4 Mose 13 - ŊMALƐ KRƆŊKRƆŊ LƐ

Mɛi yasara Kanaan shikpɔŋ lɛ nigii

¹ Yehowa kɛ Mose wie, ni ekɛɛ lɛ akɛ,

² “Tsu hii koni amɛyasara Kanaan shikpɔŋ lɛ nigii, shikpɔŋ ni mikɛbaahã Israelbii lɛ. Akutso fɛɛ akutso mli lɛ tsu mɔ kome ni eji onukpa yɛ amɛteŋ.”

³ Mose ye Yehowa wiemɔ lɛ nɔ, ni etsu Israelbii lɛ ateŋ hii onukpai akɛ saralɔi kɛjɛ Paran ŋa lɛ nɔ.

⁴ Ni mɛi ni etsu lɛ agbɛii baa nɛɛ: Ruben akutso lɛ mɔ lɛ ji Shamua, Zakur bi lɛ;

⁵ ni Simeon akutso lɛ mli mɔ lɛ ji Shafat, Hori bi lɛ;

⁶ ni Yuda akutso lɛ mli mɔ lɛ ji Kaleb, Yefune bi lɛ.

⁷ Isakar akutso lɛ mli mɔ lɛ ji Igal, Yosef bi lɛ;

⁸ ni Efraim akutso lɛ mli mɔ lɛ ji Hoshea, Nun bi lɛ;

⁹ ni Benyamin akutso lɛ mli mɔ lɛ ji Palti, Rafu bi lɛ.

¹⁰ Zebulon akutso lɛ mli mɔ lɛ ji Gadiel, Sodi bi lɛ;

¹¹ ni Manase, Yosef bi lɛ, akutso lɛ mli mɔ lɛ ji Gadi, Susi bi lɛ.

¹² Dan akutso lɛ mli mɔ lɛ ji Amiel, Gemali bi lɛ.

¹³ Asher akutso lɛ mli mɔ lɛ ji Setur, Mikael bi lɛ;

¹⁴ ni Naftali akutso lɛ mli mɔ lɛ ji Nahebi, Vofsi bi lɛ,

¹⁵ ni Gad akutso lɛ mli mɔ lɛ ji Geuel, Maki bi lɛ.

¹⁶ Hii nɛɛ ji mɛi ni Mose tsu koni amɛyasara shikpɔŋ lɛ nigii lɛ. Kɛkɛ ni Mose tsake Nun bi Hoshea lɛ gbɛi, ni ewo lɛ Yoshua.

¹⁷ Mose tsu bɔfoi nɛɛ koni amɛyasara Kanaan shikpɔŋ lɛ nigii, ni ekɛɛ amɛ akɛ, “Nyɛtsɔ̃a kooyigbɛ nɛɛ kɛyaa Kanaan shikpɔŋ lɛ wuoyigbɛ; ni kɛjɛ jɛi lɛ nyɛkwɔa gɔji lɛ,

¹⁸ ni nyɛyasaraa shikpɔŋ lɛ nigii bɔ ni eyɔɔ kɛ gbɔmɛi ni yɔɔ nɔ, akɛ amɛhe wa aloo amɛhe waaa, akɛ amɛyi fa aloo amɛyi faaa.

¹⁹ Nyɛkwɛa bɔ ni shikpɔŋ ni amɛyɔɔ nɔ lɛ yɔɔ ehã, akɛ ehi aloo ehiii, akɛ maji ni atswa gbogbo awo amɛhe aloo akrowai amli amɛyɔɔ.

²⁰ Nyɛkwɛa bɔ ni amɛshikpɔŋ lɛ diɛŋtsɛ yɔɔ, akɛ ebaa nii aloo ebaaa nii jogbaŋŋ, akɛ tsei yɛ nɔ aloo tsei bɛ nɔ. Ni nyɛbɔa mɔdɛŋ ni nyɛtserɛa shikpɔŋ lɛ nɔ tsei ayibii lɛ eko kɛbaa.” Nakai be mli lɛ eshɛ klɛŋklɛŋ wain yibii atsulɛ be.

²¹ Bɔfoi lɛ yiŋ amɛtee, ni amɛyasara Kanaan shikpɔŋ lɛ nigii kɛjɛ Zin ŋa lɛ nɔ, yɛ wuoyigbɛ, aahu kɛyashi Rehob, he ni atsɔ̃ɔ kɛyaa Hamat lɛ, yɛ kooyigbɛ.

