Biblia Todo Logo
Bìoball air-loidhne

- Sanasan -

3 Mose 13 - ŊMALƐ KRƆŊKRƆŊ LƐ


Mlai ni kɔɔ hewolo nɔ helai ahe

1 Yehowa kɛ mlai nɛɛ hã Mose kɛ Aaron.

2 “Kɛji nɔ ko fũu yɛ mɔ ko hewolo nɔ loo fala ko loo gbɛ̃ ko, ni fee sɛɛ lɛ elɛɛ shi, ni etsɔ̃ tamɔ kpiti hela lɛ, akɛ mɔ lɛ aba Osɔfo Aaron loo ebihii osɔfoi lɛ ateŋ mɔ ko ŋɔɔ.

3 Osɔfo lɛ akwɛ he ni hela lɛ yɔɔ lɛ. Kɛ ekwɛ ni tsɔi ni yɔɔ jɛi lɛ etsɔ̃ eyɛŋ, ni jɛi enyɔ mli voo fe hewolo ni bɔle he ni hela lɛ yɔɔ lɛ, belɛ kpiti ni; ni be ni osɔfo lɛ ekwɛ helatsɛ lɛ sɛɛ lɛ, ekɛɛ akɛ helatsɛ lɛ he tseee.

4 Shi kɛji hewolo nɔ he ni akwɛ lɛ yɛ eyɛŋ ni enyɔko mli voo fe hewolo ni bɔle he lɛ, ni emli tsɔi lɛ hu tsɔ̃ko eyɛŋ lɛ, no lɛ osɔfo lɛ aŋa helatsɛ lɛ yi gbii kpawo.

5 Gbi ni ji kpawo lɛ osɔfo lɛ akwɛ, ni kɛ hela lɛ yɛ bɔ ni eyɔɔ lɛ nɔŋŋ yɛ heloo lɛ hiɛ, ni elɛɛko yɛ hewolo lɛ nɔ lɛ, no lɛ osɔfo lɛ asaa aŋa eyi gbii kpawo ekoŋŋ.

6 Kɛji gbi ni ji kpawo lɛ osɔfo lɛ kwɛ ekoŋŋ, ni kɛ hela lɛ elaaje, ni elɛɛko yɛ hewolo lɛ nɔ lɛ, no lɛ osɔfo lɛ aŋɔ gbɔmɔ lɛ akɛ mɔ ko ni he tse; hela lɛ gbɛ̃i ni. Helatsɛ lɛ afɔ etadei ahe, koni ehe atse.

7 Shi kɛji gbɛ̃i lɛ miilɛɛ yɛ ehewolo lɛ nɔ be ni osɔfo lɛ ekwɛ lɛ ni ekɛɛ akɛ ehe tse lɛ sɛɛ lɛ, no lɛ gbɔmɔ lɛ kɛ ehe ayatsɔɔ osɔfo lɛ, nɔ ni ji shii enyɔ.

8 Kɛ osɔfo lɛ kwɛ, ni gbɛ̃i lɛ miilɛɛ yɛ hewolo lɛ nɔ lɛ, osɔfo lɛ akɛɛ akɛ mɔ lɛ he tseee; hela lɛ kpiti ni.

9 “Kɛji kpiti shwie mɔ ko he lɛ, akɛ lɛ aba osɔfo lɛ ŋɔɔ.

10 Osɔfo lɛ akwɛ lɛ. Kɛ nɔ ko yɛŋ ewo yɛ hewolo lɛ nɔ, ni ehã jɛi tsɔi lɛ etsɔ̃ eyɛŋ, ni loo ŋmɔŋ tɔ̃ɔ yɛ nɔ ni efuu lɛ mli lɛ,

11 belɛ kpiti momo yɔɔ ehewolo lɛ mli lɛ. Osɔfo lɛ akɛɛ akɛ nɔ ko ni he tseee ni. Osɔfo lɛ akaŋa eyi, ejaakɛ ekã shi faŋŋ akɛ ehe tseee.

12 Shi kɛji hela lɛ je kpo yɛ hewolo lɛ nɔ, ni nɔ ni osɔfo lɛ naa kɛkɛ ji hela lɛ eshwie helatsɛ lɛ hewolo nɔ fɛɛ, kɛjɛ eyiteŋ kɛyashi enaji ahe lɛ,

13 osɔfo lɛ akwɛ helatsɛ lɛ; ni kɛ ena akɛ hela lɛ eha ehewolo nɔ fɛɛ lɛ, ekɛɛ akɛ helatsɛ lɛ he tse. Ni kɛ helatsɛ lɛ he fɛɛ eyɛ futaa lɛ, ehe tse.

