3 Mose 23 - ŊMALƐ KRƆŊKRƆŊ LƐ

Jamɔ gbii juji lɛ

¹ Yehowa kɛɛ Mose akɛ,

² “Kɛɛmɔ Israelbii lɛ akɛ gbii juji ni, mi, Yehowa, mito akɛ akpe kpee krɔŋkrɔŋ kɛja yɛ amɛnɔ lɛ nɛ.

³ Atsu nii gbii ekpaa; shi gbi ni ji kpawo lɛ, hejɔɔmɔ gbi ni; akatsu nitsumɔ ko nitsumɔ ko yɛ hejɔɔmɔ gbi lɛ nɔ yɛ hei fɛɛ ni nyɛaahi; akpe kpee krɔŋkrɔŋ kɛja

⁴ Yehowa gbii juji ni akpe kpee krɔŋkrɔŋ lɛ yɛ amɛnɔ kɛja lɛ nɛ. Nyɛshiɛa eko fɛɛ eko kɛji ebe ni ato lɛ shɛ lɛ.”

Hehoo kɛ Ma Akpiti Aboloo Gbijurɔ

⁵ “Klɛŋklɛŋ nyɔɔŋ lɛ nɔ gbi ni ji nyɔŋma kɛ ejwɛ lɛ gbɛkɛnaashi lɛ ji Yehowa Hehoo gbi lɛ.

⁶ Ni gbi ni ji nyɔŋma kɛ enumɔ lɛ nɔ yɛ nakai nyɔɔŋ lɛ nɔŋŋ nɔ lɛ, no ji mã akpiti gbijurɔ lɛ. Nyɛyea aboloo ni akɛ mã akpiti shã gbii kpawo kɛjɛ nakai gbi lɛ nɔ.

⁷ Gbii kpawo nɛɛ mli klɛŋklɛŋ gbi lɛ nɔ lɛ nyɛkpea kpee krɔŋkrɔŋ kɛjaa; akatsu nitsumɔ ko nitsumɔ ko ni wa yɛ nɔ.

⁸ Nyɛkɛ niyenii afɔle abahãa Yehowa gbii kpawo. Ni gbi ni ji kpawo lɛ nɔ lɛ nyɛkpea kpee krɔŋkrɔŋ kɛjaa; shi akatsu nitsumɔ ko nitsumɔ ko ni wa yɛ nɔ.”

⁹ Yehowa kɛɛ Mose akɛ,

¹⁰ “Kɛɛmɔ Israelbii lɛ akɛ kɛji nyɛyashɛ shikpɔŋ lɛ ni mikɛhãa nyɛ lɛ nɔ, ni nyɛkpa enɔ ŋmɔshi nii lɛ, nyɛkɛ nikpamɔnii lɛ mli klɛŋklɛŋ abele tso kɛ eyinii lɛ abahãa osɔfo lɛ.

¹¹ Osɔfo lɛ baafɔ̃ nikpamɔnii nɛɛ yɛ Yehowa hiɛ kɛya kɛba akɛ afɔle krɛdɛɛ ko ni nyɛsa Yehowa hiɛ. Hejɔɔmɔ gbi lɛ nɔ jetsɛremɔ lɛ osɔfo lɛ baafɔ̃ afɔle nɛɛ.

¹² Gbi nɔ ni nyɛkɛ ŋmɔshi nikpamɔ nii afɔle lɛ baaba lɛ, nyɛhiɛa nyɛdɛŋ gwantɛŋbi ni eye afi ni kpa ko bɛ ehe akɛ shãa afɔle nyɛbahãa Yehowa.

¹³ Ni niyenii afɔle ni afata kooloo lɛ he ji ŋmãa mamu ni akɛ fɔ ekpɔtɔ, kiloi enyɔ, koni ashã ahã Yehowa koni eje ŋma ewo lɛ; ni dãa afɔle ni akɛfata he ji wain lita kome.

¹⁴ Ni kɛyaashi gbi nɔ ni nyɛkɛ nyɛfɔle lɛ aaabahã nyɛNyɔŋmɔ lɛ, aboloo loo abele ni ashã loo abele fɔ ko akaya nyɛdaaŋ. Akpɔ nɛɛ kã shi hã nyɛshwiei yɛ yinɔi fɛɛ anɔ kɛmiiya naanɔ yɛ he fɛɛ he ni amɛyɔɔ.

Ŋmãakpamɔ gbijurɔ lɛ

¹⁵ “Nyɛkanea otsii kpawo kɛjɛ Hejɔɔmɔ gbi lɛ nɔ jetsɛremɔ ni ji gbi ni nyɛkɛ ŋmãa ni nyɛku lɛ baahã Yehowa lɛ.

