2 Samuel 23 - ŊMALƐ KRƆŊKRƆŊ LƐ

David naagbee wiemɔi

¹ David, Ishai bi lɛ ni Nyɔŋmɔ wo enɔ gojoo lɛ, mɔ hu ni Yakob Nyɔŋmɔ lɛ ehala ni eto lɛ maŋtsɛ lɛ, folɔ lalai kɛ ŋɔɔmɔ nɛɛ ehã Israel. Wiemɔi nɛɛ ji enaagbee wiemɔi.

² Yehowa mumɔ lɛ tsɔɔ minɔ ewieɔ; ewiemɔ kã mililɛi nɔ.

³ Israel Nyɔŋmɔ lɛ ena ewie; Israel hebulɔ lɛ kɛɛ mi akɛ, “Mɔ ni yeɔ maŋtsɛ yɛ jalɛ naa, ni eyeɔ nɔ yɛ Nyɔŋmɔ gbeyeishemɔ naa lɛ,

⁴ etamɔ leebi hulu ni tsoɔ yɛ nunɛmɔ sɛɛ, be ni oblɔtu bɛ; etamɔ nu ni hãa jwɛifɔ kwɛɔ kɛjɛɔ shikpɔŋ.”

⁵ Bɔ ni Nyɔŋmɔ baajɔɔ miwe lɛ nɛ, ejaakɛ ekɛ mi ekpãŋ naanɔ kpãŋmɔ, kpãŋmɔ ko ni akuŋ mli, shiwoo ko ni atsakeŋ hiɛ. Anɔkwa, Nyɔŋmɔ baahã mi yelikɛbuamɔ ni he ehia, kɛ mitaomɔ nii fɛɛ.

⁶ Mɛi ni sheee Nyɔŋmɔ gbeyei lɛ, amɛtamɔ ŋmei ni ashɛrɛ ashwie; anyɛɛɛ akɛ nine folo ata amɛhe;

⁷ mɔ ni aaata amɛhe lɛ, ja ehiɛ dade kɛ akplɔ; ni akɛ la shãa amɛ wɛɛ.

David Tabilɔi Kakabãi lɛ

⁸ David tabilɔi kakabãi lɛ agbɛii nɛ: Klɛŋklɛŋ mɔ lɛ ji Yosheb-bashebet, Takemonnyo lɛ, mɔ ni ji “kakabãi etɛ̃” lɛ ateŋ onukpa fe fɛɛ lɛ. Ewo ekpɔlɔ nɔ lɛ ekɛgbe mɛi ohai kpaanyɔ yɛ ta kome mli.

⁹ Esɛɛmɔ yɛ hii kakabãi etɛ̃ lɛ ateŋ ji Eleazar, Dodo Ahohinyo lɛ, bi lɛ. Gbi ko lɛ efata David he, ni amɛtswa Filistibii ni ebabua shi akɛ amɛ kɛ Israelbii lɛ baawu lɛ mpoa. Israelbii lɛ naa sɛɛsɛɛ, shi

¹⁰ edamɔ shi akɛ nuu, ni ekpee ta lɛ naa, ni egbe Filistibii lɛ aahu kɛyashi ekɔ̃ji gboi yɛ ehe bɔ sɔŋŋ ni ehiii lɛ eklante lɛ nɔwomɔ dɔŋŋ. Yehowa ye kunim kpeteŋkple nakai gbi lɛ ehã Israelbii lɛ. Fee sɛɛ lɛ Israelbii lɛ ba he ni Eleazar wu ta lɛ yɛ lɛ, ni amɛbakpɔlɔ gbohii lɛ ahe nibii kɛtee.

¹¹ Hii Kakabãi etɛ̃ lɛ ateŋ mɔ ni ji etɛ̃ lɛ ji Shama, Agee, Hararnyo lɛ, bi lɛ. Filistibii lɛ babua shi yɛ Lehi, he ni shikpɔŋ ko ni akɛdu akwɛŋ yɔɔ lɛ. Kɛkɛ ni Israelbii lɛ jo Filistibii lɛ anaa foi.

¹² Shi Shama ho edamɔ shi yɛ ŋmɔ lɛ mli, ni egbe Filistibii lɛ ekɛfã ŋmɔ lɛ he. Ni Yehowa ye kunim kpele ehã Israelbii lɛ nakai gbi lɛ.

¹³ Be ni eshwɛ fioo ni abɔiɔ ŋmɔshi nikpamɔ lɛ, Israel hii kakabãi nyɔŋmai etɛ̃ lɛ ateŋ mɛi etɛ̃ komɛi ba David ŋɔɔ yɛ Adullam tɛkplo lɛ mli. Nakai be mli lɛ Filistibii lɛ efã ta kɛba, ni amɛbato shi yɛ Refaim Jɔɔ lɛ mli.

¹⁴ No mli lɛ David yɛ tɛkplo lɛ mli, ni Filistibii asraafoi lɛ ebaŋɔ Betlehem.

¹⁵ David shwe shĩa ekɛɛ akɛ, “Namɔ po mana koni eya Betlehem eyayɛ nubu lɛ ni yɔɔ maŋ agbo lɛ masɛi lɛ mli nu ebahã mi manu?”

