4 Mose 11 - ŊMALƐ KRƆŊKRƆŊ LƐ

He ni atsɛ jɛi Tabera lɛ

¹ Yehowa toi gbe huhuuhu ni maŋbii lɛ wie tamɔ gbɔmɛi komɛi ni miina nɔ. Be ni Yehowa nu lɛ, emli wo la ni ehã la here yɛ amɛshitoohe lɛ mli ni ekpãtã nibii ahiɛ yɛ shitoohe lɛ afãgbɛ.

² Kɛkɛ ni maŋbii lɛ bolɔ amɛtsɛ Mose, ni Mose kpa Yehowa fai, ni la lɛ gbo.

³ No hewɔ lɛ, awo jɛi gbɛi akɛ Tabera, ejaakɛ Yehowa la shã nii yɛ amɛteŋ.

Mose hala onukpai nyɔŋmai kpawo

⁴ Maŋsɛɛbii komɛi ni futu Israelbii lɛ, amɛsuɔmɔnaanii kwraa ji loo; ni no hewɔ lɛ, loo bɔ̃i amɛtsine baa; ni asaŋ, Israelbii lɛ hu bɔ̃i amɛmli gbigblimɔ ekoŋŋ, ni amɛkɛɛ akɛ, “Nɛgbɛ po wɔɔna loo yɛ wɔye.

⁵ Loo ni jara waaa enyiɛ po wɔnaaa wɔye yɛ Ijipt? Wɔkaiɔ kokumba kɛ waatrɛ kɛ shwie kɛ sabolai!

⁶ Shi naa wɔ ŋmɛnɛ ni wɔtɔ biti, ni wɔnaaa nɔ ko nɔ ko kwraa wɔye akɛ ja nɛkɛ mana nɛɛ pɛ.”

⁷ Mana nɛɛ tamɔ dumɔ wui bibiibii kɛ esu wuɔfɔ oo ko.

⁸ Maŋbii lɛ yakɔlɔɔ, ni amɛbawiɛɔ yɛ wiɛ nɔ, aloo amɛshiɔ yɛ fufuitso mli, ni amɛhoɔ yɛ kukwɛi mli amɛkɛfeɔ niyenii, eŋɔ̃ɔmɔ tamɔ akpiti ni awo mli fɔ ŋɔɔmɔ.

⁹ Nyɔɔŋ be mli ni bɔ nyɔɔ shitoohe lɛ nɔ lɛ, nakai be mli mana lɛ hu bashwieɔ shi.

¹⁰ Mose nu ni maŋbii lɛ miifofoi yɛ amɛwekui lɛ fɛɛ amli; mɔ fɛɛ mɔ damɔ ebuu shinaa naa. Yehowa mli fu naakpa; ni sane lɛ eŋɔ̃ɔɔ Mose hu naa kwraa.

¹¹ No hewɔ lɛ, Mose kɛɛ Yehowa akɛ, “Mɛɛba ni okɛ mi, otsulɔ, yeɔ kɛ joomɔ nɛɛ, ni oná mi mlifu? Mɛɛba ni okɛ nɛkɛ maŋbii nɛɛ fɛɛ yi sɔ̃ etere mi nɛɛ?

¹² Ani mi, mibɔ maŋ muu nɛɛ, aloo mi, mifɔ amɛ, hewɔ ni okɛɛ mi akɛ mihiɛ amɛ yɛ mikpɔkɔiaŋ tamɔ bɔ ni bihiɛlɔ hiɛɔ bi abifao kɛya shikpɔŋ lɛ ni owo amɛtsɛmɛi lɛ ashi yɛ he lɛ nɔ lɛ?

¹³ Nɛgbɛ maná loo yɛ mahã nɛkɛ maŋ muu nɛɛ fɛɛ, ejaakɛ amɛmiifo amɛmiiwo mi akɛ mihã amɛ loo amɛye?

¹⁴ Mi kome too minyɛŋ maŋ muu nɛɛ fɛɛ makura. Nitsumɔ nɛɛ da fe mi.

¹⁵ Kɛji nɛkɛ ji bɔ ni okɛ mi baaye lɛ, no lɛ, naa mi mɔbɔ koni ogbe mi moŋ nyɔŋlo koni mikana mihiɛnaanɔnii.”

¹⁶ Kɛkɛ ni Yehowa kɛɛ Mose akɛ, “Halamɔ Israel maŋ onukpai lɛ ateŋ mɛi nyɔŋmai kpawo ni ji hiɛnaanɔ gbɔmɛi, ni okɛ amɛ aba miŋɔɔ yɛ Kpee Buu lɛ he, ni ohã amɛdamɔ omasɛi.

¹⁷ Mibakpeleke shi mikɛ bo abawie yɛ jɛi, ni maŋɔ mumɔ ni mikɛhã bo lɛ eko mahã amɛ hu koni amɛwa bo kɛtere maŋ lɛ jatsu lɛ bɔ ni afee ni okome okatere.

¹⁸ Ni okɛɛ maŋbii lɛ akɛ, Nyɛfea nyɛhe krɔŋkrɔŋ nyɛtoa wɔ; shi nyɛbaana loo nyɛye. Yehowa enu yaafo ni nyɛfo akɛ, ‘Namɔ aaahã wɔ loo ni wɔye, ejaakɛ be mli ni wɔyɔɔ Ijipt lɛ ehi moŋ ehã wɔ lɛ. No hewɔ lɛ, agbɛnɛ Yehowa baahã nyɛ loo ni nyɛye.’

