2 Tesalonikabii 1 - ŊMALƐ KRƆŊKRƆŊ LƐ

Ŋamɔ

¹ Paulo kɛ Silvano kɛ Timoteo ŋma yahã Tesalonikabii asafo ni yɔɔ wɔTsɛ Nyɔŋmɔ lɛ kɛ Nuŋtsɔ Yesu Kristo mli lɛ.

² Dromɔ kɛ hejɔlɛ ni jɛ Tsɛ Nyɔŋmɔ lɛ kɛ Nuŋtsɔ Yesu Kristo lɛ dɛŋ ahã nyɛ!

Kojomɔ yɛ Kristo baa be lɛ mli

³ Eji wɔgbɛnaa akɛ wɔdaa Nyɔŋmɔ shi daa yɛ nyɛhewɔ, anyɛmimɛi, tamɔ bɔ ni sa lɛ, ejaakɛ nyɛhemɔkɛyeli lɛ miida naakpa, ni nyɛteŋ mɔ fɛɛ mɔ suɔmɔ ni ekɛsumɔɔ enanemɛi lɛ miifa kɛmiiya nɔ hu.

⁴ No hewɔ lɛ, wɔdiɛŋtsɛ tete wɔshwãa wɔfɔ̃ɔ nyɛnɔ yɛ Nyɔŋmɔ asafoi lɛ amli, yɛ nyɛhiɛmiamɔ kɛ nyɛhemɔkɛyeli ni nyɛhiɛ yɛ nyɛyiwalɛi kɛ nyɛmanehului ni nyɛnaa lɛ amli lɛ hewɔ.

⁵ Eji Nyɔŋmɔ kojomɔ ni ja gbɛ lɛ he okadi, koni abu nyɛ akɛ nyɛsa Nyɔŋmɔ maŋtsɛyeli ni nyɛnaa he nɔ lɛ,

⁶ akɛni eja yɛ Nyɔŋmɔ hiɛ akɛ mɛi ni haoɔ nyɛ lɛ, eeehao amɛ eto najiaŋ,

⁷ ni nyɛ mɛi ni ahaoɔ nyɛ lɛ, eeehã nyɛ kɛ wɔ fɛɛ hejɔɔmɔ, be ni aaajie Nuŋtsɔ Yesu kpo kɛaajɛ ŋwɛi kɛ ebɔfoi ni yɔɔ hewalɛ lɛ.

⁸ Ekɛ lalilɛi aaatɔ owele yɛ mɛi ni leee Nyɔŋmɔ kɛ mɛi ni booo wɔNuŋtsɔ Yesu Kristo Sanekpakpa lɛ toi lɛ anɔ.

⁹ Amɛaana nyɔmɔwoo ni ji naanɔ hiɛkpãtãmɔ, ni aaajie amɛ kɛaajɛ Nuŋtsɔ lɛ hiɛ kɛ ehewalɛ lɛ anunyam lɛ he,

¹⁰ be ni eeeba koni awo ehiɛ nyam yɛ emɛi krɔŋkrɔŋi lɛ amli ni ana enaakpɛɛnii yɛ eheyelɔi lɛ fɛɛ amli yɛ nakai Gbi lɛ nɔ lɛ, ejaakɛ ahe wɔdase ni wɔye wɔtsɔ̃ɔ nyɛ lɛ aye.

¹¹ Enɛ hewɔ hu ni wɔsɔleɔ daa wɔhãa nyɛ, koni wɔNyɔŋmɔ lɛ abu nyɛ akɛ mɛi ni sa tsɛmɔ lɛ ni ekɛ ehewalɛ lɛ ahã ekpakpafeemɔ he miishɛɛ fɛɛ ni nyɛyɔɔ kɛ nyɛhemɔkɛyeli nitsumɔ lɛ ayi obɔ̃,

¹² bɔ ni afee ni awo wɔNuŋtsɔ Yesu Kristo gbɛi lɛ hiɛ nyam yɛ nyɛmli ni nyɛ hu nyɛhiɛ aba nyam yɛ emli, yɛ wɔNyɔŋmɔ lɛ kɛ Nuŋtsɔ Yesu Kristo dromɔ lɛ naa.