3 Mose 1 - ŊMALƐ KRƆŊKRƆŊ LƐ

Afɔle ni ashãa lɛ emuu

¹ Yehowa jɛ Kpee Buu lɛ mli etsɛ Mose, ni ekɛɛ lɛ akɛ,

² “Kɛɛmɔ Israelbii lɛ akɛ, kɛji nyɛteŋ mɔ ko miiba ekɛ kooloo abashã afɔle ehã mi, Yehowa, lɛ ekɛ etsinai lɛ loo etoi lɛ ateŋ eko abashã afɔle lɛ.

³ Kɛji tsina ekɛbaa afɔleshãa lɛ, ehiɛ tsinanuu ni kpa ko bɛ ehe ebahã. Ekɛ kooloo lɛ aba Kpee Buu lɛ shinaa lɛ naa koni Yehowa ahe efɔle lɛ.

⁴ Ekɛ enine aŋmɛ afɔleshãa kooloo lɛ yiteŋ, ni abaaŋɔ kooloo lɛ akɛshã afɔle ni akɛkpãtã ehe esha lɛ ahã lɛ.

⁵ Enɛ sɛɛ lɛ egbe tsinanuu lɛ yɛ Yehowa hiɛ, ni Aaron bihii osɔfoi lɛ kɛ kooloo lɛ lá lɛ aba ni amɛkɛbashwã afɔleshãa latɛ lɛ ni ma Kpee Buu lɛ shinaa lɛ naa koji ejwɛ lɛ he lɛ kɛkpe.

⁶ Mɔ lɛ akpɔ kooloo lɛ hewolo lɛ koni esaa loo lɛ.

⁷ Aaron bihii lɛ ato lai amɛshwie afɔleshãa latɛ lɛ nɔ; ni amɛshɛre la lɛ.

⁸ No sɛɛ lɛ, amɛto loo ni asaa lɛ yitso lɛ kɛ emli fɔ lɛ amɛshwie lai lɛ nɔ yɛ afɔleshãa latɛ lɛ nɔ.

⁹ Nuu lɛ kɛ nu afɔ kooloo lɛ mlinii lɛ kɛ enaji lɛ ahe; ni osɔfo lɛ ashã kooloo muu lɛ fɛɛ yɛ afɔleshãa latɛ lɛ nɔ; shãa afɔle ni, afɔle ni akɛ la shãa kooloo lɛ fɛɛ ni. Afɔle nɛɛ jeɔ ŋma woɔ Yehowa.

¹⁰ “Shi kɛji too gwantɛŋ loo abotia mɔ lɛ kɛbaa ebashã shãa afɔle lɛ, ehiɛ gwantɛŋ nuu loo abotia nuu ni kpa ko bɛ ehe kɛba.

¹¹ Egbe kooloo lɛ yɛ afɔleshãa latɛ lɛ masɛi yɛ ekooyigbɛ yɛ Yehowa hiɛ. Aaron bihii osɔfoi lɛ kɛ kooloo lɛ lá lɛ aba ni amɛkɛbashwã afɔleshãa latɛ lɛ he koji ejwɛ lɛ he kɛkpe.

¹² Mɔ lɛ asaa loo lɛ; ni osɔfo ni yɔɔ nitsumɔ nakai be lɛ ato kooloo ni asaa lɛ: yitso lɛ kɛ emli fɔ lɛ pɛpɛɛpɛ ashwie lai lɛ nɔ yɛ afɔleshãa latɛ lɛ nɔ.

¹³ Shi mɔ lɛ kɛ nu afɔ kooloo lɛ mlinii lɛ kɛ enaji lɛ ahe. No sɛɛ lɛ, osɔfo lɛ ni tsuɔ nii nakai gbi lɛ kɛ nomɛi hu baashi nɔ, ni eshã kooloo muu lɛ fɛɛ yɛ afɔleshãa latɛ lɛ nɔ. Shãa afɔle ni: afɔle ni ashãa fɛɛ ni ejeɔ ŋma ewoɔ Yehowa ni.

¹⁴ “Shi kɛji loofɔlɔ mɔ lɛ kɛbaa ebashã shãa afɔle ehã Yehowa lɛ, no lɛ ehiɛ kosɛɛ okpo loo shĩa okpo pɛmpɛoo.

¹⁵ Osɔfo lɛ kɛ loofɔlɔ lɛ abaŋmɛ afɔleshãa latɛ lɛ nɔ; etsɔ̃mɔ ni etse loofɔlɔ lɛ yitso, ni eshã loofɔlɔ lɛ loo lɛ, shi loofɔlɔ lɛ lá lɛ atsere kɛnyiɛ afɔleshãa latɛ lɛ he.

¹⁶ Ejie loofɔlɔ lɛ kpɔŋɔshi kɛ emlinii lɛ koni eshɛrɛ eshwie afɔleshãa latɛ lɛ masɛi yɛ ebokãgbɛ he ni atsiɔ lamlu ashwieɔ lɛ.

¹⁷ Emɔ loofɔlɔ lɛ fiji lɛ amli koni egba loofɔlɔ lɛ mli, shi ekakpɔlɔ efiji lɛ. Osɔfo lɛ ashã loofɔlɔ lɛ yɛ lai lɛ nɔ yɛ afɔleshãa latɛ lɛ nɔ. Shãa afɔle ni: afɔle ni ashãa fɛɛ ni ejeɔ ŋma ewoɔ Yehowa ni.”