²² Bɔfoi nɛɛ tsɔ̃ wuoyigbɛ lɛ kɛyashɛ Hebron he ni Ahimanbii lɛ kɛ Sheshaibii lɛ kɛ Talmaibii lɛ yɔɔ lɛ. Gbɔmɛi nɛɛ lɛ, gbɔmɛi gojogojoo ni, ni mɛi ni atsɛɔ amɛ akɛ Anakbii lɛ ashwiei ni. Ato Hebron maŋ lɛ afii kpawo dani ato Zoan maŋ ni yɔɔ Ijipt lɛ.

²³ Kɛkɛ ni bɔfoi lɛ bashɛ Eshkol Jɔɔ lɛ mli. Amɛfo wain tso nine kome kɛ enɔ yibii shao yɛ jɛi, ni gbɔmɛi enyɔ wo yibii shao lɛ tsoŋ, ni amɛtere kɛba. Amɛtserɛ akutui lɛ eko kɛ agbãmii lɛ hu eko kɛba.

²⁴ Wain yibii shao ni Israelbii abɔfoi lɛ fo yɛ jɔɔ nɛɛ mli lɛ hewɔ ni atsɛɔ jɛi akɛ Eshkol Jɔɔ lɛ.

²⁵ Gbii nyɔŋmai ejwɛ sɛɛ lɛ, saralɔi lɛ ku amɛsɛɛ kɛjɛ shikpɔŋ lɛ saramɔ lɛ amɛba.

²⁶ Amɛba Mose kɛ Aaron kɛ Israelbii asafo muu lɛ fɛɛ ŋɔ̃ɔ yɛ Kadesh yɛ Paran ŋa lɛ nɔ. Amɛbagba amɛ bɔ ni amɛyana nibii amɛhã, ni amɛkɛ shikpɔŋ lɛ nɔ tsei ayibii lɛ tsɔ̃ɔ amɛ.

²⁷ Amɛbɔ Mose amaniɛ amɛkɛɛ, “Wɔtee shikpɔŋ ni otsu wɔ nɔ lɛ nɔ; ni anɔkwale ji akɛ shikpɔŋ lɛ ewo fɔ ni ebaa nii hu, ni enɔ tsei ayibii po nɛ.

²⁸ Shi moŋ mɛi ni yɔɔ shikpɔŋ lɛ nɔ lɛ, amɛhe wa; ni amɛmaji lɛ atswatswaa gbogboi awo amɛhe akɛwaje amɛ, ni maji lɛ dara naakpa hu; asaŋ wɔna Anakbii oblaŋi lɛ hu yɛ jɛi.

²⁹ Amalekbii lɛ yɛ shikpɔŋ lɛ wuoyigbɛ, ni Hitbii lɛ kɛ Yebusbii lɛ kɛ Amorbii lɛ yɛ gɔji lɛ anɔ, ni Kanaanbii lɛ kã ŋshɔ lɛ naa kɛ Yordan Faa lɛ hu naa.”

³⁰ Shi Kaleb tswa bɔfoi lɛ anaa mã yɛ Mose hiɛ ni ekɛɛ akɛ, “Nyɛhãa wɔyaa kɛ̃ koni wɔyaŋɔa shikpɔŋ lɛ ejaakɛ wɔbaanyɛ amɛnɔ kunim wɔye aahu.”

³¹ Shi hii lɛ ni kɛ Kaleb tee amɛyasara shikpɔŋ lɛ kɛɛ akɛ, “Wɔnyɛŋ gbɔmɛi lɛ ahiɛ wɔdamɔ, ejaakɛ amɛhe wa fe wɔ.”

³² Hii lɛ tsɔ̃ shikpɔŋ lɛ ni amɛyasara lɛ he sane lɛ hiɛ amɛbu shi amɛhã Israelbii lɛ, ni amɛkɛɛ amɛ akɛ, “Naa, shikpɔŋ lɛ ni wɔyakpa nɔ wɔsara lɛ, shikpɔŋ ni egbo ni ebaaa nii ni enɔ bii ana aye; ni gbɔmɛi ni wɔna yɛ nɔ lɛ hii kãkãlɔi sɔŋŋ ni;

³³ ni wɔna Anakbii ashwiei, gbɔmɛi oblaŋi gojogojoo lɛ ateŋ ekomɛi hu yɛ jɛi. Kɛji wɔkɛ wɔhe to amɛhe lɛ, wɔtamɔ agãi; ni nakai pɛpɛɛpɛ amɛ hu amɛnaa wɔ.”