4 Mose 16 - ŊMALƐ KRƆŊKRƆŊ LƐ

Kora kɛ Datan kɛ Abiram tse atua

¹ Izehar bi Kora, ni eji Kohat nabi, ni asaŋ eji Levi nanakansowa lɛ na Ruben akutso lɛ mli gbɔmɛi etɛ̃ komɛi shi enɔ. Gbɔmɛi nɛɛ ji Datan kɛ Abiram, Eliab bii lɛ, kɛ On, Pelet bi lɛ.

² Amɛte shi amɛwo Mose. Israelbii lɛ ateŋ hii ohai enyɔ kɛ nyɔŋmai enumɔ ni ji asafo lɛ mli onukpai kɛ hiɛnaanɔbii ni yɔɔ gbɛi komɛi hu fata amɛhe.

³ Gbɔmɛi nɛɛ kpe amɛwo Mose kɛ Aaron he, ni amɛkɛɛ amɛ akɛ, “Nyɛmiitsɛ nyɛhe tsɔ̃. Ejaakɛ asafo muu lɛ mli mɔ fɛɛ mɔ lɛ, Yehowa nɔ ni; ni Yehowa kɛ wɔ fɛɛ yɛ. Mɛɛba ni nyɛwoɔ nyɛhe nɔ yɛ Yehowa asafo lɛ nɔ mɔ?”

⁴ Be ni Mose nu wiemɔ nɛɛ lɛ, ekɛ ehiɛ bu shi ni esɔle.

⁵ Kɛkɛ ni ekɛɛ Kora kɛ asafo lɛ ni ekɛba lɛ fɛɛ akɛ, “Wɔ ni ji wɔ leebi lɛ Yehowa baahã ale mɔ ni ji enɔ; mɔ ni ji mɔ krɔŋkrɔŋ lɛ, lɛ ebaahã ebɛŋkɛ lɛ. Mɔ ni Yehowa aaaŋɔ̃ lɛ, lɛ ebaahã ebɛŋkɛ lɛ yɛ afɔleshãa latɛ lɛ he.

⁶ Nɔ ni nyɛfee nɛ: Kora, bo kɛ osafo lɛ nyɛkɔlɔa lajee tsɛnsii;

⁷ nyɛjea la nyɛwoa amɛmli kɛbaa wɔ, koni nyɛkɛ tsofakɛŋma abashwiea nɔ yɛ Yehowa hiɛ. Jɛi wɔbaana yɛ mɔ ni Yehowa aaaŋɔ̃ lɛ akɛ lɛ ji mɔ̃ krɔŋkrɔŋ. Nyɛmiitsɛ nyɛhe tsɔ̃, nyɛ Levibii.”

⁸ Kɛkɛ ni Mose kɛɛ Kora akɛ, “Nyɛboa mi toi koo, nyɛ Levibii!

⁹ Israel Nyɔŋmɔ lɛ etse nyɛ yɛ Israel asafo lɛ he, ni ehãa nyɛ hegbɛ ni nyɛbɛŋkɛɔ lɛ, ni nyɛtsuɔ Yehowa Kpee Buu Krɔŋkrɔŋ lɛ mli nii; ni asaŋ nyɛdamɔɔ asafo lɛ hiɛ nyɛsɔ̃mɔɔ amɛ, aso no faaa hãaa nyɛ lo?

¹⁰ Yehowa ehã bo kɛ onyɛmimɛi Levibii lɛ fɛɛ bɛŋkɛɔ lɛ; ni fɛɛ sɛɛ lɛ nyɛmiitao osɔfoyeli lɛ hu nyɛfata he?

¹¹ Naa, kpee ni bo kɛ osafo lɛ bakpe nɛɛ lɛ, Yehowa he nyɛkpe nyɛwo lɛ, ni huhuuhu ni nyɛwieɔ nyɛshiɔ Aaron lɛ, Yehowa moŋ nyɛwieɔ nyɛshiɔ lɛ.”

