4 Mose 35 - ŊMALƐ KRƆŊKRƆŊ LƐ

Maji ni akɛhã Levibii lɛ

¹ Yehowa kɛɛ Mose yɛ Moab ŋa kplenee lɛ nɔ yɛ Yordan Faa lɛ naa yɛ Yeriko ŋlɛnɔ akɛ,

² “Kɛɛmɔ Israelbii lɛ akɛ amɛhala maji komɛi yɛ shikpɔji ni akɛhã amɛ lɛ anɔ amɛkɛhã Levibii lɛ koni amɛhi mli; asaŋ amɛhã Levibii lɛ shikpɔji hu yɛ maji lɛ ahe koni amɛkɛlɛ kooloo.

³ Maji lɛ atsɔ̃mɔ Levibii lɛ ashihilɛhei, ni maji lɛ ahe shikpɔji lɛ akamɔ shi koni amɛkooloi fɛɛ ana nii aye yɛ nɔ.

⁴ Maji lɛ ahe shikpɔji ni nyɛkɛbaahã Levibii lɛ ajɛ maŋ lɛ he gbogbo lɛ he kɛya sɛɛgbɛ kɛyashi ninetalɔi akpe jɛkɛmɔ kɛbɔle maŋ lɛ he kpula kɛkpe.

⁵ No hewɔ lɛ, shikpɔŋ ni ekɛlɛ feɔ ninetalɔi akpei enyɔ baakã shi yɛ maŋ lɛ bokãgbɛ, ni nakai jekɛmɔ nɔŋŋ baakã shi yɛ ewuoyigbɛ, ni nakai nɔŋŋ yɛ enaigbɛ kɛ nakai jekɛmɔ nɔŋŋ yɛ ekooyigbɛ fɛɛ, ni maŋ lɛ diɛŋtsɛ baakã shikpɔŋ lɛ teŋ. Shikpɔŋ ni baakã maŋ lɛ he ahã Levibii lɛ dalɛ nɛ.

⁶ Nyɛhãa Levibii lɛ maji ekpaa koni amɛkɛfee abobaahe maji, hei ni mɔ ko ni egbe gbɔmɔ be mli ni ehiɛ kãaa he lɛ baajo foi kɛya eyaba abo yɛ. Nomɛi asɛɛ lɛ nyɛhãa Levibii lɛ maji nyɔŋmai ejwɛ kɛ enyɔ hu

⁷ koni maji fɛɛ ni nyɛkɛbaahã Levibii lɛ afee nyɔŋmai ejwɛ kɛ kpaanyɔ kɛ amɛhe shikpɔji.

⁸ Maji abɔ ni abaahe yɛ Israelbii akutso ko mli koni akɛhã Levibii lɛ, ebaakwɛ nakai akutso lɛ shikpɔŋ lɛ dalɛ. Akutso ni eshikpɔŋ fa lɛ ehã maji babaoo, ni akutso ni eshikpɔŋ faaa lɛ ehã maji fioo.”

Abobaa maji lɛ

⁹ Yehowa kɛɛ Mose akɛ,

¹⁰ ekɛɛ Israelbii lɛ akɛ, “Kɛji nyɛfo Yordan Faa lɛ kɛtee Kanaan shikpɔŋ lɛ nɔ lɛ,

¹¹ nyɛhalaa maji nyɛkɛfea abobaa maji koni mɔ ko ni egbe mɔ ko ni jeee gbɛ eje ajo foi kɛya jɛi ni eyaba abo.

¹² Maji nɛɛ atsɔ̃mɔ hei ni aaayaba abo yɛ kɛje mɔ ni taoɔ lá he owele etɔ dɛŋ. Akagbe gbɔmɔgbelɔ nɛɛ akɛ ja akɛ lɛ eba asafo lɛ hiɛ ni akojo lɛ dã.

¹³ Maji ni nyɛbaahala nyɛkɛfee abobaa maji lɛ ayikulɛ afee ekpaa.

¹⁴ Nyɛhalaa maji etɛ̃ yɛ Yordan Faa lɛ sɛɛ yɛ bokãgbɛ lɛ, ni nyɛhalaa maji etɛ̃ hu yɛ Kanaan shikpɔŋ lɛ nɔ koni nyɛfee amɛ abobaa maji.

¹⁵ Nɛkɛ maji ekpaa nɛɛ atsɔ̃ abobaa maji ahã nyɛ Israelbii lɛ kɛ gbɔi ni ebato nyɛ kɛ mɛi ni ebadɔmɔ nyɛ kwraa hu fɛɛ, koni mɔ fɛɛ mɔ ni aaagbe mɔ ko be mli ni jeee gbɛ eje lɛ ajo foi kɛya jɛi eyaba abo.

¹⁶ “Shi kɛji mɔ ko kɛ dade tswa mɔ ko ni mɔ lɛ tsɔ̃ mli egbo lɛ, mɔ ni tswa mɔ lɛ nɔ lɛ egbe gbɔmɔ, ni esa akɛ lɛ hu agbe lɛ.

¹⁷ Ni kɛji mɔ ko hiɛ tɛ ni aaanyɛ gbɔmɔ agbe, ni ekɛ tɛ lɛ tswa mɔ ko, ni mɔ lɛ tsɔ̃ mli egbo lɛ, tɛtswalɔ lɛ egbe gbɔmɔ, ni esa akɛ lɛ hu agbe lɛ.

¹⁸ Nakai nɔŋŋ kɛji mɔ ko hiɛ tso ni aaanyɛ gbɔmɔ agbe, ni ekɛtswa mɔ ko, ni mɔ lɛ tsɔ̃ mli egbo lɛ, mɔ ni tswa mɔ lɛ nɔ lɛ egbe gbɔmɔ, ni esa akɛ lɛ hu agbe lɛ.