¹⁶ Gbi ni ji nyɔŋmai enumɔ lɛ ni ji Hejɔɔmɔ gbi ni ji kpawo lɛ nɔ jetsɛremɔ lɛ, nyɛkɛ abele fɔ afɔle lɛ abahãa Yehowa.

¹⁷ Nyɛkɛ aboloo akwaabɔi enyɔnyɔɔnyɔ ni akɛŋmãa mamu kiloi enyɔ ni awo mli yiisi shã ajɛa nyɛshĩai amli kɛbaa akɛ nyɛŋmɔshi klɛŋklɛŋ nikpamɔnii ni nyɛkɛhãa Yehowa.

¹⁸ Nyɛkɛ gwantɛŋbii kpawo ni amɛye afifii, ni kpa ko bɛ amɛhe kɛ tsina oblanyo kome kɛ ojwɛnii enyɔ afata aboloi lɛ ahe. Akɛ kooloi lɛ kɛ amɛhe niyenii afɔle lɛ kɛ dãa lɛ fɛɛ baafee shãa afɔle akɛhã Yehowa. Afɔle ni ashãa ni ejeɔ ŋma ewoɔ Yehowa ni.

¹⁹ Asaŋ nyɛkɛ too kpakpo kome afea esha he faikpamɔ afɔle, koni nyɛkɛ gwantɛŋbii enyɔ ni amɛye afifii lɛ afea shidaa afɔle.

²⁰ Osɔfo lɛ baaŋɔ aboloo lɛ kɛ gwantɛŋbii lɛ ehã koni afɔ̃ akɛ fɔ̃ɔ afɔle yɛ Yehowa hiɛ. Nibii nɛɛ etsɔ̃mɔ Yehowa nii krɔŋkrɔŋ. Aŋɔ hã osɔfo lɛ akɛ egbɛfaŋnɔ.

²¹ Ashiɛ koni nakai gbi lɛ nɔ nɔŋŋ lɛ nyɛkpe kpee krɔŋkrɔŋ kɛja, ni akatsu nitsumɔ ko nitsumɔ ko ni wa yɛ gbi nɛɛ nɔ. Naanɔ akpɔ nɛ hã nyɛyinɔi fɛɛ yɛ he fɛɛ he ni amɛyɔɔ.

²² “Ni kɛji nyɛmiikpa nyɛŋmɔshi nii lɛ, nyɛkakpaa ŋmɔ lɛ naanaanii lɛ kɛmɔ shi kwraa; nakai nɔŋŋ hu onikpamɔnii lɛ amli kpɛkpɛbii lɛ hu kaakpɛte; shi moŋ ashi ahã ohiafo kɛ gbɔ koni amɛkɛbaye kpɛkpɛo. Mi ji Yehowa, nyɛNyɔŋmɔ lɛ.”

Afi hee gbijurɔ

²³ Kɛkɛ ni Yehowa kɛɛ Mose akɛ,

²⁴ “Kɛɛmɔ Israelbii lɛ akɛ nyɔɔŋ ni ji kpawo lɛ klɛŋklɛŋ gbi lɛ, nyɛyea lɛ kpoo akɛ hejɔɔmɔ gbijurɔ. Akpã tɛtɛrɛmantɛrɛ akɛ kaimɔ nɔ kɛshiɛ gbi lɛ, koni akpe kpee krɔŋkrɔŋ kɛja.

²⁵ Akatsu nitsumɔ ko nitsumɔ ko ni wa yɛ nɔ; ni nyɛkɛ niyenii afɔle abahãa Yehowa.”

Kpãtãmɔ gbi lɛ

²⁶ Yehowa kɛɛ Mose akɛ,

²⁷ “Nyɔɔŋ ni ji kpawo nɛɛ nɔ gbi ni ji nyɔŋma lɛ ji esha kpãtãmɔ gbi lɛ. Gbi nɛɛ nɔ lɛ nyɛwaa nyɛhe yi kɛ hɔmɔ; asaŋ nyɛkpea kpee krɔŋkrɔŋ kɛjaa, ni nyɛkɛ nyɛdɛŋ niyenii afɔle ni ashãa abaa abahãa Yehowa.

²⁸ Akatsu nitsumɔ ko nitsumɔ ko yɛ gbi nɛɛ nɔ, ejaakɛ kpãtãmɔ gbi ni, koni akpãtã yɛ nyɛhe eshai lɛ ahewɔ yɛ Yehowa, nyɛNyɔŋmɔ lɛ hiɛ ahã nyɛ.

²⁹ Mɔ fɛɛ mɔ ni waaa ehe yi kɛ hɔmɔ nakai gbi lɛ lɛ, akaneŋ lɛ ashiŋ emaŋbii anɔ dɔŋŋ.

³⁰ Ni mɔ fɛɛ mɔ ni aaatsu nitsumɔ ko yɛ nakai gbi lɛ nɔ lɛ, mibakpãtã ehiɛ yɛ emaŋbii lɛ ateŋ.