¹² Kɛkɛ ni Mose tsu koni ayatsɛ Datan kɛ Abiram, Eliabbii lɛ, kɛba. Shi amɛhã hetoo akɛ, “Wɔbaaa he ko he ko!

¹³ Kɛji obakpala wɔ kɛjɛ shikpɔŋ kpakpa ni ewo fɔ nɔ, ni obaagbegbee wɔ yɛ ŋa nɛɛ nɔ lɛ, no kɛkɛ faaa hãaa bo; shi no sɛɛ hu lɛ ootao akɛ oyeɔ lumɔ yɛ wɔnɔ lo?

¹⁴ Asaŋ jeee shikpɔŋ kpakpa ni ewo fɔ nɔ okɛ wɔ ba; ni obahãko wɔ ŋmɔji kɛ wain tromi akɛ wɔgboshinii. Obaakã he ni olaka wɔ sɔŋŋ nakai? Wɔbaaa hekoheko!”

¹⁵ Sane lɛ wo Mose mli la naakpa; ni ekɛɛ Yehowa akɛ, “Kaahe amɛfɔlei lɛ. Mishɔ̃ko amɛteŋ mɔ ko teji yɛ edɛŋ lɛ, miyeko amɛteŋ mɔ ko sane fɔŋ ko!”

¹⁶ Kɛkɛ ni Mose kɛɛ Kora akɛ, “Wɔ lɛ, bo kɛ osafo lɛ fɛɛ aba Yehowa hiɛ. Bo kɛ amɛ kɛ Aaron fɛɛ.

¹⁷ Nyɛteŋ mɔ fɛɛ mɔ, bo kɛ osafoŋbii ohai enyɔ kɛ nyɔŋmai enumɔ lɛ, kɛ Aaron hu, akɔ elajee tsɛnsi, ni ekɛ tsofakɛŋma awo mli koni nyɛkɛba Yehowa hiɛ.”

¹⁸ No hewɔ lɛ, amɛteŋ mɔ fɛɛ mɔ kɔ elajee tsɛnsi, ni eje la ewo mli; ni ekɛ tsofakɛŋma shwie nɔ, ni amɛkɛba amɛbadamɔ shi yɛ Kpee Buu lɛ shinaa lɛ shi, amɛ kɛ Mose kɛ Aaron fɛɛ.

¹⁹ Kora bua maŋ muu lɛ fɛɛ naa ewo Mose kɛ Aaron; amɛbabɔ gwa yɛ Kpee Buu lɛ shinaa lɛ shi ni amɛmiikwɛ Mose. Yehowa anunyam la lɛ pue trukaa yɛ maŋ muu lɛ fɛɛ hiɛ.

²⁰ Kɛkɛ ni Yehowa kɛɛ Mose kɛ Aaron akɛ,

²¹ “Nyɛtsia nyɛhe yɛ nɛkɛ asafo nɛɛ he koni makpãtã amɛhiɛ hiŋmɛitswaa mli.”

²² Shi Mose kɛ Aaron kɛ amɛhiɛ bumɔ shi, ni amɛsɔle amɛkɛɛ akɛ, “Ao, Nyɔŋmɔ, heloo fɛɛ awala jɛɛhe! Aso mɔ kome aaafee esha, ni okɛ ehe nu aaaju maŋ muu lɛ fɛɛ he lo?”

²³ Yehowa hã Mose hetoo akɛ,

²⁴ “Kɛɛmɔ maŋ muu lɛ akɛ, ‘Mɔ fɛɛ mɔ ashi Kora kɛ Datan kɛ Abiram shihilɛhei lɛ ahe kɛya sɛɛ flɛŋŋ.’ ”

²⁵ Mose te shi, ni eyiŋ kɛtee Datan kɛ Abiram ŋɔ̃ɔ, ni Israel maŋ onukpai lɛ nyiɛ esɛɛ kɛtee.

