2 Timoteo 4 - ŊMALƐ KRƆŊKRƆŊ LƐ

Paulo miitu nitsumɔ lɛ ewo Timoteo dɛŋ

¹ Miifã bo yɛ Nyɔŋmɔ kɛ Yesu Kristo ni baaba ebakojo hiɛkãalɔi kɛ gbohii lɛ ahiɛ, ni mikɛ epuemɔ kɛ emaŋtsɛyeli lɛ miifã bo akɛ,

² Shiɛmɔ wiemɔ lɛ, kã he, be ni hi jio, be ni ehiii jio, kã hiɛ, wo ŋaa, tsɔ̃ɔmɔ nii kɛ tsuishitoo fɛɛ.

³ Ejaakɛ be ko baaba ni gbɔmɛi ekpɛlɛŋ tsɔ̃ɔmɔ kpakpa lɛ dɔŋŋ, shi moŋ amɛaabua tsɔɔlɔi anaa amɛwo amɛhe yɛ amɛ diɛŋtsɛ amɛkɔnɔi lɛ anaa, ejaakɛ amɛtoiiaŋ miifɛlɛ̃ amɛ;

⁴ ni amɛaakpala anɔkwale lɛ yɛ amɛtoii asɛɛ, ni amɛaakpale kɛyanyiɛ adesãi asɛɛ.

⁵ Shi bo lɛ, ohiɛ akã shi yɛ nii fɛɛ mli, miamɔ ohiɛ yɛ amanehului amli, tsu Sanekpakpashiɛlɔ nitsumɔ lɛ, gbee osɔ̃ɔmɔ lɛ naa kwraa!

Paulo miiwie enitsumɔ kɛ ewala naagbee he

⁶ Ejaakɛ mi lɛ, aafɔse mila aashwie shi momo akɛ afɔle, ni mimliyimɔ be lɛ eshɛ.

⁷ Ta kpakpa lɛ, miwu; foidamɔ lɛ, mida migbe naa; hemɔkɛyeli lɛ, mihiɛ mli tswɛ.

⁸ Nɔ ni eshwɛ ni kã shi hã mi ji jalɛ akekre lɛ, ni Nuŋtsɔ ni ji jalɛ kojolɔ lɛ baahã mi yɛ nakai Gbi lɛ nɔ lɛ, ni jeee mikome ebaahã, shi moŋ mɛi bluublu hu ni sumɔɔ epuemɔ lɛ.

Wiemɔi ni kɔɔ Paulo kɛkɛ he

⁹ Bɔɔ mɔdɛŋ ni oba miŋɔɔ oya.

¹⁰ Ejaakɛ ní Dema esumɔ amrɔmrɔ je nɛɛŋ hewɔ lɛ, eshi mi etee Tesalonika. Kreske etee Galatia, Tito etee Dalmatia.

¹¹ Luka pɛ kɛ mi yɔɔ. Ŋɔɔ Marko ni okɛ lɛ aba, ejaakɛ ehe yɛ sɛɛnamɔ hã mi yɛ sɔ̃ɔmɔ lɛ mli.

¹² Tihiko lɛ, mitsu lɛ Efeso.

¹³ Atade lɛ ni mishi yɛ Troia yɛ Karpo ŋɔɔ lɛ, kɛ ooba lɛ okɛba, kɛ woji lɛ hu, titri lɛ amɛteŋ nii ni aŋmala yɛ kooloi ahewolo nɔ lɛ.

¹⁴ Aleksandro, sɔ̃lɔ lɛ, fee mi efɔŋ naakpa; Nuŋtsɔ lɛ ato lɛ najiaŋ yɛ enitsumɔi lɛ anaa.

¹⁵ Bo hu kwɛ ohe ni ahi yɛ ehe ejaakɛ eku wɔwiemɔi lɛ anaa waa naakpa.

¹⁶ Miklɛŋklɛŋ naajiemɔ lɛ mli lɛ mɔ ko mɔ ko eyawaaa mi, shi moŋ amɛ fɛɛ amɛshi mi; akabu enɛ afɔ̃ amɛnɔ.

¹⁷ Shi Nuŋtsɔ lɛ fi misɛɛ ni ewo mi hewalɛ, koni atsɔ̃ minɔ ashiɛ shiɛmɔ muu lɛ fɛɛ, ni jeŋmaji lɛ fɛɛ anu; ni ajie mi yɛ jata lɛ daaŋ.

¹⁸ Ni jiemɔ kɛ̃ Nuŋtsɔ lɛ aaajie mi kɛaajɛ efɔŋ fɛɛ efɔŋ mli, ni eeehere miyiwala kɛaatee eŋwɛi maŋtsɛyeli lɛ mli. Lɛ aŋɔ anunyam ahã kɛyashi naanɔi anaanɔ lɛ. Amen!

Shɛɛ kɛ ŋamɔi

¹⁹ Miibi Priskila kɛ Akwila kɛ Onesiforo we lɛ.

²⁰ Erasto yɛ Korinto lolo; shi Trofimo lɛ, mishi lɛ yɛ Mileto ni ehe miiye.

²¹ Bɔɔ mɔdɛŋ ni oba dani fɛ̃i be lɛ ashɛ. Eubulo kɛ Pude kɛ Lino kɛ Klaudia kɛ nyɛmimɛi lɛ fɛɛ miibi bo

²² Nuŋtsɔ Yesu Kristo kɛ omumɔ lɛ ahi shi! Dromɔ kɛ nyɛ ahi shi! Amen.