4 Mose 12 - ŊMALƐ KRƆŊKRƆŊ LƐ

Agbala Miriam toi

¹ Miriam kɛ Aaron wie amɛshi Mose yɛ Kushyoo ko ni Mose yaŋɔ̃ lɛ hewɔ,

² ni amɛkɛɛ akɛ, “Ani Mose kome kɛkɛ Yehowa kɛwieɔ? Ani wɔ hu ekɛ wɔ ewieko pɛŋ?” Yehowa nu Miriam kɛ Aaron wiemɔ nɛɛ.

³ Nɛkɛ nuu Mose nɛɛ lɛ, anɔkwa, eji ehe humi fe shikpɔŋ lɛ nɔ gbɔmɛi fɛɛ.

⁴ Kɛkɛ ni trukaa lɛ Yehowa kɛɛ Mose kɛ Aaron kɛ Miriam akɛ, “Nyɛyi etɛ̃ lɛ fɛɛ, nyɛjea kpo ni nyɛbaa Kpee Buu lɛ he.” Ni amɛyi etɛ̃ lɛ fɛɛ amɛtee.

⁵ Kɛkɛ ni Yehowa kpeleke shi yɛ atatu kutuu lɛ mli, ni ebadamɔ Kpee Buu lɛ shinaa lɛ shi, ni etsɛ Aaron kɛ Miriam. Amɛyi enyɔ lɛ amɛtsi amɛbɛŋkɛ;

⁶ ni Yehowa kɛɛ amɛ akɛ, “Nyɛboa mi toi! Kɛji gbalɔ ko yɛ nyɛteŋ lɛ, mitsɔ̃ɔ ninaa nɔ mihãa eleɔ mi, ni wɔlamɔ mli mitsɔ̃ɔ mikɛ lɛ wieɔ.

⁷ Shi mitsulɔ Mose nɔ bɛ nakai. Lɛ edɛŋ mitu mimaŋ Israel fɛɛ kuramɔ miwo.

⁸ No hewɔ lɛ, lɛ lɛ, mikɛ lɛ wieɔ hiɛ kɛ hiɛ faŋŋ; shi jeee yɛ abɛbuai amli; ni enaa mi, Yehowa, misu. Mɛɛba nyɛsheee gbeyei, ni nyɛwie nyɛshi mitsulɔ Mose lɛ?”

⁹ Yehowa mli fu Aaron kɛ Miriam; ni eyiŋ etee.

¹⁰ Shi be ni atatu kutuu lɛ jeɔ Buu lɛ nɔ lɛ, naa Miriam ni hela gbonyo eshwie ehe fɛɛ futaa oookɛɛ kpiti. Aaron yaakwɛ Miriam lɛ, hewolo nɔ hela gbonyo eshwie ehe fɛɛ oookɛɛ kpiti.

¹¹ Kɛkɛ ni Aaron kɛɛ Mose akɛ, “Minuŋtsɔ, ofainɛ, kaahã agbala wɔtoi yɛ kwashiaianii kɛ esha ni wɔfee nɛɛ hewɔ.

¹² Kaahã obiyoo tsɔ̃ tamɔ gbɔmɔ ni be mli ni enyɛ fɔɔ lɛ beebe lɛ egbo, ni eheloo fã ekpɔtɔ momo.”

¹³ No hewɔ lɛ, Mose bo etsɛ Yehowa, ni ekɛɛ akɛ, “Naa Nyɔŋmɔ, ofainɛ, tsa obiyoo.”

¹⁴ Yehowa here Mose nɔ, ni ekɛɛ lɛ akɛ, “Kɛji Miriam tsɛ fɛ̃ lajɔ̃ shwie Miriam hiɛ lɛ, ani ashwieko Miriam hiɛ shi kɛyashi gbii kpawo lo? Ashwie Miriam kɛya shitoohe lɛ sɛɛ gbii kpawo; no sɛɛ dani ahã eba shitoohe lɛ mli.”

¹⁵ Ashwie Miriam yɛ shitoohe lɛ mli kɛyashi gbii kpawo, ni no hewɔ lɛ, Israelbii lɛ nyɛɛɛ afã nyiɛmɔ kɛyashi aŋɔ Miriam kɛba shitoohe lɛ mli ekoŋŋ.

¹⁶ Kɛkɛ ni maŋ lɛ fã yɛ Hazerot kɛtee, ni amɛyato shi yɛ Paran.