4 Mose 10 - ŊMALƐ KRƆŊKRƆŊ LƐ

Jwiɛtɛi tɛtɛrɛmantɛrɛi lɛ

¹ Yehowa kɛɛ Mose akɛ,

² “Okɛ jwiɛtɛi ni atswia afee tɛtɛrɛmantɛrɛi enyɔ koni akɛtsɛ asafo lɛ kɛkpe, ni asaŋ okɛhã amɛfã kɛshi shitoohe lɛ.

³ Kɛji akpã tɛtɛrɛmantɛrɛi enyɔ lɛ fɛɛ shikome ni gbɛɛmɔ lɛ sɛɛ tsɛ naakpa lɛ, maŋbii asafo muu lɛ fɛɛ naa abakpe shi yɛ oŋɔɔ yɛ Kpee Buu lɛ shinaa lɛ naa.

⁴ Shi kɛji tɛtɛrɛmantɛrɛ kome kɛkɛ akpã lɛ, no lɛ Israelbii lɛ atsɛmɛi awei lɛ amli onukpai lɛ sɔŋŋ kɛkɛ ababua amɛhe naa yɛ oŋɔɔ.

⁵ Kɛji akpã tɛtɛrɛmantɛrɛ lɛ akɛbɔ oshe ni egbɛɛmɔ lɛ sɛɛ etsɛɛɛ lɛ, asafo ni yɔɔ bokãgbɛ lɛ afã.

⁶ Kɛ akpã kɛbɔ oshe nɔ ni ji shii enyɔ lɛ asafoi ni jwere wuoyigbɛ lɛ anɔ ni, amɛ amɛfã. Belɛ kɛji aatao akɛ maŋ lɛ afã kɛshi shitoohe lɛ, akpã tɛtɛrɛmantɛrɛ lɛ kɛbɔ oshe.

⁷ Shi kɛji aatsɛ maŋ lɛ koni amɛnaa abakpe shi lɛ, akpã tɛtɛrɛmantɛrɛ lɛ, ni egbɛɛmɔ lɛ sɛɛ atsɛ, shi akɛkabɔ oshe.

⁸ Aaron bihii ni ji osɔfoi lɛ ji mɛi ni akpã tɛtɛrɛmantɛrɛ lɛ. “Gbɛjianɔtoo kɛ akpɔ ni akã tɛtɛrɛmantɛrɛi nɛɛ akpãmɔ he ahã nyɛ kɛ nyɛshwiei fɛɛ nɛ:

⁹ Kɛji nyɛkɛ henyɛlɔ ko ni gbaa nyɛnaa miiwu yɛ nyɛshikpɔŋ nɔ lɛ, nyɛkpãa tɛtɛrɛmantɛrɛi lɛ kɛbɔa oshe; ni mi, Yehowa, nyɛNyɔŋmɔ lɛ, mibaye mabua nyɛ, ni mibahere nyɛyiwala yɛ nyɛhenyɛlɔi lɛ adɛŋ.

¹⁰ Asaŋ nyɛkpãa tɛtɛrɛmantɛrɛi lɛ yɛ gbii ni nyɛmiinya hu anɔ, kɛ gbii juji ni ato lɛ kɛ nyɔŋ hee shishijee gbi lɛ hu nɔ be mli ni nyɛshãa afɔlei kɛ shidaa afɔlei lɛ yɛ mihiɛ lɛ, ni maye mabua nyɛ. Mi ji Yehowa, nyɛNyɔŋmɔ lɛ.”

Israelbii lɛ fã nyiɛmɔ

¹¹ Israelbii lɛ Ijipt shikpɔŋ lɛ nɔ shimɔ sɛɛ afi ni ji enyɔ lɛ nyɔŋ ni ji enyɔ lɛ nɔ gbi ni ji nyɔŋmai enyɔ lɛ nɔ lɛ, atatu lɛ wo ehe nɔ yɛ Yehowa Kpee Buu Krɔŋkrɔŋ lɛ nɔ.

¹² Kɛkɛ ni Israelbii asafo lɛ fã nyiɛmɔ, ni amɛyiŋ kɛjɛ Sinai Shiaŋa lɛ nɔ. Atatu lɛ yawa yɛ Paran ŋa lɛ nɔ.

¹³ Enɛ ji Israelbii lɛ aklɛŋklɛŋ fãa ni amɛfã nyiɛmɔ yɛ fãmɔ ni Yehowa tsɔ̃ Mose nɔ efã amɛ lɛ naa.

¹⁴ Yudabii akutso lɛ aflaŋaa lɛ tsutsu fã, asafo nyiɛ asafo sɛɛ; ni amɛhiɛnyiɛlɔ ji Nahashon, Aminadab bi lɛ.

¹⁵ Mɔ ni ji Isakar akutso lɛ asafoi lɛ ahiɛnyiɛlɔ ji Netanel, Zuar bi lɛ,

¹⁶ ni mɔ ni ji Zebulon akutso lɛ asafoi lɛ ahiɛnyiɛlɔ ji Eliab, Helon bi lɛ.

¹⁷ Kɛkɛ ni afã Yehowa Kpee Buu Krɔŋkrɔŋ lɛ; ni Gershonbii lɛ kɛ Meraribii lɛ, ni amɛ amɛtereɔ Kpee Buu Krɔŋkrɔŋ lɛ hu fã nyiɛmɔ.