14 Shi gbi nɔ ni aaana fala ŋmɔŋ yɛ helatsɛ lɛ he lɛ, ehe tseee.

15 Osɔfo lɛ akwɛ helatsɛ lɛ ekoŋŋ; ni kɛ ena lɛ ekɛɛ akɛ helatsɛ lɛ he tseee; hela lɛ kpiti ni.

16 Shi kɛji fala lɛ tã, ni eesaa etsɔ̃ eyɛŋ ekoŋŋ lɛ, helatsɛ lɛ aba osɔfo lɛ ŋɔɔ.

17 Osɔfo lɛ akwɛ lɛ ekoŋŋ. Kɛ ena akɛ loo ŋmɔŋ lɛ etsɔ̃ eyɛŋ lɛ, helatsɛ lɛ he tse; ni osɔfo lɛ akɛɛ akɛ ehe tse.

18 “Kɛji asane tsɛ̃ mɔ ko hewolo nɔ ni etã,

19 ni fee sɛɛ lɛ nɔ ko yɛŋ bawo yɛ he ni asane lɛ tsɛ̃ lɛ yɛ lɛ, aloo nɔ ko yɛŋ ni tsuɔo ba jɛi lɛ, no lɛ mɔ lɛ aya osɔfo lɛ ŋɔɔ.

20 Osɔfo lɛ akwɛ lɛ. Kɛji he ni hela lɛ yɔɔ lɛ enyɔ mli voo fe hewolo ni bɔle jɛi lɛ, ni emli tsɔi lɛ etsɔ̃ eyɛŋ lɛ, osɔfo lɛ akɛɛ akɛ ehe tseee; kpiti ebote asane lɛ mli.

21 Shi kɛji osɔfo lɛ kwɛ, ni ena akɛ tsɔi yɛŋ bɛ mli, ni jɛi enyɔko mli voo fe hewolo ni bɔle lɛ lɛ, ni enaa miilaaje lɛ, no lɛ osɔfo lɛ aŋa helatsɛ lɛ yi gbii kpawo.

22 Kɛji hela lɛ miilɛɛ shi fe bɔ ni kulɛ eyɔɔ lɛ, osɔfo lɛ akɛɛ akɛ helatsɛ lɛ he tseee; hela lɛ kpiti ni.

23 Shi kɛji nɔ ko yɛŋ lɛ elɛɛɛ shi, ni eyɛ bɔ ni eyɔɔ lɛ nɔŋŋ lɛ, no lɛ fladoku ni; asane lɛ shishi ni. Osɔfo lɛ akɛɛ akɛ helatsɛ lɛ he tse.

24 “Kɛji la shã mɔ ko, ni la fala lɛ fee nɔ ko yɛŋ aloo nɔ ko yɛŋ ni etsuru fioo futu mli lɛ,

25 osɔfo lɛ akwɛ mɔ lɛ. Kɛji tsɔi ni yɔɔ la fala lɛ mli etsɔ̃ eyɛŋ, ni jɛi enyɔ mli voo fe hewolo ni bɔle lɛ lɛ, belɛ kpiti ebote la fala lɛ mli. Osɔfo lɛ akɛɛ akɛ helatsɛ lɛ he tseee; hela lɛ kpiti ni.

26 Shi kɛ osɔfo lɛ kwɛ lɛ, ni ena akɛ tsɔi yɛŋ bɛ fala lɛ mli ni jɛi enyɔko mli voo fe hewolo ni bɔle lɛ lɛ, no lɛ osɔfo lɛ aŋa helatsɛ lɛ yi gbii kpawo.

27 Osɔfo lɛ akwɛ helatsɛ lɛ ekoŋŋ gbi ni ji kpawo lɛ. Kɛji fala lɛ elɛɛ yɛ hewolo lɛ nɔ fe bɔ ni kulɛ eyɔɔ lɛ, osɔfo lɛ akɛɛ akɛ mɔ lɛ he tseee; hela lɛ kpiti ni.

28 Shi kɛji he ni hela lɛ yɔɔ lɛ yɛ bɔ ni eyɔɔ lɛ nɔŋŋ, ni elɛɛko shi efatako he, shi moŋ enaa miilaaje lɛ, belɛ la fala lɛ kɛkɛ ni ehã jɛi efuu lɛ. Osɔfo lɛ akɛɛ akɛ helatsɛ lɛ he tse, ejaakɛ fala doku kɛkɛ ni.

29 “Kɛji fala fee nuu loo yoo ko yiteŋ loo etsɛŋ mli lɛ, osɔfo lɛ akwɛ.

