2 Samuel 21 - ŊMALƐ KRƆŊKRƆŊ LƐ

Agbe Saul shwiei

¹ David yinɔ lɛ hɔmɔ ni naa wa ko ba afii nɔtonɔto shii etɛ̃ sɔŋŋ. Enɛ hã David tee ni eyabi Yehowa nii. Yehowa kɛɛ David akɛ, “Enɛ fɛɛ jɛ Saul kɛ ewe lɛ yɛ Gibeonbii lɛ ni amɛgbe lɛ hewɔ.”

² Gibeonbii nɛɛ, jeee Israelbii ni, shi moŋ Amorbii ni shwɛ ji amɛ. Israelbii lɛ ekã amɛ kitã akɛ amɛkpãtãŋ amɛhiɛ, shi be ni Saul hiɛ dɔ yɛ Israelbii kɛ Yudabii lɛ ahewɔ lɛ, kulɛ eetao ekpãtã amɛhiɛ.

³ No hewɔ lɛ, David tsɛ Gibeonbii lɛ, ni ebi amɛ akɛ, “Mɛni mifee mihã nyɛ, ni mɛni mikɛkpãtã nyɛ bɔ ni afee ni nyɛjɔɔ Yehowa webii lɛ?”

⁴ Gibeonbii lɛ hã hetoo ni amɛkɛɛ, “Sane ni kã wɔ kɛ Saul kɛ ewe lɛ teŋ lɛ, anyɛŋ akɛ jwiɛtɛi loo shika akpãtã, ni asaŋ jeee akɛ wɔmiitao Israelnyo ko lá shi wɔshwie.” David bi amɛ akɛ, “Mɛni mɔ nyɛtaoɔ ni mafee mahã nyɛ?”

⁵ Gibeonbii lɛ to he akɛ, “Saul tao akɛ ekpãtã wɔhiɛ kɛbule wɔshishi kwraa yɛ Israel,

⁶ No hewɔ lɛ, ŋɔɔ eshwiei amli hii kpawo ohã wɔ koni wɔyasɛŋ amɛ wɔtsɔ̃ɔ yɛ Yehowa hiɛ yɛ Gibea, yɛ Saul, mɔ ni Yehowa wo lɛ maŋtsɛ lɛ, maŋ lɛ mli.” Maŋtsɛ David to he ni ekɛɛ, “Mibahã nyɛ mɛi lɛ.”

⁷ Kitã ni Maŋtsɛ David kɛ Saul bi Yonatan kãmɔ amɛhe lɛ hewɔ lɛ, Maŋtsɛ David shi Yonatan bi Mefiboshet, ni ji Saul nabi lɛ, sɛɛ,

⁸ ni eŋɔ mɛi nɛɛ: Armoni kɛ Mefiboshet ni ji bihii enyɔ ni Aia biyoo Rizpa kɛ Saul fɔ lɛ, kɛ bihii enumɔ hu ni Saul biyoo Merah kɛ Adriel, Meholatnyo Barzilai bi lɛ, fɔ lɛ.

⁹ David kɛ amɛ wo Gibeonbii lɛ adɛŋ, ni Gibeonbii lɛ sɛŋ amɛ yɛ Yehowa hiɛ yɛ gɔŋ lɛ nɔ, ni amɛyi kpawo lɛ fɛɛ amɛgboi shi kome. Ŋmɔshi nikpamɔ shishijee be mli asɛŋ gbɔmɛi nɛɛ; no mli lɛ abɔi akoko foo.

¹⁰ Kɛkɛ ni Aia biyoo, Rizpa, Saul hemɔ lɛ, kɔ kpekpe ni eshi lɛ buu eha enɔ yɛ tɛsaa lɛ nɔ he ni gbohii lɛ jwere lɛ, kɛjɛ nikpamɔ shishijee be lɛ mli kɛyashi be ni nu bɔi nɛmɔ kɛ amɛnɔshwiemɔ. Shwane lɛ eŋmɛɛɛ gbɛ koni loofɔji abasɔmɔ gbohii lɛ anɔ, ni nyɔɔŋ hu eshwieɔ ŋaŋ kooloi yɛ amɛhe.

