3 Mose 27 - ŊMALƐ KRƆŊKRƆŊ LƐ

Nibii ni akɛkeɔ Yehowa ahe mlai

¹ Yehowa kɛɛ Mose akɛ,

² ekɛɛ Israelbii lɛ akɛ, “Kɛji mɔ ko je gbɛ, ni ewo shi krɛdɛɛ, ni ejɔɔ gbɔmɛi komɛi anɔ ekɛke Yehowa koni amɛsɔ̃mɔ yɛ jamɔhe lɛ, jara ni abaawo yɛ amɛyi kɛkpɔ̃ amɛ nɛ:

³ Nuu ni eye kɛjɛ afii nyɔŋmai enyɔ kɛyashi afii nyɔŋmai ekpaa lɛ, eyi jara afee jwiɛtɛi shekeli nyɔŋmai enumɔ.

⁴ Kɛji yoo ni lɛ, no lɛ eyi jara lɛ afee jwiɛtɛi shekeli nyɔŋmai etɛ̃.

⁵ Yɛ mɛi ni eye kɛjɛ afii enumɔ aahu kɛyashi afii nyɔŋmai enyɔ agbɛfaŋ lɛ, awo nuu yi jara jwiɛtɛi shekeli nyɔŋmai enyɔ, kɛ yoo hu yi jara jwiɛtɛi shekeli nyɔŋma.

⁶ Shi yɛ mɛi ni eye kɛjɛ nyɔɔŋ kome aahu kɛyashi afii enumɔ agbɛfaŋ lɛ, awo nuu yi jara jwiɛtɛi shekeli enumɔ, kɛ yoo hu yi jara jwiɛtɛi shekeli etɛ̃.

⁷ Ni mɛi ni eye kɛjɛ afii nyɔŋmai ekpaa kɛyaa lɛ, nuu yi jara ji jwiɛtɛi shekeli nyɔŋma kɛ enumɔ, yoo hu yi jara ji jwiɛtɛi shekeli nyɔŋma.

⁸ “Kɛji mɔ ni wo shi lɛ ohiafo ni, ni enyɛɛɛ jara ni afo lɛ ewo lɛ, no lɛ ekpala gbɔmɔ ni ejɔɔ enɔ eke Yehowa lɛ kɛya osɔfo lɛ hiɛ koni osɔfo lɛ awo egbɔmɔ lɛ yi jara. Osɔfo lɛ adamɔ bɔ ni mɔ ni wo shi lɛ aaana ahã nɔ kɛwo jara lɛ.

⁹ “Shi kɛji shĩa kooloo ji nɔ ni awo ehe shi ajɔɔ enɔ akɛhã Yehowa lɛ, no lɛ nɔ fɛɛ nɔ ni akɛhãa Yehowa lɛ, etsɔ̃ nɔ krɔŋkrɔŋ.

¹⁰ Mɔ ni wo shi lɛ bɛ hegbɛ akɛ ekɛ kooloo kroko toɔ najiaŋ aloo etsakeɔ; ekɛ kooloo kpakpa akato kooloo gbonyo najiaŋ lɛ, ekɛ kooloo gbonyo akatsake ekpakpa. Kɛji ekɛ kooloo tee emomo lɛ tsakemɔ lɛ, no lɛ klɛŋklɛŋ kooloo momo lɛ kɛ kooloo hee ni ekɛba tsakemɔ lɛ fɛɛ baatsɔ̃ Yehowa nii.

¹¹ Shi kɛji kooloo lɛ yafee kooloo ni he tseee, ni no hewɔ lɛ, akɛshãaa afɔle ahãaa Yehowa lɛ eko ni lɛ, no lɛ mɔ ni wo shi lɛ kɛ kooloo lɛ aya osɔfo lɛ ŋɔɔ.

¹² Osɔfo lɛ akwɛ kpa ni yɔɔ kooloo lɛ he kɛ ehiɛ fɛɛ koni ewo eyi jara. Jara ni osɔfo lɛ baawo lɛ, aŋɔ nɔ nakai.

