2 Tesalonikabii 2 - ŊMALƐ KRƆŊKRƆŊ LƐ

Mlakwalɔ lɛ

¹ Shi wɔmiikpa nyɛ fai, anyɛmimɛi, yɛ wɔNuŋtsɔ Yesu Kristo baa lɛ kɛ wɔnaa ni abaabua yɛ eŋɔɔ lɛ hewɔ

² akɛ nyɛkahãa ahã nyɛjwɛŋmɔ futu oya, ni asaŋ nyɛkahãa akɛ mumɔ ko loo wiemɔ ko loo wolo ko ni aaakɛɛ akɛ ejɛ wɔŋɔɔ lɛ miihã nyɛhao akɛ Nuŋtsɔ lɛ Gbi lɛ eshɛ etã.

³ Nyɛkahãa mɔ ko miishishiua nyɛ yɛ gbɛ ko gbɛ ko nɔ; ejaakɛ ja jamɔkwamɔ lɛ eba fɛɛ dã ni aaajie mlakwamɔ gbɔmɔ lɛ ni ji hiɛkpãtãmɔ bi lɛ kpo.

⁴ Eteɔ shi ewoɔ ehe nɔ eshiɔ nɔ fɛɛ nɔ ni atsɛɔ nyɔŋmɔ loo jamɔ lɛ aahu bɔ ni lɛ diɛŋtsɛ eyataa Nyɔŋmɔ We lɛ ni ekɛ ehe tsɔ̃ɔ akɛ lɛ ji Nyɔŋmɔ lɛ.

⁵ Nyɛkaiii akɛ be ni mikɛ nyɛ yɔɔ lɛ, mikɛɛ nyɛ nɛkɛ nii nɛɛ lo?

⁶ Ni agbɛnɛ lɛ, nɔ ni tsiɔ ekpojiemɔ lɛ gbɛ kɛyashi ebe aaashɛ lɛ, nyɛle.

⁷ Ejaakɛ mlakwamɔ teemɔsane lɛ miitsu nii momo, shi kɛyashi mɔ ni tsɔ̃ɔ lɛ gbɛ lɛ aaaje jɛi kɛkɛ.

⁸ Ni no dani aaajie mlakwalɔ lɛ kpo; Nuŋtsɔ Yesu kɛ edaaŋ mumɔ lɛ aaagbe lɛ ni ekɛ ebaa lɛ puemɔ lɛ aaakpãtã ehiɛ.

⁹ Mlakwalɔ nɛɛ, Satan nitsumɔ nɔ ebaatsɔ̃ kɛba kɛ amale hewalɛ kɛ amale okadii kɛ amale naakpɛɛnii,

¹⁰ kɛ efɔŋ mli shishiumɔ fɛɛ ni akɛ shishiuɔ mɛi ni hiɛ baakpãtã ejaakɛ amɛmɔ̃ɔɔ anɔkwale suɔmɔ lɛ mli ni akɛhere amɛyiwala lɛ.

¹¹ Ni enɛ hewɔ lɛ Nyɔŋmɔ tsuɔ shishiumɔ hewalɛ kɛbaa amɛŋɔɔ ni amɛhe amale amɛye,

¹² koni akojo mɛi fɛɛ ni heee anɔkwale lɛ amɛyeee, shi amɛnaa efɔŋ moŋ he tsui lɛ.

Ahala nyɛ kɛhã yiwalaheremɔ

¹³ Shi wɔ lɛ, esa akɛ wɔdaa Nyɔŋmɔ shi daa yɛ nyɛhewɔ, anyɛmimɛi ni Nuŋtsɔ lɛ sumɔɔ, ejaakɛ Nyɔŋmɔ ehala nyɛ akɛ klɛŋklɛŋ yibii ehã yiwalaheremɔ kɛtsɔ̃ nyɛhe ni Mumɔ Krɔŋkrɔŋ lɛ tsuɔ kɛ he ni nyɛheɔ anɔkwale lɛ nyɛyeɔ lɛ nɔ.

¹⁴ Enɛ mli etsɔ̃ wɔSanekpakpa lɛ nɔ etsɛ nyɛ kɛba, koni nyɛna wɔNuŋtsɔ Yesu Kristo anunyam lɛ.

¹⁵ Belɛ no hewɔ lɛ, anyɛmimɛi, nyɛfĩa shi, ni nyɛhiɛa nii ni wɔtsɔ̃ɔ nyɛ yɛ wiemɔ mli loo wolo mli lɛ mli.

¹⁶ Shi lɛ wɔNuŋtsɔ Yesu Kristo lɛ diɛŋtsɛ kɛ wɔTsɛ Nyɔŋmɔ ni sumɔ wɔ ni ekɛ naanɔ miishɛjemɔ kɛ hiɛnɔkãmɔ kpakpa hã wɔ yɛ dromɔ naa lɛ,

¹⁷ lɛ nɔŋŋ eshɛje nyɛmii ni ewaje nyɛ yɛ wiemɔ kpakpa kɛ nitsumɔ kpakpa fɛɛ mli.