4 Mose 26 - ŊMALƐ KRƆŊKRƆŊ LƐ

Maŋbii akanemɔ nɔ ni ji shii enyɔ nɔ

¹ Gbele hela lɛ sɛɛ lɛ Yehowa kɛɛ Mose kɛ Osɔfo Aaron binuu Eleazar akɛ,

² “Nyɛkanea Israelbii asafo muu lɛ mli hii fɛɛ ni eye kɛjɛ afii nyɔŋmai enyɔ kɛyaa ayikulɛ yɛ amɛtsɛmɛi awei lɛ anaa, no ji mɔ fɛɛ mɔ ni eshɛ tayaa yɛ Israel lɛ.”

³ Mose kɛ Osɔfo Eleazar kɛɛ Israelbii lɛ yɛ Moab ŋa kplenee lɛ nɔ yɛ Yordan Faa lɛ naa yɛ Yeriko akɛ,

⁴ “Nyɛkanea maŋbii lɛ ateŋ hii fɛɛ ni eye kɛjɛ afii nyɔŋmai enyɔ kɛyaa”, bɔ ni Yehowa fã Mose akɛ efee lɛ. Israelbii lɛ ni shi Ijipt shikpɔŋ lɛ nɔ lɛ ayikulɛ baa nɛ:

⁵ Ruben ni ji Yakob kromɔbi lɛ shwiei lɛ akutso lɛ mli shĩai ji Hanokwe kɛ Paluwe,

⁶ kɛ Hezronwe kɛ Karmiwe.

⁷ Mɛnɛɛmɛi ji Rubenbii awekui lɛ, ni amɛteŋ hii ni akane lɛ anaa shɛ akpei nyɔŋmai ejwɛ kɛ etɛ̃ kɛ ohai kpawo kɛ nyɔŋmai etɛ̃.

⁸ Palu bi ji Eliab,

⁹ ni Eliab bihii ji Nemuel kɛ Datan kɛ Abiram. Datan kɛ Abiram nɛɛ ji hii komɛi ni maŋbii lɛ hala kɛjɛ asafo lɛ mli, ni amɛtse Mose kɛ Aaron hiɛ atua, ni asaŋ amɛyafata Kora sɛɛbii lɛ ahe kɛte shi amɛshi Yehowa lɛ.

¹⁰ Shikpɔŋ gba ni emĩ amɛ kɛ Kora fɛɛ kɛ esɛɛbii lɛ hu, be ni la lɛ je ni eshã hii ohai enyɔ kɛ nyɔŋmai enumɔ koni akɛto okadi lɛ.

¹¹ Shi moŋ Kora diɛŋtsɛ musuŋbihii lɛ gboiii.

¹² Simeon akutso lɛ mli shĩai lɛ ji Nemuelwe kɛ Yaminwe kɛ Yakinwe,

¹³ kɛ Zerawe kɛ Shaulwe,

¹⁴ Mɛnɛɛmɛi ji Simeonbii awekui lɛ; ni amɛyikulɛ fee akpei nyɔŋmai enyɔ kɛ enyɔ kɛ ohai enyɔ.

¹⁵ Gad shwiei lɛ akutso lɛ mli shĩai lɛ ji Zefonwe kɛ Hagiwe kɛ Shuniwe,

¹⁶ kɛ Ozniwe kɛ Eriwe,

¹⁷ kɛ Arodwe kɛ Areliwe.

¹⁸ Mɛnɛɛmɛi ji Gadbii awekui lɛ, ni amɛyibɔ fee hii akpei nyɔŋmai ejwɛ kɛ ohai enumɔ.

¹⁹ Yuda bihii ji Er kɛ Onan; shi Er kɛ Onan gboi yɛ Kanaan shikpɔŋ lɛ nɔ.

²⁰ Yuda shwiei lɛ akutso lɛ mli shĩai lɛ ji Shelawe kɛ Perezwe.

²¹ Perezwe hiɛ Hezronwe kɛ Hamulwe.

²² Mɛnɛɛmɛi ji Yudabii awekui lɛ, ni amɛmli hii ni akane lɛ ayikulɛ fee akpei nyɔŋmai kpawo kɛ ekpaa kɛ ohai enumɔ.

