2 Samuel 7 - ŊMALƐ KRƆŊKRƆŊ LƐ

Shɛɛ ni Natan kɛhã David lɛ

¹ Be ni Maŋtsɛ David eyahi emɔɔ lɛ mli, ni Yehowa ehã ena hejɔlɛ yɛ ehenyɛlɔi ni bɔle lɛ kɛkpe lɛ agbɛfaŋ lɛ,

² etsɛ gbalɔ Natan ni ekɛɛ lɛ akɛ, “Bɛ oona akɛ, mi lɛ, mina tsenedru tsu mli mikã be mli ni Nyɔŋmɔ Kpãŋmɔ Adeka lɛ yɛ buu mli?”

³ Natan hã Maŋtsɛ David hetoo akɛ, “Feemɔ nɔ fɛɛ nɔ ni kã otsui nɔ akɛ ofee lɛ, ejaakɛ Yehowa fi osɛɛ.”

⁴ Shi nakai gbi lɛ nɔŋŋ nyɔɔŋ lɛ, Yehowa kɛɛ Natan akɛ,

⁵ “Yaa ni oyakɛɛ mitsulɔ David akɛ, ‘Nɔ ni Yehowa kɛɛ nɛ: Bo omaa tsu ohãa mi mahi mli?

⁶ Kɛjɛ be nɔ ni miyakpala Israelbii yɛ Ijipt aahu kɛbashi ŋmɛnɛ gbi nɛɛ lɛ, mihiko tsu mli dã, fe buu mli sɔŋŋ kɛkɛ miyɔɔ.

⁷ Hei fɛɛ ni mikɛ Israel fɛɛ enyiɛnyiɛ lɛ, mibiko Israel maŋ hiɛnyiɛlɔi ni mifãa amɛ akɛ amɛkura mimaŋ Israel lɛ ateŋ mɔ ko yɛ he ko pɛŋ akɛ mɛɛba po ni nyɛmako tsenedru tsu nyɛhãko mi lɛ?’

⁸ “No hewɔ lɛ, kɛɛmɔ mitsulɔ David akɛ, mi, Yehowa Taiatsɛ lɛ, miikɛɛ lɛ akɛ, ‘Too okpalaa, ni miŋɔ bo, ni mifee bo Israel nɔyelɔ,

⁹ ni he fɛɛ he ni oyaa lɛ mifata ohe, ni miplenee ohenyɛlɔi fɛɛ yɛ ohiɛ, ni mihã ona gbɛi kpeteŋkple tamɔ gbɔmɛi wuji ni yɔɔ shikpɔŋ lɛ nɔ lɛ.

¹⁰ Asaŋ mato he ko mahã mimaŋ Israel koni amɛyahi jɛi akɛ amɛ diɛŋtsɛ amɛnɔ mli, he ni agbaŋ amɛnaa yɛ dɔŋŋ, ni yiwalɔi haoŋ amɛ dɔŋŋ tamɔ sa,

¹¹ be ni mito hiɛnyiɛlɔi koni amɛkura mimaŋ Israel lɛ. Ni mahã ohe ajɔ bo yɛ ohenyɛlɔi lɛ fɛɛ agbɛfaŋ. Asaŋ mi, Yehowa, miiwo bo shi akɛ mibahã owo shwiei babaoo,

¹² ni ogbele sɛɛ lɛ matee mɔ ko shi kɛjɛ oshwiei lɛ amli akɛ maŋtsɛ, ni mahã emaŋtsɛyeli lɛ ama shi shiŋŋ.

¹³ Lɛ ji mɔ ni baama Sɔlemɔ we ehã mi ni mahã emaŋtsɛ sɛi lɛ ama shi shiŋŋ kɛya naanɔ.

¹⁴ Mibatsɔ̃ etsɛ, ni eeetsɔ̃ mibi. Kɛji efee nɔ fɔŋ lɛ mibagbala etoi tamɔ bɔ ni tsɛ gbalaa ebi toi lɛ.

¹⁵ Shi kɛ̃lɛ mimɔbɔnalɛ sɛɛ efoŋ yɛ egbɛfaŋ tamɔ bɔ ni mihã mimɔbɔnalɛ lɛ sɛɛ fo yɛ Saul gbɛfaŋ lɛ, mɔ ni mikpa lɛ ni obaye esɛɛ lɛ.

