2 Samuel 20 - ŊMALƐ KRƆŊKRƆŊ LƐ

Sheba hã atse atua

¹ Nuu yakagbɔmɔ ko baje Gilgal. Atsɛɔ lɛ Sheba, ni etsɛ gbɛi ji Bikri, Benyaminnyo lɛ. Sheba kpã tɛtɛrɛmantɛrɛ ni ebo ekɛɛ akɛ, “Israel eei! Wɔbɛ gbɛnaa ko yɛ David gbɛfaŋ. Wɔ kɛ Ishai bi lɛ ejaaa nɔ ko. No hewɔ lɛ, mɔ fɛɛ mɔ aya ewe.”

² Kɛkɛ ni Israelhii lɛ kpa yɛ David sɛɛ, ni amɛyanyiɛ Bikri bi Sheba sɛɛ. Shi Yudahii lɛ kpɛtɛ amɛmaŋtsɛ lɛ kɛjɛ Yordan naa aahu kɛyashɛ Yerusalɛm.

³ Be ni Maŋtsɛ David bashɛ ewe lɛ mli yɛ Yerusalɛm lɛ, ehã akɛ yei nyɔŋma ni ji ehemɛi lɛ ni eshi, akɛ amɛkwɛ shĩa lɛ, yato he ko banee, ni atsi amɛna awo shĩa ko mli. Elɛ amɛ, shi eyaaa amɛmasɛi, ni ehã amɛhi shi tamɔ okulafoi kɛyashi amɛgbele be.

⁴ Maŋtsɛ lɛ kɛɛ Amasa akɛ, “Yaa ni oyakpee Yudahii fɛɛ obahã mi yɛ biɛ gbii etɛ̃ mli; ni bo diɛŋtsɛ hu oba biɛ eko.”

⁵ Amasa yiŋ etee koni eyakpee Yudahii lɛ ebahã maŋtsɛ lɛ; shi eyatsɛ fe be ni ato lɛ lɛ.

⁶ No hewɔ lɛ, maŋtsɛ lɛ kɛɛ Abishai akɛ, “Etamɔ nɔ ni Bikri bi Sheba baagba wɔnaa fe Absalom tete. Ŋɔɔ mitabilɔi lɛ, ni nyɛtiua lɛ koni ekayana maji ni atswa gbogboi awo amɛhe lɛ amli eyabote ni etsɔ̃ jɛi eje wɔdɛŋ.”

⁷ Kɛkɛ ni Abishai kɛ Yoab kɛ tabilɔi lɛ ni ji Keretifoi lɛ kɛ Peletifoi lɛ ni buɔ maŋtsɛ lɛ he lɛ, kɛ hii kakabãi lɛ fɛɛ fã kɛjɛ Yerusalɛm koni amɛyatiu Sheba, Bikri bi lɛ.

⁸ Be ni amɛyaa ni amɛyashɛ tɛkplo ni yɔɔ Gibeon lɛ he lɛ, Amasa kɛ amɛ bakpe. No mli lɛ Yoab emia kɛ tawuu atade. Afi atade ni ewo lɛ mli, ni klante fi nɔ yɛ ehɛ. Klante lɛ je ehebo lɛ mli egbee shi, be ni Yoab tsiɔ ebɛŋkɛɔ Amasa lɛ.

⁹ Yoab ŋa Amasa akɛ, “Te oyɔɔ tɛŋŋ, anyɛmi nuu?” Kɛkɛ ni Yoab kɛ eninejurɔ mɔ Amasa tsɛŋ mli koni eshwɔ enaa.

¹⁰ Amasa enaaa akɛ Yoab hiɛ klante yɛ edɛŋ; ni no hewɔ lɛ, Yoab kɛ klante lɛ du Amasa musuŋ ni Amasa musuŋnii tue shwie shi. Eduuu lɛ nɔ ni ji shii enyɔ, ni egbo. Kɛkɛ ni Yoab kɛ enyɛmi Abishai tsa amɛnyiɛmɔ lɛ nɔ kɛtiu Sheba, Bikri bi lɛ.

¹¹ Oblahii tabilɔi ni yɔɔ Yoab shishi lɛ ateŋ mɔ kome ko ho yadamɔ Amasa gbonyo lɛ masɛi, ni ebo ekɛɛ, “Mɔ fɛɛ mɔ ni yɔɔ Yoab kɛ David sɛɛ lɛ, eyi Yoab sɛɛ.”

¹² Belɛ Amasa gbonyo lɛ kã shi ni lá ewu ehe kpɔtɔɔ yɛ gbɛjegbɛ lɛ teŋ tuuŋtu. Ni mɔ fɛɛ mɔ ni hoɔ ni ehiɛ gbaa enɔ lɛ, ewaa edamɔɔ shi. Be ni oblanyo lɛ na akɛ mɔ fɛɛ mɔ ni bashɛɔ gbonyo lɛ he yɛ gbɛjegbɛ lɛ nɔ waa damɔɔ shi lɛ, ewo Amasa kɛjɛ gbɛ lɛ nɔ ni ekɛ lɛ yaŋmɛ ŋa lɛ mli, ni ekɛ mama ha enɔ.