³¹ Nyɛkatsua nitsumɔ ko nitsumɔ ko yɛ gbi nɛɛ nɔ. Naanɔ akpɔ nɛ hã nyɛyinɔi fɛɛ yɛ he fɛɛ he ni amɛyɔɔ.

³² Hejɔɔmɔ gbi wulu nɛ hã nyɛ. Nyɛwaa nyɛhe yi kɛ hɔmɔ kɛjɛ nyɔɔŋ lɛ nɔ gbi ni ji nɛɛhu lɛ gbɛkɛnaashi aahu kɛyaashi enɔ jetsɛremɔ gbɛkɛnaashi ekoŋŋ. Nyɛyea Hejɔɔmɔ gbi krɛdɛɛ nɛɛ.”

Asesei agbijurɔ lɛ

³³ Kɛkɛ ni Yehowa kɛɛ Mose akɛ,

³⁴ “Kɛɛmɔ Israelbii lɛ akɛ nyɔɔŋ ni ji kpawo ni kã nɔ nɛɛ nɔ gbi ni ji nyɔŋma kɛ enumɔ lɛ ji Asesei Agbijurɔ lɛ; aye gbijurɔ lɛ gbii kpawo ahã Yehowa.

³⁵ Gbi ni ji klɛŋklɛŋ lɛ nɔ lɛ akpe kpee krɔŋkrɔŋ kɛja; akatsu nitsumɔ ko nitsumɔ ko ni wa yɛ nɔ.

³⁶ Gbii kpawo lɛ mli gbi fɛɛ gbi lɛ, nyɛhiɛa nyɛdɛŋ niyenii afɔle ni ashãa nyɛkɛbahãa Yehowa. Gbi ni ji kpaanyɔ lɛ nɔ lɛ, nyɛkpea kpee krɔŋkrɔŋ kɛjaa ekoŋŋ, ni nyɛkɛ niyenii afɔle ni ashãa abaa abahãa Yehowa. Kpee wulu diɛŋtsɛ gbi ni. Akatsu nitsumɔ ko nitsumɔ ko ni wa yɛ nɔ.

³⁷ “Enɛɛmɛi ji gbii juji ni Yehowa eto lɛ; ni kɛji eko shɛ lɛ nyɛshiɛa koni maŋ lɛ akpe kpei krɔŋkrɔŋi kɛja, asaŋ koni ashã niyenii afɔlei kɛ shãa afɔlei kɛ ŋmãa afɔlei kɛ dãa afɔlei akɛhã Yehowa, eko fɛɛ eko yɛ egbi nɔ.

³⁸ Esoro Yehowa Hejɔɔmɔgbii lɛ, dani esoro nyɛdaadaa nikeenii lɛ, ni esoro nyɛshiwoo afɔlei lɛ kɛ nyɛtsuijurɔ naa afɔlei lɛ fɛɛ hu ni nyɛkɛbahãa Yehowa.

³⁹ “Nyɔɔŋ ni ji kpawo lɛ nɔ gbi ni ji nyɔŋma kɛ enumɔ lɛ, be ni nyɛkpa ŋmɔshinii nyɛgbe naa lɛ, nyɛjea shishi nyɛyea Yehowa gbijurɔ lɛ kɛyashia gbii kpawo. Gbi ni ji klɛŋklɛŋ lɛ hejɔɔmɔ gbi krɛdɛɛ ni.

⁴⁰ Gbi nɛɛ nɔ lɛ nyɛhiɛa nyɛtsei anɔ aduawai kpakpai fɛɛfɛji kɛ tɛŋ bɛlɛo kɛ tsei flofloi aniji kɛ faa naa ŋɔi kɛbaa koni nyɛbanyaa yɛ Yehowa, nyɛNyɔŋmɔ lɛ, hiɛ gbii kpawo.

⁴¹ Nyɛkɛ gbii kpawo ayea gbijurɔ nɛɛ daa afi nyɛhãa Yehowa yɛ nyɔɔŋ ni ji kpawo lɛ nɔ. Eji naanɔ akpɔ hã nyɛyinɔi fɛɛ.

⁴² Nyɛhia asesei amli gbii kpawo. Israelnyo fɛɛ Israelnyo ahi asese mli,

⁴³ koni nyɛshwiei kɛna amɛle akɛ be ni miyakpala Israel kɛje Ijipt shikpɔŋ lɛ nɔ lɛ, asesei amli mihã amɛhi. Mi ji Yehowa, nyɛNyɔŋmɔ lɛ.”

⁴⁴ Belɛ bɔ ni Mose tsɔ̃ɔ Israelbii lɛ gbii juji ni Yehowa eto ehã amɛ akɛ amɛye lɛ nɛ.