2 Samuel 4 - ŊMALƐ KRƆŊKRƆŊ LƐ

Ishboshet gbele

¹ Be ni Saul bi Ishboshet nu akɛ Abner egbo yɛ Hebron lɛ, enijiaŋ je wui; ni Israel muu fɛɛ hu fee yɔɔ.

² Ishboshet yɛ asafoiatsɛmɛi enyɔ komɛi ni amɛ kɛ mɛi yaa amɛyayeɔ ofɔ̃ kɛbaa. Mɔ kome gbɛi ji Baana, ni mɔ kome hu gbɛi ji Rekab. Amɛtsɛ ji Rimon, Benyaminnyo ni jɛ Beerot lɛ (ejaakɛ abuɔ Beerot hu ashiɔ Benyaminbii amaji lɛ anɔ;

³ shi Beerotbii lɛ ejo foi kɛtee Gitaim, ni amɛyato gbɔ yɛ jɛi kɛbashi ŋmɛnɛ.)

⁴ Saul binuu Yonatan yɛ binuu ni enaji enyɔ lɛ fɛɛ eje kpa. Gbekɛ nuu nɛɛ eye afii enumɔ be ni Saul kɛ Yonatan gbele lɛ he sane lɛ bashɛ Yezreel. Kɛkɛ ni oblayoo ni kwɛɔ gbekɛ lɛ wo lɛ, ni ekɛ lɛ jo foi. Shi be ni oblayoo lɛ yeɔ oyai kɛjoɔ foi lɛ, gbekɛ nuu nɛɛ gbee shi, ni enaji kumɔ. Gbekɛnuu nɛɛ gbɛi ji Mefiboshet.

⁵ Rekab kɛ Baana, ni ji Beerotnyo Rimon bihii lɛ, yi mli kɛtee Ishboshet we lɛ. Amɛshɛ jɛi shwane fintiŋŋ be mli ni Ishboshet kã shi ewɔɔ eshwane wɔ lɛ.

⁶ Yoo ni buɔ shĩa lɛ agbo lɛ naa lɛ miisha ŋmãa mli nɔŋŋ ni wɔ sha lɛ ni ewɔ. No hewɔ lɛ, Rekab kɛ enyɛminuu Baana shara ehe kɛbote shĩa lɛ mli.

⁷ Amɛyanina Ishboshet ni ekã esaa nɔ yɛ epia lɛ mli ewɔ; kɛkɛ ni amɛgbe lɛ, ni amɛfo eyitso. Amɛkɔ Ishboshet yitso lɛ; ni amɛnyiɛ nyɔɔŋnyɔɔŋ kɛtsɔ̃ ŋa kplenee lɛ nɔ,

⁸ ni amɛkɛba David ŋɔɔ yɛ Hebron. Amɛbakɛɛ Maŋtsɛ David akɛ, “Ohenyɛlɔ Saul ni tao bo egbe lɛ, ebi Ishboshet lɛ yitso nɛ. Yehowa etɔ minuŋtsɔ maŋtsɛ he owele ŋmɛnɛ yɛ Saul kɛ eshwiei anɔ.”

⁹ Shi hetoo ni David hã Rekab kɛ enyɛminuu Baana, ni ji Beerotnyo Rimon bihii lɛ, ji “Mina Yehowa, mɔ ni ebaa miyi yɛ fimɔi fɛɛ amli lɛ,

¹⁰ be ni mɔ ko ba ebagba mi akɛ ‘Naa, Saul egbo,’ ni eyiŋ fɛɛ lɛ eba ebagba mi sane kpakpa ko lɛ, mimɔ lɛ, ni migbe lɛ yɛ Ziklag, ni mikɛ no wo lɛ nyɔmɔ.

¹¹ Enyiɛ nɔŋŋ ni kɛji gbɔmɛi fɔ̃ji etee amɛyagbe jalɔ yɛ wɔmli, yɛ lɛ diɛŋtsɛ eshĩa teŋ, ni mibiŋ elá shi yɛ nyɛdɛŋ, ni mikpãtãŋ nyɛhiɛ yɛ shikpɔŋ lɛ nɔ?”

¹² Kɛkɛ ni David fã eblahii lɛ, ni amɛgbe Rekab kɛ Baana, ni amɛfolɔ amɛniji kɛ amɛnaji, ni amɛkɛtsotsro kpaakpo ni yɔɔ Hebron lɛ masɛi. Ni amɛkɔ Ishboshet yitso lɛ, ni amɛyafu yɛ he ni afu Abner yɛ lɛ, yɛ Hebron.