2 Samuel 5 - ŊMALƐ KRƆŊKRƆŊ LƐ

David tsɔ̃ Israel kɛ Yuda fɛɛ Maŋtsɛ

¹ Israel akutsei lɛ fɛɛ ba David ŋɔɔ yɛ Hebron, ni amɛbakɛɛ lɛ akɛ, “Naa, wɔ kɛ bo jɛ lá kome.

² Nyɛsɛɛ nɛɛ be ni Saul yeɔ wɔmaŋtsɛ lɛ, bo ji tatsɛ ni nyiɛ Israelbii lɛ ahiɛ kɛtee kɛba, asaŋ Yehowa wo bo shi akɛ ‘Bo oootsɔ̃ mimaŋ Israelbii lɛ ahiɛnyiɛlɔ kɛ amɛlumɔ.’ ”

³ Israel onukpai lɛ fɛɛ ba Maŋtsɛ David ŋɔɔ yɛ Hebron, ni ekɛ amɛ kpãŋ; kɛkɛ ni amɛfɔ David mu, ni amɛwo lɛ Israel fɛɛ maŋtsɛ.

⁴ Be ni David bɔi maŋtsɛyeli lɛ, eye afii nyɔŋmai etɛ̃, ni eye maŋtsɛ afii nyɔŋmai ejwɛ.

⁵ Eye Yuda kɔkrɔɔ maŋtsɛ afii kpawo kɛ nyɔji ekpaa, ni eye Israel kɛ Yuda fɛɛ maŋtsɛ afii nyɔŋmai etɛ̃ kɛ etɛ̃ yɛ Yerusalɛm.

⁶ Maŋtsɛ David kɛ ewebii lɛ fã ta kɛyanina Yebusbii ni ji shikpɔŋ lɛ nɔ shikwɛ̃ɛbii lɛ yɛ Yerusalɛm. Yebusbii nɛɛ asusumɔ ji akɛ David nyɛŋ maŋ lɛ eshɔ̃, ni no hewɔ lɛ, amɛtswa David mpoa akɛ, “Onyɛŋ biɛ oba; shwilafoi kɛ akpakei sɔŋŋ baashwie bo.”

⁷ Shi David na eshɔ̃ Zion Mɔɔ lɛ kɛ̃, ni ewo jɛi gbɛi David Maŋ agbɛnɛ.

⁸ David kɛɛ yɛ nakai gbi lɛ nɔ akɛ, “Namɔ yɔɔ biɛ ni etaooo Yebusbii lɛ asane tamɔ bɔ ni mi, David, minyɛɔ amɛ, ni no hewɔ lɛ, ena ni etswia amɛ nii? Mɔ lɛ atsɔ̃ nujɔɔ lɛ mli koni eyatswia shwilafoi lɛ kɛ akpakei lɛ anii ni egbe amɛ.” Sane nɛɛ hewɔ akɛɔ akɛ, “Shwilafoi kɛ akpakei baaa Yehowa we lɛ mli lɛ.”

⁹ David kɛ Zion fee eshihilɛhe, ni ewo jɛi gbɛi akɛ David Maŋ. Esaa etswa maŋ lɛ ehee, kɛjɛ Milo lɛ he kɛba mli gbɛ ekɛbabɔle mɔɔ lɛ he kpula kɛkpe.

¹⁰ David hewalɛ tee nɔ eshwere ejaakɛ Yehowa, ni ji Nyɔŋmɔ Taiatsɛ lɛ, fĩ esɛɛ.

¹¹ Tiro maŋtsɛ Hiram wo kapintafoi kɛ tɛ gbogbotswalɔi agbɛ, ni amɛkɛ tsenedru tsei ba, ni amɛkɛbama maŋtsɛ we amɛhã David.

¹² David na akɛ Yehowa ewo emaŋtsɛyeli lɛ nɔ gojoo yɛ Yehowa maŋ Israel lɛ hewɔ.

¹³ Be ni David efã kɛjɛ Hebron kɛba Yerusalɛm sɛɛ lɛ, esaa eŋɔ hemɛi, ni ekpeekpee yei efata eŋãmɛi lɛ ahe, ni efɔ bihii kɛ biyei efata ebii krokomɛi lɛ ahe.

¹⁴ Bii ni David fɔ yɛ Yerusalɛm ji Shamua kɛ Shobab kɛ Natan kɛ Solomon

¹⁵ kɛ Ibhar kɛ Elishua kɛ Nefeg kɛ Yafia,

¹⁶ kɛ Elishama kɛ Eliada kɛ Elifelet.

David ye Filistibii anɔ kunim

¹⁷ Be ni Filistibii lɛ nu akɛ awo David Israel fɛɛ maŋtsɛ lɛ, Filistibii fɛɛ fã ta akɛ amɛyaamɔ David. Shi David nu he, ni no hewɔ lɛ, etee ehe yɛ mɔɔ lɛ mli.

¹⁸ Filistibii lɛ ba, ni amɛbagba ta yɛ Refaim Jɔɔ lɛ mli, ni amɛha jɛi fɛɛ.

¹⁹ Kɛkɛ ni David yabi Yehowa nii ekɛɛ, “Ani mifã ta kɛyanina Filistibii lɛ lo? Ooohã maye amɛnɔ kunim lo?” Yehowa here David nɔ akɛ, “Fãa ta okɛyanina amɛ, ejaakɛ bɔ fɛɛ bɔ ni fee lɛ mahã oye amɛnɔ kunim.”

²⁰ No hewɔ lɛ, David fã ta kɛyanina Filistibii lɛ yɛ Baal-Perazim, (eshishi ji Nuŋtsɔ lɛ ji mɔ ni gbaa kɛtsɔ̃ɔ mli) ni eye amɛnɔ kunim yɛ jɛi. David kɛɛ akɛ, “Yehowa etsɔ̃ minine nɔ egba kɛtsɔ mihenyɛlɔi lɛ ateŋ tamɔ nu ni eje ŋa gbaa lɛ.” No hewɔ ni atsɛɔ jɛi akɛ Baal-Perazim lɛ.

²¹ Filistibii lɛ shi amɛmãgãi lɛ yɛ jɛi, ni amɛjo foi, ni David kɛ ewebii lɛ loo amãgãi lɛ kɛtee.

²² Shi Filistibii lɛ fã ta kɛba ekoŋŋ, ni amɛbagba ta yɛ Efraim Jɔɔ lɛ mli.

²³ Be ni David tee eyabi Yehowa nii lɛ, hetoo ni ehã lɛ ji akɛ, “Kaafã ta lɛ kɛyatua amɛ kɛjɛ biɛ, shi lɔgɔmɔ kɛyaje amɛsɛɛgbɛ, koni ojɛ Balsam tsei lɛ aŋlɛnɔ obatua amɛ.

²⁴ Kɛ onu gbɛɛmɔ yɛ Balsam tsei lɛ ayiteŋ tamɔ naneshi gbɛɛmɔ lɛ, ohe afee oya ni otua amɛ, ejaakɛ no tsɔ̃ɔ akɛ miyi ohiɛ miyatswia Filistibii lɛ atabilɔi lɛ anii.”

²⁵ David fee bɔ ni Yehowa fã lɛ lɛ, ni egbe Filistibii lɛ, ni eshwie amɛ kɛjɛ Geba aahu kɛyashwie Gezer.