¹⁶ Mibahã owe lɛ kɛ omaŋtsɛyeli fɛɛ ama shi shiŋŋ daa kɛaatee naanɔ; omaŋtsɛ sɛi lɛ baama shi shiŋŋ kɛaatee naanɔ.’ ”

¹⁷ Natan gba David wiemɔi nɛɛ kɛ ninaa nɛɛ bɔ ni ajie atsɔ̃ɔ lɛ lɛ pɛpɛɛpɛ.

David sɔle eda shi

¹⁸ Kɛkɛ ni Maŋtsɛ David bote Yehowa Kpee Buu lɛ mli, ni eho eta shi, ni esɔle ekɛɛ, “Nuŋtsɔ Nyɔŋmɔ, namɔ ji mi, ni mɛni mli miwe lɛ yɔɔ hewɔ ni ohiɛ mi kɛbashi be nɛ nɛɛ?

¹⁹ Ni kɛ̃lɛ enɛ jeee nɔ ko srɔto ko hã bo, Nuŋtsɔ Nyɔŋmɔ. Otsɔ̃ɔ wɔsɛɛ shɔŋŋ nibii ni baaba, mi otsulɔ, miwe lɛ nɔ hu. Nuŋtsɔ Nyɔŋmɔ, otsɔ̃ɔ mi shwiei ni mawo.

²⁰ Mɛni po yɔɔ mi David minaa ni makɛɛ dɔŋŋ? Ejaakɛ bo Nuŋtsɔ Nyɔŋmɔ, ole mi, otsulɔ.

²¹ Shi ni owo lɛ, akɛ ni eji bo diɛŋtsɛ osuɔmɔnaa hewɔ lɛ, ofee nibii wuji nɛɛ fɛɛ koni okɛtsɔ̃ɔ mi, otsulɔ, nii.

²² Anɔkwa, oda kpeteŋkple, Ofe, ejaakɛ mɔ ko mɔ ko kɛ bo yeee egbɔ, ni asaŋ yɛ nii fɛɛ ni wɔnu kɛ wɔtoi lɛ naa lɛ, osɛɛ lɛ nyɔŋmɔ ko nyɔŋmɔ ko bɛ.

²³ Mɛɛ maŋ kroko ko yɔɔ shikpɔŋ lɛ nɔ ni etamɔ omaŋ Israel, ni ji maŋ ni bo Nyɔŋmɔ otee oyakpɔ̃ amɛ; ni ofee amɛ bo diɛŋtsɛ owebii, ni okɛhe gbɛi, ni otsu nibii wuji ni yɔɔ gbeyei ohã amɛ, akɛ ogbɛ maŋ muu kɛ amɛnyɔŋmɔi fɛɛ oshwã yɛ amɛhiɛ?

²⁴ Oma omaŋ Israel nɔ mi akɛ bo diɛŋtsɛ omaŋ kɛmiiya naanɔ, ni bo Yehowa otsɔ̃ amɛNyɔŋmɔ.

²⁵ “Agbɛnɛ, Yehowa Nyɔŋmɔ, maa shi ni owo yɛ mi, otsulɔ, kɛ ewe lɛ he lɛ nɔ mi kɛya naanɔ; ofee nɔ ni okɛɛ lɛ,

²⁶ ni ogbɛi lɛ aaada kpeteŋkple, ni aaakɛɛ kɛya naanɔ akɛ, ‘Yehowa Taiatsɛ lɛ, lɛ ji Nyɔŋmɔ yɛ Israel;’ ni mi otsulɔ David we lɛ ama shi shiŋŋ yɛ ohiɛ.

²⁷ Akɛ bo Yehowa Taiatsɛ, Israel Nyɔŋmɔ lɛ, diɛŋtsɛ ojie nii nɛɛ otsɔ̃ɔ mi otsulɔ, ni okɛɛ akɛ, ‘Mahã oshwiei atsɔmɔ maŋtsɛmɛi lɛ,’ no hã mi, otsulɔ, mina ekãa misɔle nɛkɛ sɔlemɔ nɛɛ.

²⁸ “Nuŋtsɔ Nyɔŋmɔ, bo ji Nyɔŋmɔ, ni owiemɔ lɛ anɔkwale ni; ni okɛ nɔ kpakpa nɛɛ ewo otsulɔ shi.

²⁹ No hewɔ lɛ, agbɛnɛ, na he tsui koni ojɔɔ otsulɔ we lɛ bɔ ni afee ni miwe lɛ ahi shi kɛya naanɔ. Ejaakɛ Nuŋtsɔ Nyɔŋmɔ, owo shi, ni jɔɔmɔ lɛ aaahi mishwiei lɛ anɔ kɛya naanɔ.”