2 Samuel 24 - ŊMALƐ KRƆŊKRƆŊ LƐ

David hã akane maŋbii ayikulɛ

¹ Yehowa mli bafu Israelbii lɛ ekoŋŋ, ni etsɔ̃ David nɔ, ni egbala amɛtoi. Yehowa kɛɛ David akɛ, “Yaa ni oyakane Israelbii kɛ Yudabii lɛ.”

² Kɛkɛ ni David kɛɛ Yoab ni ji etatsɛnukpa lɛ akɛ, “Okɛ tabilɔi anɔ asafoiatsɛmɛi ni yɔɔ oshishi lɛ ayakpa Israelbii akutsei lɛ fɛɛ amli, kɛjɛ Dan aahu kɛyashi Beersheba, koni nyɛkane maŋbii lɛ nyɛhã mi koni male amɛyikulɛ.”

³ Shi Yoab here Maŋtsɛ David nɔ akɛ, “Nii, Yehowa oNyɔŋmɔ lɛ, aaahã maŋbii ayikulɛ ŋmɛnɛ aku abɔ he nakai toi oha, ni enɛ aaanyɛ aba mli yɛ miNuŋtsɔ maŋtsɛ yinɔ hu. Shi mɛni eba hewɔ ni Nii taoɔ ekane maŋ lɛ nɛɛ?”

⁴ Shi maŋtsɛ lɛ hã Yoab kɛ asafoiatsɛmɛi lɛ ye ewiemɔ lɛ nɔ. No hewɔ lɛ, Yoab kɛ esafoiatsɛmɛi lɛ shi Maŋtsɛ David hiɛ amɛtee koni amɛyakane Israelbii lɛ.

⁵ Amɛyafo Yordan Faa lɛ, ni amɛyato shi yɛ Aroer, ni ji maŋ ni kã Gad Faa lɛ jɔɔ lɛ teŋ lɛ wuoyigbɛ. Amɛjɛ jɛi amɛtee kooyigbɛ kɛyashɛ Yazer.

⁶ Amɛtsa nɔ kɛtee Gilead kɛ Kadesh yɛ Hitbii ashikpɔŋ lɛ nɔ. Kɛkɛ ni amɛtee Dan, ni kɛjɛ jɛi lɛ amɛdɔ amɛyi amɛfɔ̃ anaigbɛ kɛtee Sidon.

⁷ Amɛyi wuoyigbɛ agbɛnɛ kɛtee Tiro, ni ji maŋ ni awaje yɛ ta hewɔ lɛ, kɛ Hivbii lɛ kɛ Kanaanbii lɛ amaji lɛ fɛɛ amli, ni amɛyagbe naa yɛ Beersheba yɛ Yuda wuoyigbɛ.

⁸ Amɛku amɛsɛɛ amɛbashɛ Yerusalɛm nyɔji nɛɛhu kɛ gbii nyɔŋmai enyɔ sɛɛ, be mli ni amɛyakpa shikpɔŋ tso muu lɛ fɛɛ nɔ lɛ.

⁹ Yoab kɛ maŋbii ni ayakane lɛ ayibɔ lɛ bahã Maŋtsɛ David. Ana hii hiɛwalɔi ni eshɛ tayaa akpei ohai kpaanyɔ yɛ Israel kɛ hii akpei ohai enumɔ hu yɛ Yuda.

¹⁰ Shi be ni David ekane maŋbii lɛ sɛɛ lɛ, ehenilee bɔi enaagbamɔ. Kɛkɛ ni ekɛɛ Yehowa akɛ, “Mifee esha kpele akɛ mifee nɛkɛ nɔ ko. Ofainɛ ni okɛfa mi, ejaakɛ miye kwashiai asane naakpa!”

^11-12 Yehowa kɛɛ Gad, ni ji gbalɔ ni yɔɔ David he lɛ, akɛ, “Yaa ni oyakɛɛ David akɛ mikɛ nibii etɛ̃ miishwie ehiɛ ni ekɔ mli ekome koni mafee mahã lɛ.” Enɔ jetsɛremɔ be ni David te shi lɛ,

¹³ Gad yanina lɛ, ni ebɔ lɛ amaniɛ, asaŋ ni ebi lɛ akɛ, “Te amɛteŋ nɔ ni okɔɔ lɛ? Akɛ hɔmɔ aba oshikpɔŋ lɛ nɔ afii etɛ̃, aloo ohenyɛlɔi anyiɛ osɛɛ ni ojo amɛnaa foi nyɔji etɛ̃, aloo gbele hela abayi shikpɔŋ lɛ nɔ gbii etɛ̃? Susumɔ he okwɛ, koni ohã mi hetoo ni mikɛyahã mɔ ni tsu mi lɛ.”

