4 Mose 29 - ŊMALƐ KRƆŊKRƆŊ LƐ

Afi shishijee gbijurɔ lɛ nɔ afɔle

¹ Nyɔŋ ni ji kpawo lɛ klɛŋklɛŋ gbi lɛ nɔ lɛ, nyɛkpea kpee krɔŋkrɔŋ ni nyɛjaa Yehowa. Akatsu nitsumɔ ko nitsumɔ ko ni wa yɛ gbi lɛ nɔ. Nyɛtɛtrɛmantrɛ lɛ kpãmɔ gbi ni;

² ni nyɛkɛ tsina oblanyo kome kɛ ojwɛni kome kɛ gwantɛŋ bihii kpawo ni eye afifi ni kpa ko bɛ amɛhe ashãa shãa afɔle ni jeɔ ŋma woɔ Yehowa.

³ Kooloi nɛɛ ahe niyenii afɔle hu ni ji ŋmãa mamu ni akɛ fɔ ekpɔtɔ ji enɛ: tsinanuu kome lɛ mamu kiloi etɛ̃, ni ojwɛni lɛ mamu kiloi enyɔ;

⁴ ni gwantɛŋbii kpawo lɛ ateŋ eko fɛɛ eko lɛ mamu kilo kome.

⁵ Akɛ too kpakpo kome ashã esha he faikpamɔ afɔle koni akɛkpãtã ahã maŋ lɛ.

⁶ Enɛɛmɛi asɛɛ lɛ ashã nyɔŋ hee shãa afɔle kɛ ehe niyenii afɔle lɛ, kɛ daa gbi shãa afɔle lɛ hu kɛ ehe niyenii afɔle lɛ hu. Eko fɛɛ eko lɛ kɛ ehe dãa afɔle bɔ ni afo aŋmɛ shi lɛ pɛpɛɛpɛ. Niyenii afɔlei ni akɛ la shãa ni jeɔ ŋma woɔ Yehowa ni.

Kpãtãmɔ gbi lɛ nɔ afɔle

⁷ “Nyɔŋ ni ji kpawo nɛɛ nɔŋŋ nɔ gbi ni ji nyɔŋma lɛ nɔ lɛ nyɛkpea kpee krɔŋkrɔŋ ni nyɛjaa. Nyɛhia ŋmãa, ni nyɛkatsua nitsumɔ ko nitsumɔ ko ni wa yɛ gbi lɛ nɔ;

⁸ shi nyɛkɛ tsina oblanyo kome kɛ ojwɛni kome kɛ gwantɛŋ bihii kpawo ni eye afifi ni kpa ko bɛ amɛhe ashã shãa afɔle ni jeɔ ŋma woɔ Yehowa.

⁹ Kooloi lɛ ahe niyenii afɔle hu ni ji ŋmãa mamu ni akɛ fɔ ekpɔtɔ ji enɛ: tsinanuu lɛ mamu kiloi etɛ̃, ni ojwɛni lɛ mamu kiloi enyɔ;

¹⁰ ni gwantɛŋbii kpawo lɛ ateŋ eko fɛɛ eko lɛ mamu kilo komekome.

¹¹ Asaŋ no sɛɛ lɛ akɛ too kpakpo kome ashã esha hefaikpamɔ afɔle koni akɛkpãtã ahã maŋ lɛ. Ashã daa gbi afɔle lɛ hu kɛ ehe dãa afɔlei lɛ.

Asesei agbijurɔyeli lɛ he afɔle

¹² “Nyɔŋ ni ji kpawo lɛ nɔ gbi ni ji nyɔŋma kɛ enumɔ lɛ nɔ lɛ, nyɛkpea kpee krɔŋkrɔŋ ni nyɛjaa; nyɛkatsua nitsumɔ ko nitsumɔ ko ni wa yɛ nɔ; shi nyɛyea gbijurɔ nyɛhãa mi gbii kpawo.

¹³ Klɛŋklɛŋ gbi lɛ nɔ lɛ, nyɛkɛ tsinai oblahii nyɔŋma kɛ ejwɛ kɛ ojwɛnii enyɔ kɛ gwantɛŋ bihii nyɔŋma kɛ ejwɛ ni eye afifi ni kpa ko bɛ amɛhe ashã shãa afɔle ni jeɔ ŋma woɔ Yehowa.

