4 Mose 24 - ŊMALƐ KRƆŊKRƆŊ LƐ

¹ Shi Balaam eyɔse akɛ Yehowa suɔmɔ naa ji akɛ ejɔɔ Israelbii lɛ. No hewɔ lɛ, eyaaa tamɔ bei krokomɛi lɛ akɛ eyaatao okadii. Shi moŋ ewo ehiɛ nɔ, ni ekwɛ shiaŋa lɛ nɔ gbɛ.

² Ena Israelbii lɛ ni amɛjwere shi yɛ amɛkutsei lɛ anaa. Kɛkɛ ni Nyɔŋmɔ mumɔ lɛ bayi Balaam nɔ,

³ ni ewo enaa nɔ, ni egba ekɛɛ akɛ, “Balaam, Beor bi lɛ, ninaa nɛ, nuu ninalɔ lɛ ninaa nɛ,

⁴ mɔ ni nuɔ nɔ ni Nyɔŋmɔ kɛɔ ni enaa ninaa ni Ofe lɛ jieɔ etsɔ̃ɔ lɛ, mɔ ni buɔ shi, shi enaa nii lɛ.

⁵ Kwɛ bɔ ni Israel bui lɛ yɔɔ fɛo! Israel shihilɛhei amli yɛ akɔnɔ

⁶ tamɔ faa he jɔi ni elɛɛ shi oookɛɛ faa toi abɔi, tamɔ tsei fɛɛfɛji ni Yehowa tɛo oookɛɛ faa toi tsenedrutsei.

⁷ Nu aaajɛ onubui amli, Israel, ashwie shi ni oshwiei kɛaadu nii. Omaŋtsɛ lɛ baaje agbo fe Maŋtsɛ Agag, ni aaawo emaŋtsɛyeli nɔ.

⁸ Nyɔŋmɔ yajie amɛ yɛ Ijipt, ni amɛhe wa tamɔ wuo. Amɛbaaye amɛhenyɛlɔi lɛ amaji anɔ, ni amɛbaajwara amɛwui wɔtsɔwɔtsɔ, ni amɛkɛ amɛgãii lɛ baatsɛ̃rɛ amɛ.

⁹ Edɛke shi; ebu shi tamɔ jata, tamɔ jatayoo; namɔ aaatsiɛ lɛ? Mɔ fɛɛ mɔ ni jɔɔ bo lɛ, aaajɔɔ lɛ, ni mɔ fɛɛ mɔ ni lomɔɔ bo lɛ, aaalomɔ lɛ.”

¹⁰ Balak kɛ mlifu tswa edɛ̃, ni ekɛɛ Balaam akɛ, “Miyakpee bo kɛba koni obalomɔ mihenyɛlɔi ohã mi lɛ, jɔɔmɔ sɔŋŋ moŋ ojɔɔ amɛ shii etɛ̃ nɛɛ fɛɛ.

¹¹ No hewɔ lɛ, kuu osɛɛ ni oya omaŋ. Mito miyiŋ akɛ majuro bo; shi Yehowa etsi juromɔ ni majuro bo lɛ naa.”

¹² Balaam kɛɛ Balak akɛ, “Ani mikɛɛɛ obɔfoi ni otsu amɛ miŋɔɔ lɛ tete akɛ,

¹³ ‘Naa, kɛji Balak ŋɔ̃ ewe lɛ mli shika kɛ jwiɛtɛi tsu obɔ̃ tete eke mi lɛ, minyɛŋ maje Yehowa wiemɔ sɛɛ koni mato miyiŋ mafee nɔ kpakpa loo nɔ fɔŋ ko. Nɔ ni Yehowa aaakɛɛ lɛ no nɔŋŋ ji nɔ ni mawie.’ ”

Balaam naagbee gbalɛ

¹⁴ Balaam tee ewiemɔ lɛ nɔ, ni ekɛɛ Balak akɛ, “Mi lɛ miiya mimaŋ, shi dani mashwie nɔ lɛ, mibatswa bo adafi yɛ nɔ ni Israel maŋ nɛɛ baafee omaŋ lɛ wɔsɛɛ ko he.”

¹⁵ Kɛkɛ ni Balaam wo enaa nɔ, ni ebɔ̃i gbaa ekɛɛ, “Balaam, Beor binuu lɛ, ninaa nɛ. Nɔ ni mɔ ni agbele ehiŋmɛii lɛ kɛɛ nɛ:

¹⁶ ‘Mɔ ni nuɔ Nyɔŋmɔ wiemɔi lɛ, ni eleɔ Ŋwɛinyo lɛ yiŋtoi lɛ, ni Ofe lɛ jieɔ ninai etsɔ̃ɔ lɛ lɛ, ni ehiɛ bu shi, shi enaa nɔ fɛɛ nɔ lɛ kɛɔ nɛ:

¹⁷ Miina Israel, shi jeee bɔ ni eyɔɔ lɛ minaa lɛ, shi eyɛ shɔŋŋ. Ŋulami ko baaje yɛ Yakob, Maŋtsɛ tso ko baate shi yɛ Israel, ni ebaatswia Moab hiɛnaanɔbii lɛ anii, ni ebaaye Set shwiei lɛ fɛɛ anɔ kunim.

¹⁸ Ebaaye Edom nɔ, ni eeeye Seir hu nɔ, eeeye ehenyɛlɔi lɛ hu anɔ ni eeeŋɔ amɛshikpɔji lɛ be mli ni Israel yeɔ kunim lɛ.

¹⁹ Israel jaku baanaanaa amɛ fɛɛ amɛnɔ, ni eeekpãtã mɛi ni aaashwɛ yɛ maji lɛ amli lɛ ahiɛ.’ ”

²⁰ Agbɛnɛ Balaam na Amalekbii lɛ yɛ ninaa lɛ mli. Kɛkɛ ni etsɔ̃ gbalɛ lɛ kɛtee amɛnɔ ni ekɛɛ akɛ, “Amalek ji majimaji lɛ ateŋ mɔ ni yɔɔ hewalɛ fe fɛɛ; shi naagbee mli aahu lɛ, ehiɛ baakpãtã kwraa.”

²¹ Balaam na Kenbii lɛ hu yɛ ninaa lɛ mli, ni egba yɛ amɛhe akɛ, “Oshihilɛhe lɛ yɛ shweshweeshwe tamɔ loofɔlɔ tsu ni mã tɛsaa nɔ.

²² Kɛ̃lɛ Kenbii ahiɛ baakpãtã ni etsɛŋ ni Asiria aaaŋɔ̃ bo nom.”

²³ Balaam tee nɔ ni egba gbalɛ nɛɛ, ni ekɛɛ akɛ, “Ao, namɔ aaahi walaŋ, ni ena be ni Nyɔŋmɔ aaafee nii nɛɛ?

²⁴ Akɛ ta lɛji aaajɛ Kipro aba ni aaabaye Asiria kɛ Eber nɔ. Shi tatsɛmɛi nɛɛ hu ahiɛ aaakpãtã kɛya naanɔ.”

²⁵ Kɛkɛ ni Balaam yi mli, ni eku esɛɛ kɛtee emaŋ, ni Balak hu ku esɛɛ kɛtee ejɛɛhe.