²³ Isakar shwiei lɛ akutso lɛ mli shĩai lɛ ji Tolawe kɛ Puvawe,

²⁴ kɛ Yashubwe kɛ Shimronwe.

²⁵ Mɛnɛɛmɛi ji Isakarbii lɛ awekui lɛ, ni amɛmli bii ni akane lɛ ayikulɛ fee akpei nyɔŋmai ekpaa kɛ ejwɛ kɛ ohai etɛ̃.

²⁶ Zebulon shwiei lɛ akutso lɛ mli shĩai lɛ ji Seredwe kɛ Elonwe kɛ Yahleelwe.

²⁷ Mɛnɛɛmɛi ji Zebulonbii lɛ awekui lɛ, ni amɛmli hii ni akane lɛ ayikulɛ fee akpei nyɔŋmai ekpaa kɛ ohai enumɔ.

²⁸ Yosef shwiei lɛ akutsei ji Manase kɛ Efraim ni ji ebihii enyɔ lɛ.

²⁹ Manase shwiei lɛ nɛ: Manase fɔ Makir, ni Makir hu fɔ Gilead. Shĩai ni jɛ Gilead mli lɛ ji

³⁰ Yezerwe kɛ Helekwe,

³¹ kɛ Asrielwe kɛ Shekemwe,

³² kɛ Shemidawe kɛ Heferwe.

³³ Hefer bi ji Zelofehad, shi Zelofehad fɔɔɔ bihii fe yei sɔŋŋ kɛkɛ efɔ; ni Zelofehad biyei lɛ agbɛii ji Mahala kɛ Noa, kɛ Hogla kɛ Milka kɛ Tirza.

³⁴ Mɛnɛɛmɛi ji Manasebii lɛ awekui lɛ, ni amɛmli hii ni akane lɛ ayikulɛ fee akpei nyɔŋmai enumɔ kɛ enyɔ kɛ ohai kpawo.

³⁵ Efraim shwiei lɛ akutso lɛ mli shĩai lɛ ji Shutelawe kɛ Bekerwe kɛ Tahanwe,

³⁶ kɛ Eranwe ni jɛ Shutelawe lɛ mli lɛ.

³⁷ Mɛnɛɛmɛi ji Efraimbii lɛ awekui lɛ, ni amɛmli hii ni akane lɛ ayikulɛ fee akpei nyɔŋmai etɛ̃ kɛ enyɔ kɛ ohai enumɔ. Yosef shwiei lɛ ashĩai ji shĩai nɛɛ fɛɛ.

³⁸ Benyamin shwiei lɛ akutso lɛ mli shĩai lɛ ji Belawe kɛ Ashbelwe kɛ Ahiramwe,

³⁹ kɛ Shefufamwe kɛ Hufamwe,

⁴⁰ kɛ Ardwe kɛ Naamanwe ni amɛjɛ Belawe mli lɛ.

⁴¹ Mɛnɛɛmɛi ji Benyaminbii awekui lɛ, ni amɛmli hii ni akane ayikulɛ fee akpei nyɔŋmai ejwɛ kɛ enumɔ kɛ ohai ekpaa.

⁴² Dan shwiei lɛ akutso lɛ mli shĩa lɛ ji Shuhamwe,

⁴³ ni emli hii ni akane lɛ ayikulɛ fee akpei nyɔŋmai ekpaa kɛ ejwɛ kɛ ohai ejwɛ.

⁴⁴ Asher shwiei lɛ akutso lɛ mli shĩai lɛ ji Imnawe kɛ Ishwiwe kɛ Beriawe.

⁴⁵ Beriawe kɔkrɔɔ hiɛ Heberwe kɛ Malkielwe.

⁴⁶ Asher fɔ biyoo ni egbɛi ji Sera.

⁴⁷ Mɛnɛɛmɛi ji Asherbii awekui lɛ, ni amɛmli hii ni akane lɛ ayikulɛ fee akpei nyɔŋmai enumɔ kɛ etɛ̃ kɛ ohai ejwɛ.

⁴⁸ Naftali shwiei lɛ akutso lɛ mli shĩai lɛ ji Yahzeelwe kɛ Guniwe,

⁴⁹ kɛ Yerwe kɛ Shilemwe.

