2 Timoteo 1 - ŊMALƐ KRƆŊKRƆŊ LƐ

Ŋamɔ kɛ shidaa

¹ Paulo, ni ji Kristo Yesu bɔfo yɛ Nyɔŋmɔ suɔmɔ naa kɛ wala ni yɔɔ Kristo Yesu mli lɛ he shiwoo naa lɛ,

² ŋma yahã esuɔmɔ bi Timoteo. Dromɔ, mɔbɔnalɛ, hejɔlɛ ni jɛ Tsɛ Nyɔŋmɔ lɛ kɛ wɔNuŋtsɔ Kristo Yesu lɛ dɛŋ ahã bo!

³ Midaa Nyɔŋmɔ ni mijaa lɛ kɛ henilee krɔŋŋ tamɔ bɔ ni miniimɛi ja lɛ lɛ shi daa kɛ mikai bo yɛ mifaikpamɔi amli nyɔɔŋ kɛ shwane.

⁴ Ni kɛ mikai ohiɛ yaafonui lɛ, mishweɔ akɛ mana bo, koni mayi obɔ̃ kɛ miishɛɛ.

⁵ Ejaakɛ mikaiɔ ohemɔkɛyeli ni osato bɛ mli lɛ, ni yɔɔ onaa Loise kɛ onyɛ Eunike mli tsutsu, ni miyɛ nɔmimaa akɛ eyɛ bo hu omli lɛ.

Timoteo kɛ edromɔ keenii

⁶ No hewɔ lɛ, miikai bo ni Nyɔŋmɔ dromɔ keenɔ ni yɔɔ omli yɛ miniji ni mikɛshwie onɔ lɛ hewɔ lɛ, otee lɛ shi ni etso,

⁷ ejaakɛ Nyɔŋmɔ hãaa wɔ gbeyeishemɔ mumɔ, shi moŋ hewalɛ kɛ suɔmɔ kɛ jwɛŋmɔ ni sa mumɔ ekɛhã wɔ.

⁸ No hewɔ lɛ, ohiɛ akagbo yɛ wɔNuŋtsɔ lɛ he odaseyeli lɛ he aloo yɛ mi ni mi ji egboklɛfonyo lɛ he, shi moŋ naa Sanekpakpa lɛ he amanehulu lɛ eko yɛ Nyɔŋmɔ hewalɛ naa.

⁹ Lɛ ehere wɔyiwala ni ekɛ tsɛmɔ krɔŋkrɔŋ tsɛ wɔ, jeee wɔnitsumɔi anaa, shi moŋ yɛ lɛ diɛŋtsɛ eyiŋtoo kɛ edromɔ naa, nɔ ni ekɛ hã wɔ yɛ Kristo Yesu mli dani aje be shishi,

¹⁰ ni agbɛnɛ atsɔ̃ wɔyiwalaherelɔ, Yesu Kristo, puemɔ lɛ nɔ ajie lɛ shi faŋŋ lɛ. Lɛ efo gbele sɛɛ, ni ejie wala kɛ naanɔ shihilɛ kpo etsɔ̃ɔ yɛ Sanekpakpa lɛ mli.

¹¹ Enɛ he awo mi shiɛlɔ kɛ bɔfo kɛ tsɔɔlɔ yɛ lɛ.

¹² No hewɔ nɔŋŋ minaa amanehului nɛɛ, shi kɛ̃lɛ mihiɛ gbooo; ejaakɛ mile mɔ ni mihe miye lɛ, ni miyɛ hewalɛ yɛ nɔ akɛ eeenyɛ ebu nii ni mitu miwo edɛŋ lɛ he kɛyashi nakai Gbi lɛ nɔ.

¹³ Hiɛmɔ wiemɔi ni hi ni onu yɛ minaa akɛ nɔkwɛmɔnɔ lɛ mli yɛ hemɔkɛyeli kɛ suɔmɔ ni yɔɔ Kristo Yesu mli lɛ mli.

¹⁴ Nɔ kpakpa ni atu awo odɛ̃ŋ lɛ buu he yɛ Mumɔ Krɔŋkrɔŋ ni hiɔ wɔmli lɛ hewalɛ naa!

Mɛi ni kpa yɛ Paulo sɛɛ kɛ mɔ ni damɔ esɛɛ kpɛŋŋ

¹⁵ Ole enɛ akɛ mɛi ni yɔɔ Asia lɛ fɛɛ kpa yɛ misɛɛ; amɛteŋ mɛi komɛi ji Figelo kɛ Hermogene.

¹⁶ Nuŋtsɔ lɛ ana Onesiforo we lɛ mɔbɔ, ejaakɛ ebahãa mi tsui kpitiokpitio, ni ehiɛ gbooo mikɔ̃sɔ̃ŋkɔ̃sɔ̃ lɛ he;

¹⁷ shi be ni eba Roma lɛ, ebɔ mɔdɛŋ etao mi ni ena mi.

¹⁸ Nuŋtsɔ lɛ ahã ena Nuŋtsɔ lɛ dɛŋ mɔbɔnalɛ yɛ nakai Gbi lɛ nɔ. Ni bɔ ni etsɔ̃ esɔ̃mɔ mi yɛ Efeso lɛ fɛɛ lɛ, ole jogbaŋŋ.