¹¹ Be ni David nu nɔ ni Rizpa efee lɛ,

¹² etee ni eyaŋɔ Saul wui lɛ kɛ Yonatan hu wui lɛ yɛ Yabesh Gileadbii lɛ adɛŋ kɛba. Ejaakɛ gbi ni Filistibii lɛ gbe Saul yɛ Gilboa lɛ, amɛkɛ Saul kɛ Yonatan gbohii lɛ ba, ni amɛkɛbatsotsro shi yɛ Bet-Shan blohu lɛ mli; ni Yabesh-Gileadbii lɛ baju gbohii lɛ kɛtee.

¹³ David yaŋɔ Saul kɛ ebi Yonatan wui lɛ kɛjɛ jɛi kɛba, ni ekɛbafata Saul shwiei amli hii kpawo lɛ ni asɛŋ lɛ awui lɛ ahe.

¹⁴ Akɛ Saul kɛ Yonatan wui lɛ tee, ni ayafu yɛ Saul tsɛ Kish fuuhe lɛ, yɛ Zela yɛ Benyamin shikpɔŋ lɛ nɔ. Afee nɔ fɛɛ nɔ pɛpɛɛpɛ bɔ ni maŋtsɛ lɛ efã lɛ. No sɛɛ dani Nyɔŋmɔ bo shikpɔŋ lɛ nɔ bii lɛ afai ni amɛkpa amɛhã shikpɔŋ lɛ toi.

Tai ni akɛ Filistibii oblaŋi gojogojoo wu lɛ

¹⁵ Ta te shi yɛ Filistibii lɛ kɛ Israelbii lɛ ateŋ ekoŋŋ, ni David kɛ etabilɔi fã, ni amɛtee amɛkɛ Filistibii yawu. Nɔmɔ lɛ dɛŋ David, ni be ni akɛshɛ he ko lɛ David tɔ biti.

¹⁶ Kɛkɛ ni nuu oblaŋ gojoo ko ni atsɛɔ lɛ Ishbi-Benob lɛ fã kɛba kɛ yiŋtoo akɛ ebaagbe David. Edɛŋ akplɔ tsiimɔ ji akɔɔble shekeli ohai etɛ̃, ni klante hee ŋmɔ ehɛ.

¹⁷ Shi Abishai, ni ji Zeruia bi lɛ, bahere David. Ebatswa Filistinyo lɛ nɔ, ni egbe lɛ. Jɛi ni David tabilɔi lɛ hã David kã amɛ kitã akɛ efataŋ amɛhe kɛyaŋ ta dɔŋŋ. Amɛkɛɛ lɛ akɛ, “Okɛ wɔ akaya ta dɔŋŋ koni okabahã Israel hiɛnɔkãmɔ miitã.”

¹⁸ Sane nɛɛ sɛɛ lɛ Israelbii lɛ kɛ Filistibii lɛ wu ta ekoŋŋ yɛ Gob. Ta nɛɛ mli ni Sibekai, Hushanyo lɛ, gbe hii oblaŋi gojogojoo lɛ ashwiei lɛ ateŋ eko ni gbɛi ji Saf lɛ.

¹⁹ Israelbii lɛ kɛ Filistibii lɛ ku sɛɛ amɛwu ta yɛ Gob ekoŋŋ. No mli Elhanan, ni ji Betlehemnyo Yaare-Oregim bi lɛ, gbe Goliat, Gatnyo lɛ ni ekpɔlɔ mlitso ti tamɔ mamalolɔ agba tso tilɛ lɛ.

²⁰ Awu ta ko hu yɛ Gat, ni nuu ko kɛ enine kɛ enane waobii ekpaaekpaa ba ta lɛ eko.

²¹ Nuu nɛɛ tswa Israelbii lɛ mpoa, kɛkɛ ni Yonatan, ni ji David nyɛmi Shimei bi lɛ, tswa lɛ nɔ, ni egbe lɛ.

²² Hii oblaŋi gojogojoo ni hi shi yɛ Gat lɛ ashwiei ji oblaŋi ejwɛ nɛɛ ni David kɛ tabilɔi lɛ gbe lɛ.