²⁶ Mose kɛɛ asafo lɛ akɛ, “Nyɛtsia nyɛhe oya kɛjea nɛkɛ gbɔmɛi fɔ̃ji nɛɛ abui lɛ ahe kɛyaa sɛɛ flɛŋŋ, ni nyɛkataa amɛnɔ ko nɔ ko he koni akakpãtã nyɛ kɛ amɛ fɛɛ hiɛ yɛ amɛhe eshai lɛ ahewɔ.”

²⁷ Wiemɔ nɛɛ hã asafo lɛ gbala amɛhe shi kɛshi Kora kɛ Datan kɛ Abiram bui lɛ ahe kɛtee sɛɛ flɛŋŋ. Datan kɛ Abiram je kpo amɛbadamɔ amɛbui lɛ ashinai lɛ ashi, ni amɛŋamɛi kɛ amɛbii kɛ amɛbifabii lɛ fɛɛ hu fata amɛhe.

²⁸ Mose kɛɛ maŋbii lɛ akɛ, “Enɛ nyɛkɛaale akɛ Yehowa ji mɔ ni tsu mi akɛ mibatsu nibii fɛɛ ni nyɛnaa ni mifeɔ lɛ, shi jeee mi diɛŋtsɛ mito miyiŋ ni mifeɔ.

²⁹ Kɛji gbɔmɛi nɛɛ gboi tamɔ bɔ ni gbɔmɛi fɛɛ gboiɔ, aloo amɛkɛ osharã ko kpe ni eji adesã he nɔ lɛ, belɛ jeee Yehowa ni tsu mi nii ni mitsuɔ lɛ tsumɔ.

³⁰ Shi kɛji Yehowa fee nɔ ko ni bako dã, ni shikpɔŋ gba ni emĩ gbɔmɛi nɛɛ kɛ nii fɛɛ ni amɛyɔɔ, ni amɛkpeleke shi kɛtee gbohiiaje hiɛkãalɔi lɛ, no nyɛkɛaale akɛ nɛkɛ hii nɛɛ ebuuu Yehowa.”

³¹ Mose naa ni nyɔ shi nɔŋŋ kɛkɛ ni shikpɔŋ gba yɛ Datan kɛ Abiram shishi,

³² ni amɛ kɛ amɛbii kɛ hɔi kɛ Kora hu webii lɛ kɛ nibii fɛɛ ni amɛyɔɔ lɛ nyɔ bu lɛ mli, ni shikpɔŋ mi amɛ fɛɛ.

³³ No hewɔ lɛ, amɛtee gbohiiaje hiɛkãalɔi kɛ nibii fɛɛ ni amɛyɔɔ. Shikpɔŋ ni gba lɛ bashi hiɛ ni etsa ekoŋŋ, ni emii amɛ, kɛkɛ ni amɛhiɛkpãtã kwrakwra yɛ amɛjakumɛi lɛ ateŋ.

³⁴ Bolɔmɔ ni amɛbolɔ lɛ hã Israelbii fɛɛ ni ewo shi yɛ jɛi kɛkpe lɛ jojoo foi, ni amɛ hu amɛbolɔ amɛkɛɛ, “Akakwɛ ni shikpɔŋ lɛ bamii wɔ hu.”

³⁵ Yehowa hã la bayi hii ohai enyɔ kɛ nyɔŋmai enumɔ lɛ ni kɛ tsofakɛŋma ba Kpee Buu lɛ hiɛ lɛ anɔ ni eshã amɛ wɛɛ.

Lajee tsɛnsii lɛ

³⁶ Kɛkɛ ni Yehowa kɛɛ Mose akɛ,

³⁷ “Kɛɛmɔ Eleazar, Osɔfo Aaron binuu lɛ, akɛ ehole lajee tsɛnsii lɛ yɛ gbɔmɛi lɛ ni eshã lɛ ateŋ, ni egbɛ amɛmli la lɛ eshwã kɛya sɛɛ shɔŋŋ, ejaakɛ tsɛnsii lɛ etsɔ̃mɔ nii ni yɔɔ krɔŋkrɔŋ,

³⁸ No hewɔ lɛ, atswia hii nɛɛ, mɛi ni kɛ amɛwala wo esha lɛ he nyɔmɔ lɛ, atsɛnsii lɛ tɛtɛrɛbii, ni akɛha afɔleshãa latɛ lɛ he koni etsɔ̃ okadi ehã Israelbii fɛɛ.”

