3 Yohane 1 - ŊMALƐ KRƆŊKRƆŊ LƐ

Ŋamɔ

¹ Onukpa lɛ ŋma yahã suɔlɔ Gaio, mɔ ni misumɔɔ yɛ anɔkwale mli lɛ.

² Suɔlɔ, miikpa fai akɛ oshwere yɛ nibii fɛɛ mli ni ohi hewalɛ, tamɔ bɔ ni osusuma shwereɔ lɛ.

³ Ejaakɛ mina miishɛɛ babaoo be ni nyɛmimɛi komɛi ba ni amɛbaye onɔkwale lɛ he odase, bɔ ni onyiɛɔ yɛ anɔkwale lɛ mli lɛ.

⁴ Mibɛ miishɛɛ ko ni da fe enɛ akɛ manu akɛ mibii lɛ nyiɛɔ yɛ anɔkwale lɛ mli lɛ.

Gaio

⁵ Suɔlɔ, nɔ fɛɛ nɔ ni otsuɔ ohãa nyɛmimɛi lɛ anɔkwale mli ofeɔ yɛ, tsɛbelɛ gbɔi ji amɛ.

⁶ Amɛ amɛbaye osuɔmɔ lɛ he odase yɛ asafo lɛ hiɛ; ni kɛ ooowo amɛ gbɛ bɔ ni sa yɛ Nyɔŋmɔ hiɛ lɛ, ooofee jogbaŋŋ.

⁷ Ejaakɛ Kristo gbɛi lɛ hewɔ amɛtee, ni amɛheee nɔ ko yɛ jeŋmajiaŋbii lɛ adɛŋ.

⁸ No hewɔ lɛ, esa akɛ wɔhereɔ nɛkɛ gbɔmɛi nɛɛ atuu, koni wɔtsɔ̃mɔ anɔkwale lɛ he nanemɛi nitsulɔi.

Diotrefe kɛ Demetrio

⁹ Miŋma wolo ko mimaje asafo lɛ, shi Diotrefe mɔ ni taoɔ amɛnɔ onukpa aye lɛ hereee wɔ.

¹⁰ No hewɔ lɛ, kɛ miba lɛ mahã nyɛle enifɔɔji anii ni efeɔ lɛ, bɔ ni ewieɔ wɔhe wiemɔi fɔ̃ji lɛ, ni enɛɛmɛi tete hu faaa hãaa lɛ, shi moŋ lɛ diɛŋtsɛ ehereee nyɛmimɛi lɛ, ni asaŋ mɛi ni sumɔɔ akɛ amɛaafee nakai lɛ etsĩɔ amɛ gbɛ, ni eshwieɔ amɛ kɛjɛɔ asafo lɛ mli.

¹¹ Suɔlɔ, kaakase nɔ ni ji efɔŋ, shi kasemɔ nɔ ni ji ekpakpa moŋ. Mɔ ni feɔ ekpakpa lɛ, ejɛ Nyɔŋmɔ mli; mɔ ni feɔ efɔŋ lɛ, enako Nyɔŋmɔ.

¹² Demetrio lɛ, mɛi fɛɛ miiye ehe odase, ni anɔkwale diɛŋtsɛ miiye ehe odase, ni wɔ hu wɔmiiye ehe odase, ni ole akɛ wɔdase lɛ anɔkwa ni.

Naagbee ŋamɔi

¹³ Kulɛ miyɛ nibii pii ni maŋma bo, shi misumɔ̃ɔɔ akɛ mikɛ “blɛgi” kɛ niŋmaatso ŋmaa bo;

¹⁴ shi moŋ mihiɛ kã nɔ akɛ eshwɛ fioo kɛkɛ ni mana bo, ni wɔɔwie hiɛ kɛ hiɛ.

¹⁵ Hejɔlɛ ahã bo! Wɔshieŋtsɛmɛi lɛ miibi bo. Tsɛ wɔshieŋtsɛmɛi lɛ agbɛii ekomekome ni oŋa amɛ.