¹⁴ Niyenii afɔle ni ji ŋmãa mamu ni akɛ fɔ ekpɔtɔ ni akɛfata kooloi lɛ ahe nɛ: tsinanuu kome lɛ mamu kiloi etɛ̃; ojwɛni lɛ mamu kiloi enyɔ,

¹⁵ ni gwantɛŋ binuu kome lɛ mamu kilo kome.

¹⁶ Asaŋ akɛ too kpakpo kome ashã esha hefaikpamɔ afɔle. Enɛɛmɛi asɛɛ lɛ ashã daa gbi shãa afɔle lɛ kɛ ehe niyenii afɔle lɛ kɛ dãa afɔle lɛ hu.

¹⁷ “Gbi ni ji enyɔ lɛ nɔ lɛ, nyɛkɛ tsinai oblahii nyɔŋma kɛ enyɔ kɛ ojwɛnii enyɔ kɛ gwantɛŋ bihii nyɔŋma kɛ ejwɛ ni eye afifi ni kpa ko bɛ amɛhe ashã shãa afɔle.

¹⁸ Niyenii afɔlei kɛ dãa afɔlei ni akɛfata kooloi lɛ ateŋ eko fɛɛ eko he afee bɔ ni afo afɔ̃ shi lɛ pɛpɛɛpɛ.

¹⁹ Asaŋ akɛ too kpakpo kome ashã esha he faikpamɔ afɔle lɛ kɛ ehe niyenii afɔle lɛ kɛ amɛhe dãa afɔlei lɛ hu.

²⁰ “Gbi ni ji etɛ̃ lɛ nɔ lɛ, nyɛkɛ tsina oblahii nyɔŋma kɛ ekome kɛ ojwɛnii enyɔ kɛ gwantɛŋ bihii nyɔŋma kɛ ejwɛ ni amɛye afifi ni kpa ko bɛ amɛhe ashã shãa afɔle.

²¹ Ni niyenii afɔlei kɛ dãa afɔlei ni akɛfata tsinai lɛ kɛ ojwɛnii lɛ kɛ gwantɛŋ bihii nɛɛ ateŋ eko fɛɛ eko he afee bɔ ni afo afɔ̃ shi lɛ pɛpɛɛpɛ.

²² Asaŋ akɛ too kpakpo kome ashã esha hefaikpamɔ afɔle. No sɛɛ hu ashã daa gbi afɔle lɛ kɛ ehe niyenii afɔle lɛ kɛ amɛhe dãa afɔlei lɛ hu.

²³ “Gbi ni ji ejwɛ lɛ nɔ lɛ nyɛkɛ tsina oblahii nyɔŋma kɛ ojwɛnii enyɔ kɛ gwantɛŋ bihii nyɔŋma kɛ ejwɛ ni eye afifi ni kpa ko bɛ amɛhe ashã shãa afɔle.

²⁴ Niyenii afɔle kɛ dãa afɔlei ni akɛfata tsinai lɛ kɛ ojwɛnii lɛ kɛ gwantɛŋ bihii nɛɛ ateŋ eko fɛɛ eko he afee bɔ ni afo afɔ̃ shi lɛ pɛpɛɛpɛ.

²⁵ Asaŋ akɛ too kpakpo kome ashã esha he faikpamɔ afɔle. No sɛɛ hu ashã daa gbi afɔle lɛ kɛ ehe niyenii afɔle lɛ kɛ amɛhe dãa afɔlei lɛ hu.

²⁶ “Gbi ni ji enumɔ lɛ nɔ lɛ, nyɛkɛ tsina oblahii nɛɛhu kɛ ojwɛnii enyɔ kɛ gwantɛŋ bihii nyɔŋma kɛ ejwɛ ni eye afifi ni kpa ko bɛ amɛhe ashã shãa afɔle.