¹³ Shi kɛji mɔ lɛ miisumɔ akɛ ekpɔ̃ ekooloo lɛ, no lɛ ekɛ kooloo lɛ jara lɛ mlijaa enumɔ mli ekome ashwie kooloo lɛ yi jara ni awo lɛ nɔ kɛwo eyi nyɔmɔ.

¹⁴ “Kɛji mɔ ko jɔɔ eshĩa nɔ eke Yehowa lɛ, osɔfo lɛ akwɛ nibii ni hi kɛ nibii ni ehiii fɛɛ yɛ shĩa lɛ he koni ewo ejara; ni jara ni osɔfo lɛ baawo lɛ aŋɔ nɔ nakai.

¹⁵ Ni kɛji mɔ ni jɔɔ eshĩa nɔ eke lɛ miisumɔ akɛ ekpɔ̃ eshĩa lɛ, no lɛ ekɛ shĩa lɛ jara ni awo lɛ mlijaa enumɔ mli ekome ashwie jara ni awo lɛ nɔ kɛwo shĩa lɛ he nyɔmɔ, ni shĩa lɛ baatsɔ̃ enɔ ekoŋŋ.

¹⁶ “Kɛji mɔ ko jɔɔ shikpɔŋ ni ji egboshinii nɔ ekɛke Yehowa lɛ, akwɛ dumɔ wui ni shikpɔŋ lɛ yeɔ falɛ kɛwo shikpɔŋ lɛ jara. Tɛ nɔ ni adamɔ kɛwo jara lɛ ji akoko kiloi nyɔŋmai enyɔ akɛhe jwiɛtɛi shekel nyɔŋma.

¹⁷ Kɛji Nikpɔ̃mɔ Afiyeli lɛ nɔ nɔŋŋ ni ejɔɔ eshikpɔŋ lɛ nɔ eke lɛ, shikpɔŋ lɛ jara lɛ adamɔ jara bɔ ni awo lɛ nɔ nɔŋŋ.

¹⁸ Kɛji afiyeli lɛ sɛɛ dani ejɔɔ eshikpɔŋ lɛ nɔ eke lɛ, no lɛ osɔfo lɛ abu afii abɔ ni eshwɛ dani eshɛɔ Nikpɔ̃mɔ Afi ekoŋŋ yɛ shika mli koni akɛtse jara ni awo lɛ nɔ.

¹⁹ Kɛji mɔ ni jɔɔ eshikpɔŋ lɛ nɔ eke lɛ sumɔ akɛ ekpɔ̃ shikpɔŋ lɛ, ekɛ shikpɔŋ lɛ jara ni awo lɛ mlijaa enumɔ mli ekome ashwie jara ni awo lɛ nɔ kɛwo nyɔmɔ, ni ebaatsɔ̃ enɔ ekoŋŋ.

²⁰ Shi kɛji esumɔ̃ɔɔ akɛ ekpɔ̃ shikpɔŋ lɛ, aloo ehɔ̃ɔ ehã mɔ kroko ko lɛ, no lɛ shikpɔŋ lɛ ehiŋ kpɔ̃mɔ dɔŋŋ.

²¹ Ni kɛji eshɛ Nikpɔ̃mɔ Afi lɛ nɔ, ni aŋmɛɛ nɛkɛ shikpɔŋ nɛɛ he tete lɛ, ebaahi shi akɛ Yehowa nɔ, nɔ ko ni ajɔɔ nɔ owura kosɛɛ ake Yehowa; ebaatsɔ̃ osɔfo lɛ nɔ.