¹⁹ Ni jeee gbi kome, loo gbii enyɔ, loo gbii enumɔ, loo gbii nyɔŋma, loo gbii nyɔŋmai enyɔ kɛkɛ nyɛbaaye loo nɛɛ;

²⁰ shi moŋ nyɔŋ kome muu sɔŋŋ kɛyashi beyinɔ ni loo lɛ baaje fu ewo nyɛ, ni ebaaje nyɛtsine. Ejaakɛ nyɛgbe Yehowa ni kɛ nyɛ yɔɔ lɛ he guɔ, ni nyɛfo nyɛtsɔ̃ɔ lɛ, ni nyɛkɛɛ akɛ, ‘Wɔyɛ Ijipt moŋ kulɛ ehi.’ ”

²¹ Shi Mose here nɔ ni ekɛɛ Yehowa akɛ, “Maŋbii ni mikɛyɔɔ lɛ ayifalɛ shɛɔ akpei ohai ekpaa, ni okɛɛ obaahã amɛ loo amɛye nyɔŋ kome sɔŋŋ.

²² Ani toi kɛ tsinai aaagbe ahã amɛ, ni eeeshɛ amɛnaa aloo ŋshɔŋ loo fɛɛ abaaya ayahɛ abahã amɛ, ni eeeshɛ amɛnaa?”

²³ Kɛkɛ ni Yehowa kɛɛ Mose akɛ, “Ani Yehowa bɛ hewalɛ yɛ nɔ fɛɛ nɔ nɔ lo? Miwiemɔ lɛ aaaba mli jio, ebaŋ mli jio, obaana ŋmɛnɛ!”

²⁴ No hewɔ lɛ, Mose tee ni eyakɛɛ maŋ lɛ nɔ ni Yehowa kɛɛ lɛ lɛ. Ebua maŋ lɛ mli onukpai lɛ ateŋ hii nyɔŋmai kpawo lɛ anaa, ni ehã amɛdamɔ shi kɛbɔle Kpee Buu lɛ he kɛkpe.

²⁵ Ni Yehowa kpeleke shi yɛ atatu mli, ni ekɛ Mose bawie, ni eŋɔ mumɔ lɛ ni ekɛhã Mose lɛ eko ekɛhã onukpai nyɔŋmai kpawo lɛ hu. Amrɔ nɔŋŋ ni mumɔ lɛ yi amɛnɔ lɛ, amɛgbagbai; shi kɛjɛ no sɛɛ lɛ amɛgbaaa dɔŋŋ.

²⁶ Maŋ onukpai ni Mose hala lɛ ateŋ hii enyɔ komɛi, mɔ kome gbɛi ji Eldad, ni mɔ kome hu gbɛi ji Medad, naaa afata maŋ onukpai lɛ ahe kɛya Kpee Buu lɛ he. Kɛ̃lɛ mumɔ lɛ yi amɛ hu amɛnɔ, ni amɛgba yɛ shitoohe lɛ mli.

²⁷ Ni oblanyo ko jo foi ni ebatsĩ tã etsɔ̃ɔ Mose akɛ Eldad kɛ Medad miigba yɛ shitoohe lɛ mli.

²⁸ Enɛ hã Nun bi Yoshua ni ji Mose sɔ̃ɔlɔ kɛjɛ eblahiaŋ lɛ here nɔ ni ekɛɛ akɛ, “Minuŋtsɔ, tsii amɛ gbɛ!”

²⁹ Shi Mose kɛɛ Yoshua akɛ, “Mi oyeɔ awuŋã ohã nɛɛ? Miná ni kulɛ Yehowa maŋ muu lɛ fɛɛ tsɔ̃mɔ gbalɔi, ni Yehowa fɔse emumɔ lɛ eshwie amɛnɔ.”

³⁰ Kɛkɛ ni Mose kɛ maŋ onukpai lɛ ku amɛsɛɛ kɛtee shitoohe lɛ mli.

Yehowa hã trakɔkɔi

³¹ Yehowa hã kɔɔyɔɔ ko tswa, ni eloo trakɔkɔi babaoo kɛjɛ ŋshɔ lɛ naa kɛba ni ekɛ amɛ bashwie shitoohe lɛ mli kɛ ehewɔ fɛɛ kɛbɔle kpula bɔ ni amɛkɛ shikpɔŋ jekɛmɔ aaafee ninetalɔi enyɔ.

³² Ni nakai gbi muu lɛ fɛɛ kɛ enyɔɔŋ lɛ mli kɛmɔ enɔ jetsɛremɔ fɛɛ lɛ maŋbii lɛ mɔmɔ trakɔkɔi lɛ. Mɔ ni naaa kwraa lɛ ena loo ni tsiimɔ fee kiloi akpe. Amɛgbɛ loo lɛ mli amɛka kɛbɔle shitoohe lɛ he kpula.

³³ Ayeko loo nɛɛ atãko, ni Yehowa mli fu Israelbii lɛ, ni ehã hela ko babote amɛteŋ ni ekpãtã amɛhiɛ naakpa.

³⁴ Sane nɛɛ hã awo jɛi gbɛi akɛ Kibrot Hataava (eshishi ji Tsinebalɔi Agbonyobui), ejaakɛ jɛi ji he ni afu mɛi ni nii ba amɛtsine lɛ yɛ.

³⁵ Kɛkɛ ni Israelbii lɛ fã yɛ Kibrot Hataava kɛtee Hazerot, ni amɛto shi yɛ jɛi.