²⁷ Niyenii afɔle lɛ kɛ dãa afɔlei ni akɛfata tsinai lɛ kɛ ojwɛnii lɛ kɛ gwantɛŋ bihii lɛ ateŋ eko fɛɛ eko he afee bɔ ni afo afɔ̃ shi lɛ pɛpɛɛpɛ.

²⁸ Asaŋ akɛ too kpakpo kome ashã esha he faikpamɔ afɔle. No sɛɛ hu ashã daa gbi shãa afɔle lɛ kɛ ehe niyenii afɔle lɛ kɛ amɛhe dãa afɔle lɛ hu.

²⁹ “Gbi ni ji ekpaa lɛ nɔ lɛ, nyɛkɛ tsina oblahii kpaanyɔ kɛ ojwɛnii enyɔ kɛ gwantɛŋ bihii nyɔŋma kɛ ejwɛ ni amɛye afifi ni kpa ko bɛ amɛhe ashã shãa afɔle.

³⁰ Niyenii afɔle lɛ kɛ dãa afɔlei ni akɛfata tsina bihii lɛ kɛ ojwɛnii lɛ kɛ gwantɛŋ bihii lɛ ateŋ eko fɛɛ eko he afee bɔ ni afo afɔ̃ shi lɛ pɛpɛɛpɛ.

³¹ No sɛɛ hu akɛ too kpakpo kome ashã esha he faikpamɔ afɔle. Ashã daa gbi afɔle lɛ kɛ ehe niyenii afɔle lɛ kɛ amɛhe dãa afɔlei lɛ hu.

³² “Gbi ni ji kpawo lɛ nɔ lɛ, nyɛkɛ tsina oblahii kpawo kɛ ojwɛnii enyɔ kɛ gwantɛŋ bihii nyɔŋma kɛ ejwɛ ni amɛye afifi ni kpa ko bɛ amɛhe ashã shãa afɔle lɛ.

³³ Niyenii afɔle lɛ kɛ dãa afɔlei ni nyɛkɛfata tsinai oblahii lɛ kɛ ojwɛnii lɛ kɛ gwantɛŋ bihii lɛ ateŋ eko fɛɛ eko he afee bɔ ni afo afɔ̃ shi lɛ pɛpɛɛpɛ.

³⁴ Asaŋ akɛ too kpakpo kome ashã esha he faikpamɔ afɔle. No sɛɛ hu ashã daa gbi shãa afɔle lɛ kɛ ehe niyenii afɔlei lɛ kɛ amɛhe dãa afɔlei lɛ hu.

³⁵ “Gbi ni ji kpaanyɔ lɛ nɔ lɛ, nyɛkpea kpee krɔŋkrɔŋ nyɛjaa; nyɛkatsua nitsumɔ ko nitsumɔ ko ni wa yɛ nɔ;

³⁶ shi nyɛkɛ tsinanuu kome kɛ ojwɛni kome kɛ gwantɛŋ bihii kpawo ni amɛye afifi ni kpa ko bɛ amɛhe ashã shãa afɔle ni jeɔ ŋma woɔ Yehowa.

³⁷ Niyenii afɔle lɛ kɛ dãa afɔlei lɛ ni akɛfata kooloi lɛ ateŋ eko fɛɛ eko he afee bɔ ni afo afɔ̃ shi lɛ pɛpɛɛpɛ.

³⁸ Asaŋ akɛ too kpakpo kome ashã esha hefaikpamɔ afɔle. No sɛɛ hu ashã daa shãa afɔle lɛ kɛ ehe niyenii afɔlei lɛ kɛ amɛhe dãa afɔlei lɛ hu.

³⁹ “Afɔlei ni nyɛshã nyɛkɛhã Yehowa yɛ nyɛgbii juji ni ato lɛ anɔ lɛ nɛ. Esoro shãa afɔlei lɛ kɛ niyenii afɔlei lɛ kɛ dãa afɔlei lɛ kɛ shidaa afɔlei lɛ ni nyɛshãa yɛ shiwoo naa loo suɔmɔ naa lɛ.”

⁴⁰ Mose kɛɛ Israelbii lɛ nɔ fɛɛ nɔ bɔ ni Yehowa fã lɛ lɛ pɛpɛɛpɛ.