Biblia Todo Logo
Bìoball air-loidhne

- Sanasan -

2 Timoteo 2 - ŊMALƐ KRƆŊKRƆŊ LƐ


Kristo Yesu tabilɔ kpakpa

1 Agbɛnɛ mibi, bo lɛ ohe awa yɛ dromɔ ni yɔɔ Kristo Yesu mli lɛ mli.

2 Ni nii ni onu yɛ minaa yɛ odasefoi pii ahiɛ lɛ, tuu owo gbɔmɛi anɔkwafoi adɛŋ, mɛi ni aaanyɛ atsɔ̃ɔ mɛi krokomɛi hu lɛ.

3 Naa amanehulu lɛ eko, tamɔ Kristo Yesu tabilɔ kpakpa ko.

4 Mɔ ko enyiɛɛɛ ta gbɛ ni ekɛ ehe wo shĩa saji amli, koni esa mɔ ni fã lɛ kɛtee ta lɛ lɛŋ lɛ hiɛ.

5 Ni kɛji mɔ ko miishi mple hu lɛ, afiŋ lɛ kunim akekre, akɛ ja eshi lɛ mla naa.

6 Okwaafonyo ni tsuɔ nii lɛ, lɛ tsutsu sa akɛ ena yibii lɛ eko. Jwɛŋmɔ nɔ ni mikɛɔ nɛɛ he,

7 ejaakɛ Nuŋtsɔ lɛ aaahã ona nii fɛɛ shishi.

8 Ohiɛ ahi Yesu Kristo ni te shi kɛjɛ gbohii ateŋ ni jɛ David shwie mli lɛ nɔ, tamɔ bɔ ni mikɛɛ yɛ mi-Sanekpakpa lɛ shiɛmɔ mli lɛ.

9 No mli amane nɔŋŋ minaa, kɛyashi kpãi amli tete, tamɔ efɔŋfeelɔ ko nɛɛ, shi kɛ̃lɛ Nyɔŋmɔ wiemɔ lɛ awooo lɛ kpãa.

10 Enɛ hewɔ lɛ, mimiaa mihiɛ yɛ saji fɛɛ amli yɛ mɛi ni ahala amɛ lɛ ahewɔ, koni amɛ hu amɛnine ashɛ yiwalaheremɔ ni yɔɔ Kristo Yesu mli lɛ kɛ naanɔ anunyam lɛ nɔ.

11 Anɔkwa wiemɔ nɛ, “Kɛ wɔ kɛ lɛ gbo lɛ, wɔ kɛ lɛ aaana wala hu;

12 kɛ wɔmia wɔhiɛ lɛ, wɔ kɛ lɛ aaaye maŋtsɛ hu; kɛ wɔkpa yɛ esɛɛ lɛ, lɛ hu eeekpa yɛ wɔsɛɛ.

13 Kɛ wɔfeee wɔhe anɔkwafoi lɛ, lɛ lɛ eeehi shi anɔkwafo, Enyɛŋ ekpa yɛ lɛ diɛŋtsɛ ehe sɛɛ.”


Nitsulɔ ni sa Nyɔŋmɔ hiɛ

14 Kaimɔ amɛ nɛkɛ nii nɛɛ, ni oma nɔ mí ohã amɛ yɛ Nuŋtsɔ lɛ hiɛ, koni amɛkawu naabu ta ni sɛɛnamɔ ko bɛ he, shi ebutuɔ mɛi ni nuɔ lɛ moŋ lɛ.

15 Bɔɔ mɔdɛŋ ni okɛ ohe adamɔ Nyɔŋmɔ hiɛ akɛ mɔ ko ni sa, nitsulɔ ni hiɛ gbooo, ni tsɔ̃ɔ anɔkwale wiemɔ lɛ pɛpɛɛpɛ.

16 Shi yaka wiemɔ ni buleɔ mɔ lɛ, tsi ohe kɛjɛ he; ejaakɛ mɛi ni wieɔ nɛkɛ lɛ aaaya nɔ awo wu yɛ bu ni abuuu Nyɔŋmɔ mli.

17 Ni amɛwiemɔ lɛ aaafee tamɔ fala fɔŋ ni yeɔ heloo. Amɛteŋ mɛi komɛi ji Himeneo kɛ Fileto,

18 mɛi ni edu gbɛ kɛjɛ anɔkwale lɛ he, ni amɛkɛɔ akɛ shitee lɛ eho momo, ni amɛbutuɔ mɛi komɛi ahemɔkɛyeli lɛ.

19 Kɛ̃lɛ Nyɔŋmɔ shishitoo ni wa lɛ ma shi shiŋŋ, ni ehiɛ nɛkɛ naasɔomɔnɔ nɛɛ, “Nuŋtsɔ lɛ le lɛ diɛŋtsɛ emɛi lɛ,” kɛ “Mɔ fɛɛ mɔ ni tsiɔ Nuŋtsɔ lɛ gbɛi lɛ tã lɛ atsi ehe kɛjɛ nii ni ejaaa gbɛ lɛ ahe.”

20 Shi shĩa wulu mli lɛ, jeee shikanii kɛ jwiɛtɛinii kɛkɛ yɔɔ jɛi, shi moŋ tsonii kɛ sunii hu yɛ mli, ni ekomɛi lɛ abuɔ amɛ, shi ekomɛi hu abuuu.

21 Agbɛnɛ kɛji mɔ ko tsuu ehe kɛjɛ nɛkɛ nii nɛɛ amli lɛ, eeetsɔ̃ nɔ ni akɛfeɔ nii ni yɔɔ nyam ni atsuu he krɔŋŋ, ni hi hã shĩatsɛ lɛ jogbaŋŋ, ni asaa ahã nitsumɔ kpakpa fɛɛ nitsumɔ kpakpa.

22 Shi oblahiiaŋ sɛɛdii lɛ hu, joo naa foi, ni okɛ mɛi ni tsɛɔ Nuŋtsɔ lɛ kɛjeɔ tsui ni mli tse mli lɛ atiu jalɛ, hemɔkɛyeli, suɔmɔ kɛ hejɔlɛ sɛɛ.

23 Shi kwashiai aŋwanejee ni akɛkaseee nɔ ko lɛ tsi ohe kɛjɛ he, ejaakɛ ole akɛ ekɛ bei baa;

24 shi Nuŋtsɔ lɛ tsulɔ lɛ, esaaa akɛ ebeɔ, shi moŋ efee mɔ ni mli jɔ hã mɛi fɛɛ, mɔ ni le nitsɔɔmɔ, mɔ ni toɔ etsui shi,

25 mɔ ni kɛ mlijɔlɛ wieɔ tsɔ̃ɔ mɛi ni kuɔ enaa, akɛ aleenɔ Nyɔŋmɔ ahã amɛ tsuitsakemɔ ni amɛle anɔkwale lɛ.

26 Ni amɛhiɛ aaatserɛ amɛ ni amɛaaje abonsam tsɔne lɛ mli lo; ejaakɛ ekɛdu amɛ ni amɛfee esuɔmɔnaanii.

Bible in Ga Language © Bible Society of Ghana, 2020.

Bible Society of Ghana
Lean sinn:



Sanasan