3 Mose 10 - ŊMALƐ KRƆŊKRƆŊ LƐ

Nadab kɛ Abihu fee esha

¹ Shi Aaron bihii ni ji Nadab kɛ Abihu lɛ ateŋ mɔ fɛɛ mɔ wo elajee ŋɛsu, ni amɛkɛ la wo mli. Amɛkɛ tsofakɛŋma shwie nɔ, ni amɛshã amɛhã Yehowa; shi la ni amɛkɛshã lɛ bɛ krɔŋkrɔŋ, ejaakɛ jeee no he kitã Yehowa wo lɛ.

² Yehowa hã la ba ebashã amɛ, ni amɛgboi yɛ ehiɛ.

³ Kɛkɛ ni Mose kɛɛ Aaron akɛ, “Enɛ ji nɔ ni Yehowa tsɔ̃ɔ be ni ekɛɛ akɛ, ‘Mɛi fɛɛ ni sɔ̃mɔɔ mi lɛ esa akɛ abu mi akɛ mɔ krɔŋkrɔŋ; majie minunyam lɛ kpo matsɔ̃ɔ maŋ muu lɛ fɛɛ.’ ” Shi Aaron mua enaa.

⁴ Kɛkɛ ni Mose tsɛ Mishael kɛ Elzafan, Aaron tsɛkwɛ Uziel bii lɛ kɛba, ni ekɛɛ amɛ akɛ: “Nyɛbaa nyɛbaholea nyɛnyɛmimɛi lɛ agbohii lɛ kɛjea He Krɔŋkrɔŋ lɛ kɛyaa shitoohe lɛ sɛɛ.”

⁵ Amɛba ni amɛbahole Aaron bihii lɛ kɛ amɛflakai ni amɛwo lɛ kɛje shitoohe lɛ mli, tamɔ bɔ ni Mose kɛɛ lɛ.

⁶ Mose kɛɛ Aaron kɛ ebihii ni ji Eleazar kɛ Itamar akɛ, “Nyɛkahãa nyɛyiteŋ fea tsaŋtsaŋ aloo nyɛgbalaa nyɛtadei kɛtsɔ̃ɔ akɛ nyɛmiiye ŋkɔmɔ. Kɛ nyɛfee nakai lɛ, nyɛbaagboi, ni Yehowa mli baawo maŋ muu lɛ fɛɛ la. Nyɛhãa nyɛwekumɛi, Israel maŋ muu lɛ fɛɛ, afoa shãa ni Yehowa ehã la eshã nyɛnyɛmimɛi lɛ ni amɛgboi nɛɛ.

⁷ Nyɛkajea Kpee Buu lɛ shinaa lɛ naa hu ni nyɛbagboi, ejaakɛ akɛ Yehowa mufɔɔ mu lɛ efɔ nyɛ mu.” Amɛfee bɔ ni Mose kɛɛ amɛ lɛ.

Mlai ni awo Osɔfoi

⁸ Yehowa kɛɛ Aaron akɛ,

⁹ “Bo kɛ obihii lɛ, nyɛkanua wain loo dãa ni wa ko be mli ni nyɛyaa Kpee Buu lɛ mli lɛ. Kɛ nyɛnu dãa lɛ, nyɛbaagboi. Oshwiei fɛɛ aye akpɔ nɛɛ nɔ.

¹⁰ Esa akɛ nyɛle srɔto ni kã nɔ ni he tse krɔŋkrɔŋ kɛ nɔ ni buleɔ mɔ teŋ; ni esa akɛ nyɛle srɔto ni yɔɔ nɔ ni he tse kɛ nɔ ni he tseee teŋ.

¹¹ Nyɛtsɔ̃a Israelbii lɛ akpɔi fɛɛ ni Yehowa tsɔ̃ Mose nɔ ekɛ amɛ wie he lɛ.”

¹² Mose kɛɛ Aaron kɛ ebihii ni eshwɛ ni ji Eleazar kɛ Itamar lɛ akɛ, “Niyenii afɔlei ni shwɛɔ yɛ afɔlei ni ashã ahã Yehowa lɛ sɛɛ lɛ, nyɛkɛshãa mã akpiti aboloo ni nyɛyea yɛ afɔleshãa latɛ lɛ he ejaakɛ afɔle nɛɛ nɔ krɔŋkrɔŋ ni fe fɛɛ ni.

¹³ Nyɛyea yɛ he ko ni yɔɔ krɔŋkrɔŋ, ejaakɛ bo kɛ obihii lɛ, nyɛgbɛnaanii ji niyenii afɔlei nɛɛ ni shwɛɔ yɛ shãa afɔlei ni ashãa ahãa Yehowa lɛ asɛɛ lɛ. Ejaakɛ enɛ ji Yehowa kitã ni ewo mi.

¹⁴ Shi tsitsi lɛ kɛ shuɔ lɛ ni akɛhãa Yehowa akɛ keenɔ lɛ nyɛyea yɛ he ko ni tse, bo kɛ obihii kɛ obiyei lɛ fɛɛ, ejaakɛ akɛ afɔlei nɛɛ ehã bo kɛ obii lɛ akɛ nyɛgbɛnaanii yɛ naanyobɔɔ afɔlei ni Israelbii lɛ shãa lɛ amli.

¹⁵ Akɛ tsitsi lɛ kɛ sɛɛ shuɔ lɛ afata fɔi lɛ ahe kɛba, be mli ni ashãa fɔi lɛ akɛ afɔle ahãa Yehowa akɛ niyenii afɔle lɛ. Tsitsi lɛ kɛ shuɔ lɛ, bo kɛ obihii lɛ agbɛnaanii ni akɛhã nyɛ kɛmiiya naanɔ ni. Nakai ji bɔ ni Yehowa fã akɛ afee.”

¹⁶ Mose tao too ojwɛni ni akɛshãa esha afɔle lɛ aahu kɛyashi ena ele akɛ ashã momo. Mose mli wo Eleazar kɛ Itamar Aaron bihii ni eshwɛ lɛ la ni ekɛɛ,

¹⁷ “Mɛɛba nyɛyeee esha afɔle lɛ yɛ he ko ni yɔɔ krɔŋkrɔŋ? Nɔ ko ni yɔɔ krɔŋkrɔŋ naakpa ji afɔle lɛ ni Yehowa kɛhã nyɛ koni nyɛkɛ kpãtã yɛ Yehowa hiɛ koni nyɛjie maŋ lɛ he esha lɛ kɛya lɛ.

¹⁸ Akɛni akɛ too ojwɛni lɛ lá lɛ baaa Kpee Buu krɔŋkrɔŋ lɛ mli hewɔ lɛ, kulɛ esa akɛ nyɛye afɔle lɛ yɛ jɛi tamɔ bɔ ni mifã lɛ.”

¹⁹ Aaron to he ehã Mose akɛ, “Maŋbii lɛ shã amɛhe esha afɔle kɛ amɛshãa afɔle lɛ ŋmɛnɛ; ni kɛ̃lɛ oshara ebasharã mi nɛɛ. Eji miye esha afɔle ŋmɛnɛ kulɛ ehi yɛ Yehowa hiɛ?”

²⁰ Be ni Mose nu wiemɔ nɛɛ lɛ, ena akɛ eja.