30 Kɛji he ni fala lɛ yɔɔ lɛ enyɔ mli voo fe hewolo ni bɔle jɛi lɛ, ni tsɔi ni yɔɔ jɛi lɛ yɛ hwiaahwiaa ni ehiɛ wuɔfɔ su lɛ, osɔfo lɛ akɛɛ akɛ mɔ lɛ he tseee; hela lɛ fafale ni; efeɔ yiteŋ loo tsɛŋ mli.

31 Kɛji be ni osɔfo lɛ kwɛ helatsɛ lɛ ena akɛ he ni fafale lɛ yɔɔ lɛ enyɔko mli voo fe hewolo ni bɔle lɛ lɛ, shi kɛ̃lɛ tsɔi ni yɔɔ jɛi lɛ bɛ ediŋ lɛ, eŋa helatsɛ lɛ yi ewo tsuŋ gbii kpawo.

32 Gbi ni ji kpawo lɛ osɔfo lɛ asaa akwɛ fafale lɛ ekoŋŋ. Kɛji fafale lɛ elɛko, ni tsɔi ni hiɛ wuɔfɔ su ekwɛ̃ko yɛ mli, ni fala lɛ enyɔko hewolo lɛ mli voo fe hewolo ni bɔle lɛ lɛ,

33 ahã mɔ lɛ ashɛ ehe tsɔi fɛɛ fe he ni fafale lɛ yɔɔ pɛ eshi. Osɔfo lɛ aŋa mɔ lɛ yi awo tsuŋ gbii krokomɛi kpawo.

34 Gbi ni ji kpawo lɛ nɔ lɛ, osɔfo lɛ akwɛ fafale lɛ ekoŋŋ. Kɛji elɛɛko ni enyɔko mli voo fe hewolo ni bɔle lɛ lɛ, ekɛɛ akɛ mɔ lɛ he tse. Mɔ lɛ afɔ etadei ahe koni ehe atse.

35 Shi kɛji fafale lɛ elɛɛ, yɛ be ni akɛɛ akɛ mɔ lɛ he tse lɛ sɛɛ lɛ,

36 Osɔfo lɛ akwɛ helatsɛ lɛ ekoŋŋ. Kɛji fafale lɛ esaa elɛɛ lɛ, ehe ehiaaa akɛ osɔfo lɛ akwɛ akɛ eeena tsɔi ni hiɛ wuɔfɔ su lo; nɔ ni kã shi faŋŋ kɛkɛ ji mɔ lɛ he tseee.

37 Shi kɛji ekwɛ lɛ esusuɔ akɛ fafale lɛ yɛ bɔ ni eyɔɔ lɛ nɔŋŋ, ni tsɔi diŋ ekwɛ̃ yɛ mli lɛ, belɛ fafale lɛ etã. Helatsɛ lɛ he etse; ni osɔfo lɛ akɛɛ akɛ ehe tse.

38 “Kɛji nii yɛji hãlãhãlã komɛi ba nuu loo yoo ko hewolo nɔ lɛ,

39 osɔfo lɛ akwɛ. Kɛji nibii yɛji hãlãhãlã nɛɛ ejeee shi jogbaŋŋ yɛ hewolo lɛ nɔ lɛ, belɛ aflimata eshwie mɔ lɛ hewolo nɔ lɛ; mɔ lɛ he tse.

40 “Kɛji nuu ko yi kpa yɛ eyisɛɛ lɛ, yikpataatsɛ ji lɛ, shi ehe tse.

41 Kɛji ehiɛnaa gbɛ kɛkɛ eyi lɛ kpa yɛ lɛ, hiɛnaa kpataa tsɛ ji lɛ, shi ehe tse.

42 Shi kɛji nɔ ko yɛŋ ni tsuɔ oo shwie eyiteŋ loo ehiɛnaa he ni ekpa lɛ, kpiti ji nɔ ni yɔɔ jɛi lɛ.

43 Osɔfo lɛ akwɛ mɔ lɛ. Kɛji osɔfo lɛ na fafale yɛŋ ni tsuɔ oo yɛ eyisɛɛ loo ehiɛnaa he ni ekpa lɛ, ni etamɔ kpiti yɛ hewolo nɔ lɛ,

44 osɔfo lɛ akɛɛ akɛ eji mɔ ko ni he tseee yɛ nɔ ni yɔɔ eyiteŋ lɛ hewɔ.

45 “Mɔ ni yeɔ kpiti lɛ egbala etadei, ni ehiɛ eyitso efolo. Eha enaabu nɔ, ni ebolɔ akɛ, ‘Mihe tseee, mihe tseee!’

