɛi awei lɛ anaa.

³⁵ Kɛjɛ mɔ ni eye afii nyɔŋmai etɛ̃ nɔ aahu kɛyashi mɔ ni eye afii nyɔŋmai enumɔ nɔ. Aŋmã mɔ fɛɛ mɔ ni yɔɔ hegbɛ akɛ etsuɔ nii yɛ Kpee Buu lɛ mli lɛ gbɛi koni amɛtsu Kpee Buu lɛ he nii.

³⁶ Mɛi ni ana lɛ ayikulɛ ji mɛi akpei enyɔ kɛ ohai kpawo kɛ nyɔŋmai enumɔ

³⁷ be ni Mose kɛ Aaron kane Kohatbii hii lɛ yɛ Yehowa wiemɔ naa koni amɛsɔ̃mɔ yɛ Kpee Buu lɛ he lɛ.

³⁸ Gershonbihii ni akane yɛ amɛwekui kɛ amɛtsɛmɛi awei lɛ anaa,

³⁹ kɛjɛ mɔ ni eye afii nyɔŋmai etɛ̃ nɔ aahu kɛyashi mɔ ni eye afii nyɔŋmai enumɔ nɔ, ni ji mɔ ni yɔɔ hegbɛ akɛ etsu nii yɛ Kpee Buu lɛ mli, koni amɛtsu Kpee Buu lɛ he nii lɛ,

⁴⁰ amɛyikulɛ ji mɛi akpei enyɔ kɛ ohai ekpaa kɛ nyɔŋmai etɛ̃.

⁴¹ Gershonbii hii ni Mose kɛ Aaron kane yɛ Yehowa wiemɔ naa, koni amɛsɔ̃mɔ yɛ Kpee Buu lɛ gbɛfaŋ lɛ ayikulɛ nɛ.

⁴² Meraribihii lɛ ateŋ mɛi ni akane yɛ amɛwekui kɛ amɛtsɛmɛi awei lɛ anaa,

⁴³ kɛjɛ mɔ ni eye afii nyɔŋmai etɛ̃ nɔ aahu kɛyashi mɔ ni eye afii nyɔŋmai enumɔ nɔ, ni ji mɔ ni yɔɔ hegbɛ akɛ etsu nii yɛ Kpee Buu lɛ mli, koni amɛtsu Kpee Buu lɛ he nii lɛ,

⁴⁴ amɛyikulɛ ji mɛi akpei etɛ̃ kɛ ohai enyɔ.

⁴⁵ Meraribihii ni Mose kɛ Aaron kane yɛ wiemɔ ni Yehowa kɛtsɔ̃ Mose nɔ lɛ naa lɛ nɛ.

⁴⁶ No hewɔ lɛ, Levibii hii fɛɛ ni Mose kɛ Aaron kɛ Israel onukpai lɛ kane yɛ amɛwekui kɛ amɛtsɛmɛi awei lɛ anaa,

⁴⁷ kɛjɛ mɔ ni eye afii nyɔŋmai etɛ̃ nɔ aahu kɛyashi mɔ ni eye afii nyɔŋmai enumɔ nɔ, ni ji mɔ fɛɛ mɔ ni yɔɔ hegbɛ akɛ etsu nii yɛ Kpee Buu lɛ mli loo Kpee Buu lɛ he loo jatsu teremɔ lɛ,

⁴⁸ amɛyikulɛ ji mɛi akpei kpaanyɔ kɛ ohai enumɔ kɛ nyɔŋmai kpaanyɔ.

⁴⁹ Mose nine nɔ atsɔ̃ akane Levibii nɛɛ yɛ Yehowa wiemɔ naa, ni Yehowa wiemɔ nɔ nɔŋŋ adamɔ ni ahã mɔ fɛɛ mɔ enitsumɔ kɛ ejatsu.