4 Mose 1 - ŊMALƐ KRƆŊKRƆŊ LƐ

Israelbii ayikulɛ kanemɔ, klɛŋklɛŋ nɔ̃

¹ Israelbii lɛ Ijipt shikpɔŋ lɛ nɔ shimɔ sɛɛ afi ni ji enyɔ lɛ mli nyɔŋ ni ji enyɔ lɛ klɛŋklɛŋ gbi lɛ nɔ lɛ, Yehowa kɛ Mose wie yɛ Kpee Buu lɛ mli yɛ Sinai Shiaŋa lɛ nɔ, ni ekɛɛ lɛ akɛ,

² “Nyɛkanea Israel asafo muu lɛ fɛɛ yikulɛ yɛ amɛwekui lɛ kɛ amɛtsɛmɛi awei lɛ anaa. Aŋmala hii fɛɛ agbɛii

³ kɛjɛ mɛi ni eye afii nyɔŋmai enyɔ kɛyaa, ni ji mɔ fɛɛ mɔ ni eshɛ tayaa. Bo kɛ Aaron akane mɛi lɛ yɛ amɛsafoi anaa.

⁴ Akutso fɛɛ akutso mli nuu kome ni ji onukpa yɛ etsɛmɛi awe afata nyɛhe.”

⁵ Hii, akutseiaŋ onukpai, ni ahala akɛfata Mose kɛ Aaron he koni amɛtsu nii lɛ agbɛii baa nɛɛ: Ruben akutso lɛ fã Elizur, Shedeur bi lɛ;

⁶ ni Simeon akutso lɛ fã Shelumiel, Zurishadai bi lɛ;

⁷ ni Yuda akutso lɛ fã Nahashon, Aminadab bi lɛ.

⁸ Isakar akutso lɛ fã Netanel, Zuar bi lɛ,

⁹ ni Zebulon akutso lɛ fã Eliab, Helon bi lɛ;

¹⁰ ni Efraim akutso lɛ, ni ji Yosef shwiei lɛ, fã Elishama, Amihud bi lɛ; ni Manase akutso, ni ji Yosef nɔŋŋ shwiei hu, fã Gamaliel, Pedazur bi lɛ.

¹¹ Benyamin akutso lɛ fã Abidan, Gideoni bi lɛ;

¹² ni Dan akutso lɛ fã Ahiezer, Amishadai bi lɛ;

¹³ ni Asher akutso lɛ fã Pagiel, Okran bi lɛ;

¹⁴ Gad akutso lɛ fã Eliasaf, Deuel bi lɛ;

¹⁵ ni Naftali akutso lɛ fã Ahira, Enan bi lɛ.

¹⁶ Gbɔmɛi nɛɛ ji hiɛnaanɔbii, ni asaŋ amɛ ji amɛtsɛmɛi akutsei lɛ amli onukpai, ni ahala amɛ, ni afee amɛ Israel akutsei lɛ ahiɛnyiɛlɔi lɛ.

¹⁷ Mose kɛ Aaron ŋɔ hii ni atsi amɛgbɛii atã nɛɛ amɛfata amɛhe,

¹⁸ ni amɛbua Israel asafo muu lɛ fɛɛ naa kɛkpe yɛ nyɔŋ ni ji enyɔ lɛ klɛŋklɛŋ gbi lɛ nɔ, ni amɛŋmala maŋbii lɛ agbɛii yɛ amɛwekui lɛ kɛ amɛtsɛmɛi awei lɛ anaa. Hii fɛɛ ni eye kɛjɛ afii nyɔŋmai enyɔ kɛyaa lɛ aŋmala amɛgbɛii ni akane amɛyibɔ.

¹⁹ Bɔ ni Yehowa fã Mose akɛ efee lɛ, nakai efee, ni ekɛkane Israel asafo lɛ yikulɛ yɛ Sinai Shiaŋa lɛ nɔ.

²⁰ Akɛjɛ Ruben ni ji Israel kromɔbi lɛ bihii lɛ ashwiei lɛ anɔ, ni aŋmala hii fɛɛ ni eye kɛjɛ afii nyɔŋmai enyɔ kɛyaa ni asaŋ amɛshɛ tayaa lɛ agbɛii ekomekome yɛ amɛwekui kɛ amɛtsɛmɛi awei lɛ anaa.

²¹ Rubenbii ayikulɛ ni ana ji mɛi akpei nyɔŋmai ejwɛ kɛ ekpaa kɛ ohai enumɔ.

²² Ni Simeon shwiei lɛ, kɛjɛ nuu fɛɛ nuu ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

²³ mɛi akpei nyɔŋmai enumɔ kɛ nɛɛhu kɛ ohai etɛ̃.