⁵⁰ Mɛnɛɛmɛi ji Naftalibii awekui lɛ, ni amɛmli hii ni akane lɛ ayikulɛ fee akpei nyɔŋmai ejwɛ kɛ enumɔ kɛ ohai ejwɛ.

⁵¹ No hewɔ lɛ, Israelbii lɛ ateŋ hii ni akane fɛɛ ayikulɛ fee akpei ohai ekpaa kɛ ekome kɛ ohai kpawo kɛ nyɔŋmai etɛ̃.

⁵² Yehowa kɛɛ Mose akɛ,

⁵³ “Jaa shikpɔŋ lɛ ohã akutsei lɛ yɛ amɛmli gbɔmɛi lɛ ayikulɛ naa.”

⁵⁴ Mɛi ni yi fa lɛ, ohã amɛ shikpɔŋ agbo; ni mɛi ni yi faaa lɛ ana shikpɔŋ bibioo. Akutso fɛɛ akutso ana shikpɔŋ yɛ emlibii lɛ ayikulɛ naa.

⁵⁵ Shi moŋ afɔ̃ oshiki ni akɛja shikpɔŋ lɛ yɛ akutsei lɛ ashikwɛ̃ɛ tsɛmɛi lɛ agbɛii anaa, shĩa fɛɛ shĩa baana egbɛfaŋnɔ.

⁵⁶ Mɛi ni yi fa kɛ mɛi ni yi faaa fɛɛ lɛ, afɔ oshiki koni akɛja amɛgbɛfaŋnii lɛ ahã amɛ.

⁵⁷ Yɛ Levi shwiei agbɛfaŋ lɛ, amɛshĩai wuji ni akane lɛ amɛmli bii ji Gershonwe kɛ Kohatwe kɛ Merariwe.

⁵⁸ Shĩai bibii ni jɛ ewuji nɛɛ amli lɛ ji Libniwe kɛ Hebronwe kɛ Maheliwe kɛ Mushiwe kɛ Korawe. Kohat fɔ Amram,

⁵⁹ mɔ ni kɛ Levi biyoo Yokebed, mɔ ni efɔ yɛ Ijipt lɛ, hi shi akɛ eŋa lɛ. Amran kɛ Yokebed fɔ Aaron kɛ Mose kɛ amɛnyɛmi yoo Miriam.

⁶⁰ Ni Aaron fɔ Nadab kɛ Abihu kɛ Eleazar kɛ Itamar.

⁶¹ Shi Nadab kɛ Abihu gboi be ni amɛkɛ la ni bɛ krɔŋkrɔŋ yashã afɔle yɛ Yehowa hiɛ lɛ.

⁶² Levibii lɛ ateŋ hii fɛɛ ni akane, ni ji mɛi ni eye kɛjɛ nyɔŋ kome kɛyaa lɛ ayikulɛ fee akpei nyɔŋmai enyɔ kɛ etɛ̃. Akaneee Levibii ayikulɛ nɛɛ ashiii Israelbii krokomɛi lɛ anɔ, ejaakɛ amɛ Levibii lɛ ahãaa amɛ shikpɔŋ lɛ eko.

⁶³ No hewɔ lɛ, gbɔmɛi nɛɛ ayikulɛ nɛɛ ji nɔ ni Mose kɛ Osɔfo Eleazar na be ni amɛkane Israelbii lɛ yɛ Moab ŋa kplenee lɛ nɔ yɛ Yordan Faa lɛ naa yɛ Yeriko ŋlɛnɔ lɛ.

⁶⁴ Mɛi abɔ ni Mose kɛ Aaron kane be ni amɛkane Israelbii lɛ ayikulɛ yɛ Sinai Shiaŋa lɛ nɔ lɛ, ateŋ mɔ kome folo nɛkɛ bɛ mɛi ni akane ehee nɛɛ ateŋ.

⁶⁵ Ejaakɛ Yehowa kɛɛ yɛ amɛhe akɛ gboimɔ amɛaagboi yɛ shiaŋa lɛ nɔ. Mɛi ni shwɛ ji Kaleb, Yefune bi lɛ, kɛ Yoshua, Nun bi lɛ, kɛkɛ.