3 Mose 9 - ŊMALƐ KRƆŊKRƆŊ LƐ

Aaron shã afɔle

¹ Gbi ni agbe osɔfowoo kusumi lɛ anaa lɛ nɔ jetsɛremɔ lɛ, Mose tsɛ Aaron kɛ ebihii lɛ kɛ Israel onukpai lɛ.

² Mose kɛɛ Aaron akɛ: “Ŋɔɔ tsinanuu fioo kome ni kpa ko bɛ ehe kɛ too ojwɛni kome hu ni kpa ko bɛ ehe ni okɛshã afɔle, ohã Yehowa. Okɛ tsinanuu lɛ ashã esha afɔle ni okɛ too ojwɛni lɛ ashã shãa afɔle.

³ Kɛkɛ lɛ okɛɛ Israelbii lɛ akɛ amɛŋɔ too ojwɛni amɛkɛshã esha afɔle; amɛkɛ tsinabi ni eye afi ni kpa ko bɛ ehe kɛ too gwantɛŋbi ni eye afi ni kpa ko bɛ ehe ashã shãa afɔle;

⁴ ni amɛkɛ tsinanuu kɛ too ojwɛni kɛ ŋmãa afɔle ni awo mli mu ashã naanyobɔɔ afɔle. Amɛshã afɔle amɛhã Yehowa, ejaakɛ ŋmɛnɛ gbi nɛɛ nɔ Yehowa baajie ehe kpo etsɔ̃ɔ nyɛ.”

⁵ Amɛkɛ nii ni Mose fã amɛ akɛ amɛkɛba lɛ ba Kpee Buu lɛ hiɛ, ni asafo muu lɛ fɛɛ bua amɛhe naa yɛ jɛi koni amɛja Yehowa.

⁶ Mose kɛɛ amɛ akɛ, “Yehowa fã akɛ nyɛfee enɛɛmɛi fɛɛ bɔ ni afee ni enunyam ni kpɛ kaŋkaŋ lɛ ajie ehe kpo atsɔ̃ɔ nyɛ.”

⁷ Kɛkɛ ni Mose kɛɛ Aaron akɛ, “Tsi obɛŋkɛ afɔleshãa latɛ lɛ ni oshã esha afɔle kɛ shãa afɔle ohã ohe koni okɛfɔ ohe esha kɛ maŋ lɛ he esha. Oshã afɔle nɛɛ koni okɛfɔ maŋ lɛ he eshai, tamɔ bɔ ni Yehowa wo kitã lɛ.”

⁸ Aaron tsi kɛtee afɔleshãa latɛ lɛ he, ni egbe tsinanuu fioo lɛ ekɛshã esha afɔle ehã lɛ diɛŋtsɛ ehe.

⁹ Ebihii lɛ kɛ lá lɛ ba. Aaron kɛ ewao tsɔ mli, ni ekɛdiki koji ni yɔɔ afɔleshãa latɛ lɛ he lɛ. Ni lá ni shwɛ lɛ etsi eshwie afɔleshãa latɛ lɛ shishi.

¹⁰ Kɛkɛ ni eshã fɔ lɛ kɛ sabai lɛ kɛ mlɛbo lɛ he loo ni tsotsoro shi lɛ yɛ afɔleshãa latɛ lɛ nɔ, tamɔ bɔ ni Yehowa wo Mose kitã lɛ.

¹¹ Shi kooloo lɛ kɛ hewolo lɛ eshã yɛ shitoohe lɛ sɛɛ.

¹² Mose gbe kooloo ni akɛbaashã shãa afɔle lɛ hu. Ebihii lɛ kɛ lá lɛ bahã lɛ, ni ekɛshwã afɔleshãa latɛ lɛ koji ejwɛ lɛ he kɛkpe.

¹³ Amɛkɛ shãa afɔle lɛ hu bahã lɛ, loo ni ashãa lɛ kɛ yitso lɛ fɛɛ hu lɛ, ni eshã yɛ afɔleshãa latɛ lɛ nɔ.

¹⁴ Kɛkɛ ni efɔ mlinii lɛ kɛ naji lɛ ahe, ni ekɛshwie shãa afɔle ni jwere afɔleshãa latɛ lɛ nɔ lɛ nɔ, ni eshã fɛɛ.

¹⁵ Enɛ sɛɛ lɛ, ekɛ maŋ lɛ afɔlei lɛ ba. Eŋɔ too kpakpo ni akɛbaashã maŋ lɛ he esha afɔle lɛ; egbe lɛ ni ekɛshã afɔle, tamɔ bɔ ni efee lɛ diɛŋtsɛ ehe esha afɔle lɛ.

¹⁶ Eŋɔ kooloo ni akɛshãa shãa afɔle lɛ hu kɛba, ni ekɛshã afɔle tamɔ bɔ ni gbɛjianɔtoo lɛ yɔɔ lɛ.

¹⁷ Ekɛ niyenii afɔle lɛ ba; ni ekpiti emli eko ekɔkɔ obɔ̃ ni ekɛfata shãa afɔle ni ashãa daa leebi lɛ he, ni eshã yɛ afɔleshãa latɛ lɛ nɔ.

¹⁸ Kɛkɛ ni egbe tsinanuu lɛ kɛ too ojwɛni lɛ ekɛshã naanyobɔɔ afɔle ehã maŋ lɛ; ebihii lɛ kɛ lá lɛ bahã lɛ, ni ekɛshwã afɔleshãa latɛ lɛ koji ejwɛ lɛ he kɛkpe.

¹⁹ Tsinanuu lɛ kɛ too ojwɛni lɛ fɔi lɛ kɛ lei ni ewo fɔ lɛ kɛ fɔ ni ha mlinii lɛ ahe lɛ kɛ sabai lɛ kɛ loo ni tsotsoro mlɛbo lɛ he lɛ,

²⁰ Aaron kɛ fɛɛ shwie kooloi lɛ atsitsii lɛ anɔ, ni eshã yɛ afɔleshãa latɛ lɛ nɔ.

²¹ Ekɛ tsitsii lɛ kɛ sɛɛ ninejurɔ shuɔ naji lɛ hã Yehowa akɛ nikeenii titri ko, tamɔ bɔ ni Mose ewo kitã lɛ.

²² Be ni Aaron eshã esha afɔle kɛ naanyobɔɔ afɔle lɛ egbe naa lɛ, ehole eniji anɔ kɛtee ŋwɛi ni ejɔɔ maŋ lɛ. Kɛkɛ ni ekpeleke shi.

²³ Agbɛnɛ Mose kɛ Aaron bote Kpee Buu lɛ mli. Be ni amɛje kpo ekoŋŋ lɛ, amɛjɔɔ maŋ lɛ. Ni Yehowa anunyam ni kpɛɔ kaŋkaŋ lɛ jie ehe kpo etsɔ̃ɔ maŋ lɛ fɛɛ.

²⁴ Trukaa lɛ Yehowa hã la ba ni ebashã shãa afɔle lɛ kɛ fɔi lɛ ni yɔɔ afɔleshãa latɛ lɛ nɔ lɛ. Be ni maŋ muu lɛ fɛɛ na lɛ, amɛbolɔ, ni amɛkɛ amɛhiɛ bumɔ shi.