2 Tesalonikabii 3 - ŊMALƐ KRƆŊKRƆŊ LƐ

Nyɛsɔlea nyɛhãa wɔ

¹ Nɔ ni eshwɛ lɛ, anyɛmimɛi, nyɛsɔlea nyɛhãa wɔ koni Nuŋtsɔ lɛ wiemɔ lɛ agbɛ ashwã oyayaayai ni awo ehiɛ nyam, tamɔ bɔ ni eyɔɔ yɛ nyɛŋɔɔ lɛ.

² Ni ajie wɔ kɛjɛ yiwalɔi gbɔmɛi fɔ̃ji lɛ adɛŋ, ejaakɛ jeee mɛi fɛɛ yɔɔ hemɔkɛyeli.

³ Shi anɔkwafo ji Nuŋtsɔ lɛ, mɔ ni aaawaje nyɛ ni eeebu nyɛhe ni ejie nyɛ kɛjɛ mɔ fɔŋ lɛ dɛŋ lɛ.

⁴ Wɔhiɛ kã nyɛnɔ yɛ Nuŋtsɔ lɛ mli akɛ nii ni wɔwoɔ nyɛ he kitã lɛ, nyɛmiifee ni nyɛaafee hu.

⁵ Nuŋtsɔ lɛ akudɔ nyɛtsuii kɛya Nyɔŋmɔ suɔmɔ kɛ Kristo tsuishiŋmɛɛ lɛ mli.

Esa akɛ mɔ fɛɛ mɔ atsu nii

⁶ Shi anyɛmimɛi, wɔmiiwo nyɛ kitã yɛ wɔNuŋtsɔ Yesu Kristo gbɛi mli, akɛ nyɛtsia nyɛhe kɛjɛa nyɛmi fɛɛ nyɛmi ni feɔ hejɔ̃ ni ehiii shi yɛ nii ni wɔtsɔ̃ɔ nyɛ lɛ naa lɛ he.

⁷ Ejaakɛ nyɛ diɛŋtsɛ nyɛle akɛ esa akɛ nyɛkaseɔ wɔ; ejaakɛ wɔfeee wɔhe hejɔ̃lɔi yɛ nyɛteŋ.

⁸ Ni asaŋ wɔyeee mɔ ko ŋmaa yaka, shi moŋ wɔkɛ mɔdɛŋbɔɔ kɛ tɔlɛ tsuɔ nii nyɔɔŋ kɛ shwane bɔ ni afee ni wɔkafee jatsu wɔmiihã nyɛteŋ mɔ ko.

⁹ Jeee akɛ wɔbɛ nakai hegbɛ, shi moŋ, koni wɔkɛ wɔhe afee nɔkwɛmɔnɔ wɔhã nyɛ ni nyɛkase.

¹⁰ Ejaakɛ be ni wɔkɛ nyɛ yɔɔ lɛ hu, wɔwo nyɛ kitã akɛ, “Kɛ mɔ ko sumɔɔɔ akɛ etsuɔ nii lɛ, belɛ ekaye nii hu.”

¹¹ Ejaakɛ wɔnuɔ akɛ mɛi komɛi yɛ nyɛteŋ ni feɔ hejɔ̃, ni amɛtsuuu nii, shi moŋ amɛkɛ amɛhe woɔ mɛi asaji amli.

¹² Nɛkɛ mɛi nɛɛ wɔmiiwo amɛ kitã ni wɔmiiwo amɛŋaa yɛ Nuŋtsɔ Yesu Kristo mli akɛ amɛtsu nii waa ni amɛye amɛ diɛŋtsɛ amɛdɛŋ ŋmaa.

¹³ Shi nyɛ lɛ, anyɛmimɛi, nyɛkahãa ekpakpafeemɔ miitɔa nyɛ.

¹⁴ Shi kɛ mɔ ko booo wɔwiemɔ ni yɔɔ wolo lɛ mli lɛ toi lɛ, nyɛkadia lɛ, ni nyɛkɛ lɛ akabɔa, koni ehiɛ agbo;

¹⁵ ni nyɛkabua lɛ akɛ henyɛlɔ, shi moŋ nyɛwiea nyɛtsɔ̃a lɛ akɛ nyɛmi.

Naagbee wiemɔ

¹⁶ Shi lɛ hejɔlɛ Nuŋtsɔ lɛ diɛŋtsɛ ahã nyɛ hejɔlɛ daa yɛ gbɛ fɛɛ gbɛ nɔ. Nuŋtsɔ lɛ kɛ nyɛ fɛɛ ahi shi.

¹⁷ Mi Paulo diɛŋtsɛ minine naa bimɔ ni ji okadi yɛ miwolo fɛɛ wolo mli nɛ; bɔ ni miŋmaa nɛ.

¹⁸ WɔNuŋtsɔ Yesu Kristo dromɔ lɛ kɛ nyɛ fɛɛ ahi shi! Amen.