2 Yohane 1 - ŊMALƐ KRƆŊKRƆŊ LƐ

Ŋamɔ

¹ Onukpa lɛ ŋma yahã Awula ni ahala lɛ kɛ ebii lɛ, mɛi ni misumɔɔ yɛ anɔkwale mli lɛ, ni jeee mi kome kɛkɛ, shi mɛi fɛɛ hu ni le anɔkwale lɛ

² yɛ anɔkwale ni hiɔ wɔmli ni ekɛ wɔ aaahi shi kɛaatee naanɔ lɛ hewɔ.

³ Dromɔ, mɔbɔnalɛ kɛ hejɔlɛ ni jɛ Tsɛ Nyɔŋmɔ lɛ kɛ Nuŋtsɔ Yesu Kristo, Tsɛ lɛ Bi lɛ, dɛŋ lɛ kɛ nyɛ ahi shi yɛ anɔkwale suɔmɔ mli!

Anɔkwale kɛ suɔmɔ

⁴ Mina miishɛɛ babaoo akɛ mina obii lɛ ateŋ mɛi komɛi nyiɛ yɛ anɔkwale lɛ mli, tamɔ bɔ ni Tsɛ lɛ wo wɔ kitã lɛ.

⁵ Ni agbɛnɛ miikpa bo fai, Awula, jeee akɛ belɛ miiŋma bo kitã hee ko, shi moŋ nɔ ni wɔyɔɔ kɛje shishijee lɛ, akɛ wɔsumɔsumɔɔ wɔhe.

⁶ Ni suɔmɔ lɛ ji akɛ wɔnyiɛ yɛ ekitãi lɛ anaa; kitã lɛ ji akɛ, bɔ ni nyɛnu kɛjɛ shishijee lɛ, nyɛba nyɛjeŋ nakai.

⁷ Ejaakɛ shishiulɔi pii eba je lɛ mli, mɛi ni ejajeee akɛ Yesu Kristo eba yɛ heloo mli. Mɔ nɛ ji shishiulɔ lɛ kɛ Kristo henyɛlɔ lɛ.

⁸ Nyɛkwɛa nyɛhe jogbaŋŋ koni nyɛkalaaje nii ni nyɛkɛ nitsumɔ ena lɛ, shi moŋ nyɛna nyɔmɔwoo muu.

⁹ Mɔ fɛɛ mɔ ni tekeɔ Kristo tsɔ̃ɔmɔ lɛ ni ehiii mli lɛ, ebɛ Nyɔŋmɔ; mɔ ni hiɔ Kristo tsɔ̃ɔmɔ lɛ mli lɛ, eyɛ Tsɛ lɛ kɛ Bi lɛ.

¹⁰ Kɛ mɔ ko ba nyɛŋɔɔ ni ehiɛɛɛ nɛkɛ tsɔ̃ɔmɔ nɛɛ lɛ, nyɛkaherea lɛ kɛbaa nyɛwe, ni nyɛkafalaa lɛ tete;

¹¹ ejaakɛ mɔ ni fala lɛ lɛ, ekɛ lɛ feɔ ekome yɛ enitsumɔi fɔ̃ji lɛ amli.

Naagbee wiemɔi

¹² Kulɛ miyɛ nibii pii ni maŋma nyɛ, shi misumɔ̃ɔɔ akɛ mikɛ wolo kɛ “blɛgi” ŋmaa, shi moŋ mihiɛ kã nɔ akɛ maba nyɛŋɔɔ ni mikɛ nyɛ abawie hiɛ kɛ hiɛ, koni wɔmiishɛɛ lɛ ayi obɔ̃.

¹³ Onyɛmi yoo ni ahala lɛ bii lɛ miibi bo.