46 Gbii abɔ ni hela lɛ yɔɔ ehe lɛ, ehe tseee kwraa. Ekome too ehi shi, ni eshihilɛhe lɛ ahi shitoohe lɛ sɛɛ.

47 “Kɛji kpiti ekadi kuŋtu loo klala atade ko mli,

48 aloo ekadi kuŋtu loo klala kpãi ni akɛlo atade lɛ mli, loo kooloo wolo loo nɔ ko ni akɛ kooloo wolo fee lɛ mli,

49 ni kadimɔ lɛ su eŋɔli loo etsuru yɛ atade loo kooloo wolo loo kpãi ni akɛlo atade lɛ, loo nɔ ko ni akɛ kooloo wolo fee lɛ mli lɛ, no lɛ kpiti he okadi ni; ni esa akɛ akɛtsɔ̃ɔ osɔfo lɛ.

50 Osɔfo lɛ akwɛ nɔ ni ekadi mli lɛ, ni ekɛ nɔ ni mli ni ekadi lɛ ato gbii kpawo.

51 Gbi ni ji kpawo lɛ ekwɛ ekoŋŋ. Kɛji nɔ ni ekadi mli lɛ elɛɛ yɛ atade lɛ loo kpãi ni akɛlo atade lɛ loo kooloo wolo lɛ loo nɔ fɛɛ nɔ ni akɛ kooloo wolo lɛ fee lɛ mli lɛ, belɛ kpiti ni fiteɔ nii eshwie he lɛ; ni nɔ mli ni ekadi lɛ he tseee.

52 Osɔfo lɛ ashã atade ni kpiti lɛ ekadi mli lɛ, loo kpãi ni akɛlo kuŋtu loo klala atade lɛ loo nɔ fɛɛ nɔ ni akɛ kooloo wolo fee ni akadi mli lɛ; ejaakɛ eji kpiti ni fiteɔ nii; ni esa akɛ akɛ la ashã.

53 “Shi kɛji osɔfo lɛ kwɛ, ni ena akɛ nɔ ni ekadi mli lɛ elɛɛko yɛ atade lɛ loo kpãi ni akɛlo lɛ, loo nɔ fɛɛ nɔ ni akɛ kooloo wolo fee lɛ mli lɛ,

54 no lɛ osɔfo lɛ afã akɛ afɔ nɔ ni kpiti lɛ ekadi mli lɛ he, ni esaa eŋa eyi gbii kpawo ekoŋŋ.

55 Gbi ni ji kpawo lɛ osɔfo lɛ akwɛ; ni kɛ ena akɛ kadimɔ lɛ su tsakeko be ni afɔ he sɛɛ, ni elɛko hu efatako he lɛ, belɛ nɔ ni kpiti lɛ ekadi mli lɛ he tseee. Akɛ la ashã; hiɛgbɛ ekadi jio, sɛɛgbɛ jio, no kɔɔɔ he eko.

56 Shi kɛji osɔfo lɛ kwɛ ni ena akɛ nɔ ni ekadi nii lɛ mli lɛ miilaaje be ni afɔ he sɛɛ lɛ, no lɛ etse he ni kadimɔ lɛ yɔɔ lɛ yɛ atade lɛ loo kooloo wolo lɛ loo kpãi ni akɛlo atade lɛ he.

57 Shi kɛji aana kadimɔ lɛ lolo yɛ atade lɛ loo kpãi ni akɛlo atade lɛ mli, loo nɔ ni akɛ kooloo wolo fee lɛ mli lɛ, no lɛ nɔ ni ekadi nii lɛ mli lɛ miiku esɛɛ ekoŋŋ, akɛ la ashã nɔ ni mli ni ekadi lɛ.

58 Atade lɛ loo kpãi ni akɛlo lɛ loo kooloo wolo nɔ lɛ ni afɔ he lɛ, kɛ nɔ ni ekadi mli lɛ je mli lɛ, afɔ he ekoŋŋ koni ehe atse.

59 “Enɛ ji mla ni kã shi hã kpiti ni eshwie kuŋtu loo odonti mama loo kpãi ni akɛloɔ mama lɛ loo nɔ fɛɛ nɔ ni akɛ kooloo wolo fee he lɛ. Eji mla hu ni akɛnaa akɛ nɔ ni kpiti eshwie he lɛ he tse aloo ehe tseee.”

Bible in Ga Language © Bible Society of Ghana, 2020.

Bible Society of Ghana
Lean sinn:



Sanasan