¹⁹ Mɔ ni agbe lɛ wekunyo yɛ hegbɛ ni etɔɔ enyɛmi lɛ lá lɛ he owele. He fɛɛ he ni ekɛ gbɔmɔgbelɔ lɛ aaakpe yɛ lɛ, egbe lɛ.

²⁰ “Kɛji mɔ ko miinyɛ mɔ ko, ni no hewɔ lɛ, eyawo mɔ lɛ ka, ni etsu mɔ lɛ nɔ, aloo etsi lɛ egbee shi, ni mɔ lɛ tsɔ̃ mli egbo,

²¹ aloo egba mɔ lɛ ma, ni mɔ lɛ tsɔ̃ mli egbo lɛ, gbɔmɔ ni gba mɔ lɛ ma lɛ egbe gbɔmɔ, ni esa akɛ lɛ hu agbe lɛ. Mɔ ni agbe lɛ wekunyo yɛ hegbɛ ni etɔɔ enyɛmi lɛ lá lɛ he owele. He fɛɛ he ni ekɛ gbɔmɔgbelɔ lɛ aaakpe yɛ lɛ, eyɛ hegbɛ akɛ egbeɔ lɛ.

²² “Shi kɛji osharã naa ni mɔ ko gbe mɔ ko be mli ni ebɛ mɔ lɛ mli esha eto, etsi lɛ egbee shi jio, efɔ̃ nɔ ko ekɛtswa mɔ lɛ jio;

²³ aloo mɔ ko fɔ̃ tɛ be mli ni enaaa mɔ ko, shi fee sɛɛ lɛ tɛ lɛ tee eyatswa mɔ ko ni egbe lɛ be mli ni ekɛgbɔmɔ nɛɛ bɛ bei ko, eto ni ejeee ehenyɛlɔ, ni etaooo lɛ efɔŋ lɛ,

²⁴ no lɛ yɛ mlai nɛɛ anaa lɛ asafo lɛ akojo mɔ ni tswa mɔ lɛ nɔ lɛ kɛ lá he oweletɔlɔ lɛ teŋ.

²⁵ Asafo lɛ ahere gbɔmɔgbelɔ lɛ yiwala yɛ lá oweletɔlɔ lɛ dɛŋ koni ahã gbɔmɔgbelɔ lɛ ahi shi yɛ maŋ he ni ejo foi kɛtee eyaba abo yɛ lɛ mli, kɛyashi beyinɔ ni mɔ ni afɔ lɛ mu akɛ osɔfonukpa ni yɔɔ be mli ni eyaba abo lɛ aaagbo.

²⁶ Shi kɛji eshɛ be ko ni gbɔmɔgbelɔ nɛɛ shi abobaa maŋ lɛ mli he ni etee eyaba abo yɛ lɛ husu nɔ

²⁷ ni lá he oweletɔlɔ lɛ kɛ lɛ yakpe yɛ maŋ lɛ husu lɛ sɛɛ, ni egbe lɛ lɛ, oweletɔlɔ lɛ yeee gbɔmɔ nɛɛ lá yi sɔ̃.

²⁸ Ejaakɛ kulɛ esa akɛ gbɔmɔgbelɔ lɛ ahi abobaa maŋ lɛ mli kɛyashi beyinɔ ni osɔfonukpa ni yɔɔ be mli ni eyabɔ abo lɛ aaagbo. No sɛɛ dani gbɔmɔgbelɔ lɛ yɔɔ hegbɛ ni ekuɔ esɛɛ eyaa lɛ diɛŋtsɛ emaŋ he ni ejo foi eshi lɛ.

²⁹ Mlai nɛɛ akã shi ahã nyɛ kɛ nyɛshwiei ayinɔi fɛɛ yɛ hei fɛɛ ni nyɛaayahi.

³⁰ “Mɔ fɛɛ mɔ ni akɛ sane eshi lɛ akɛ egbe gbɔmɔ lɛ, adamɔ odasefoi kɛjɛ mɛi enyɔ loo nɔ nɔ kɛyaa anaa wiemɔ nɔ akɛbu lɛ gbele fɔ. Akadamɔ odasefonyo kome too naa wiemɔ nɔ akɛbu mɔ ko gbele fɔ.

³¹ Gbɔmɔgbelɔ ni abu lɛ gbelefɔ lɛ ja agbe lɛ. Akaŋmɛ gbɛ ni ewo shika ko kwraa ekɛkpɔ̃ ehe kɛje gbele lɛ mli.

³² Asaŋ akahe shika ko yɛ mɔgbelɔ ni ejo foi eyaba abo yɛ abobaa maŋ lɛ dɛŋ akɛ ehekpɔ̃mɔ nii, bɔ ni afee ni ekanyɛ eku esɛɛ etee lɛ diɛŋtsɛ emaŋ beyinɔ ni osɔfonukpa mɔ yinɔ ni eyaba abo lɛ nako agbo,

³³ koni nyɛkabule shikpɔŋ ni nyɛyɔɔ nɔ lɛ, ejaakɛ lashishwiemɔ buleɔ shikpɔŋ fɛɛ shikpɔŋ; ni nɔ ko kwraa bɛ ni akɛdãiɔ shikpɔŋ ni ashwie lá shi yɛ nɔ, akɛ ja mɔ ni shwie lá shi lɛ nɔŋŋ lá.

³⁴ Nyɛkabulea shikpɔŋ ni mi kɛ nyɛ fɛɛ yɔɔ nɔ lɛ, ejaakɛ mi, Yehowa, miyɛ Israelbii lɛ ateŋ.”