¹⁶ Kɛkɛ ni hii kakabãi etɛ̃ nɛɛ gba kɛtsɔ̃ Filistibii atabilɔi lɛ ateŋ ekãa naa kɛho, ni amɛtee amɛyayɛ nubu lɛ ni yɔɔ Betlehem maŋ agbo lɛ masɛi lɛ mli nu, ni amɛkɛbahã David. David enuuu, shi moŋ efɔse eshwie shikpɔŋ akɛ nɔ ko ni ekɛmiishã afɔle ehã Yehowa;

¹⁷ ni ekɛɛ akɛ, “Yehowa, enɛ akagbale mi fɔ̃ŋfɔ̃ akɛ manu nɛkɛ nu nɛɛ, ejaakɛ yɛ gbɛ ko nɔ lɛ, hii lɛ ni shã amɛhe afɔle lɛ alá ni.” No hewɔ lɛ, David enuuu nu lɛ. Ekãa naa nibii krokomɛi ni hii Kakabãi Etɛ̃ lɛ tsu lɛ nɛ.

¹⁸ Abishai, Yoab nyɛmi lɛ, ni ekɛ lɛ fɛɛ nyɛ ji Zeruia lɛ, ji hii kakabãi nyɔŋmai etɛ̃ lɛ fɛɛ anukpa. Ekɛ hii ohai etɛ̃ nɔ, ni ekɛ edɛŋ akplɔ gbe amɛ fɛɛ tswɛm. Enɛ hã ena gbɛi yɛ hii nyɔŋmai etɛ̃ lɛ ateŋ.

¹⁹ Egbɛi hehe fe mɔ fɛɛ mɔ yɛ hii kãkãlɔi nyɔŋmai etɛ̃ lɛ ateŋ, ni no hewɔ lɛ, etsɔ amɛnukpa, shi moŋ eninaaa kakabãi etɛ̃ lɛ.

²⁰ Benaia, Yehoiada bi lɛ, ni jɛ Kabzeel lɛ, lɛ hu hii kakabãi lɛ eko ni; ni efee ekãa naa nibii srɔtoi wuji babaoo. Eko ji akɛ egbe Moabbii tabilɔi enyɔ komɛi. Be ko hu lɛ ekpeleke shi kɛtee, ni eyagbe jata yɛ bu ko mli yɛ snoo be mli.

²¹ Lɛ nɔŋŋ esaa egbe Ijiptnyo nyɛnyreŋŋ ko ni hiɛ akplɔ yɛ edɛŋ ekɛmiifã ehe. Shi Benaia hiɛ tso, ni ekɛyatua Ijiptnyo lɛ, ni eshɔ̃ akplɔ lɛ yɛ edɛŋ, ni ekɛ Ijiptnyo lɛ nɔŋŋ akplɔ lɛ gbe lɛ.

²² Enɛɛmɛi ji nii ni Benaia, Yehoiada bi lɛ fee, ni ekɛna gbɛi yɛ hii kãkãlɔi Nyɔŋmai Etɛ̃ lɛ ateŋ.

²³ Ena gbɛi jogbaŋŋ diɛŋtsɛ yɛ tabilɔi lɛ ateŋ, shi eninaaa Kakabãi Etɛ̃ lɛ. David wo lɛ ehebulɔi lɛ anukpa.

²⁴ Hii kãkãlɔi nyɔŋmai etɛ̃ lɛ ateŋ mɛi ni shwɛɔ lɛ ji Asahel, Yoab nyɛmi lɛ, kɛ Elhanan, Dodo ni jɛ Betlehem lɛ bi lɛ.

²⁵ Kɛ Shama kɛ Elika ni amɛjɛ Harod lɛ, kɛ

²⁶ Helez Peletnyo lɛ kɛ Ira, Ikesh ni jɛ Tekoa lɛ bi lɛ, kɛ

²⁷ Abiezer ni jɛ Anatot lɛ, kɛ Mebunai ni jɛ Husha lɛ, kɛ

²⁸ Zalmon ni jɛ Ahoh lɛ, kɛ Maharai ni jɛ Netofa lɛ

²⁹ kɛ Heleb, Baana ni jɛ Netofa lɛ bi lɛ, kɛ Itai, Rabai ni jɛ Gibea yɛ Benyamin lɛ;

³⁰ Benaia ni jɛ Piraton lɛ, kɛ Hidai ni jɛ Gaash faa lɛ he jɔɔ lɛ mli lɛ, kɛ

³¹ Abi-Albon ni jɛ Araba lɛ, kɛ Azmavet ni jɛ Bahurim lɛ kɛ

³² Eliaba ni jɛ Shaalbon lɛ, kɛ Yashen bihii lɛ kɛ Yonatan kɛ

³³ Shama ni jɛ Harar lɛ, kɛ Ahiam, Sharar ni jɛ Harar lɛ bi, lɛ kɛ

³⁴ Elifelet, Ahasbai ni jɛ Maaka lɛ bi lɛ, kɛ Elaim, Ahitofel ni jɛ Gilon lɛ bi lɛ;

³⁵ Hezro ni jɛ Karmel lɛ, kɛ Paarai ni jɛ Arbi lɛ kɛ

³⁶ Igal, Natan bi lɛ ni jɛ Zoba lɛ bi lɛ, kɛ Bani ni jɛ Gad lɛ kɛ

³⁷ Zelek ni jɛ Amon lɛ, kɛ Naharai ni jɛ Beerot lɛ, mɔ ni hiɛɔ Zeruia bi Yoab tawuunii lɛ, kɛ

³⁸ Ira kɛ Gareb ni amɛ fɛɛ amɛjɛ Yatri lɛ, kɛ

³⁹ Uria Hitnyo lɛ. Tabilɔi kãkãlɔi nɛɛ fɛɛ ayibɔ feɔ nyɔŋmai etɛ̃ kɛ kpawo.