³⁹ No hewɔ lɛ, Osɔfo Eleazar kɔlɔ akɔɔble lajee tsɛnsii lɛ ni hii lɛ ni la lɛ shã lɛ kɛba lɛ, ni atswia akɛfee afɔleshãa latɛ lɛ hehaanii,

⁴⁰ koni etsɔ̃ kaimɔnɔ ehã Israelbii lɛ bɔ ni afee ni mɔ ni jeee Aaron shwie ko akatsi ebɛŋkɛ afɔleshãa latɛ lɛ akɛ ebaashã tsofakɛŋma ekɛhã Yehowa, koni ekabatsɔ̃ tamɔ Kora kɛ esafo lɛ. Eleazar fee bɔ ni Yehowa tsɔ̃ Mose nɔ ekɛɛ lɛ lɛ pɛpɛɛpɛ.

Aaron here maŋbii lɛ ayiwala

⁴¹ Enɔ jetsɛremɔ lɛ maŋ muu lɛ fɛɛ saa wie huhuuhu amɛshi Mose kɛ Aaron ni amɛkɛɛ akɛ, “Nyɛgbe Yehowa webii.”

⁴² Be ni maŋbii lɛ anaa ebabua kɛbaaya ayanina Mose kɛ Aaron lɛ, amɛtsɔ̃ amɛhiɛ amɛkwɛ Kpee Buu lɛ, ni naa, atatu kutuu lɛ ebaha Buu lɛ nɔ, ni Yehowa anunyam la lɛ epue.

⁴³ Kɛkɛ ni Mose kɛ Aaron badamɔ Kpee Buu lɛ hiɛ,

⁴⁴ ni Yehowa kɛɛ Mose akɛ,

⁴⁵ “Nyɛtsia nyɛhe kɛjea nɛkɛ asafo nɛɛ he kɛyaa sɛɛ koni makpãtã amɛhiɛ hiŋmɛitswaa mli.” Shi Mose kɛ Aaron kɛ amɛhiɛ bumɔ shi,

⁴⁶ ni Mose kɛɛ Aaron akɛ, “Kɔ olajee tsɛnsi lɛ, ni oje afɔleshãa latɛ lɛ nɔ la lɛ eko owo mli, ni okɛ tsofakɛŋma ashwie nɔ, ni okɛya asafo lɛ ŋɔɔ mramra okɛyakpãtã ohã amɛ, ejaakɛ Yehowa mlifu ete shi momo, ni gbele hela lɛ ebɔ̃i mɛi ahiɛ kpãtãmɔ.”

⁴⁷ Aaron fee bɔ ni Mose kɛɛ lɛ lɛ. Ekɔ elajee tsɛnsi lɛ, ni ekɛjo foi kɛtee maŋbii lɛ ateŋ. Eyanina ni gbele hela lɛ ebɔ̃i mɛi ahiɛkpãtãmɔ momo. Eshã tsofakɛŋma lɛ, ni ekɛkpãtã ehã maŋbii lɛ.

⁴⁸ Aaron damɔ gbohii lɛ kɛ hiɛkãalɔi lɛ ateŋ, ni gbele hela lɛ sɛɛ fo.

⁴⁹ Gbɔmɛi ni gbele hela lɛ gbe lɛ ayikulɛ fee akpei nyɔŋma kɛ ejwɛ kɛ ohai kpawo, soro mɛi ni gboi yɛ Kora sane lɛ hewɔ lɛ.

⁵⁰ Be ni gbele hela lɛ sɛɛ fo lɛ, Aaron ku esɛɛ kɛba Mose ŋɔ̃ɔ yɛ Kpee Buu lɛ shinaa lɛ naa.