¹⁴ David hã Gad hetoo akɛ, “Sane lɛ wa hã mi naakpa. Shi fɛɛ sɛɛ lɛ misumɔŋ akɛ mayaje gbɔmɔ adesa dɛŋ. Wɔyɛ Yehowa dɛŋ, ejaakɛ lɛ lɛ, emɔbɔnalɛ fa.”

¹⁵ No hewɔ lɛ, Yehowa hã gbele hela babote Israelbii ateŋ kɛjɛ gbi lɛ leebi lɛ kɛyashi be ni ato lɛ. Kɛjɛ Dan aahu kɛyashwie Beersheba lɛ hela nɛɛ gbe mɛi akpei nyɔŋmai kpawo.

¹⁶ Shi be ni bɔfo ni kpãtãa maŋbii lɛ ahiɛ lɛ yaata Yerusalɛm he lɛ, Yehowa tsake ejwɛŋmɔ yɛ efɔŋ ni eba maŋbii lɛ anɔ lɛ gbɛfaŋ, ni ekɛɛ bɔfo ni gbeɔ mɛi lɛ akɛ, “Efa, kɛwa biɛ!” No be lɛ mli lɛ Yehowa bɔfo lɛ yɛ Arauna, Yebusnyo lɛ, ŋmaa gbeemɔhe lɛ.

¹⁷ Be ni David na bɔfo lɛ ni tswiaa maŋbii lɛ anii lɛ, David kɛɛ Yehowa akɛ, “Naa, mi mifee esha lɛ; ni mi mitɔ̃ lɛ, shi gbɔmɛi ni tamɔ toi humii nɛɛ, amɛ lɛ amɛfeko nɔ ko. Ofainɛ, gbalamɔ mi kɛ mitsɛ we lɛ moŋ toi.”

¹⁸ Nakai gbi lɛ gbɛkɛ lɛ Gad ba David ŋɔɔ, ni ebakɛɛ lɛ akɛ, “Yaa ni oyama afɔleshãa latɛ ohã Yehowa yɛ Arauna, Yebusnyo lɛ ŋmãagbeemɔhe lɛ.”

¹⁹ David ye Yehowa famɔ lɛ nɔ, ni eyiŋ etee yɛ Gad wiemɔ lɛ naa.

²⁰ Be ni Arauna yaakwɛ lɛ, ena Maŋtsɛ David kɛ etsuji miiba eŋɔɔgbɛ. Kɛkɛ ni Arauna je kpo, ni eho egbee shi, ni ekɛ ehiɛ bu shi, ni ekoto Maŋtsɛ David,

²¹ ni ekɛɛ lɛ akɛ, “Mɛni kɛ minuŋtsɔ maŋtsɛ baa etsulɔ ŋɔɔ nɛɛ?” David kɛɛ Arauna akɛ, “Miba oŋmãagbeemɔhe lɛ hemɔ, bɔ ni afee ni mama afɔleshãa latɛ yɛ jɛi mahã Yehowa koni gbele hela ni ebabote maŋbii lɛ ateŋ lɛ sɛɛ afo.”

²² Arauna to he ehã David akɛ, “Minuŋtsɔ Maŋtsɛ, ŋɔɔ shikpɔŋ lɛ koni okɛshã afɔle fɛɛ afɔle ni sa yɛ ohiɛ ohã Yehowa. Naa tsinai koni akɛshã afɔle lɛ, kɛ tsinai akɔŋtsei koni akɛfee lai.

²³ Mikɛ nibii nɛɛ fɛɛ ehã maŋtsɛ tswaa.” No sɛɛ lɛ, ekɛɛ David akɛ, “Yehowa, oNyɔŋmɔ lɛ ahe ofɔle lɛ.”

²⁴ Shi David here Arauna nɔ, ni ekɛɛ lɛ akɛ, “Dabida! Mibahe, ni mawo bo nyɔmɔ, bɔ ni afee ni mikɛ nɔ ko ni mina lɛ yaka akashã afɔle mihã Yehowa, miNyɔŋmɔ lɛ.” No hewɔ lɛ, David he ŋmãagbeemɔhe lɛ kɛ tsinai lɛ jwiɛtɛi shekeli nyɔŋmai enumɔ.

²⁵ Kɛkɛ ni Maŋtsɛ David ma afɔleshãa latɛ yɛ nɔ ehã Yehowa, ni eshã shãa afɔlei kɛ shidaa afɔlei. No hewɔ lɛ, Yehowa bo fai ni akpa lɛ ahã Israelbii lɛ toi, kɛkɛ ni gbele hela lɛ sɛɛ fo yɛ Israel.