2 Samuel 9 - ŊMALƐ KRƆŊKRƆŊ LƐ

David fee Mefiboshet ejurɔ

¹ Gbi ko lɛ David bi akɛ, “Ani Saul shwie ko kwraa yɛ jeŋ lolo lo? Masumɔ akɛ mafee mɔ lɛ ejurɔ yɛ Yonatan hewɔ.”

² Tsulɔ ko yɛ Saul we lɛ ni atsɛɔ lɛ Ziba, ni ayatsɛ lɛ abahã David. Be ni Ziba ba lɛ, Maŋtsɛ David bi lɛ akɛ, “Ani bo ji Ziba lɛ?” Ziba jie naa akɛ, “Ofainɛ, mi ni.”

³ Maŋtsɛ David bi lɛ akɛ, “Ani Saul shwie ko kwraa yɛ jeŋ lolo, koni mafee mɔ lɛ ejurɔ yɛ Nyɔŋmɔ hewɔ lo?” Ziba to he ekɛɛ, “Yonatan musuŋ binuu ko yɛ lolo, ni enaji enyɔ lɛ fɛɛ eje kpa.”

⁴ Maŋtsɛ lɛ bi lɛ akɛ, “Nɛgbɛ eyɔɔ?” Ziba here nɔ akɛ, “Eyɛ Amiel bi Makir we lɛ yɛ Lo-Debar.”

⁵ Kɛkɛ ni Maŋtsɛ David tsu atee koni ayaŋɔ Yonatan musuŋ binuu lɛ yɛ Amiel bi Makir we lɛ yɛ Lo-Debar kɛba.

⁶ Be ni Mefiboshet, Yonatan binuu ni ji Saul nabi lɛ, shɛ David ŋɔɔ lɛ, eho egbee shi, ni ekɛ ehiɛ bu shi, ni eŋa David. Kɛkɛ ni David tsɛ lɛ ekɛɛ, “Mefiboshet,” ni Mefiboshet here nɔ akɛ, “Ofainɛ, naa mi.”

⁷ David kɛɛ lɛ akɛ, “Kaashe gbeyei! Miyɛ ejurɔ ni mafee bo yɛ otsɛ Yonatan hewɔ. Mibakpale onii Saul shikpɔji lɛ fɛɛ mahã bo; ni kɛjɛ kɛyaa nɛɛ lɛ obaata mikpɔlɔ̃ lɛ he, ni okɛ mi baaye nii daa.”

⁸ Kɛkɛ ni Mefiboshet koto David ni ekɛɛ, “Ofainɛ, namɔ po ji mi, otsulɔ, ni tamɔ gbee gbonyo nɛɛ, ni ona mihe tsuijurɔ nɛkɛ?”

⁹ Kɛkɛ ni David tsɛ Ziba, Saul tsulɔ lɛ; ekɛɛ lɛ akɛ, “Naa, miikpale nibii ni ji Saul kɛ ewe lɛ fɛɛ nii lɛ miihã Mefiboshet, onuŋtsɔ nabi lɛ.

¹⁰ No hewɔ lɛ, okɛ obii lɛ kɛ otsuji lɛ baahu shikpɔŋ lɛ, ni okpa enɔ nii ohã onuŋtsɔ nabi lɛ we lɛ koni amɛna nii amɛye. Shi moŋ kɛjɛ kɛyaa nɛɛ lɛ Mefiboshet, onuŋtsɔ nabi lɛ, kɛ mi aaata okplɔ̃ he be fɛɛ be ni wɔye nii.” (Ziba nɛɛ yɛ bihii nyɔŋma kɛ enumɔ kɛ tsuji nyɔŋmai enyɔ.)

¹¹ Kɛkɛ ni Ziba here Maŋtsɛ David nɔ, ni ekɛɛ, “Mibafee nɔ fɛɛ nɔ ni minuŋtsɔ maŋtsɛ efã etsulɔ akɛ efee lɛ.” No hewɔ lɛ, Mefiboshet kɛ David ta okplɔ̃ he ye nii tamɔ maŋtsɛ bihii lɛ feɔ lɛ.

¹² Mefiboshet yɛ binuu fioo ko ni atsɛɔ lɛ Mika. Ziba shĩa lɛ mli bii fɛɛ tsɔ̃ Mefiboshet tsuji.

¹³ Mefiboshet ni enaji enyɔ lɛ fɛɛ eje kpa lɛ, hi shi yɛ Yerusalɛm, ni eyeɔ nii yɛ maŋtsɛ okplɔ̃ lɛ he.