¹³ Be ni ajie gbonyo lɛ kɛje gbejegbɛ lɛ nɔ lɛ sɛɛ lɛ, mɛi lɛ fɛɛ loo mli kɛnyiɛ Yoab sɛɛ kɛtiu Sheba, Bikri bi lɛ.

¹⁴ Sheba tsɔ̃ Israel akutsei lɛ ashikpɔji lɛ fɛɛ anɔ kɛho, ni be ni eyashɛ Abel Bet-Maaka lɛ, Bikribii lɛ bua amɛhe naa, ni amɛnyiɛ esɛɛ kɛbabote maŋ lɛ mli.

¹⁵ Kɛkɛ ni Yoab shishi tabilɔi lɛ basa Sheba yi amɛwo Abel Bet-Maaka maŋ lɛ mli. Amɛkɛ su tswa kpoku ni ekwɔlɛ kɛ maŋ lɛ he gbogbo lɛ kwɔlɛ ye hegbɔ. Asaŋ amɛshimɔshimɔɔ gbogbo lɛ diɛŋtsɛ hu koni amɛwule lɛ amɛshwie shi.

¹⁶ Shi yoo nilelɔ ko bo kɛjɛ maŋ lɛ mli, ni ekɛɛ, “Nyɛboa toi! Nyɛboa toi! Nyɛtsɛa Yoab nyɛhãa mi koni mi kɛ lɛ awiea.”

¹⁷ Yoab tsi bɛŋkɛ lɛ. Yoo lɛ bi lɛ akɛ, “Bo ji Yoab lɛ?” Yoab here nɔ akɛ, “Mi ni.” Yoo lɛ kɛɛ lɛ akɛ, “Ofainɛ ni obo mi toi.” Yoab kɛɛ lɛ akɛ, “Miibo bo toi.”

¹⁸ Kɛkɛ ni yoo lɛ kɛɛ akɛ, “Sa lɛ kɛji anaaa sane ko naa lɛ bɔ ni akɛɔ ji akɛ, ‘Aya Abel ni ayabi?’

¹⁹ Ejaakɛ Israel maji ni sumɔɔ hejɔlɛ kɛ anɔkwayeli lɛ ateŋ eko ji Abel. Oba ootao okpãtã maŋ ni ji biianyɛ hã Israel lɛ hiɛ. Mɛɛba ni obaakpãtã Yehowa diɛŋtsɛ nii ahiɛ nɛɛ?”

²⁰ Yoab here yoo lɛ nɔ, ni ekɛɛ, “Kpaoo! Enɛ akagbale mi fɔ̃ŋfɔ̃ akɛ makpãtã nyɛmaŋ lɛ hiɛ?

²¹ Jeee nakai nyiɛmɔ kwraa wɔnyiɛ. Sane lɛ moŋ ji akɛ nuu ko ni jɛ Efraim gɔŋ lɛ nɔ, ni atsɛɔ lɛ Sheba, Bikri binuu lɛ, ete shi ewo Maŋtsɛ David. Nyɛjiea lɛ nyɛhãa wɔ, kɛkɛ lɛ wɔbaashi nyɛmaŋ lɛ ni wɔya.” Yoo lɛ kɛɛ Yoab akɛ, “Kɛfee lɛ abaafɔ̃ eyitso kɛtsɔ̃ gbogbo lɛ nɔ ahã bo.”

²² Yoo lɛ tee ekɛ sane lɛ yafɔ̃ maŋbii lɛ ahiɛ, ni ehã amɛfo Sheba yitso, ni afɔ̃ kɛtsɔ̃ gbogbo lɛ nɔ ahã Yoab. Enɛ hã Yoab kpã tɛtɛrɛmantɛrɛ, ni etabilɔi lɛ fɔ̃ɔ maŋ lɛ tuamɔ, ni mɔ fɛɛ mɔ tee eshĩa. Kɛkɛ ni Yoab ku esɛɛ eba Maŋtsɛ David ŋɔɔ yɛ Yerusalɛm.

David tsuji lɛ

²³ Agbɛnɛ Yoab ji Israel fɛɛ tatsɛnukpa, ni Benaia, Yehoiada bi lɛ, ji Keretifoi kɛ Peletifoi ni ji maŋtsɛ hebulɔi lɛ atsɛ.

²⁴ Adoniram ji mɔ ni kwɛɔ nitsulɔi lɛ anɔ, ni Yehoshafat, Ahilud bi lɛ, buɔ nibii ahe akɔntaa.

²⁵ Sheva ji woloŋmalɔ, ni Zadok kɛ Abiatar ji osɔfoi,

²⁶ ni David osɔfo kroko hu ji Ira, Yairnyo lɛ.