3 Mose 26 - ŊMALƐ KRƆŊKRƆŊ LƐ

Toiboo sɛɛ Jɔɔmɔi

¹ Kɛkɛ ni Yehowa kɛɛ akɛ, “Nyɛkafea amãgãi nyɛhãa nyɛhe, ni nyɛkɛ tɛ akamaa shiu ko, ni nyɛkakpɛa nɔ ko mfoniri yɛ tɛ mli hu nyɛkɛma shi yɛ nyɛshikpɔŋ lɛ nɔ, ni nyɛkoto shi nyɛja lɛ, ejaakɛ mi ji Yehowa, nyɛNyɔŋmɔ lɛ.

² Nyɛyea gbii juji ni mito lɛ, ni nyɛhiɛ asɔa he ni ajaa mi yɛ lɛ. Mi ji Yehowa.

³ “Kɛji nyɛba nyɛjeŋ yɛ mikpɔi lɛ anaa, ni nyɛbu mikitãi lɛ, ni nyɛye amɛnɔ lɛ,

⁴ mahã nu anɛ ahã nyɛ yɛ be ni sa mli, ni shikpɔŋ lɛ baaba nii babaoo ahã nyɛ, ni ŋmɔshi tsei hu baawo yibii.

⁵ Nyɛbaakã he nyɛgbee ŋmãa ni nyɛku aahu kɛyaashi wainyibii tsemɔ be mli, ni nyɛbaahiɛ wainyibii tsemɔ nɛkɛ aahu kɛyashi nidumɔ be mli, ni nyɛaaye nyɛboloo nyɛtɔrɔ. Nyɛaahi nyɛshikpɔŋ lɛ nɔ shweshweeshwe.

⁶ “Mahã jeŋ ajɔ yɛ nyɛshikpɔŋ lɛ nɔ; ni nyɛaakamɔ shi nyɛwɔ ni mɔ ko mɔ ko woŋ nyɛhe gbeyei. Mahã kooloi fɔ̃ji atã yɛ nyɛshikpɔŋ lɛ nɔ, ni awuŋ ta yɛ jɛi.

⁷ Nyɛaawo nyɛhenyɛlɔi foi, ni amɛaanyɔnyɔi yɛ nyɛhiɛ yɛ klante naa.

⁸ Nyɛteiaŋ gbɔmɛi enumɔ kɛkɛ aaawo henyɛlɔi oha foi, ni nyɛmɛi oha hu aaawo henyɛlɔi akpei nyɔŋma foi. Nyɛhenyɛlɔi lɛ aaanyɔnyɔi yɛ nyɛhiɛ yɛ klante naa.

⁹ Madro nyɛ, ni mahã nyɛwo shwiei ni nyɛyi afa; ni maye mi kɛ nyɛ teŋ kpãŋmɔ lɛ nɔ.

¹⁰ Nyɛhiɛ abele kukudabi ni nyɛto lɛ yeli mli ni abele kpokploku baapue, ni no hewɔ lɛ, nyɛaajie kukudabi lɛ kɛje kpo koni ana toohe ahã kpokploku lɛ.

¹¹ Mahi nyɛteŋ yɛ miBuu Krɔŋkrɔŋ lɛ mli, ni minyaŋeŋ nyɛ.

¹² Manyiɛ nyɛteŋ, ni matsɔ̃ nyɛNyɔŋmɔ, ni nyɛ hu nyɛaatsɔ̃ mimaŋ.

¹³ Mi ji Yehowa, nyɛNyɔŋmɔ lɛ, mɔ ni jie nyɛ yɛ Ijipt shikpɔŋ lɛ nɔ koni nyɛkahi shi akɛ amɛnyɔji dɔŋŋ lɛ. Mikumɔ tsei ni akɛwo nyɛ apã lɛ, ni mihã nyɛnyiɛ ni apã kãaa nyɛkuɛ.”

Toigbele he toigbalamɔ

¹⁴ “Shi kɛji nyɛbooo mi toi, ni nyɛyeee mikitãi nɛɛ anɔ;

¹⁵ ni kɛji nyɛkwa mikpɔi lɛ, ni nyɛnyaŋe mimlai lɛ, ni nyɛyeee mikitãi lɛ anɔ, ni nyɛku mi kɛ nyɛ kpãŋmɔ lɛ mli lɛ,

¹⁶ mi hu nɔ ni mibafee nyɛ nɛ: Mibahã tsuifãa saji abahɛŋ nyɛ trukaa, ni wɔlɔmɔ kɛ atridii ni hãa hiŋmɛi fiteɔ, ni etãa gbɔmɔtso loo baaye nyɛ. Nyɛbaagbo deŋme yaka nyɛdu nii ejaakɛ nyɛhenyɛlɔi moŋ baaba abaye.

¹⁷ Majie mihiɛ maka nyɛ, ni nyɛhenyɛlɔi baaye nyɛnɔ, ni mɛi ni hetsɛ̃ɔ nyɛ lɛ aaaye nyɛnɔ bɔ sɔŋŋ, ni nyɛbaawo foi be mli ni mɔ ko mɔ ko enyiɛɛɛ nyɛsɛɛ.