²² “Kɛji mɔ ko jɔɔ shikpɔŋ ni jeee gbo agbo ashi ahã lɛ, shi etse shika ekɛhe, nɔ ehã Yehowa lɛ,

²³ no lɛ osɔfo lɛ abu shikpɔŋ lɛ jara lɛ naa kɛyashi Nikpɔ̃mɔ Afi lɛ nɔ ehã mɔ lɛ, ni mɔ lɛ awo shika nɛɛ yɛ nakai gbi lɛ nɔ nɔŋŋ akɛ shika lɛ ahã Yehowa akɛ enii yinii.

²⁴ Ni Nikpɔ̃mɔ Afi lɛ nɔ lɛ akpale shikpɔŋ lɛ ahã mɔ dɛŋ ni ahe yɛ lɛ koni etsɔ̃ enɔ ekoŋŋ akɛ shikpɔŋ ni ji egboshinii.

²⁵ “Tɛ nɔ ni adamɔ kɛwo jara fɛɛ jara afee He Krɔŋkrɔŋ lɛ jwiɛtɛi tɛ lɛ naa; no ji akɛ gerai nyɔŋmai enyɔ afee shekel kome.

²⁶ “Shi kooloi fɛɛ akromɔbii ni ji Yehowa nii momo lɛ, mɔ ko akajɔɔ eko nɔ ekɛmiike Yehowa: tsina ni jio, too ni jio, Yehowa nɔ ni momo.

²⁷ Shi kɛji kooloi ni ahe tseee lɛ eko kromɔbi ni lɛ, no lɛ akpɔ̃ lɛ yɛ jara tɛ ni afo lɛ naa; ni akɛ eyi jara ni awo lɛ mlijaa enumɔ mli ekome ashwie jara ni awo lɛ nɔ kɛwo eyi nyɔmɔ. Shi kɛji nɔtsɛ lɛ kpɔ̃ɔɔ ekooloo lɛ, no lɛ ahɔ̃ɔ lɛ yɛ jara ni awo lɛ kɛkɛ naa.

²⁸ “Shi moŋ nɔ fɛɛ nɔ ni mɔ ko yɔɔ, gbɔmɔ ni jio, kooloo ni jio, shikpɔŋ ni agbo ashi ahã lɛ ni jio, ni ejɔɔ nɔ tswaa ekɛke Yehowa lɛ, akahɔ̃ɔ, ni akakpɔ̃ kɔkɔɔkɔ, ejaakɛ nɔ lɛ eji Yehowa nii kɛmiiya naanɔ.

²⁹ Gbɔmɔ adesa tete ni akɛ lɛ eke koni akpãtã ehiɛ kɛje gbɔmɛi ateŋ lɛ, akakpɔ̃ lɛ; ana agbe lɛ kɛ̃.

³⁰ “Shikpɔŋ lɛ nɔ nibaanii fɛɛ lɛ, ŋmãa ni jio, aduawai ni jio, amɛmlijaa nyɔŋma mli ekome lɛ Yehowa nɔ ni; nɔ krɔŋkrɔŋ ni.

³¹ Kɛji mɔ ko sumɔ akɛ ekpɔ̃ egbɛfaŋ nibii lɛ mlijaa nyɔŋma mli ekome lɛ eko lɛ, no lɛ ekɛ mlijaa enumɔ mli ekome agbe yi kɛwo nyɔmɔ.

³² Nakai nɔŋŋ ji tsinai kɛ toi: no ji kooloi fɛɛ ni akpalaa amɛ lɛ amɛyikulɛ nyɔŋma mli ekome lɛ eji Yehowa nɔ.

³³ Akakpa mli akwɛ akɛ kooloo lɛ ehi aloo ehiii; ni akatsake hu. Kɛji mɔ ko aaatsake eko kɛ̃ lɛ, no lɛ no kɛ lɛ kooloo hee ni akɛbaatsake emomo lɛ fɛɛ tswɛm baatsɔ̃ Yehowa nɔ; akakpɔ̃ kooloo lɛ.”

³⁴ Enɛɛmɛi ji kitãi ni Yehowa fã Mose yɛ Sinai Gɔŋ lɛ nɔ akɛ ewo Israelbii lɛ.