²⁴ Ni Gad shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

²⁵ mɛi akpei nyɔŋmai ejwɛ kɛ enumɔ kɛ ohai ekpaa kɛ nyɔŋmai enumɔ.

²⁶ Yuda shwiei lɛ kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

²⁷ mɛi akpei nyɔŋmai kpawo kɛ ejwɛ kɛ ohai ekpaa.

²⁸ Ni Isakar shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

²⁹ mɛi akpei nyɔŋmai enumɔ kɛ ejwɛ kɛ ohai ejwɛ.

³⁰ Ni Zebulon shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

³¹ mɛi akpei nyɔŋmai enumɔ kɛ kpawo kɛ ohai ejwɛ.

³² Efraim shwiei lɛ, ni jɛ Yosef mli lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

³³ mɛi akpei nyɔŋmai ejwɛ kɛ ohai enumɔ.

³⁴ Ni Manase shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

³⁵ mɛi akpei nyɔŋmai etɛ̃ kɛ enyɔ kɛ ohai enyɔ.

³⁶ Ni Benyamin shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

³⁷ mɛi akpei nyɔŋmai etɛ̃ kɛ enumɔ kɛ ohai ejwɛ.

³⁸ Dan shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

³⁹ mɛi akpei nyɔŋmai ekpaa kɛ enyɔ kɛ ohai kpawo.

⁴⁰ Ni Asher shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

⁴¹ mɛi akpei nyɔŋmai ejwɛ kɛ ekome kɛ ohai enumɔ.

⁴² Ni Naftali shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee

⁴³ mɛi akpei nyɔŋmai enumɔ kɛ etɛ̃ kɛ ohai ejwɛ.

⁴⁴ Gbɔmɛi nɛɛ ji mɛi ni Israel maŋ onukpai nyɔŋma kɛ enyɔ lɛ ni damɔ amɛtsɛmɛi awei lɛ anaa ni wa Mose kɛ Aaron kɛkane amɛyikulɛ lɛ.

⁴⁵ No hewɔ lɛ, Israelbii fɛɛ ni eye kɛjɛ afii nyɔŋmai enyɔ kɛyaa ni akane amɛ yɛ amɛtsɛmɛi awei anaa akɛ mɛi ni eshɛ tayaa lɛ,

⁴⁶ amɛyikulɛ fee mɛi akpei ohai ekpaa kɛ etɛ̃ kɛ ohai enumɔ kɛ nyɔŋmai enumɔ.

⁴⁷ Shi Levibii lɛ akaneee amɛ ashiii akutsei krokomɛi lɛ anɔ,

⁴⁸ ejaakɛ Yehowa kɛɛ Mose akɛ,

⁴⁹ “Kɛji okane Israelbii lɛ ayikulɛ lɛ, okakane Levibii lɛ oshi nɔ.

⁵⁰ Moŋ akɛ miKpee Buu Krɔŋkrɔŋ lɛ kɛ ehe nibii lɛ fɛɛ kɛ nɔ fɛɛ nɔ ni fata he lɛ nɔkwɛmɔ awo amɛdɛŋ. Amɛ amɛtere Buu lɛ kɛ ehe nibii lɛ fɛɛ, ni amɛ nɔŋŋ amɛkura Buu lɛ. Ni kɛji ato shi yɛ he ko lɛ, amɛmãmɔ amɛwɔɔhei amɛkɛbɔle Buu lɛ he kpula kɛkpe.

⁵¹ Kɛji maŋ lɛ fã nyiɛmɔ lɛ, Levibii lɛ afã Buu lɛ, ni kɛji shɛ be ni abaashi Buu lɛ, Levibii lɛ nɔŋŋ ashi. Mɔ folo fɛɛ mɔ folo ni aaabɛŋkɛ Buu lɛ agbe lɛ.

⁵² Kɛji ashɛ shitoohe ko lɛ, Israelbii fɛɛ ashi amɛbuui yɛ amɛsafo kuikui lɛ anaa. Mɔ fɛɛ mɔ buu ahi esafo shitoohe mli, ni asaŋ yɛ etsɛmɛi awe aflaŋaa shishi.

⁵³ Shi Levibii lɛ ashishii amɛbui lɛ kɛbɔle miKpee Buu Krɔŋkrɔŋ lɛ; amɛbu he bɔ ni afee ni mɔ folo ko akabɛŋkɛ Buu lɛ ni no yatsɛ mimlifu bahã Israelbii lɛ.”

⁵⁴ Bɔ ni Yehowa fã Mose lɛ nakai pɛpɛɛpɛ Israelbii lɛ fee lɛ.