¹⁸ “Ni kɛji enɛɛmɛi fɛɛ asɛɛ lɛ, nyɛbooo mi toi lolo lɛ, no lɛ mibagbala nyɛtoi ekoŋŋ shii kpawo yɛ nyɛtɔ̃mɔi lɛ ahewɔ,

¹⁹ ni maku nyɛhe ni nyɛwoɔ kɛ kuɛŋtilɛ lɛ naa, ni mahã ŋwɛi agbi tamɔ dade, ni nyɛshikpɔŋ lɛ hu nɔ aaagbi tamɔ akɔɔble,

²⁰ ni nyɛaagbo yaka deŋme ejaakɛ nyɛshikpɔŋ lɛ baŋ niyenii, ni enɔ tsei lɛ hu woŋ yibii.

²¹ “Kɛji nyɛfeee nɔ ni mi mitaoɔ, ni nyɛtee nɔ nyɛbooo mi toi lɛ, mayanɔ magbala nyɛtoi shii kpawo fe tsutsu lɛ yɛ nyɛtɔ̃mɔi lɛ anaa.

²² Maŋmɛɛ ŋaŋ kooloi ahe mawo nyɛteŋ, ni amɛbaagbegbee nyɛbii, ni amɛbaakpãtã nyɛshĩa kooloi ahiɛ, ni amɛbaahã nyɛ nɔ agbɔ, bɔ ni nane baaje nyɛgbɛjegbɛi anɔ.

²³ “Kɛji yɛ nɛkɛ toigbalamɔ nɛɛ hu fɛɛ sɛɛ lɛ nyɛtsakeee, shi nyɛtee nɔ nyɛfee nɔ ni mitaooo lɛ,

²⁴ no lɛ mi hu mate shi mawo nyɛ, ni magbala nyɛtoi shii kpawo fe tsutsu lɛ yɛ nyɛtɔ̃mɔi lɛ ahewɔ.

²⁵ Mahã ta abanina nyɛ koni atsɔ̃ no nɔ kɛgbala nyɛtoi, kɛtɔ mi kɛ nyɛ teŋ kpãŋmɔ lɛ mlikuu he owele. Kɛji nyɛbua nyɛhe naa yɛ nyɛmaji wuji amli, yɛ shweshweeshwefeemɔ hewɔ hu lɛ, mibahã gbele hela abote nyɛteŋ, ni nyɛhenyɛlɔi lɛ anine aaashɛ nyɛnɔ.

²⁶ Mafo nyɛŋmãa ni nyɛnaa nyɛyeɔ sɛɛ lɛ; ni no baahã yei nyɔŋma ashã aboloo fɛɛ ni nyɛyɔɔ shãa lɛ yɛ flɔnɔɔ kome pɛ mli. Aboloo lɛ hu abaaŋmɛ kɛ nsɛni ahã nyɛ nyɛye; ni nyɛaaye nɛ shi nyɛtɔrɔŋ.

²⁷ “Ni kɛji yɛ enɛ fɛɛ hu sɛɛ lɛ nyɛbooo mi toi, shi nyɛfee nɔ ni mitaooo lɛ,

²⁸ no lɛ mi hu mate shi mawo nyɛ kɛ mlila, ni magbala nyɛtoi shii kpawo fe tsutsu lɛ yɛ nyɛtɔ̃mɔi lɛ ahewɔ.

²⁹ “Hɔmɔ naa lɛ nyɛbaagbe nyɛ diɛŋtsɛ nyɛbihii kɛ nyɛbiyei, nyɛye.

³⁰ Mibafite hei ni nyɛjaa yɛ, yɛ gɔji lɛ anɔ, kɛ ohɛ afɔleshãa latɛi lɛ; ni mibashɛrɛ nyɛgbohii lɛ mashwie nyɛmãgãi ni akumɔ ashwie shi lɛ anɔ.

³¹ Mahã nyɛmaji lɛ atsɔ̃mɔ amaŋfɔ̃i, ni mafite nyɛjamɔhei lɛ hu; ni mihereŋ nyɛtsofakɛŋma lɛ ŋma dɔŋŋ.

³² Makpãtã shikpɔŋ lɛ hiɛ bɔ ni nyɛhenyɛlɔi lɛ diɛŋtsɛ ni aaabahi nɔ lɛ tete ahiɛ aaafee amɛ yaa.

³³ Ni nyɛ diɛŋtsɛ lɛ mahã ta abanina nyɛ, ni magbɛ nyɛ mashwã majimaji ni yɔɔ jeŋ lɛ anɔ. Gbɔmɛi baatã yɛ nyɛshikpɔŋ lɛ nɔ, ni nyɛmaji lɛ baatsɔ̃mɔ amaŋfɔ̃i.

³⁴ Gbii abɔ ni nyɛyɔɔ nyɛhenyɛlɔi lɛ ashikpɔŋ lɛ nɔ, ni shikpɔŋ lɛ kã shi efolo ni ahuuu nɔ lɛ, belɛ shikpɔŋ lɛ miijɔɔ ehe ekɛtse ehejɔɔmɔ be ni nyɛshã nyɛshwie lɛ. Belɛ ja nakai dani shikpɔŋ lɛ baana hegbɛ eye ehejɔɔmɔ be lɛ.