¹⁸ Amɛ amɛsɛɛ lɛ Ruben akutso lɛ aflaŋaa lɛ fã, asafo nyiɛ asafo sɛɛ, ni mɔ ni ji amɛhiɛnyiɛlɔ ji Elizur, Shedeur bi lɛ.

¹⁹ Mɔ ni ji Simeon akutso lɛ asafoi lɛ ahiɛnyiɛlɔ ji Shelumiel, Zurishadai bi lɛ;

²⁰ ni mɔ ni ji Gad akutso lɛ asafoi lɛ ahiɛnyiɛlɔ ji Eliasaf, Deuel bi lɛ.

²¹ Kɛkɛ ni Levibii lɛ ateŋ Kohatbii lɛ ni tereɔ He Krɔŋkrɔŋ lɛ mli nibii lɛ fã. Ashiɔ Yehowa Kpee Buu Krɔŋkrɔŋ lɛ amãa shi dani asafo lɛ yashɛɔ he ni ayaato shi yɛ ehee lɛ.

²² Amɛ amɛsɛɛ lɛ Efraim akutso lɛ aflaŋaa lɛ fã, asafo nyiɛ asafo sɛɛ; ni mɔ ni ji amɛhiɛnyiɛlɔ ji Elishama, Amihud bi lɛ.

²³ Mɔ ni ji Manase akutso lɛ asafoi lɛ ahiɛnyiɛlɔ ji Gamaliel, Pedazur bi lɛ;

²⁴ ni mɔ ni ji Benyamin akutso lɛ asafoi lɛ ahiɛnyiɛlɔ ji Abidan, Gideon bi lɛ.

²⁵ Kɛkɛ ni Dan akutso lɛ aflaŋaa lɛ ni nyiɛɔ Israelbii asafoi lɛ fɛɛ asɛɛ lɛ fã, asafo nyiɛ asafo sɛɛ; ni mɔ ni ji amɛhiɛnyiɛlɔ ji Ahiezer, Amishadai bi lɛ.

²⁶ Mɔ ni ji Asher akutso lɛ asafoi lɛ ahiɛnyiɛlɔ ji Pagiel, Okran bi lɛ;

²⁷ ni mɔ ni ji Naftali akutso lɛ asafoi lɛ ahiɛnyiɛlɔ ji Ahira, Enan bi lɛ.

²⁸ Nɛkɛ ji bɔ ni Israelbii lɛ toɔ naa fãa, asaŋ ni amɛnyiɛɔ yɛ asafoi lɛ anaa kɛji amɛshi shitoohe ko lɛ.

²⁹ Be ni Israel asafoi lɛ baafã nyiɛmɔ lɛ, Mose kɛɛ eŋa nyɛmi nuu Hobab, ni ji eshaanuu Yetro, Midiannyo lɛ, binuu lɛ akɛ, “Wɔmiifã kɛya he ni Yehowa wo wɔ shi yɛ he akɛ ekɛbaahã wɔ lɛ. Fatamɔ wɔhe ni wɔtee. Yehowa ewo shi akɛ ebaahã Israel aye ejurɔ; no hewɔ lɛ, wɔ hu wɔɔfee bo ejurɔ.”

³⁰ Shi Hobab here Mose nɔ ni ekɛɛ lɛ akɛ, “Ehiŋ mi yaa; shi moŋ matee mi diɛŋtsɛ mijaku shikpɔŋ nɔ kɛ mimaŋbii aŋɔɔ.”

³¹ Kɛkɛ ni Mose kɛɛ Hobab akɛ, “Ofainɛ, kaashi wɔ. Gbii abɔ ni bo ole hei ni sa akɛ wɔtotoo shi yɛ, yɛ shiaŋa lɛ nɔ lɛ, nyiɛmɔ wɔhiɛ.

³² Kɛji okɛ wɔ nyiɛ lɛ, ejurɔ fɛɛ ni Yehowa aaafee wɔ lɛ, no nɔŋŋ wɔ hu wɔkɛaafee bo.”

Israelbii lɛ fã nyiɛmɔ

³³ No hewɔ lɛ, Israelbii lɛ fã nyiɛmɔ kɛjɛ Sinai, ni ji Yehowa Gɔŋ lɛ he; ni amɛnyiɛ gbii etɛ̃; ni Yehowa Kpãŋmɔ Adeka lɛ nyiɛ amɛhiɛ gbii etɛ̃ lɛ koni etsɔ̃ɔ amɛ amɛshitoohe.

³⁴ Be fɛɛ be ni amɛaafã nyiɛmɔ amɛshi amɛshitoohe ko lɛ Yehowa atatu lɛ haa amɛnɔ shwane.

³⁵ Kɛji eshɛ be ni Kpãŋmɔ Adeka lɛ baafã nyiɛmɔ lɛ, Mose kɛɔ akɛ, “Wo ohe nɔ, Yehowa, koni ohenyɛlɔi lɛ agbɛ ashwã, koni mɛi ni teɔ shi woɔ bo lɛ ajo foi yɛ ohiɛ.”

³⁶ Ni kɛji Kpãŋmɔ Adeka lɛ miito shi lɛ, Mose kɛɔ akɛ, “Kuu osɛɛ, Yehowa, kɛba Israelbii akpeiakpei abɔ lɛ aŋɔ̃ɔ.”