³⁵ Gbii abɔ ni shikpɔŋ lɛ kã shi efolo ni ahuuu nɔ lɛ, belɛ ehejɔɔmɔ ni nyɛhã ŋmɛɛ lɛ be ni nyɛyɔɔ enɔ lɛ, no eyeɔ lɛ.

³⁶ “Ni nyɛteŋ mɛi ni baashwɛ yɛ nyɛhenyɛlɔi lɛ ashikpɔji lɛ anɔ lɛ, mahã nyɛtsɔ̃mɔ gbeyeilɔi feetɔi, mɛi ni baa ni etse kɛyaagbee shi gbɛɛmɔ kɛkɛ po baawo amɛ foi, ni amɛbaajo foi tamɔ ajoɔ klante naa foi, ni amɛaanyɔnyɔi, tsɛbelɛ mɔ ko mɔ ko enyiɛɛɛ amɛsɛɛ.

³⁷ Ni amɛaagbeegbee shi, mɔ ko kã mɔ ko nɔ tamɔ mɛi ni miijo klante naa foi gbeɔ shi, tsɛbelɛ mɔ ko woko amɛ foi; ni nyɛnyɛŋ nyɛhenyɛlɔi ahiɛ nyɛdamɔ.

³⁸ Nyɛaagboi yɛ maŋsɛɛ majimaji lɛ anɔ, ni eeefee tamɔ nɔ ni nyɛhenyɛlɔi lɛ ashikpɔji lɛ emimii nyɛ.

³⁹ Ni nyɛteŋ mɛi ni aaashwɛ lɛ, mligbigblimɔ sɔŋŋ baagbegbee nyɛ yɛ nyɛhenyɛlɔi lɛ ashikpɔji lɛ anɔ yɛ nyɛtɔ̃mɔi lɛ ahewɔ. Nakai nɔŋŋ hu nyɛaagbigbli nyɛmli tamɔ nyɛtsɛmɛi lɛ kɛyaashi nyɛaagboi tamɔ amɛ.

⁴⁰ “Shi kɛji amɛjaje amɛnifɔɔjianii lɛ kɛ amɛtsɛmɛi lɛ hu anifɔ̃ɔjianii ni amɛfee amɛshi mi, kɛ bɔ ni amɛbaaa amɛjeŋ bɔ ni mi mitaoɔ,

⁴¹ ni no hewɔ hu mi hu mite shi miwo amɛ, ni mihã amɛyaje amɛhenyɛlɔi shikpɔŋ nɔ lɛ, kɛji amɛtsui ni ekpiliŋ lɛ he jɔ, ni amɛba amɛhe shi, ni amɛkpɛlɛ̃ amɛnifɔɔji lɛ ahe nyɔmɔwoo lɛ nɔ lɛ,

⁴² no lɛ mibakai mi kɛ Yakob teŋ kpãŋmɔ lɛ, kɛ mi kɛ Isak teŋ kpãŋmɔ lɛ hu, kɛ mi kɛ Abraham teŋ kpãŋmɔ lɛ hu, ni mibakai amɛshikpɔŋ lɛ.

⁴³ Shi ja amɛhã shikpɔŋ lɛ kã shi efolo ni ahuuu nɔ, koni shikpɔŋ lɛ ana aye ehejɔɔmɔ be lɛ. No sɛɛ lɛ, ja agbala amɛtoi kɛwo amɛ amɛnifɔɔjianii lɛ ahe nyɔmɔ, ejaakɛ amɛkwa mimlai lɛ, ni amɛnyaŋe mikpɔi lɛ.

⁴⁴ Enɛ fɛɛ sɛɛ lɛ, be mli ni amɛyɔɔ amɛhenyɛlɔi lɛ ashikpɔŋ lɛ nɔ tete lɛ, mikwaŋ amɛ, ni minyaŋeŋ amɛ bɔ ni no baahã makpãtã amɛhiɛ kwraa kɛku mi kɛ amɛteŋ kpãŋmɔ lɛ mli, ejaakɛ mi ji Yehowa, amɛNyɔŋmɔ lɛ.

⁴⁵ Shi amɛhewɔ lɛ, mibakai mi kɛ amɛtsɛmɛi lɛ ateŋ kpãŋmɔ lɛ, amɛtsɛmɛi lɛ ni mijie yɛ Ijipt shikpɔŋ lɛ nɔ yɛ majimaji lɛ ahiɛ lɛ, koni matsɔ̃ amɛNyɔŋmɔ lɛ. Mi ji Yehowa.”

⁴⁶ Akpɔi kɛ kitãi kɛ mlai ni Yehowa tsɔ̃ Mose nɔ ewo yɛ Sinai Gɔŋ lɛ nɔ koni ekã lɛ, Yehowa, kɛ Israelbii lɛ ateŋ ji enɛɛmɛi.